Matews 8 - Uhokri Gahegbetawni Nukune akak Sawmus

Jesus makniwa pahavwi ku pariye axpusakare avit busukne

¹ Ayteke ig Kiyavwiye Jesus muhuke avititak ini waxri. Ku samah ig waywe, hiyeg kuruwnene gihavu butte.

² Ayge pahavwi awayg axpusakare avit busukne ig danuh atere git. Ig paberetusaw ta gitivut. Ig awna git: — Kiyavwiye, uya amnihun. Ku pis muwaka piyihun, pisnewa hiya numakniwka.

³ Ig Kiyavwiye Jesus hiyapni hene, ig sarayh giwak ta givitit. Ig daxwig atere. Ig awna git: — Ihi. Nah muwaka. Pis kuwis makniw. Aynewa gibuskana miyvi.

⁴ Ayteke ig Kiyavwiye Jesus awna git: — Ataybiswanaba nutuh. Ka ba kinetihwa arit hiyeg avigkuya ahin amin ku samah pis makniw. Su atak wade gimkanit muwveg. Akka pivit git kahadbe ig iwasap ig hiyap ku pis makniw. Ayteke pis kakanhaw git Uhokri ku samah amekene Moís aya wot minikwak, adahan areketni gitkis hiyeg ku pis inyewa makniw. Igme timapni hene, ig tivik.

Jesus makniwa pahavwi suwtat gibuk

⁵ Ayteke ariwnteke ini ig Kiyavwiye Jesus danuhe atere avitit paytwempu Kafarnawh. Ayge pahavwi romayene suwtat gikivarakis ig danuh atere git. Ig amnihswe git. Ig awna git:

⁶ — Kiyavwiye, uya amnihun. Nubukuh ig kakahriye harihte aynte nuvineku. Ig dathuvye. Ig ka aynsima kayehe.

⁷ Igme Kiyavwiye Jesus kaytwa giwn: — Nah atere piyihgi.

⁸ Igme suwtat gikivarakis kaytwa giwn: — Kawa, Kiyavwiye. Nah patehwevye hiyeg. Nah yuma nukiytanisima pitivut adahan pis parak nuvinekut. Kiyavwiye, pis karayt akivara. Ku pis he awnevi aytontak piyawakad, ikeyvi. Nubukuh makniwnek.

⁹ Nah hiyak mmanawa nah hawata nah kakivara. Nah hawata nah kumaduka nawenyevwi suwtat akiw. Ku nah awna ta git pahavwi: “Su tivik” ig iha nuwnuh ig tivik. Ku nah awna ta git pahavwiwa akiw: “Ba ayta” ig iha nuwnuh ig ayta. Ku nah kawatni nubukuh, ig hawata ig iha nuwnuh.

¹⁰ Ig Kiyavwiye Jesus timapni inakni hene, ig wakaymni ka aynsima. Ig awna ta gitkis neras ku pariye kane aynsima gihavu butte. Giwn: — Ner suwtat kane izhaewyenema ig pi kamaxwate ta nuvitit mpiya madikte nukebyuvwi izhaewyenevwi. Nah ka hiyapti pahavwinema izhaewyene gikamaxwan kema nerma. Henewatbaki in.

¹¹ Aysawnemenek ka aynsima hiyeg kane izhaewyenevwima wahamavriktak akak uvitkiyavriktak ignes kawih Uhokri gikumadukannek. Henewatbaki in. Ayge igkis darihwaknek aynte inurik gikak amekene Abraawh, gikak amekene Izaki, hawata gikak amekene Jakó.

¹² Ignesme neras izhaewyenevwi ku kadahan ig Uhokri ahegbete ini gikumadukan pitatye, igkis ka darihninek. Igkis ivukavepkanek hanpa kabaywakat, ta abetit amisnavyad, ku kiney hiyeg tihebdinek ignes kagah gaybukis.

¹³ Ayteke ig Kiyavwiye Jesus awna ta git ner suwtat gikivarakis. Giwn: — Hiyawa pis diyuhe pivinwat. Ku samah pis kamaxwa nuvitit adahan nah piyihgi henewa in humaw. Ku aysaw ig awna inakni, aynewa suwtat gibuk makniw.

Jesus makniwa Pedru gimatru

¹⁴ Ayteke ariwnteke ini ig Kiyavwiye Jesus danuh ta givinekut Pedru. Ayge ig ute Pedru gimatru egme harit akak nawaki.

¹⁵ Ig Kiyavwiye Jesus hiyapni hene, ig atere gut. Ig sumuhe guwak. Aynewa gunawan mpiye guw. Ayteke eg kannikaw, eg kuwegwano gidahan.

Jesus makniwa kakahribdavye

¹⁶ Ayteke misanpi, ka aynsima hiyeg danuh atere git Kiyavwiye Jesus. Igkis waxwe git hiyeg wavityewnavye. Igme pekkis wavitye givititakkis akak gibiynenwa. Avim ini ig makniwe madikte hiyeg ku pariye kakahribdavye.

¹⁷ In danuh hene kahadbe in kahayak ku samah Uhokri gawneve amekene Izaíyas awna minikwak. Ig awna: “Ig kayah ukayhawniwiy. Ig wiwh ukahriwiy uvititakwiy.”

Hiyeg kote ahegbete adahan wewnes gikak Jesus

¹⁸ Ka aynsima hiyeg ayge kabubuknene ganwa Kiyavwiye Jesus. Ig hiyapni hene, ig awna ta gitkis gikannuhnivwi. Giwn: — Uyay manuke ta pahabakaytak mahakwa. Igkisme kaytwa giwn: — Uyay.

¹⁹ Igkis tivikwiyes, igme pahavwi kannuhekevutne amin amekene Moís gikumadukan ig danuh atere git. Ig awna git: — Kiyavwiye, nah tivik pikak ku kitwiye pis.

²⁰ Igme Kiyavwiye Jesus kaytwa giwn: — Ba pis ahegbetnema adahan pis hiyepne mbeyne payak nukakuh? Puwikne kadahan giwetrikis ariku miyokwiye. Kuhivra kadahan guwetrikis avewi ah. Nahme ku pariye wageswe awayg amadgaya inin, nah yuma nuwetri adahan nah mayekne.

²¹ Ayteke pahavwiwa Jesus gikannuhni akiw ig danuh atere git. Ig awna git: — Kiyavwiye, nah wewkerevye pikak heneme niguh kote miyate. Ku aysaw ig miyavinek nah avuhpig, nikwe nah tivik pihapti.

²² Igme Kiyavwiye Jesus kaytwa giwn: — Ka sam. Uya tivik nuhapti kurinewa. Hiyawa pis isaksa pahavwi ku pariye kuwis ke wotbe ig miyarevyebe giw Uhokri, isaksanig adahan igi avuhe giyaki miyaviye.

Jesus misak mayg akak paraw

²³ Ayteke ig Kiyavwiye Jesus katapte muhumdakat. Gikannuhnivwi tivik gihapti. Igkis tarekwe ayteke.

²⁴ Igkis ku aynte pakwa amadga mahakwa, pahaye adahan mayg kannikew gimkanitkis, ka aynsima paraw katapte amadgat gihmunkis. Gihmunkis me buwisemet. Heneme ig Kiyavwiye Jesus himeke ayge gimadgakis.

²⁵ Igkis gikannuhnivwi hiyapni hene, igkis atere wadiswig. Igkis awna git: — Kiyavwiye, uya amnih usuh. Wixwiy me biyukapmet.

²⁶ Igme kaytwa giwnkis: — Yis awaykemni avisatruvye! Mmahki yis ba yavisatrun? Uhokri ik adahan yis kamaxwa givitit. Ayteke ig kannikaw ig himehe mayg akak paraw. Aynewa madikte kariswehwe.

²⁷ Igkis gikannuhnivwi hiyapni hene, igkis wakaymnibdi gidahan. Igkis awna: — Pariyeneki ner hiyeg? He mayg akak paraw iha giwn.

Jesus awahkis wavityempu ta givuwitkis pakirempu

²⁸ Ayteke pisenwa igkis hamah pahabakat igkis minahwa atere avitit giwaxigkis hiyeg gadarayenevwi. Ayge piyana awaykemni wavityewnavye atere patipteke Kiyavwiye Jesus. Igkis pes abetitak imewti. Igkis ka gimabyankisima. Ka ik adahan hiyeg wew atere ku kiney igkis misakwa.

²⁹ Igkis danuh atere git Kiyavwiye Jesus, igkis kabiman git. Igkis awna: — Pis Uhokri gikamkayh. Pariye pikehni ukakuh ku avim inin? Mmah pis ayta womkat adahan hiyapkiswiye mbeyne wotuh? Kote uhawkanavrikma adahan usuh hiyapkiska mbeyne wotuh.

³⁰ Ayge pahabunene pakirempu axwenekis piyawakte giwkis aynesa.

³¹ Ayteke nikwe neras wavityempu amnihswe ta git Kiyavwiye Jesus. Igkis aya git: — Ku pis pekkiswiye usuh givititakkis neras awaykemni, uya awahkis usuh tahan givititkis neras pakirempu.

³² Igme Kiyavwiye Jesus awna gitkis: — Tiviknay atere. Ayteke nikwe igkis pesbetwikis givititakkis neras awaykemni. Igkis pareke givititkis ignes pakirempu. Igkisme pakirempu sigisbetwikis ta asebrikute. Igkis tubohbetwikis ta ahakwate mahakwa. Ayge igkis aniksewbet ahakwa un.

³³ Pakirempu gikavriwtenkis igkis hiyapni hene, igkis sigisbet kibehtenwa ta paytwempuwit. Igkis danuh atere, igkis kinetihwa amin givigkis ku samah arikna danuhe gitkis. Hawata igkis kinetihwa giminkis neras awaykemni wavityewnavye.

³⁴ Neras hiyeg paytwempuyenevwi igkis timapni hene, igkis pes paytwemputak adahan patiptekene Kiyavwiye Jesus. Igkis danuh atere git, igkis awna git: — Su tivik aytakihan avititak uwaxrig.