Romanus 11 - Uhokri Gahegbetawni Nukune akak Sawmus

Ka madiktema judeyenevwi tukuhne Jesus

¹ Nawenetke pahavwi yaytak hiyapni hene, ig awna: “Kuri nikwe ig Uhokri tukuhe gihiyegavu izhaewyenevwi.” Nukebyi, ka muwaka awna inakni hene. Nahwa izhaewyene, nah gihiwhi amekene Abraawh, giwntak amekene Benjamih, heneme Uhokri ka tukuhun.

² Ig Uhokri ka tukuh gihiyegavu. Igkis gikanyanvu ku samah akavuska hawkri. Heneme in danuh ku samah Uhokri gannasan awna. Kiyeminahnabay ku samah in kinetihwa gimin Uhokri gawneve amekene Eliyas. Ig amekene Eliyas kamiye hiyeg izhaewyenevwi ta git Uhokri. Ig awna git:

³ “Kiyavwiye, igkis umahave pawnevevu, igkis mehbete piviryepkewten. Nahte misekwe. Igkis nuharitnene adahan igkis nuwmepten.”

⁴ Kiyeminahnabay ku samah ig Uhokri kaytwa giwn. Ig awna: “Kawa. Ka piswonema pahavonema misekwevye. Nah kuwis bayehe nudahanwa ka aynsima hiyeg adahan igkis ka paberetusaw avetunat ner batakka kewye Baal. Nah bayehe ntewnehker mil (7.000) gikebikis.” Henewatbaki ig Uhokri awna.

⁵ Kuri avim inin in hawata ke minikwakbe. Ig Uhokri bayehe gidahanwa gaytakkis hiyeg izhaewyenevwi adahan igkis misakwa gikak Uhokri. He gamnihkakkisnenwa ig kaniyvigkis.

⁶ Ig kaniygikis ka awakuma gikehbetankisma kabayka, heneme awaku gamnihra. Wake ig kaniyvigkis awaku gikehbetankis kabaykabe, nikwekam ini gamnihra ka inyewatma amnihka.

⁷ Ku akak inin igkis hiyeg izhaewyenevwi mpiksewnenes adahan igkis humaw kibeynevwi giwtrik Uhokri, heneme igkis ka uti ku kaharitne igkis mpiksaw. Gaytakkisnen ute. Nerasnenwa ku pariye Uhokri gikanyanvu ignes ute. Heneme ig Uhokri isakse kaba madikte igkis motase gihiyekemnikis igkis dahkise giyaknikis.

⁸ Henewa in ku samah Uhokri gannasan awna. In awna: “Uhokri keh igkis humaw ke hiyegbe ku pariye himekweknenebe. Gihiyekemnikis sab ta git Uhokri. Ku akak inin igkis ke hiyegbe kane hiyep, kane timep. Givewkankis gihiyekemnikis wadit. Bawa kawa, ka wadit.”

⁹ Hawata akiw amekene Davi awna inakniwata akiw. Ig awna: “Inin gimirihwankis ini kiniswigkis. In humaw ke pahayku teybe gidahankis adahan gikinseptenkis, adahan gikamaxtenkis, adahan gibiykeseptenkis, adahan igkis katiwnihwevye avatra gitaraksankis.

¹⁰ In ke wotbe giwtyakkis mananbe adahan igkis ka hiyap. In ke wotbe giduhyakis buynenekwa akak mbeyne.”

Hiyeg judeyenevwi gitaraksankis ka adahanma avanenekwatma

¹¹ Nawenetke pahavwi yaytak hiyapni hene, ig awna: “Mmah nikwe hiyeg judeyenevwi gitaraksankis mmah adahan avanenekwa?” Kawa, nukebyi, ka adahanma avanenekwatma. Heneme ini gitaraksankis kawih adahan wokene ahin gidahankis hiyeg ku pariye kane judeyenevwima kahadbe igkis hawata danuhne git Uhokri. Hawata akiw ig Uhokri amnihe neras kane judeyenevwima kahadbe igkis judeyenevwi atihpak givatra.

¹² Ku samah hiyeg judeyenevwi tarakse Uhokri gihiyekemni in woke ahin adahan madikte hiyeg amadga wayk uti kabayka. Inkata akiw aysawnemenek ku aysaw igkis ka taraksa gihiyekemni akiw ku aysaw igkis kivun akak Uhokri gihiyekemni. Avim ini madikte hiyeg ka aynsima utipte kabayka akiw.

Hiyeg judeyenevwi ke pahakti ahbe, kane judeyenevwima hamahkiska atere

¹³ Kuri nah awna ta yit yis hiyeg ku pariye kane judeyenevwima. Nah bateke numinuh ku samah Uhokri awahkiswen yimin adahan nah ekkene giwn ta yit.

¹⁴ Nawenetke nah keh nukebyuvwi judeyenevwi atihpak avatra Uhokri giwn. Nawenetke ku aysaw igkis hiyap ku samah yis amava inakni giwn kabayntiwa, gaytakkis amnihswa git Uhokrinek igkis isahptawnek ariw givathawnikis.

¹⁵ Ku samah ig Uhokri miniwvi giwkis hiyeg judeyenevwi, ka aynsima kabayka humaw. Kuri ig kabeyvi gikakkis madikte hiyegiviyene ay amadga inin. Aysawnemenek ku aysaw ig diyuh giminkis judeyenevwi akiw, in ka aynsima kabayka akiw. In ke wotbe igkis kannikasakibe ariw miyaka.

¹⁶ Neras pitatyevwi amekenegben judeyenevwi igkis Uhokri gihiyegavu. Nikwe madikte gihiwhivwikis gidahanwata. In kewa pahakti ahbe. Ku eg ah adug gidahan Uhokri, nikwe atawnibdi gidahanwata Uhokri.

¹⁷ Hiyeg judeyenevwi kewa pahakti amutri “oliveg” adugbe ku pariye gidahan Uhokri. Yisme hiyeg kane judeyenevwima yis ke ahbe akamribe. Ku akak inin ka aynsima judeyenevwi avawyewa giw Uhokri. In ke wotbe egu ah adug ku pariye gidahan Uhokri in ke wotbe gutawnibdi tigehpikabe. Yisme hiyeg kane judeyenevwima in ke wotbe yis hamahkiskabe atere guminat. Ku akak inin yis ke wotbe yis tarakwabe gitawnaptakkis judeyenevwi yis iwenebe gawaygikis.

¹⁸ Nikwe ka yi muwaka ikaw kabaytema giwkis hiyeg judeyenevwi. Pariyenekay adahan yis keh yiwanti hene? Yis he atawnibdinen. Igkisme hiyeg judeyenevwi igkis humaw ke akatbe yidahan. Ka yisma akamaxten akat. Kawa. Wake judeyenevwi yumahbe, kitkama yis hamahkiskankam?

¹⁹ Nawenetke pahavwi kane judeyenema hiyapni hene, ig awna: “Heneme in ke wotbe atawnibdi tigehpika adahan ikene iwetrit nutuh. Nikwe nah kabayte giwkis.”

²⁰ Piwnavriknawa igkis tigehpika. Heneme igkis tigehpika awaku igkis ka ihpa Uhokri giwn. Yisme hamahkiska atere awaku yis kamaxwa givitit. Nikwe ka yi muwaka keh yiwanti nikak. Avuriwnabay yihiyekemni ku nawenetke yis meksa Uhokri ig tukuhpeynek hawata.

²¹ Ig Uhokri ka kavigsa neras judeyenevwi ku pariye igyewa guwntak egu ah adug, ku pariye gidahanen Uhokri. Ku yis hiyap ig ka kavigsa gihiyegavu judeyenevwi, yiskata akiw he hamahkiskanen atere? Ku yis kawnata ihpa giwn ig Uhokri kawnata kavigsaynek.

²² Henewa ig Uhokri ka gamnihrasima. Heneme ig hawata hiyapkis mbeyne gitkis hiyeg ku pariye taraksavye. Yisme ig ka gamnihrasima yikak. Ku yis misakwa akak gamnihra, ig ka gabaysima yikaknek. Heneme ku yis meksevgi, ig tigehpey hawatanek.

²³ Igkisme hiyeg judeyenevwi ku igkis wagese gihiyekemnikis adahan igkis ka meksa Uhokri akiw, ayge nikwe ig hamahkiswigkisnek atere gidukwenitkis akiw. Ik adahan ig keh hene.

²⁴ Yis hiyeg ku pariye kane judeyenevwima yis ke wotbe yis tigahkabe ariwntak pahakti ah adug akamri yis hamahkiskabe ta aminat kibeyne ah adug oliveg ku kariwntak yis ka ayta. Igkisme hiyeg judeyenevwi igkis ke wotbe igkis egwa ah gutawnabe kibeynewatbe. Ayge nikwe in ka mahiko ig Uhokri hamahkisgikis aterewata adukwenit akiw.

Aysawnemenek judeyenevwi wages gihiyekemnikisnek

²⁵ Nukebyuvwi, nah ikene inakni yinetni amin ku pariye yis kotene hiyakte kahadbe yis ka ikaw kabaytema giwkis hiyeg izhaewyenevwi. Ku akak inin kaba madikte hiyeg izhaewyenevwi dahkise giyaknikis giw Kiyavwiye Jesus. Heneme in ka adahanma avanenekwatma. Aysawnemenek ku aysaw madikte hiyeg kane judeyenevwima ku pariye Uhokri gikanyanvu ku aysaw igkis kuwis kamaxwa givitit, avim ini igkis izhaewyenevwi ka dahkis giyaknikis giw Kiyavwiye Jesus akiw.

²⁶ Ayge nikwe madikte hiyeg izhaewyenevwi isahptawnek. In henewa ku samah Uhokri gannasan awna. In awna: “Aysawnemenek wamnihtenwiy pes giwntakkis hiyeg siyawhyenevwi. Avim ini ig wiwhpiye givathawnikisnek.”

²⁷ Hawata akiw in gannasan awna: “Nah wiwhenek givathawnikis givititakkis ku samah nah ikakse gitkis minikwak.”

²⁸ Ku akak inin kaba madikte hiyeg judeyenevwi ka timepkere Uhokri ginetni gimin Kiyavwiye Jesus. Inneki keh igkis wageswe Uhokri givetunyavu. Ku samah igkis givetunyavu in iki iwetrit yit, yis ku pariye kane judeyenevwima, adahan yisme wageswa gikagmadavu Uhokri. Igkisme hiyeg judeyenevwi igkis gidukweneswa Uhokri gibetkivu. Ig kaniyvigkis minikwak adahan igkis humaw gihiyegavu. Kuwis ig ikakse hene gitkis gihawkrivwikis amekene Abraawh, amekene Izaki, amekene Jakó. Ig ka kinisgikis.

²⁹ Mmanawa ig Uhokri ka wages gihiyekemni. Ku pariye hiyeg ig kaniy ignes gikanyanvu adahan avanenekwa. Mmanawa ku pariye ig kakanhaw ig ka xuwahni akiw.

³⁰ Yis hiyeg ku pariye kane judeyenevwima, minikwak yis ka ihpenema Uhokri giwn. Kurime ig Uhokri amnihpey. Ig amnihpey awaku gihiyegavu judeyenevwi ka ihpa giwn.

³¹ Heneme aysawnemenek ig amnihgikisnek hawata ku samah ig amnihpey. Ku samah igkis kawnata ihpenema giwn, he gamnihkakkisnen ig Uhokri amnihgikisnek. Ig amnihgikisnek awaku ig kuwis amnihpey.

³² Mmanawa ig Uhokri isakse madikte hiyeg tarakse adahan in ikene iwetrit git adahan igme gamnihtenkis madikte.

Uhokri ka aynsima gihiyekemni

³³ Kibeyne gidahan Uhokri. Ig ka gannusima. Ig ka aynsima gihiyekemni. Ka gihiyekemnisima ig. Wis ka hiya wisma pukuhpa ku pariye gikehni ine ku pariye gihiyekemni.

³⁴ Yuma pahavwinema hiyeg hiya asamanak adahan pukuhpa madikte Uhokri gihiyekemni. Yuma pahavwinema hiyeg kannuh iki hiyakemniki git Uhokri.

³⁵ Yuma pahavwinema hiyeg ik adahan ig awna: “Nah kuwis iki arikna git Uhokri. Kuri ig matiwnihnan.”

³⁶ Mmanawa madikte ariknebdi ayipa kuwis Uhokri gidahan. Madikte humaw giwntak Uhokri. Madikte humaw givitimpi Uhokri. Madikte humaw gidahan Uhokri. Kibeyne gidahan Uhokri adahan avanenekwa! Ameh!