Matews 4 - Uhokri Gahegbetawni Nukune akak Sawmus

Wavitye gikivarakis gihikekten Jesus

¹ Ayteke nikwe Uhokri Gitip awahkise Kiyavwiye Jesus amadgate amatap. Ig awahkisgi atere adahan wavitye gikivarakis gihikekten adahan hiyap ba hiya igma taraksasig.

² Ayge amadga amatap ig Kiyavwiye Jesus maxhawne adahan paxnika madikwa (40) hawkri. Ayteke nikwe ig mativwe.

³ Ig wavitye gikivarakis hiyapni hene, ig danuh atere git. Ig awna git: — Ku pis Uhokri gikamkayh, nikwe awna gut nor tip adahan eg wageswa bugut pidahan.

⁴ Igme Kiyavwiye Jesus kaytwa giwn: — Kawk. Ka ininema ku pariye Niguh gayapni nutuh. Mmanawa Uhokri gannasan awna: “Hiyeg ka aymuhwa akak bugutnenwatma, heneme igkis aymuhwa akak madikte iwit ku pariye pes gibiyaptak Uhokri.”

⁵ Ayteke nikwe ig wavitye gikivarakis waxwe Kiyavwiye Jesus avitit paytwempu Jerusalém. Ayge ig ikevgi ta inut avuhekut Uhokri Givin.

⁶ Ig awna git: — Ku pis Uhokri gikamkayh, nikwe asa watiswa aytaki inutak adahan ekkene ku ig inyerwa ay pikak. Mmanawa Uhokri gannasan awna: “Uhokri avuriwkispi gitkis ahj adahan igkis amavap amadga giwakkis kahadbe ine pikugku ka tes avitit tip.”

⁷ Igme Kiyavwiye Jesus kaytwa: — Kawk. Mmanawa Uhokri gannasan hawata awna: “Ka yi muwaka hikek Kiyavwiye yiwohkiga.”

⁸ Ayteke ig wavitye gikivarakis gihikekten akiw. Ig waxwevgi ta avitit paha waxri imuwadnene. Ayge ig ekke git madikte gikumadukan amedgene inin akak madikte igiskaviyene.

⁹ Ig awna git: — Ku pis paberetusaw nutivut adahan pis kiyathan, nah iki pit madikte inin.

¹⁰ Igme Kiyavwiye Jesus kaytwa: — Satanas, su higihwa aytakin! Mmanawa Uhokri gannasan awna: “Kiyathanaba ignenwa Kiyavwiye piwohkiga. Kehnaba ignenwa gibetki.”

¹¹ Nikwe wavitye gikivarakis hiyapni hene, ig tivik giw. Ayteke igkisme ahj danuh atere, igkis ikene Kiyavwiye Jesus gawaygi.

Jesus kavusa gannivwi aynte Galileyamnaw

¹² Ayteke ariwnteke ini ig Kiyavwiye Jesus time Joawh Batista gak ku ig kuwis kamaxwika arikut parakseket. Ig hiyapni hene, ig tivik avitit Galileyamnaw ta avitit paytwempu Nazaré ku kiney ig aymuhwa.

¹³ Heneme ayteke ig pese avititak ini paytwempu, ig tivik misekwe avitit paytwempu Kafarnawh, ku pariye kennesa akigbimna mahakwa Galileya, aynte avit waxri Zebulomnaw akak Naftalimnaw.

¹⁴ Inin danuh hene kahadbe in kahayak ku samah minikwak Uhokri gawneve amekene Izaíyas awna. Giwn:

¹⁵ “Ka aynsima kabaykanek avit Zebulomnaw akak avit Naftalimnaw, ayge ayegbi parahwokwa akak warik Jordawh, akak Galileyamnaw waxri ku pariye kane hiyegma judeyenevwi giwaxigkis!

¹⁶ Ignes hiyeg ku pariye abetnene amisnavye igkis hiyapnek nopsad kabutniki! Inme kabutniki uguhwanek givititkis neras ku pariye avitnene waxri abet amisnavye adahan miyaka!”

¹⁷ Ayteke ig Kiyavwiye Jesus kavusa akka Uhokri giwn gitkis hiyeg. Ig awna: — Wagesnabay yihiyekemni ariw yitaraksan mmanawa ahawkanavrik Uhokri gikumadukan kuwis danuh!

Jesus humak ivuhtyakevutnevwi

¹⁸ Ku aysaw ig Kiyavwiye Jesus waywe akigbimna mahakwa Galileya, ig hiyap piyana gikebikis awaykemni ivuhtyakevutnevwi igkisweke pakebyekne: Simawh, hawata ig kanumka Pedru, gikak gisamwi Andre. Igkis ayge ivuhtyanekis akak tagamayh.

¹⁹ Ig Kiyavwiye Jesus hiyavgikis ayge, ig awna gitkis: — Ba yi ayta wew nukakuh. Nah kannuhyi adahan yis humaw ivuhtyakevutne hiyeg nudahan. Ku samah yis uti im, nah keh yis uti hiyeg nudahannek hawata.

²⁰ Igkisme timapni hene, aynewa igkis isahkise gitagmayakis. Igkis tivik gihapti adahan humewnes gikannuhnivwi.

²¹ Ayteke ig waywe han pitatit akiw, ig hiyap piyana gikebikis akiw, Tiyagu gikak gisamwi Joawh, ku pariye Zebedew gikamkayuvwi. Igkis ayge amadga umuh gikak gigkis, kahevenekis gitagmayakis. Igme Kiyavwiye Jesus humekwigkis atere,

²² Igkisme timapni hene aynewa igkis isahkise gihmunkis gikak gigkis. Igkis tivik gihapti Kiyavwiye Jesus adahan igkis hawata humewnes gikannuhnivwi.

Jesus kannuhekne hawata ig makniwa ka aynsima hiyeg

²³ Ayteke ariwnteke ini ig Kiyavwiye Jesus wew muwapuw ay Galileyamnaw. Ig kannuhekne arikuw judeyenevwi gileglisakis. Ig ekkene kibeyne inetit amin ku samah Uhokri kumaduka hiyeg. Hawata ig makniwene hiyeg ariw madikte karaytviyene ariw madikte mabimnakatru.

²⁴ Madikte hiyeg kinetni gak muwapuw ay Siriyamnaw. Inneki keh igkis hiyegviyene waxwave git madikte kakahribdavye, neras ku pariye akak arakembet karayt, akak kayahwaki, neras ku pariye wavityewnavye, nuwiskawenpiye, datpuwavye, igme makniwavevgikis madikte.

²⁵ Ka aynsima hiyeg kurukehe gihavu butte. Igkis danuh atere avititak Galileyamnaw, avititak Dekapolis, avititak paytwempu Jerusalém, avititak Judeyamnaw, avititak waxri pahambaktak ariw warik Jordawh.