Matews 5 - Uhokri Gahegbetawni Nukune akak Sawmus

Jesus akki ku pariye hiyeg uti kabayka

¹ Ku aysaw ig Kiyavwiye Jesus hiyap ka aynsima hiyeg kabubuk ayge, ig wagehe avitit paha waxri imuwvitnene. Ayge ig batahkiswe adahan gikannuhtenkis. Igkisme gikannuhnivwi atere pahadguhwa ganwat.

² Igme kavusa gikannuhtenkis. Ig awna:

³ — Ka aynsima kabaykanek gidahankis hiyeg ku pariye ikewnevwi yumanene gawaygikis giwntekneswatma. Mmanawa ayge nikwe igkis kawihnek Uhokri gikumadukan.

⁴ Ka aynsima kabaykanek gidahankis hiyeg ku pariye kadniyevwi adahan givathawnikis. Mmanawa ayge nikwe Uhokri aydhaptihgikisnek.

⁵ Ka aynsima kabaykanek gidahankis hiyeg ku pariye tuwatasewne gitivut Uhokri. Mmanawa ayge nikwe Uhokri kumadukasanek madikte hiyeg amadga hawkri gitkis.

⁶ Ka aynsima kabaykanek gidahankis hiyeg ku pariye mpiksewnevwi adahan igkis wew wadit. Mmanawa ayge nikwe Uhokri iki gitkisnek ini ku kaharit igkis mpiksaw.

⁷ Ka aynsima kabaykanek gidahankis hiyeg ku pariye amnihnevwi hiyeg. Mmanawa ayge nikwe Uhokri amnihgikis hawatanek.

⁸ Ka aynsima kabaykanek gidahankis hiyeg ku pariye barewbetyevwi gihiyekemnikis. Mmanawa ayge nikwe igkis hiyapnek Uhokri.

⁹ Ka aynsima kabaykanek gidahankis hiyeg ku pariye kabeywotevye hiyeg. Mmanawa ayge nikwe Uhokri kanumgikisnek gikamkayuvwi awaku gihiyekemnikis kewa gidahanbe.

¹⁰ Ka aynsima kabaykanek gidahankis hiyeg ku pariye hiyapkiska mbeyne gitkis avatra ku samah igkis kehne kabayka. Mmanawa ayge nikwe igkis kawihnek Uhokri gikumadukan.

¹¹ Ka aynsima kabaykanek yidahan ku aysaw hiyeg mahivwihyi avatra ku samah yis nuhiyegavu. Ku aysaw igkis hiyapkis mbeyne yit nuvatra, ku aysaw igkis patehevyes yiw akak wasaymka nuvatra, ayge nikwe yis uti ka aynsima kabaykanek.

¹² Bateknabay yinaktin avim ini ku aysaw yis hiyepne mbeyne nuvatra. Bateknay ka aynsima, mmanawa yis uti yitiwninek kibeynewa aynte inurik. Mmanawa henewa Uhokri gawnevevu pitatyevwi avit yis igkis hiyapkiska mbeyne gitkis.

Abektey pam akak abukri

¹³ — Nah kehte abektey yidahan akak pam. Pam muwakapka adahan kiterene im. Yis hawata, yis kewa pambe ay gibetkis hiyeg amedgenevwi inin adahan yihiyekemni kibeyhevye gihiyekemnikis. Heneme ku yis isaksa gihiyekemnikis parekwey, nikwe yihiyekemni humawnek ke pambe ku pariye wagesbetepka akak wayk. Ka ik adahan in kabayhaka akiw. Ini pam ka kawih adahan ariknawnema. In kawih adahannen padekwiki kahadbe in sibuhbetepka gavitkis neras ku pariye mpiyenevwi awvge. Hawata ku yihiyekemni payebdak akak mbeyviye hiyakemniki nikwe yihiyekemni kawnata kawih adahan ariknawnema akiw.

¹⁴ — Hawata akiw, yis kewa pohow abukribe ay gibetkis hiyeg amedgenevwi hawkri adahan yihiyekemni uguhne gihiyekemnikis. Ku samah wis ka hiya wisma ayam paha paytwempu ku pariye avitnene paha waxri imuwadnene, hawata ka hiya wisma ayam uhiyekemni ku pariye ke wotbe kabutennebe.

¹⁵ Yuma pahavwinema hiyeg hakis abukri adahan ig asabkeptenma anavit suwyeg. Kawa. Ig ikigu inut akekrit adahan eg uguhno madikte hiyeg ku pariye ariku payt.

¹⁶ Hene amawka hawata yihiyekemni ku pariye ke wotbe kabutennebe in kabutnihwa. Kahadbe ku aysaw hiyeg hiyap ini kabayka ku pariye yis keh, igkis kabayha Wigwiy inurikyene.

Amawka yis waditte giwkis farizewkis

¹⁷ — Ka yi muwaka ivegmina yihiyekemni ku nah ayta pisenwevye akak amekene Moís gikumadukan hawata akak Uhokri gawnevevu ginetnikis. Kawa. Nah ka ayta pisenwevyema akak inakni giwnkis, heneme nah ayta adahan kehne madikte ku pariye in ayap wotwiy, hawata adahan nah akkamnihne yit ku pariye inyewatnene Uhokri gayapni yit.

¹⁸ Kiyeminahnabay inin nuwnuh: ku aysaw en akak waxri aynete, yuma pahatnamanek iwit amedgene amekene Moís gikumadukan biyuksene akiytaninek. Ine yuma pahatnamanek iwit atikak avuheku biyuksene nawayginek henentima.

¹⁹ Hawata akiw ku pahavwi taraksa amekene Moís gikumadukan pahatwowa, ku ig kannuh hiyeg adahan ignes taraksin, igi yuma gikiytaninek abet Uhokri gikumadukan. Heneme ku pahavwi inyewa ihpene amekene Moís gikumadukan, ku ig kannuh hiyeg adahan ignes ihpin, igi ka gikiytanisimanek abet Uhokri gikumadukan.

²⁰ Henewatbaki in. Amawka ku yis wew waditte giwkis neras farizewkis, giwkis neras kannuhekevutnevwi amin amekene Moís gikumadukan. Ku ka henema, yis ka kawihtinek Uhokri gikumadukan.

Ka muwaka dagawnaw git pahavwi

²¹ — Yikannuhten akka yit ku ig amekene Moís awna gitkis amekenegben, giwn: “Ka yi muwaka umah hiyeg. Ku pahavwi umah pahavwi, nikwe ig tarakse. Igi kis adahan hiyaptigi hiyapkis mbeyne git avatra ini gitaraksan.”

²² Nahme awna yit, ku pahavwi he dagawnevi git gikebyi, nikwe amun ini ig kuwis ig tarakse. Igi kis adahan hiyaptigi hiyapkis mbeyne git avatra ini gitaraksan. Hawata akiw ku pahavwi awna gimin gikebyi: “Novre yuma gihiyekemni”, ay amun ini ig hawata tarakse. Igi kis adahan uwewkistenwiy hiyapkis mbeyne git avatra ini gitaraksan. Hawata akiw ku pahavwi awna gimin gikebyi: “Novre ka kabay. Kuri ig tivik ariwtrikut tiket.” Igi hawata ig kis adahan ig tivik ariwtrikut tiket ayge amun ini iwetrit ku kiney kane aynsima kayahwaki.

Wadithebdih pitaraksan kibehtenwa

²³ — Nikwe ku kavim pis kakanhewne git Uhokri avetun kakanhewket, ku pahaye adahan tuguh abet pihiyekemni ku pis kataraksan gikak pikebyi,

²⁴ amawka ku pis ikis pikan ayge, pis atak gimkat pikebyi pisenwate avit pis kakanhaw git Uhokri. Pis danuh atere, pis wadithebdih pihiyekemni gikak pikebyi. Ayteke nikwe hiyawa pis diyuh kakanhaw git Uhokri.

²⁵ Amawka ku pis wadithebdih madikte pitaraksan ku akak inin kibehtenwa. Aysawnemenek pis ka kahawkannek. Ku samah amadga inin ku pahavwi taraksa gikak pahavwi amawka ku ig ner kataraksanye wadithebdih gitaraksan kibehtenwa gikak pahavwi. Mmanawa ku ig ner ku pariye waxwevginek givetunat hiyaptigi adahan ig kamiyevgi atere, ku igme ner kataraksanye ka mpiksaw wadithebdih gitaraksan gikak avit igkis danuh atere, ig ner pahavwi kamiyevginek git hiyaptigi, igme hiyaptigi awahkisnek giwatni, igme giwatni paraksenek ner kataraksanye arikut parakseket.

²⁶ Ku ig paraksepka atere, ig ka pesnek ayteke he ku aysaw ig katiwnih madikte gimatiwnihni. Pis hawata. Amawka ku pis wadithebdih pitaraksan pisenwate akak inin kahadbe aysawnemenek pis ka paraksepkama gavit Uhokri. Henewatbaki in.

Ka muwaka powkemnihwa

²⁷ — Yikannuhten hawata akka yit ku amekene Moís awna: “Ka yi muwaka powkemnihwa.”

²⁸ Nahme awna yit, ku pahavwi he ivegviyene gumkat pahavu tino adahan ig kiyakan guvitit, amun ini nikwe ig kuwis powkemnihwe gukak abet gihiyekemni.

Kabayte pis hiyap mbeyne ay mpinekata pis hiyap mbeyne aynte abet tiket

²⁹ — Battukawnaba adahan pis avuriw pihiyekemni adahan pis ka taraksa. Ku pis me taraksemet awaku ku samah pis iveg gumkat nor tino akak piwtyak, kabayte pis wareke piwtyak pis padekwin mpinekata pis tarakse. Aysawnemenek pis katiwnih pitaraksannek. Kabayte pis biyukse piwtyak mpinekata pis biyukse pivit pahavwite amun ini iwetrit ku kiney kane aynsima kayahwaki.

³⁰ Hawata akiw ku pis me taraksemet akak piwak, kabayte pis bukihpin padekwin mpinekata pis tarakse. Mmanawa kabayte pis biyukse piwak pahabakya mpinekata pis biyukse pivit pahavwite amun ini iwetrit ku kiney kane aynsima kayahwaki.

Maytwawka

³¹ — Neras yikannuhten hawata awna: “Ku pahavwi maytwekere gihayo, ka sam, hiyawa ig iki gut ini kagta adahan maytwawka.”

³² Nahme awna yit, ihi in sam, mmanawa ku pahavwi maytwa gihayo waditnevyenen, eg ka powkemnihwa, amun ini nikwe hiyeg ikiy gihayo ku eg powkemnihwe, inneki keh eg maytwepka. Hawata igkis ikiy ner awayg ku pariye maripkewviye gukaknek ku ig hawata powkemnihwe gukak giwtrik Uhokri.

Amawka pis ka awna iwit kiniskama

³³ — Neras yikannuhten hawata akka yit ku amekene Moís awna gitkis amekenegben, giwn: “Ku pis kanum Kiyavwiye Uhokri pawneve adahan ig timap piwn ku in ka kiniskama, nikwe pugamawka henewa pis ka kinis.” Ayteke igkis yikannuhten idis gihiyekemnikis atere, igkis awna: “Heneme ku pis kanum inurik pawneve, ku pis kanum waxri pawneve, nikwe ka sam pis kinis.”

³⁴ Nahme awna yit, ka ba yi kanum Uhokri yawneve. Ine kawnata kanum inurik yawneve mmanawa in Uhokri giwetri.

³⁵ Ine kawnata kanum inin waxri adug yawneve mmanawa in Uhokri gikugkapta. Ine kawnata kanum Jerusalém yawneve mmanawa in givin Ukivarawiy detye.

³⁶ Ine pitew pis ka kanum mmanawa ka pisnema kumaduka pitew. Pis ka hiya pisma wages pahatnema pisemni ine seye ine pohe.

³⁷ Amawka pis ka awnati adahan kinisaka. Avuriwnaba madikte piwn ku pariye pis awnakere. Amawka ku piswa humaw pawneve adahan pivit. Ku pis awna: “Ihi”, amawka ku inakni piwn henewa “ihi”. Ku pis awna: “Kawa”, amawka ku inakni piwn henewa “kawa”. Ku pis awna iwit mpiy inakni, in awaku pis mbeyevye pihiyekemni.

Ka muwaka diyuhkis hiyeg

³⁸ — Yikannuhten hawata akka yit ku amekene Moís awna: “Ku pahavwi patukwika giwtyak, amawka ku ig diyuhkiska hawata patukwika giwtyak. Ku pahavwi dunihpika gaybu, amawka ku ig diyuhkiska hawata dunihpika gaybu.” Bawa ig amekene Moís awna inakni hene he adahan ig mpithene pahavwi adahan ig ka diyuhkiska mpinema ahawna gitaraksan. Heneme yikannuhten idis gidahankiswa gihiyekemnikis atere, igkis awna: “Inakni giwn awna ku pugamawka wis diyuhkis pahavwi.”

³⁹ Nahme awna yit, ku pahavwi tarakse pikak, ka muwaka diyuhkisgi. Ku pahavwi biwhbokep, kabayte pis wages pahambakya adahan ig biwhbokap pebakte mpinekata pis diyuhkisgi.

⁴⁰ Ku pahavwi wasaymaptihpep git hiyaptigi adahan ig xuwehpiye pisimsa, uya ikepni git payak akak pidagmanvit akiw.

⁴¹ Ku pahavwi suwtat mpiksaptihpep adahan pis hiyuh gisakola piyawakad, hiyuhniba piyawakte akiw gaviyukan mpiy ku samah gayapni pit.

⁴² Ku pahavwi makehe arikna pit, ikepniba git. Ku pahavwi sunepkere arikna pit, sunapkisnaba git.

Bateknabay gikakkis yivetunyavu

⁴³ — Yikannuhten akka yit ku amekene Moís awna: “Bateknabay gikakkis hiyeg.” Ayteke igkis idis gidahankiswa gihiyekemnikis atere, igkis awna: “Heneme amiyhanay yivetunyavu.”

⁴⁴ Nahme awna yit, ka ba yi amiyha yivetunyavu heneme bateknabay gikakkis. Priyepkawnabay gidahankis hiyeg ku pariye hiyapkis mbeyne yit.

⁴⁵ Kahadbe yis humaw Wigwiy inurikyene gikamkayuvwi, awaku yihiyekemni kewa gidahanbe, mmanawa ig Uhokri kabutni kamuw givititkis hiyeg mbayave payak gikakkis hiyeg kibeynevwi. Ig waykkis muwok givititkis hiyeg wadityevwi payak gikakkis hiyeg kane wadityevwima.

⁴⁶ Amnihnabay yivetunyavu. Ku yis amnih nerasnen ku pariye yamnihten nawenevwime yis ka amnihgikis mmah yis yivewkan Uhokri iki yit kabayka adahan ini? Kawa. Mmanawa madikte hiyeg kuwis kehnekuye hene. He hiyeg kakehniyevwi keh.

⁴⁷ Hawata ku yis aytnih yikagmadavunen nawenevwime yis ka aytnihgikis, nikwe yis ka keh kabaytema giwkis madikte hiyeg. Hawata hiyeg kane Uhokriyanvuma aytnih gikagmadavukis.

⁴⁸ Amawka ku wis amnih hiyeg avigkutavrik ku samah Wigwiy inurikyene amnihpigkis.