Matews 7 - Uhokri Gahegbetawni Nukune akak Sawmus

Ka ba ikiy pahavwi ku ig ka kibeynema

¹ — Ka yi muwaka ikiy pahavwi ku ig ka kibeynema kahadbe ig Uhokri kawnata ikayi ku yis kawnata kibeynevwima.

² Ku wis ikiy pahavwi ku ig kibeyne hiyeg, hawata ig Uhokri ikiy wis ku wis kibeynewata. Heneme ku wis ikiy pahavwi ku ig ka kibeynema hiyeg, nikwe ig Uhokri ikiy wis ku wis kawnata kibeynema.

³ Mmahki pis avuriw pikebyi gitaraksan? Pis ke wotbe kiyimanebe akak paha iget nopsesnibe ay giwtrik pikebyi. Pisme ka hiyaknima ba pahat ahadma nopsad ay piwtrik.

⁴ Ku aysaw ini ahad ay piwtrik, pis ka hiya pisma awna git pikebyi: “Isaksanate nah wiwh ini iget piwtriktak.”

⁵ Pis ikewne ke wotbe pis kibeynebe hiyeg bawa pis pi mbayte giw pikebyi. Asa hiyak akak pidahankit pihiyekemni taraksevye. Ayge nikwe ik adahan pis hiyak akak pikebyi gitaraksan.

Abektey pewru akak pakir

⁶ — Kuwis nah ekke yit kibeyne hiyakemniki. Ku yis ka amevekere inakni hiyakemniki, yis ikaw ke pahavwibe ku pariye ka amevekere kibeynewa axka, ig padekwin git pewru. In ke wotbe yis padeknebe barewye akabdat ta git pakir. Igme pakir ka hiyak ku pariye barewka ig sibuhbetepni, ayteke ig wageswa yimin ig kagehpey. Nikwe battukawnabay adahan yis wew avigkut inakni hiyakemniki avanenekwa. Ku ka henema, yis uti mbaykanen.

Ka miniw ariw yiviryepkawni

⁷ — Avanenekwa ayepnenekwa yawaygi ta git Uhokri. Igme iki yitnek ku pariye yayapni git. Ku ig ka iki yit nikwenewatma avim ini, ka sam. Ikawnay kewa pahavwibe ku pariye ivegvene paha arikna he ig utepni. Ayge nikwe yis utinek ku pariye yimawkan. Ikawnay kewa pahavwibe ku pariye tetesnene anumeku pahavwi gilapota he igme woka ta git. Ayge nikwe ig Uhokri kaytwa yiwnnek.

⁸ Mmanawa ku wis aya wawaygi git, ikaka wotnek. Ku wis ivegvene ku pariye umawkan git, wis utipninek. Ku wis awna git, kaytwaka wownnek.

⁹ Ig ka kiniswi. Nah kehte abektey. Yis awaykemni, ku pahavwi yikamkayh aya bugut yit, yis ka iki tipma git. Yuma pahavwinema awayg kinis gikamkayh hene.

¹⁰ Hawata akiw ku yikamkayh aya im yit, yis kawnata iki kaybunema git.

¹¹ Ku yis hiyap yis taraksavye iki kibeyne arikna gitkis yikamkayuvwi, igkata akiw Wigwiy inurikyene? Ig iki kibeynewa arikna ta gitkis neras ku pariye ayepnevwi git.

¹² Ka yi muwaka ikiy ku yis ka hiya yisma wew avigku inakni hiyakemniki ku pariye nah ekke yit ku avim inin. Kiyenabay inin nuwnuh: amawka yis kabay gikak pahavwi hawata ku samah yis muwaka pahavwi kabay yikak. Inakni iwit in ahiw madikte Moís gikumadukan akak Uhokri gawnevevu pitatyevwi giwnkis. Henewatbaki in.

Pitahra akebi ahin

¹³ — Ay pitahra akebi ahin adahan uhiyekemni. Ig Uhokri gihiyekemni kewa pahatra ahin mahamwisniyebe. Heneme paraknabay atere avigkut ini ahin. Mmanawa ku yis ka wew akakma Uhokri gihiyekemni, in ke wotbe yis avigkube pahatra ahin nopsadnene pugubwadnene ku pariye tivikwiye arimkanit iwetrit ku kiney kane aynsima hiyapka mbeyne ayge. Ka aynsima hiyeg tivikwiye atere.

¹⁴ Heneme ini ahin nopsesa mahamwisniyene in tivikwiye arimkat kabayka dehetniki. Ka kiyesradima hiyeg utipni.

Pikatna ah

¹⁵ — Pukuhpawnabay gavitkis hiyeg ku pariye ikawnamahkis ke wotbe ignes Uhokri gawnevevube bawa ignes ka giwntakma Uhokri. Igkis hiyapkiswa yit huwipegeviye kewa muwtohbe, heneme abet gihiyekemnikis igkis kewa axtigibe.

¹⁶ Nah akkite yit ku samah yis hiyakgikis baki igkis giwntakwatma Uhokri. Ku yis hiyap ku igkis ka kehnema Uhokri gibetki, nikwe yis hiyakgikis ku igkis ka giwntakma Uhokri. Ku wis hiyap pahakti amutri eg ka sarayh guw kabaynovwima, nikwe wis hiyak ku egu amutri ka kabaynoma. Ke puduku akatbe ke iveybe egkis ka sarayh guwkis kabaynovwima kema “uva”ma kema “figu”ma.

¹⁷ Ku pahakti ah akat kabaynowa, eg sarayh guw kabaynovwi guw. Egme ah akat ku pariye kane kabaynoma, guw kawnata kabaynovwima.

¹⁸ Pahakti ah akat ku pariye kabaynowa ka ik adahan eg sarayh guw mbeyevyoma guw. Ine pahakti ah akat ku pariye kane kabaynoma kawnata ik adahan eg sarayh guw kabaynovwima guw.

¹⁹ Madikte ah akat ku pariye ka sarayh guwkis kabaynovwima, egnes ihukavepkanek egkis padakavepkanek ariwtrikut tiket adahan egkis bukahavepka.

²⁰ Hene, hawata yis hiyaknek ku pariye hiyeg kane kibeynevwima ku aysaw yis hiyap ini mbayka ku pariye pes giwntakkis.

Hiyawa pahavwi keh annut heneme ku ig ka keh Uhokri gibetki ig biyukenek

²¹ — Ay hiyeg ku pariye awna nutuh: “Kiyavwiye, pis nukivara”, heneme waditnevyenen. Igkis ka kawih nukumadukan aynte inurik. Ignewa ku pariye keh Wigwiy inurikyene gibetki, ignewa kawih.

²² Aysawnemenek avim ini ku aysaw Uhokri hiyepne hiyeg ba ignes kibeynevwiwatma, ayge avim ini ka aynsima hiyeg awna nutuhnek: “Kiyavwiye, Kiyavwiye, Ka ba pis hiyak usuh? Minikwak usuh ekkene Uhokri gihiyekemni piwavrik, usuh pekkis ka aynsima wavitye piwavrik, usuh keh ka aynsima annut piwavrik.”

²³ Nahme kaytwa giwnkisnek: “Nah ka hiyakyiwa ku pariyene yis. Higihwanabay aytakihan, yis taraksavye.”

Piyana hiyeg paytya

²⁴ — Ku pahavwi hiyeg timap nukannuhakni, ku ig ihpin, igi kewa pahavwi awayg hiyakemniyebe ku pariye mutuhe givin awakubet ta abetit tip.

²⁵ Ayteke muwok wayk kihhaw. Akemni buwis. Mayg kamayghaw huwit ta avitit ini givin. Heneme givin ka hakuh mmanawa awaku mituw kabayntiwa ta warikwit abetit tip.

²⁶ Heneme ku pahavwi hiyeg timap nuwnuh heneme ku ig ka ihpin, igi kewa pahavwi awayg mahiyekemnivyebe ku pariye tabirase givin awakubet ta abetit kayh.

²⁷ Ayteke muwok wayk kihhaw. Warik digise. Mayg kamayghaw huwit ta avitit ini givin. Pahaye adahan givin hakuhe pahatte. Henewatbaki ig Kiyavwiye Jesus awna.

Jesus kannuhekne akak madikte gikiytani

²⁸ Pisenwa inakni gawnan neras hiyeg kabubuknene ayge igkis wakaymnibdi gidahan ku samah gikannuhakni.

²⁹ Mmanawa ig ka kannuhak kema nerasma kannuhekevutnevwi amin amekene Moís gikumadukan. Heneme ig kannuhekne ayge akak madikte gikiytani.