Romanus 12 - Uhokri Gahegbetawni Nukune akak Sawmus

Wewnay kehnenekwa Uhokri gibetki

¹ Nikwe nukebyuvwi kibeynevwi, ku samah ig Uhokri ka gamnihrasima ukakwiy, nah aya yit ikawnabay pahavwite git Uhokri. Ikawnay git ke kakanhawkabe ku pariye ivegnene, barewvitye, ku pariye keh ig bateke ginaktin. Ku yis ikaw hene, amun ini nikwe yis inyewa kehne Uhokri gibetki.

² Ka ba yi wew akak hiyeg gihiyekemnikis amadgaya inin. Isaksanay Uhokri wages yihiyekemni akak nukune hiyakemniki. Ayge nikwe yis hiyaknek ku pariye Uhokri gibetki, yis hiyaknek ku pariye kabayka adahan yis keh, yis hiyaknek ku pariye keh Uhokri batek, yis hiyaknek ku pariye avigkutavrik ku samah gimawkan.

³ Nah ikene yihiyekemni yit yis madikte, mmanawa ig Uhokri akak gabay keh nah humaw giwatni yit. Nah aya yit, ka ba yi ikaw kannuhtema mpiy ku samah Uhokri iki yit. Ikawnabay tuwatavye adahan yis ivegminene yihiyekemni adahan yis uti ku pariye annivwit Uhokri iki yit akak yikamaxwan givitit.

Wixwiy Cristo givit

⁴ Nah akkite yit abektey adahan ku samah wixwiy kadahanyekuye wannivwiy adahan amnihekne pawtak. Uvitwiy pahavwiwa, heneme in kadahan ka aynsima akisutbet. Wis kataybi. Wis kawan. Wis kakugku. Mpuse akisutbet kadahanyekuye arannivwi.

⁵ Wixwiy hawata, wixwiy ka aynsima, heneme wixwiy pahavwiwa pawtak, mmanawa wixwiy pahavwiwa gikak Cristo. Wixwiy ke wotbe wixwiy Cristo giwanbetbe. Wixwiy kamawkanak pawtak.

Kawihnabay yannu pawtak gidahan Uhokri

⁶ Wixwiy mpuse kadahanyekuye wannuwiy ku pariye Uhokri gikan ta uvititwiy akak gabay. Amawka ku wixwiy kabivwiye kawih ini ku pariye ikaka ta uvititwiy. Ku ikaka ta pivitit adahan pis awnene iwit ku pariye pes giwntak Uhokri, amawka pis awna pakeku akak pikamaxwan awaygi.

⁷ Ku ikaka pivitit adahan pis ayavekne, amawka ku pis kabivwiye ayava hiyeg. Ku ikaka pivitit adahan pis kannuhekne, amawka ku pis kabivwiye kannuh hiyeg.

⁸ Ku ikaka pivitit adahan pis ikene hiyeg gihiyekemnikis, amawka pis ka mara iki gihiyekemnikis. Ku pis ikaka pivitit igiska adahan pisme kakanhaw ta gitkis hiyeg ku pariye yumanene gidahankis, amawka ku pis kakanhaw gitkis akak madikte pibetki. Ku ikaka pivitit adahan pis wewkisne hiyeg, amawka pis kannuh avuriw pihiyegavu. Ku ikaka pivitit adahan pis amnihekne, amawka pis amnih hiyeg akak madikte pibetki.

Bateknabay gikakkis hiyeg avititakwa yiyakni

⁹ Bateknay gikakkis hiyeg avititakwa yiyakni. Ka yi muwaka batek gikakkis akak yihepkanenwatma. Tukuhwepnabay ariw mbeyevye hiyakemniki. Kamaxwanabay ta avitit kibeynenen hiyakemniki.

¹⁰ Batekaknay pawtak kabayntiwa ke wotbe yisweke pakebyeknebe guwntak pahavuwa inagti. Mpiksawnay kiyathak pawtak.

¹¹ Ka yi muwaka mabivwihwa. Kannivwinabay gidahan Ukivarawiy akak madikte yabivwi giwntak Uhokri Gitip.

¹² Bateknay yinaktin adahan ini kabayka ku pariye nehmnikuhpiye. Kiyaknihwanabay abet ini mbeyne. Piriyepkawnay avanenekwa.

¹³ Ku aysaw pikebyi Jesus gihiyega muwak arikna git, amnihnig. Amavanig ta yivinekut.

¹⁴ Ayapnay git Uhokri adahan ig awahkis kabayka giminkis neras ku pariye hiyapkisne mbeyne ta yit. Henewa, nukebyuvwi. Ayapnay git kabayka gidahankis. Ka ba yi aya git mbaykama gidahankis.

¹⁵ Bateknabay yinaktin payak gikakkis hiyeg ku pariye batekyevwi ginaktinkis. Tihnabay payak gikakkis hiyeg ku pariye kadniyevwi.

¹⁶ Kiyathanay madikte hiyeg hehpekuye. Ka yi muwaka kiyatha hiyeg he kiyatyevwinenwatma. Amawka yis kiyatha hiyeg ku pariye yumanene gikiythanikis hawata. Ka yi muwaka ikaw hiyakemnitema giwkis.

Ka yi muwaka diyuhkis pahavwi

¹⁷ Ku pahavwi hiyapkis mbeyne ta yit, ka ba yi diyuhkisgi akakwatma mbeyne. Amawka ku yis keh ku pariye waditnen giwtrikkis madikte hiyeg.

¹⁸ Mpiksawnay pasamrak gikakkis madikte hiyeg ku aysaw ik adahan yis pasamrak gikakkis.

¹⁹ Nukebyuvwi kibeynevwi, ku pahavwi tarakse yikak, ka yi muwaka diyuhkisgi. Ka yi muwaka dagawnaw git. Isaksa igwa Uhokri diyuhkisgi yidahan. Mmanawa ig Uhokri gannasan awna: “Nahwa diyuhkis mbayka ta gitkis hiyeg. Nahwa katiwnise gitaraksankis gitkis. Inakni Ukivarawiy awna.”

Wanekbetnay ahawkan mbeyevye hiyakemniki akak kibeyne hiyakemniki

²⁰ Ka ininewatma yis ka diyuhkisgima, heneme amawka ku yis amnihgi ku samah Uhokri gannasan awna adahan yis keh. In awna: “Ku pivetunya mativwevye, amnihnig ikapnig. Ku ig arabyuvye un, ikapnig akak un. Mmanawa ku pis keh hene, amun ini nikwe pis wanekbetene gihawkan ke wotbe pis ikenebe tiket amey ta gitewharit. Ig ka ik adahan ig misakwa akak gidahan gihiyekemni, ayge ig marekevwe.”

²¹ Ka ba yi isaksa mbeye hiyakemniki adahan in wanekbeta yihawkan, heneme wanekbetanay ahawkan mbeyevye hiyakemniki akak kibeyne hiyakemniki.