Matews 9 - Uhokri Gahegbetawni Nukune akak Sawmus

Jesus makniwa pahavwi miyavuvye

¹ Ig Kiyavwiye Jesus timapni hene, ig katapte muhumdakat. Ig manuke mahakwa ig diyuhe ta avitit paytwempu Kafarnawh ku kiney ig misakwa.

² Ayteke hiyeg danuh atere, igkis waxwe pahavwi awayg miyavuvye ta gimkat Kiyavwiye Jesus. Ig harit amadga gisivamna. Ig Kiyavwiye Jesus hiyapni hene ku samah gikamaxwankis givitit, ig awna git awayg miyavuvye. Giwn: — Ka muwaka wakaymni, nukebyi. Nah bayahminap ariw pitaraksan gikak Uhokri.

³ Avimnewa ini ka aynsima kannuhekevutnevwi amin amekene Moís gikumadukan igkis ayge. Gaytakkis timapni inakni Kiyavwiye Jesus giwn, igkis awna gimin ginaktinkis. Giwnkis: — Ner awayg ikewne ke wotbe ig Uhokribe bawa ig ka Uhokrima. Ig miyathene Kiyavwiye Uhokri ku samah ig awna inakni hene.

⁴ Ig Kiyavwiye Jesus hiyakni hene ku samah gihiyekemnikis, ig awna ta gitkis: — Mmahkay yis ivegminene yihiyekemni amin mbeyevye hiyakemniki hene?

⁵ Mmah yivewkan ku in mahiko nudahan nah bayahminig ariw gitaraksan? Ku yis hiyap nah hiya gikankasak nah keh ig wew akiw, ininkata akiw nah ka dat adahan nah bayahminig ariw gitaraksan?

⁶ Nah hiyapkiste yit ku nah, ku pariye wageswe awayg amadgaya inin, nahnewa detye amadga inin adahan nah bayahminene hiyeg ariw gitaraksankis gikak Uhokri. Ayteke ig awna git ner awayg miyavuvye. Giwn: — Kannikaw kuri. Kidisnaba pisivamna. Hiyawa pis diyuhe pivinwate.

⁷ Aynewa ig awayg kannikew. Ig tivik givinwate.

⁸ Madikte hiyeg kabubuknene ayge igkis hiyapni hene, igkis wakaymnibdi. Igkis awna: — Kibeyne, Kiyavwiye Uhokri, ku samah pis ike pannu hene ta git pahavwi amadgaya inin.

Jesus kaniy Matews

⁹ Ayteke ig Kiyavwiye Jesus tivik. Ig waywe avigku ahin, ig hiyavun nah Matews, nah betnene ariku payt ahiwket karukri. Nah ladwan, nah ahiwne karukri gidahan guvelma. Igme awna nutuh: — Ba ayta wew nukakuh adahan pis humewne nukannuhni. Nah timapni hene, nah kannikew, nah tivik gikak.

Jesus ayta humekwiye hiyeg taraksavye ta git

¹⁰ Ayteke ig Kiyavwiye Jesus danuh ta nuvinekut. Ayge ig axne nukakuh. Ka aynsima ladwan danuh atere payak gikakkis hiyeg akiw ku pariye ikaka kane kibeynevwima hiyeg. Igkis hawata ax gikak Kiyavwiye Jesus gikakkis gikannuhnivwi.

¹¹ Neras farizewkis hiyapni hene, igkis awna gitkis gikannuhnivwi. Giwnkis: — Mmahki ner yikannuhten axne darihwekne gikakkis ladwan, gikakkis hiyeg akiw kane kibeynevwima hiyeg? Wake ig kibeyne hiyegbe, ig ka axkam gikakkis gikebikis neras hiyeg.

¹² Ig Kiyavwiye Jesus timapni hene, ig kaytwa giwnkis. Ig awna gitkis: — Hiyeg kane kibeynevwima ignes kewa hiyeg kakahribdavyebe. Ignes muwaka pahavwi ayta amnihgikis. Ignesme hiyeg makniwyevwi ignes ka muwaka mekseh. Ignesme hiyeg kakahribdavye ignes muwaka mekseh.

¹³ Ataknabay ivegboha Uhokri gannasan minikwekene marihwa yis pukuhpa inin ku samah nah darihwekne gikakkis hiyeg kane kibeynevwima. Mmanawa in Uhokri gannasan awna: “Nah ka muwaka yis he kakanhawnen nutuh. Nah pi muwakate yis amnih hiyeg.” Mmanawa nah ka ayta adahan nah humeknema ku pariye hiyeg wadityevwi kuwis adahan ignes wageswiyes gihiyekemnikis. Nah ayta adahanikwa nah humekwiye neras ku pariye taraksavye adahan ignesnewa wageswiyes gihiyekemnikis.

Amawka wixwiy maxhaw inyewa avititak uyakniwiy

¹⁴ Ayteke Joawh Batista gikannuhnivwi igkis danuh atere git Kiyavwiye Jesus. Igkis awna git: — Kiyavwiye, usuh maxhaw adahan kiyene Uhokri. Kiberevut usuh maxhaw adahan usuh piriyepkewne. Igkisme farizewkis hawata akiw igkis maxhaw hene. Pisme pikannuhnivwi ka maxhaw. Mmahki igkis ka maxhaw hene? Mmahki igkis ka kiyatha Kiyavwiye Uhokri kema nerasma?

¹⁵ Igme Kiyavwiye Jesus kaytwa giwnkis: — Igkis ka maxhaw adahan nukiyetni mmanawa nah kuviknene ay gikakkis. Nah kehte abektey akak pahavwi awayg maripkewviye. Ku aysaw ig maripkewviye nikwe gikagmadavu ayta iwasa gimaripkawni. Ku samah ig ayge gikakkis abet ini fet ba ignes kadni giharit? Ba ignes maxhaw? Kawa. Heneme aysawnemenek ku aysaw nah iwepka giwkisnek nukannuhnivwi, avim ini nikwe igkis maxhawnek.

Nuhiyekemni ka kis gikakkisma hiyeg kuwisnene dehe gihiyakemnkis

¹⁶ Ayteke ig Kiyavwiye Jesus keh nawenyewa abektey akiw. Giwn: — Ka kis adahan wis kahava simis mugumguviye akak nukune kamis mmanawa in kamis nukune ku pariye kote sukuhkante in ka dep tariswa mmanawa in kote dahwate kema mugumguviyema. Ku pahavwi kahava gisimsa mugumguviye akak nukune kamis, inkit mugumguviye sigka, hawata in sigka pi kiyeste akiw.

¹⁷ Kawnata kis adahan wis katiyha win nukune arikut pakir amar ayivwivye ivatmakuvye. Mmanawa ku aysaw ini win tukugwa, in pakir amar ka ahwa payak nikak. In bekwe awaku. Ayge nikwe ini win dimuke. Hawata ini pakir amar ka kabay akiw. Amawka ku wis katiyha win nukune ta arikut pakir amar ku pariye mitibetnene. Ayge nikwe win atiy misakwa kabayntiwa payak akak win. Heneki nuhiyekemni in kis gikakkis hiyeg ku pariye kote dahate gihiyekemnikis.

Leglis akivara amnihswa git Jesus

¹⁸ Ig Kiyavwiye Jesus awnempiye inakni iwit hene, pahavwi awayg leglis akivara danuh atere git. Ig paberetusaw gitivut Kiyavwiye Jesus, ig awna git: — Kiyavwiye, uya amnihun. Nukamkayh kuhwekwa eg biyuke. Ba ayta sarayh piwak guvitit kahadbe eg kannikaw ariw gumiromni, eg iveg akiw.

¹⁹ Ig Kiyavwiye Jesus timapni hene, ig kannikaw ig tivik gihapti ner awayg. Usuhme gikannuhnivwi tivik gihapti.

Pahavu tino makniw ariw guminewkan

²⁰ Ku samah gitepkemni, pahavu tino danuh gihavu butte. Eg kuwis hiyap mbeyne akak guminewkan adahan ka aynsima kamukri kuwis, madikawkubu akebi akak pikana arawna (12). Eg danuh atere giharaptak, eg daxe gikanwapta akigbimna.

²¹ Mmanawa eg awna gunaktin: — Ku nah he daxpi gisimsa abet, ikeyvi, nah makniw.

²² Igme Kiyavwiye Jesus wagestaw ig hiyavgu. Ig awna gut: — Ka muwaka avis, nukebyi. Pis makniw mmanawa pis kamaxwa ta nuvitit. Aynewa eg tino makniw.

Jesus kannikasa Jayru gikamkayh

²³ Ayteke ig Kiyavwiye Jesus danuh atere givinekut ner awayg leglis akivara. Ayge ig hiyap ka aynsima hiyeg agighenes kadukman adahan igkis ekkenes gikadnikis.

²⁴ Ig hiyapni hene, ig awna gitkis neras hiyeg: — Aguhwanabay aytakihan. Nor bakimni ka miyó. Himak eg. Igkisme hiyaraptihpig.

²⁵ Igkis pesantenwa, igme Kiyavwiye Jesus parak ta arikut xam. Ayge ig sumuhe nor bakimni guwaku. Aynewa eg kannikew.

²⁶ Ayteke inetit amin ini gannu ibekhewvi muwapuw ku kiw paytwempu.

Jesus makniwa piyana motavye

²⁷ Pisenwa ig Kiyavwiye Jesus tivik ayteke. Ayge avigku ahin piyana gikebikis motavye waywe gihavu butte. Igkis amnihswenes git. Igkis awna: — Kiyavwiye Jesus, pis ukivara hawata ke amekene Davibe. Uya amnih usuh.

²⁸ Ayteke ig Kiyavwiye Jesus pareke paytrikut. Neras piyananene motavye hiyapni hene, igkis pareke atere git. Igme Kiyavwiye Jesus awna gitkis: — Ba yis kamaxwa nuvitit ku nah detye keh yis hiyap? Igkisme kaytwa giwn: — Ihi, Kiyavwiye. Usuh kamaxwa pivitit.

²⁹ Ig Kiyavwiye Jesus timapni hene, ig daxe giwtyakkis. Ig awna gitkis: — Ku samah yis kamaxwa nuvitit nikwe henewa in humaw.

³⁰ Aynewa giwtyakkis hiyap. Ig Kiyavwiye Jesus hiyapni hene, ig awna gitkis: — Ka ba yi kinetihwa amin inin nannuh ta gitkis hiyeg.

³¹ Heneme igkis ka iha giwn, igkis tivik kinetihwa amin ku pariye Kiyavwiye Jesus keh gidahankis. Igkis kinetihwa muwapuw ku kiw paytwempu.

Jesus makniwa pahavwi mownpiye

³² Igkis pesantenwa paytrikutak, hiyeg waxwe git Kiyavwiye Jesus pahavwi awayg mownpiye. Ig mownpi awaku wavitye ay givit.

³³ Igme hiyapni hene, ig pekkise ner wavitye givititak. Ku aysaw ig wavitye pes ayteke givititak ner awayg, ig awayg kavusaw awna. Neras hiyeg kabubuknene ayge igkis hiyapni hene, igkis wakaymnibdi ka aynsima. Igkis awna: — Usuh kote hiyapte akebi inin ay Izhaewamnaw.

³⁴ Igkisme neras farizewkis ayge igkis awna: — Ig ivuke wavitye givititak ner awayg akak wavitye gikivarakis gannu ay givit.

Jesus amnihkere hiyeg

³⁵ Ayteke ariwnteke ini ig Kiyavwiye Jesus mpiye muwapuw avuwiw paytwempu nopsadmin, avuwiw paytwempu nopsanyupnene akiw. Ayge ig kannuhekne ariku judeyenevwi gileglisakis. Ig ekkene inakni kibeyne inetit amin Uhokri gikumadukan. Ig makniwene hiyeg ariw madikte karaytpiyene, ariw madikte mabimnakatru.

³⁶ Avim ini ig sarayh givegi ta gimkatkis hiyeg kabubuknekis ayge. Ig kayah avit giyakni. Ig kayah gidahankis ku samah igkis kimare ginaktinkis, igkis yuma gawaygikis. Igkis ayge kewa muwtohbe ku pariye yumanene gikivarakis gikavriwtenkis.

³⁷ Ig hiyapni hene, ig awna ta gitkis gikannuhnivwi: — Ka aynsima hiyeg kuwis ahegbet adahan kamaxwevye ta nuvitit. Ta nutuh igkis kewa pahak wasbe ivatrik ahegbet adahan tariswiki. Heneme ka kiyesradima hiyeg akka nudahan nuhiyekemni gitkis.

³⁸ Piriyepkawnabay ta git Kiyavwiye was akivara adahan ig kawatni hiyeg adahan ignes kinetihwenes gitkis numinuh.