Romanus 1 - Uhokri Gahegbetawni Nukune akak Sawmus

Nah Pol awahkis kabayka yimin

¹ Nah Pol ku pariye gibuk Kiyavwiye Jesus Cristo, nah awahkis kabayka yimin. Kibeyne, Uhokri kaniyven akak gibetki adahan nah humaw giwatni. Ig awahkiswen adahan nah ekkene ini kibeyne inetit

² ku pariye ig ikakse minikwak ku in danuh. Inakni ig akka amadga gikagtan ku pariye gannasan gitkis gawnevevu pitatyevwi.

³ Inakni inetit gimin Uhokri gikamkayh Ukivarawiy Jesus Cristo. Ig Kiyavwiye Jesus kinaghew, ig wageswe awayg amadgaya inin. Ig ihtikekne. Ig amekene Davi gihiwhi

⁴ heneme ig gidukwenewa ig Uhokri gikamkayh. Ig gitiphaw Uhokri barewvitye. Ini gannu ku samah ig kannikaw ariwntak gimiremni innebaki akkig wotwiy ku igyewa Uhokri gikamkayh.

⁵ Ig Jesus Cristo iki nutuh nawaygih adahan nah humaw giwatni adahan nah ekkene ginetni ta gitkis madikte hiyegiviyenevwi kahadbe igkis ihpin igkis kamaxwa givitit. Ini nannivwi nah keh gidahan.

⁶ Yis ayge yis hawata gaytakkis Uhokri gikanyanvu adahan yis humaw Jesus Cristo gihiyegavu.

⁷ Nah awahkis kabayka yimin, yis madikte ku pariye aygnenevwi avit paytwempu Roma, yis Uhokri gibetkivu ku pariye ig kaniye adahan yis humaw gidahanwa gihiyegavu barewvityevwi. Ig Wigwiy Uhokri gikak Ukivarawiy Jesus Cristo gabaykis yikaknek. Igkis kariswahsa yiyakninek.

Nah atekere atere adahan nah ekkene Uhokri giwn yit

⁸ Pitatye nah kabayha Uwohkigawiy yidahan madikte givitimpi Jesus Cristo. Mmanawa madikte hiyeg kinetni yak ku samah yis kamaxwene givitit Kiyavwiye Jesus kabayntiwa.

⁹ Nah takunipti piriyepkewnene yidahan avanenekwa. Ig Uhokri hiyakni ku nah inyewa piriyepkawa yidahan, ig Uhokri ku kadahan nah kannivwiye akak madikte nubetki adahan nah ekkene ginetni gidahan gikamkayh Jesus Cristo.

¹⁰ Nah piriyepkaw git adahan ig keh nah ik adahan nah atak iwasavyi ku avim inin kayg. Gikak Uhokrinek nah danuh atere yitnek.

¹¹ Mmanawa nah ka aynsima danuhpakere yit kahadbe nah akki yit madikte ku pariye ekkepka nutuh gavit Uhokri Gitip adahan nah ikene yawaygi.

¹² Hawata akiw adahan nah utinek nawaygi yiwntak adahan wixwiy awayghaw pawtak awaku ku samah wixwiyweke kamaxwenevwi givitit Kiyavwiye Jesus.

¹³ Nukebyuvwi, nah ikene yinetni kahadbe yis hiyakni ku nah ka aynsima ikiswanaw adahan nah danuhpa atere yit, heneme kuviknene kote ikte adahan nah danuh atere yit. Mmanawa numawkan nah wages hiyeg gidahan Cristo ayge yibet hawata ku samah nah kuwis wages hiyeg gidahan ay gibetkis nawenyevwi hiyegiviyenevwi ku pariye kane judeyenevwima.

¹⁴ Mmanawa nah kawatnihka adahanikwa nah ekkene Uhokri ginetni ta gitkis hiyeg madikte. Nah akkin ta gitkis hiyeg kannuyevwi. Hawata nah akkin ta gitkis hiyeg mannavyempu. Hawata nah akkin ta gitkis hiyeg hiyakemniyevwi. Hawata nah akkin ta gitkis hiyeg ku pariye kane hiyak hawkri.

¹⁵ Nah kawatnihka adahanikwa nah ekkene ginetni muwapu. Inneki keh nah ahegbet adahan nah ekkene inakni kibeyne inetit ta yit hawata ayge avit paytwempu Roma.

Nah ka mara akak Uhokri ginetni

¹⁶ Mmanawa nah ka mara akak inakni kibeyne inetit. Nah batek kinetihwa nimin. In Uhokri gidatni adahan amnihne madikte hiyeg ku pariye ihpenevwi giwn. Pitatye in kawih adahan amnihne hiyeg judeyenevwi. Kurime in kawih adahan amnihne hiyeg ku pariye kane judeyenevwima hawata.

¹⁷ Inakni kibeyne inetit akka adahan ku samah wis misakwa kibeyne giwtrik Uhokri. Wis humaw kewa kibeynebe giwtrik Uhokri awaku ku samah wis kamaxwa givitit Jesus Cristo. Ininewa ukamaxwanwiy keh wixwiy kibeyne. In Uhokri gannasan awna: “Pahavwi ku pariye kakamaxwan givitit Uhokri, igi kibeyne giwtrik Uhokri, ig aymuhwanek gimun Uhokri adahan avanenekwa.”

In huwewe gitkis hiyeg ku Uhokri ay

¹⁸ Ig Uhokri kuwis akka wotwiy ku ig ka amava hiyeg gihiyekemnikis ku pariye mbeyevye. Ig ka batek akak gitaraksankis neras hiyeg mbayavye ku pariye mataybiswevye ariw hiyakemniki ku pariye inyewatnene.

¹⁹ Mmanawa igkis hiyakni ku ig Uhokri ay, heneme igkisnewa ka ihpa giwn. In huwewe gitkis ku ig Uhokri ay. Ignewa Uhokri akka gitkis huwewe

²⁰ ku samah akavuska hawkri. Ig ka hiyapkarati akakma wowtyak amadgaya inin. Heneme ig akka wotwiy huwewe ku ig ay adahan avanenekwa. Ini ku samah ig keh madikte ariknebdi ay amadga hawkri ini areketni wotwiy ku ig gidatni yuma amaksemni. Nikwe igkis ka hiya igkisma awna ku igkis ka hiyak ba Uhokri aywatma.

²¹ Ku igkis awna inakni hene, igkis tarakse giwntekneswa. Igkis kuwis hiyakni ku Uhokri ay, heneme igkis ka kiyathig, igkis ka kawohkigahawkere git ine igkis kawnata kabayhig. Heneme igkis ikatuswate arit mahayakemniki. Yuma hiyakemniki abet gihiyekemnikis. He misanpikinen ayge. Mmanawa igkis ka pukuha Uhokri gihiyekemni ku pariye inyewatnene.

²² Igkis ikawnamahkis ke wotbe igkis hiyakemniyebe hiyeg, bawa amun ini nikwe igkis humaw mahayakemnivye.

²³ Mmanawa igkis ka kawohkigahawkere git Uhokri ku pariye ka gikiytanisima kane hiyap miyaka. Igkisme kawohkigahaw aritpa arikna ku pariye kane ik adahan bisiksaw ariw miyaka. Igkis kawohkigahaw arit awayg amadgaya inin gahehpak, arit kuhivra gahehpak, arit puwikne gahehpak, arit kawapnene gahehpak.

²⁴ Nikwe ig Uhokri isaksevgikis. Ig isaksevgikis adahan igkis wew akak gihiyekemnikis mbeyevye. Ayge nikwe igkis wew akak powkemniki, he igkis keh mbeye patahwaki pawtak ku pariye maraki udahanwiy.

²⁵ Igkis kamaxwa avitit hiyakemniki ku pariye he wasaymkanenwa he igkis miyehe Uhokri gihiyekemni ku pariye inyewatnene. Mpinekata igkis kawohkigahaw git Uhumtenwiy, igkis kawohkigahaw aritpa ku pariye Uhumtenwiy gikehavan. Bawa ignewa Uhokri ku pariye kis adahan wis kawohkigahaw git. Henewatbaki ig.

Higeg gihiyekemnikis mbeyevye

²⁶ Awaku ini gihiyekemnikis mbeyevyenen ig Uhokri isaksevgikis adahan igkis keh ku pariye igkis kehkerevye. Ayge nikwe egkis tinogben miniw ariw guwewnikis gikakkis gugihgikis ku pariye waditnene. Egkis wages adahan guwewnikis ku pariye kane wadit. Egkisweke kamaxekbet pawtak.

²⁷ Hawata awaykemni miniw ariw giwewnikis ku pariye waditnene gukakkis gihayokis. Igkisweke miyarhaw pawtak. Awaykemni igkisweke kamaxekbet pawtak. Ayge nikwe igkis uti mbeyne ku pariye kawih gidahankis avatra ini gikehnikis mbeyevyenen.

²⁸ Ku samah igkis ka kiyekere Uhokri abet gihiyekemnikis, nikwe ig isaksevgikis adahan igkis wew akak gidahankiswa gihiyekemnikis ku pariye mbeyevyenen hiyakemniki adahan igkis keh ku pariye kane kis adahan igkis keh.

²⁹ Avim ini igkis ikatuswa arit mbayka madikte adahan igkis humaw powkemnavye, kowtyakuvye, kanaktinatruvye, katihpavye, umehekevutnevwi, karatonavye, wasaymavye, arewhavye. Avim ini igkis patehevye pahavwi giw.

³⁰ Igkis awna mbeyevye iwit paminak. Igkis amiyhene Uhokri. Igkis kaytwana hiyeg. Igkis ikewne kabayte giw pahavwi. Igkis kawantivye. Igkis ivegminene gihiyekemnikis takunipti adahan kehne mbayka. Igkis ka ihpa gigkis giwn.

³¹ Igkis kawnata pukuhpa ku pariye kabayka. Igkis kinisak, igkis ka batek gikakkis hiyeg, igkis kawnata amnih giyakikis hiyeg.

³² Igkis hiyakni ku Uhokri gikumadukan awna: “Ku pariye wewne akak mbayka ignes miyarapnek. Igkis ka danuh git Uhokri.” Igkis hiyak inakni gihiyekemni, heneme igkis gidukweneswa igkis wewnenes akak ini mbayka hene. Pi mbayte akiw, igkis ikenes hiyeg gawaygikis adahan ignes keh mbayka hawata ke igkisbe.