Matews 6 - Uhokri Gahegbetawni Nukune akak Sawmus

Amnih hiyeg ka akakma piwanti

¹ — Avuriwnabay ba yihiyekemni kibeynewatma. Araytak hiyeg keh kabayka ariwtrik hiyeg kahadbe igkis ikaka ku igkis kibeynevwi hiyeg. Amawka yis ka keh hene. Ku yis keh kabayka kahadbe hiyeg ikiyi ku yis kibeynevwi hiyeg, nikwe yis ka uti kabayka giwntak Wigwiy inurikyene.

² Ku aysaw pis amnih pahavwi, ka ba kinetihwa nimin kema nerasma hiyapkisnevwi gabaykis. Igkis gibetkikis kinetihwa amin gabaykis ay ariku leglis hawata ay avigku ahin. Igkis amnih hiyeg kahadbekam igkis ikaka ku igkis kibeynevwi hiyeg. Ku igkis ikaka hene, amun ini igkis kuwis uti kabayka ay amadga inin. Yuma akiw gidahankis aynte inurik. Henewatbaki igkis.

³ Pisme ku aysaw pis amnih pahavwi, amawka pis amnihgi avawyewa ariw hiyeg marihwa pis ka humaw kawantivyema akak ini pamnihra. Ka muwaka kinetihwa nimin git pikagmada kibeynewatnen.

⁴ Ku pis amnih pahavwi avawyewa ariw hiyeg ku kiney ignenwa Wigwiy hiyapi, nikwe ig Wigwiy iki kabayka pitnek.

Piriyepkaw ka akakma piwanti

⁵ — Hawata akiw ku aysaw pis piriyepkaw, ka ba piriyepkaw kema nerasma hiyapkisnevwi gabaykis. Igkis batek piriyepkaw ariku leglis, hawata wade atusik ahin kahadbe igkis hiyapka gavitkis hiyeg, igkis ikaka ku igkis kibeynevwi hiyeg. Ku igkis ikaka hene, amun ini nikwe igkis kuwis uti kabayka ay amadga inin. Yuma akiw gidahankis aynte inurik. Henewatbaki igkis.

⁶ Pisme ku aysaw pis piriyepkaw amawka pis piriyepkaw avawyewa ariw hiyeg marihwa pis ka humaw kawantivyema akak ini piviryepkawni. Parak tahan arikut pahayku xam sabuk lapot. Ayge pis piriyepkaw ta git Wigwiy ku kiney ignewa hiyapi, ayge nikwe ignewa timap piwn ig iki kabayka ta pitnek.

⁷ Ku aysaw yis piriyepkaw, ka ba yi diyuhminaw kiberevutnema amin iwit arakembet akiw ku pariye he waditnevyenen kema nerasma kane Uhokriyanvuma. Ignes givewkankiskam ku amawka igkis piriyepkaw kihhaw akak kibite iwit kahadbe giwohkigakis timap giwnkis.

⁸ Yisme ka ba yi piriyepkaw hene kema igkisma. Mmanawa avit yis ayap arikna git Wigwiy, ayipa ig kuwis hiyak ku pariye yimawkanitnene git.

Piriyepkawnay han

⁹ — Ku aysaw yis piriyepkewne, awnanay han: “Wiguh inurikyene, usuh kabayhap. Pis ka pikiytanisima.

¹⁰ Ba ayta kumaduka atan amadga inin. Umawkan pibetki kehka ay amadga inin hawata ku samah in kehka ayge inurik.

¹¹ Iknaba wotuh umana takunipti.

¹² Bayahminanaba usuh ariw utaraksan hawata ku samah usuh bayahmina neras hiyeg ku pariye tarakse ukakuh.

¹³ Iknaba wotuh wawaygi adahan usuh ka isaksewvima arit mbayka. Avuriwnaba usuh ariw ini mbeyevyenen wavitye gikumadukan. Usuh kabayhap, Kiyavwiye. Pisnewa kumaduka adahan avanenekwa. Pisnewa ka pidatnisima adahan avanenekwa. Pisnewa ka pikiytanisima adahan avanenekwa avanenekwa. Ameh.” Henebaki yis piriyepkaw.

¹⁴ Mmanawa ku yis bayahmina pahavwi ariw gitaraksan yikak, nikwe hawata Wigwiy inurikyene bayahminay ariw yitaraksan gikak.

¹⁵ Heneme ku yis ka bayahmina pahavwi ariw gitaraksan, nikwe Wigwiy kawnata bayahminay ariw yitaraksan.

Ka muwaka maxhaw akakma piwanti

¹⁶ — Ku aysaw yis maxhaw adahan yis gikiyetni Uhokri, ka yi muwaka maxhaw kema nerasma hiyapkisnevwi gabaykis. Igkis gibetkikis waywe bibapneme gihepkakkis. Igkis aseneweke gihepkakkis kahadbe hiyeg hiyak ku igkis maxhewnes kahadbekam igkis ikaka ku igkis kibeynevwi hiyeg. Ku igkis ikaka hene, amun ini igkis kuwis uti kabayka ay amadga inin. Yuma akiw gidahankis aynte inurik. Henewatbaki igkis.

¹⁷ Pisme ku aysaw pis maxhaw amawka pis maxhaw ayamaw marihwa pis ka humaw kawantivyema akak ini pimaxhawni. Sukuhava pihepka barewap, akuyva pisemni kabayntiwa

¹⁸ kahadbe hiyeg ka hiyak ba pis maxhewnema. Ayge pis maxhewne gidahannen Wigwiy. Ignewa Wigwiy hiyapi ku samah pis kiyegi nikwe ig iki kabayka pitnek.

Igiska aynte inurik

¹⁹ — Aharitnabay akebi ini kabayka. Ka ba yi bayah igiska ay amadga inin ku kiney madikte ewkaki mehwa, ay ku kiney masumsu kagehbeta kamis, ay ku kiney sivari tihebdip, ay ku kiney amevwavye danuh kidis wewkanbet.

²⁰ Heneme bayahkisnabay igiska yidahan aynte inurik ku kiney yumanene ewkaki mehwa, ine masumsu kawnata kagehbeta kamis, ine amevwavye kawnata danuh atere adahan igkis kidisnes wewkanbet.

²¹ Ku pis avanenekwa ivegminenekwa pihiyekemni amin arikna amadgaya inin, amun ini pidahan igiska ay amadga inin. Heneme ku pis avanenekwa ivegminenekwa pihiyekemni amin arikna inurikyene, amun ini pis kadahannek igiska aynte inurik.

Ku uhiyekemni kabay, in kewa paha abukribe kabutennene ay uvit

²² — Wowtyak kewa paha abukribe adahan uvit. Ku wowtyak makniw, nikwe in ke wotbe uvit ay abet kabutnikibe. Uhiyakemni hawata. Ku in makniw, ayge nikwe in ke wotbe uhiyekemni ay abet kabutnikibe.

²³ Hawata akiw ku wowtyak ka makniwnema, nikwe in ke wotbe uvit ay abet amisnavyebe. Uhiyakemni hawata. Ku wis ivegminene uhiyekemni amin ini misanpiki patehwevye amadgaya inin, ayge in ke wotbe uhiyekemni ay abet amisnavyadbe adahan wis ka hiyak ku pariye hiyakemniki inyewatnene.

Aharitnay kawih inkit Uhokri gikumadukan

²⁴ — Pahavwi ibukti ka ik adahan ig kakivarahaw gitkis gikivara piyamatema. Wake ig piyana gikebikis gikivarabe, ig pi batektekam gikak pahavwi mpiya giw pahavwi. Ig miniwkam giw pahavwi adahan ig kannivwiye gidahan pahavwiwa. Wixwiy hawata akiw. Ku wixwiy iki uhiyekemniwiy arit igiskanenwa amadgaya inin, nikwe wixwiy ka kahawkan iki uhiyekemniwiy git Uhokri nikwenewatma. Amawka wixwiy kaniy pahatwowa hiyakemniki adahan wixwiy wew nikak.

²⁵ Inneki keh nah awna yit, ka yi muwaka kiyimwihwa amin ariknawnema ku pariye muwekne yit, ine amin yaxni ine amin yihigvan adahan yih adehetni, ine amin yikawihni adahan yivit. Ku yis hiyap ig Uhokri kuwis iki udehetniwiy, umanawiykata akiw ig ka iki wotwiy akiw? Ku yis hiyap ig kuwis keh uvitwiy, ukawihniwiykata akiw ig ka iki wotwiy?

²⁶ Ivegnay noras kuhivra amarapnano. Egkis ka mutuh ariknawnema, egkis kawnata taris ariknawnema ine egkis kawnata bayah ariknawnema ariku payt. Heneme Wigwiy inurikyene iki gumanakis takunipti. Yis ka aynsima pi kavigte git Uhokri mpiy kuhivra. Ig iki yit hawata.

²⁷ Ka ik adahan wis kiyabwih udehetni akak ku samah wis kiyimwihwa nikak. Wis kiyimwihwa nikak waditnevyenen.

²⁸ Mmahki nikwe yis kiyimwihwa amin yikawihni? Ivegnay ku samah ivuriti gubereswankis. Egnes ivuriti ka kannivwi adahan guvitkis. Egkis kawnata paduk gukawihnikis.

²⁹ Heneme egkis ka gubereswankisima. He amekene Salomão gibereswan ka mataka gubereswankis. Henewatbaki in.

³⁰ Egkis ivuriti he ewaktinen egkis waditnevyenen. Ku avim inin egkis ay amadga inin. Takuwanekme egkis yuma ay akiw egkis bukahavepka. Yis ka aynsima pi kavigte git Uhokri mpiy ivuriti. Ku yis hiyap ig Uhokri iki gubereswankis, yiskata akiw ig ka iki yit yikawihni akiw? Mmahki yis ka kamaxwa givitit Uhokri?

³¹ Ka yi muwaka kiyimwihwa. Ka yi muwaka awnptaw: “Kit wis uti umana kuri? Kit wis uti uhigvan? Kit wis uti ukawihni?”

³² Ku yis awnptaw hene, yis humaw kewa hiyegbe ku pariye kane Uhokriyanvuma. Ignes avanenekwa wakaymni aharit madikte ini. Yisme ka muwaka wakaymni hene. Wigwiy inurikyene ig hiyak madikte ku pariye yimawkanitnene.

³³ Aharitnabay kawih inkit Uhokri gikumadukan akak gihiyekemni kibeyne hiyakemniki. Ayge nikwe ig iki yitnek madikte ku pariye yimawkanitnene.

³⁴ Ka yi muwaka kiyimwihwa akak hawkri ku pariye nehmnikuhpiye yit takuwanek. Ig Uhokri hiyak nikak yidahan hawata takuwanek. Ikeyvi ig avuriwyi ku avim inin.