Romanus 10 - Uhokri Gahegbetawni Nukune akak Sawmus

¹ Nukebyuvwi, numawkanuhwa avititak nuyakni ku nukebyuvwi izhaewyenevwi isahptaw. Innewa nuviryepkawni git Uhokri.

² Mmanawa nah hiyakni ku igkis mpiksewnenes giharit Uhokri. Gitkis igkis kiyathig. Gitkis igkis kehnes gibetki. Bawa igkis ka hiyakgi inyewatma.

³ Mmanawa igkis ka hiyaknima ku ignewa Uhokri kannuh waditha hiyeg. Gimawkankis igkiswa humaw kibeyne hiyeg akak gimaviswankis akak gikehbetankisnenwa. Inneki keh igkis ka isaksa Uhokri wadithigkis.

⁴ Givewkankis igkis humaw kibeyne hiyeg akak ku samah igkis mpiksaw iha giwn amekene Moís gikumadukan. Bawa kawa. Ignewa Cristo ku pariye keh hiyeg humaw kibeynevwi. Ig waditha madikte ku pariye kamaxwenevwi givitit.

⁵ Ig amekene Moís kinetihwa amadgatak gikagtan amin ku samah hiyeg humaw kibeynevwi akak ku samah igkis ihpenes gikumadukan. Ig awna: “Ku pahavwi ihpenenekwa madikte inakni kumadukaki, igi aymuhwanek gimun Uhokri adahan avanenekwa.”

Uhokri gihiyekemni ka mahikonema adahan wis utipni

⁶ In ka aynsima mahiko adahan wixwiy ihpa amekene Moís gikumadukan muwamnete, heneme in ku samah Uhokri keh wixwiy humaw kewa kibeynevwibe awaku ku samah wixwiy kamaxwa givitit Cristo in ka mahikonema wotwiy. Kibeyne, wixwiy ka muwaka keh ariknawnema mpiy udatniwiy. Wixwiy ka muwaka atak inurikut adahan wixwiy muhuksa Cristo adahan ig keh wixwiy humaw kibeynevwi.

⁷ Ine wixwiy kawnata muwaka atak ta warikwit adahan wixwiy kannikasa Cristo ariw miyaka.

⁸ Kibeyne, ig Uhokri gihiyekemni ka mahikonema adahan wis utipni. In kennesa umun. In ay ubiyrik, in ay avit uyakni. Ini gihiyekemni adahan wixwiy kamaxwa givitit Cristo. Inwata hiyakemniki ku pariye usuh ekkene ta gitkis hiyeg.

⁹ Usuh awna gitkis: “Ku pis awna inyewa akak pibiy: ‘Kiyavwiye Jesus nukivara’, ku pis ihpa avititak piyakni ku Uhokri kannikasevgi ariw gimiremni, amun ini nikwe pis isahptaw.”

¹⁰ Mmanawa avititakwa uyakni wis kamaxwa givitit Cristo. Akakme ubiy wis kinetihwa gimin. Innewa keh wis kewa kibeynevwibe giwtrik Uhokri. Innewa keh wis isahptaw ariw uvathawni.

¹¹ Henewa in ku samah Uhokri gannasan awna. In awna: “Ku pariye kamaxwevye givitit Cristo, igi ka marakwa givit gitivut Uhokrinek.”

¹² Inakni iwit kawih gidahankis madikte hiyeg, mmanawa ig Uhokri hiyap hiyeg judeyenevwi akak hiyeg ku pariye kane judeyenevwima igkis hehpekuye giwtrik. Igwata gikivarakis. Ig ka gamnihrasima gikakkis madikte hiyeg ku pariye amnihswenevwi git.

¹³ Henewa in ku samah Uhokri gannasan awna. In awna: “Madikte hiyeg ku pariye amnihswenevwi ta git Kiyavwiye Uhokri ignes amnihkanek.”

Ku hiyeg ka kinetni gak Cristo, ignes ka hiya igkisma kamaxwa givitit

¹⁴ Heneme ku hiyeg ka kamaxwa givitit Cristo, nikwe ignes ka hiya igkisma amnihswa git. Hawata akiw ku igkis ka kinetni gak, nikwe igkis ka hiya igkisma kamaxwa givitit. Hawata akiw ku pahavwi ka kinetihwa gitkis gimin, nikwe igkis ka hiya igkisma kinetni gak.

¹⁵ Hawata akiw ku ner pahavwi ka awahkiska giminkis hiyeg, nikwe ig ka hiya igma kinetihwa gitkis. Henewa in ku samah Uhokri gannasan awna. In awna: “Ku pahavwi waywe ewkne kibeyne inetit, batekkanewa ku samah ig danuh wot.”

¹⁶ Heneme ka madiktema hiyeg amava inakni kibeyne inetit. Igwa amekene Izaíyas awna minikwak: “Kiyavwiye, yuma hiyeg ihpene unetni.”

¹⁷ Ka sam. Amawka ku hiyeg kinetni gak Cristo kahadbe ignes ik adahan igkis kamaxwa givitit.

Hiyeg judeyenevwi ka hiya igkisma wihwa ariw ku samah igkis ka kamaxwa givitit Jesus

¹⁸ Nawenetke pahavwi yaytak hiyapni hene, ig awna: “Nawenetke hiyeg judeyenevwi ka kamaxwa givitit Cristo awaku igkis ka kinetni gak.” Nukebyi, igkis kuwis kinetni gak. Mmanawa ig Cristo kuwis kinetihwaka gimin muwapuw giwaxigkis he danuhe amaksemni paytwempu.

¹⁹ Nawenetke pahavwi yaytak hiyapni hene, ig awna: “Nawenetke neras judeyenevwi ka kamaxwa givitit Cristo awaku igkis ka pukuha inakni inetit ku pariye igkis timap” Nukebyi, igkis pukuhpin. He hiyeg ku pariye kane judeyenevwima igkis pukuhpin. Minikwak ig amekene Moís kinetihwa amin inakni. Ig awna ku pariye Uhokri awna gitkis gihiyegavu. Giwn: “Aysawnemenek nah keh yis judeyenevwi atihpak nuvatra awaku ku samah nah amnih nawenyevwi hiyegviyenevwi ku pariye kane nuhiyegavuma. Nah keh yis ka batek avatra ku samah nah amnih hiyeg ku pariye yis iki ku igkis yumahwatnene gihiyekemnikis.”

²⁰ Hawata akiw amekene Izaíyas kinetihwa giminkis hiyeg ku pariye kane judeyenevwima akak madikte giboka. Ig awna: “Uhokri awna: ‘Nah utepkanek gavitkis neras ku pariye kane mpiksaw nuharit. Nah hiyapkiswanek ta gitkis neras ku pariye kane ayapti nakuh.”

²¹ Giminkisme hiyeg izhaewyenevwi ig Uhokri awna: “Nah awakasaw gitkis takunipti, heneme igkis ka iha nuwnuh, igkis tukuhpen.”