Matews 27 - Uhokri Gahegbetawni Nukune akak Sawmus

Jesus waxwepka ta givetunat Pilatus

¹ Hewke nikwe hawkanawa neras muwveg kiyatyevwi gikakkis neras judeyenevwi giwewkistenkis igkis ahegbete ginetnikis adahan giwmasepten Kiyavwiye Jesus.

² Ayteke nikwe igkis wanakminasevgi. Igkis waxwevgi ta gimkanit Pilatus, ner hiyaptigi romayene. Igkis danuh atere, igkis ikevgi ta giwakurit.

Judas Iskariyotis umehwe

³ Igme Judas Iskariyotis ner kamaykistinene Kiyavwiye Jesus, ig hiyapni hene ku samah igkis kuwis ahegbete ginetnikis adahan giwmasepten Kiyavwiye Jesus, ig kayehe gitaraksan. Ayge nikwe ig tivik gitkis neras muwveg kiyatyevwi gikakkis neras judeyenevwi giwewkistenkis. Ig diyuhkise gitkis nor mpanamkunano madikwa (30) karukri wahano seyno.

⁴ Ig awna gitkis: — Nah tarakse. Nah kamaykise yit pahavwi waditye ku pariye kane keh mbayka! Igkisme kaytwa giwn: — Usuh ka hiyak akak inin. Inin pihawkan in pidahan.

⁵ Igme Judas Iskariyotis timapni hene, ig padeke gikakura ta waykborit ayge ariku Uhokri Givin. Ayteke ig tivik. Ig awna: — Nah umehwepte. Ayteke nikwe ig iwe kuwawta, ig waneke gibita, ig watiswe inutak, ig miya kuwigihwe.

⁶ Igkisme muwveg kiyatyevwi hiyapni hene, igkis iwe nor karukri wahano seyno. Igkis awna: — Amekene Moís gikumadukan ka isaksa wixwiy kawih nor karukri adahan Uhokri Givin awaku nor karukri kuwis katiwnihe adahan giwmasepten pahavwi.

⁷ Nikwe igkis ahegbete ginetnikis adahan isimpiye paha waxri git pahavwi batekerevutne akak egu karukri adahan avuheket gidahankis hiyeg nawotunyevwi.

⁸ Inneki keh kuviknene akak inin hiyeg kanum ini waxri, “Waxri Migatapta.”

⁹ Metakwa in kahayak ku samah Uhokri gawneve amekene Jeremiyas giwn minikwak. Ig awna: “Igkis izhaewyenevwi ahegbete ginetnikis adahan igkis katiwnih mpanamku madikwa (30) karukri wahano seyno gidahan. Ayteke igkis iwe nor karukri,

¹⁰ igkis kawihpig adahan isimpiye pahavwi batekerevutne giwaxig. In tuguh avigkutavriknawa ku samah Kiyavwiye Uhokri gakkan nutuh.”

Jesus ay givetun Pilatus

¹¹ Igme Kiyavwiye Jesus ikepka ta giwakurit ner hiyaptigi Pilatus. Ig tabiresepka ay givetun, igme Pilatus ayavgi: — Mmah pis judeyenevwi gikivarakis? Igme Kiyavwiye Jesus kaytwa giwn: — Henewa ku samah pis awna!

¹² Igkisme neras muwveg kiyatyevwi gikakkis neras judeyenevwi giwewkistenkis kamiyevgi atere git Pilatus, igme Kiyavwiye Jesus ka kaytwa giwnkis pahatnema iwit.

¹³ Ig Pilatus timapni hene, ig awna git Kiyavwiye Jesus: — Mmah pis ka timap ku samah igkis kamiyep ku pis keh mbayka ka aynsima?

¹⁴ Kameki ig Kiyavwiye Jesus kaytwame giwnkis. Ig ka diyuhkis ginetnikis akak pahatnema iwit. Igme hiyaptigi hiyapni hene, ig wakaymni ka aynsima.

Jesus daddahkiswika

¹⁵ Avim ini ahawkanavrik adahan hiyeg judeyenevwi gifetrakis. Abet ini gifetrakis ig hiyaptigi gibetki isahkis pahavwi awayg ku pariye paraksepkare ayge. Mpuse kamukri ig isahkiswiye avim ini pahavwi ku pariye hiyeg fetyavu isahkiskere.

¹⁶ Avim ini hawkri ayge pahavwi awayg ariku parakseket ku pariye hiyakan muwapuw. Giw Bahabas.

¹⁷ Ayteke, ku aysaw hiyeg fetyavu kuwis pahadguvu, ig Pilatus ayavgikis: — Pariye yimawkan nah isahkis yidahan? Ba Bahabas? Ba kawk? Ba Jesus ku pariye ikawvarinene Cristo, Uhokri gikanyan adahan yikumaduketni?

¹⁸ Ig Pilatus awna inakni mmanawa ig hiyak kabayntiwa ku neras muwvegviyene ike Kiyavwiye Jesus giwakurit he avatranen ku samah igkis atihpanig.

¹⁹ Hawata akiw awaku gihayo guwn ta git. Mmanawa avim ini ku samah ig Pilatus betnene amadga gevwi adahan ku kiney ig hiyekne gikakkis hiyeg, atere gihayo wasavanaw gimin. Guwn: — Ka ba keh ariknawnema gikak ner awayg waditye awaku atige, abet narisun, nah hiye mbeyne ka aynsima givatra.

²⁰ Igkisme neras muwveg kiyatyevwi gikakkis neras judeyenevwi giwewkistenkis igkis wagese neras fetyavu gihiyekemnikis kahadbe ignesme isahkisase Bahabas, igme Kiyavwiye Jesus igkis umahkise.

²¹ Igme hiyaptigi awna ta gitkis neras fetyavu akiw. Giwn: — Pariyevahki gaytakkis neras piyananene gikebikis, pariyevahki yimawkan nah isahkisasa yidahan? Igkisme kaytwa giwn: — Isahkis Bahabas.

²² Igme Pilatus timapni hene, ig ayavgikis: — Mmah nah keh nikwe gikak Jesus ku pariye yis kanum Cristo, Uhokri gikanyan adahan yikumaduketni? Igkisme madikte kaytwa giwn: — Daddahkiswinig!

²³ Igme timapni hene, ig ayavgikis: — Mmahki? Pariye mbayka gikehni? Igkisme kabiman pi kihawnate akiw. Igkis awna: — Daddahkiswinig!

Pilatus sukokaw ariw Jesus gimiremni

²⁴ Igme Pilatus hiyapni hene ku ka ik adahan ig wages neras pahabunene hiyeg gihiyekemnikis, ig hiyapni hene ku igkis tiviknene kuwis arimkat dakuhwaki, ig matiwniswe. Ayge nikwe ig ewkise un, ig sukokew giwtrikneswa adahan wihwevye ariw Kiyavwiye Jesus gimiremni. Ig awna gitkis: — Kuri ka nahma hiyekne akak ner awayg gimiremni. Kuri yiswa yikak nikak.

²⁵ Igkisme madikte hiyeg kaytwa giwn: — Ka sam. Usuhwa umahkiswig. Ku usuh tarakse hiyawa usuhwa katiwnihpin payak gikakkis ukamkayuvwi.

²⁶ Ayteke nikwe ig Pilatus isahkisase Bahabas gidahankis. Heneme ig biwhkise Kiyavwiye Jesus akak tigay. Ayteke ig ikevgi ta giwakuritkis gisuwtatavu adahan igkisme deddehpig.

Jesus mahivwihka gavitkis suwtat

²⁷ Henneme pitatye igkis waxwe Kiyavwiye Jesus ta givinbukut hiyaptigi. Ayge igkis pahadguhe madikte suwtatviyene ta ganwat adahan gimahivwihpitni. Igkis awna gitkis:

²⁸ — Uyay arehwa gikak. Uyay kawihkis gikawihni givitit kewa ukivarawiybe ku samah ig kawih gidagmanvit duwboye akak gisuwvren karukri wahano. Ayteke nikwe igkis wiwhe gisimsa, igkis kadagmanevgi akak pahak dagam duwboye.

²⁹ Ayteke igkis imeve puduku, igkis kehe giyuw nikak. Igkis kawihkiswin ta gitewharit. Ayteke igkis ike pahat yakot akat ta giwakurit kihehaptak ke wotbe in ikivarat gisugabe. Pisenwa igkis paberetusaw gitivut. Igkis mahivwihpig. Igkis awna git: — Kibeyne pis judeyenevwi gikivarakis!

³⁰ Ayteke igkis tuvestevgi. Igkis xuwehe ini yakot akat ayta giwakutak. Igkis biwhpig gitewha nikak.

³¹ Pisenwa gimiythankis igkis wiwhe ini simis givititak, igkis kawihkise git gidahanwa gisimsa ku pariye gikawhan. Ayteke nikwe igkis tivikevgi avititak ini paytwempu adahan gideddehpitni.

Simawh ayava Jesus hiyuh giyakni

³² Avigku ahin igkis patipteke gikak pahavwi awayg kewye Simawh, ig avititak paytwempu Sirene. Igkis hiyapni hene, igkis mpiksaptihpig adahan ig gayavetni Kiyavwiye Jesus hiyuhne giyakni. Igme ihe giwnkis.

Jesus deddehpika aminat giyakni

³³ Ayteke igkis danuh ta avitit paha waxri imuwvitnene kewye Gówgota. (Gówgota inakni wownavrikwiy “Waxri Hiyeg Gaptiwvitwiye”.)

³⁴ Ayge igkis suwtat ike win git Kiyavwiye Jesus adahan gihigvan. In wagesbetaki akak iveyti adahan tagetrene gih kewye “few”. Heneme ku aysaw ig ewhemni ig ka higapni.

³⁵ Ayteke igkis deddehpig aminat giyakni. Pisenwa gidaddahnikis, igkis arehwe akak tip adahan hiyap ku pariye kabunuganen ig darihpiye araytak Kiyavwiye Jesus gikawihni. Hene igkis ibekhevyes gikawihni pawtak.

³⁶ Ariwnteke ini igkis batahkiswe ayge, igkis avuriwnig.

³⁷ Ayge amin giyakni, avitmin gitew, pahak kagta daddahka atere adahan areketni ku pariye gikehnitnene ta gitkis hiyeg. Amadga ini kagta awna, “Ig Jesus Ig Judeyenevwi Gikivarakis.”

³⁸ Hawata akiw igkis deddehe piyana amevavye ta aminat giyaknikiswa payak gikak Kiyavwiye Jesus. Pahavwi amin giyakni kihehaptak pahavwime amin gidahan patuwanaptak.

Jesus mahivwihka ayge amin giyakni

³⁹ Ka aynsima hiyeg mpiya awvre. Ayge igkis mahivwihpig atere aminat giyakni. Igkis sassah gitewkis adahan areketni ku samah igkis ka batek gikak. Igkis awna git:

⁴⁰ — Kineykap kuri ku samah pis awna: “Nah mehbete Uhokri Givin. Ayteke abet amamnampiye hawkri nah kannikasin akiw.” Asa amnih pivit kuri. Ku pis igyewa Uhokri gikamkayh, nikwe muhuk ayteke kuri aminatak piyakni.

⁴¹ Neras muwveg kiyatyevwi gikakkis neras kannuhekevutnevwi amin amekene Moís gikumadukan gikakkis neras judeyenevwi giwewkistenkis igkis hawata igkis mahivwihpig atere. Igkis kinetihwa pawtak. Igkis awna:

⁴² — Kuwis ig amnihe nawenyevwi hiyeg, kuri givitme ig ka hiya aramnihka! Ku igyewa hiyeg izhaewyenevwi gikivarakis, hiyawa ig muhuk ayteke aminatak giyakni. Ku wixwiy hiyap ig muhuke ayteke, nikwe wixwiy ihpa giwn!

⁴³ Ig awna ku ig kamaxwa givitit Uhokri. Ig ikawvari Uhokri gikamkayh. Ku henewa Uhokri kavigsanig, uyay hiyap ba Uhokri amnihgi kuri! Henewatbaki igkis awna.

⁴⁴ Neras amevavye ku pariye deddehpika ayge gihumwa Kiyavwiye Jesus, igkis hawata mahivwihpig akak inwata iwit.

Jesus miyap

⁴⁵ Ayteke puwipka danuh. Pahaye adahan kamuw abutni ka kabutni akiw. Hawkri misanpi he dareke kamuw. Ayteke in kavusa kabutni akiw.

⁴⁶ Avim ini daraka kamuw, ig Kiyavwiye Jesus kabiman akak gihawna giwnavrik. Ig awna: — Eli, Eli, lema sabaktâni? Inakni wownavrikwiy: “Nuwohkiga, nuwohkiga, mmahki pis ikiswen?”

⁴⁷ Gaytakkis hiyeg ku pariye tabirbetnene ayge, igkis timapni hene. Igkis awna: — Ig humekne amekene Eliyas.

⁴⁸ Pahavwime gaytakkis ig timapni gabiman hene, ig amnihkerevgi atere. Ig sigise kibehtenwa ig iwe paha arikna ku pariye mitibetnene. Ig subukwin ahakwat win suwiyweye adahan anugasetni. Ayteke ig ikepni akisurik pahat yakot akat. Ig tarekwin ta gimkat Kiyavwiye Jesus kahadbe givewkan igme susni.

⁴⁹ Heneme nawenyevwi hiyeg ayge, igkis hiyapni hene, igkis awna git: — Miniw giw! Uyay hiyap ba ig amekene Eliyas danuhwatma adahan gamnihten!

⁵⁰ Ayteke ig Kiyavwiye Jesus kabiman akiw akak gihawna. Giyakek madike. Ig miyap.

⁵¹ Nikwenewa avim ini, ini kamis amaptenten Uhokri giwskeki pi kiyattenene ku pariye ayge arikunene Uhokri Givin, in sigke pabakak. In sigke inutak danuhte warikwit, amun ini ku aysaw ig miyap. In woke ahin ta arikut Uhokri giwskeki. Ayge avim ini wayk segke. Tip ibekhewbet.

⁵² Amun ini ka aynsima imewti woke. Ayteke ariwntak Kiyavwiye Jesus gikankawni, ka aynsima Uhokriyanvu miyaravye ignes kannikewbet,

⁵³ igkis pese avititak ini gimewkis. Igkis tivik ta avitit paytwempu Jerusalém ku kiney ini givin Uhokri. Ayge ka aynsima hiyeg hiyavgikis.

⁵⁴ Ig Kiyavwiye Jesus miyap, pahavwi romayene, suwtat gikivarakis, gikakkis neras gisuwtatavu ku pariye avuriwnevwi Kiyavwiye Jesus, igkis hiyap ini sagkaki hene, akak madikte akiw ku pariye danuhne avim ini, igkis wakaymnibdi mpiynevevye. Igkis awna: — Inyewa ner awayg Uhokri gikamkayh.

⁵⁵ Aygwata ka aynsima kiyavunogben egkis hawata ivegbet atere, aytontak piyawakad. Egkis ku pariye danuhpanovwi payak gikak Kiyavwiye Jesus avititak Galileyamnaw. Egkis ku pariye hiyaknovwi gikak.

⁵⁶ Ayge gubetkis eg Mahi Madalena; gukak pahavuwa Mahi akiw ku pariye ginagkis Tiyagu gikak José. Hawata kiyavuno Salome ku pariye Zebedew gikamkayuvwi ginagkis eg ay gubetkis.

Jesus avuhpika

⁵⁷ Aygete pahavwi awayg igisye danuh atere. Ig ariwntak paytwempu Arimateya. Giw José. Ig hawata Kiyavwiye Jesus gikannuhni.

⁵⁸ Ig hiyapni hene ku samah ayipa Jesus gimiremni, ig tivik ta gimkat Pilatus, ig awna git: — Kiyavwiye, uya amnihun isaksan adahan nah atak iwe Jesus givit. Igme Pilatus timapni hene, ig awna ta gitkis gisuwtatavu: — Wani ikepka git kiyavwiye José. — Ihi.

⁵⁹ Igme José hiyapni hene, ig tivik. Ig danuh atere, ig wiwhe givit aminatak giyakni. Ayteke ig awasminevgi akak pahak dagam seyne barewbetye.

⁶⁰ Pisenwa ig sarayhpig ta arikut pahayku imewti nukune ku pariye ayipa ig atikis gidahanwa ariku tip amiyokni. Ayteke ig wagesmine pohow tip kiyapyad adahan asabwatip gimew. Pisenwa ig tivik.

⁶¹ Avim ini kiyavuno Mahi Madalena gukak nor pahavuwa Mahi akiw, egkis batabdawak ayge avitkig gimew.

Suwtat avuriw Jesus gimew

⁶² Ayteke amavya ini hawkri ku kabet judeyenevwi ahegbetaw adahan kiyathene samdi, neras muwveg kiyatyevwi gikakkis neras farizewkis igkis tivik ta git Pilatus. Hiyawa avim inin samdi, heneme igkisnewa atak atere.

⁶³ Igkis danuh atere, igkis awna git: — Kiyavwiye, usuh kiye ku pariye ner kinisekevutne giwn ku samah ig aytente ay ukakuh. Ig awna: “Abet amamnam hawkrinek ariwntak numiremni, nah kannikawnek akiw.”

⁶⁴ Nikwe uya awahkis suwtat atere adahan ignes avuriwnes gimew he ku aysaw mpiye mpana hawkri, kahadbe gikannuhnivwi ka ik adahan atak kidis givit atere, pisenwa kuwewanek igkis awnanek ta gitkis hiyeg: “Ig kuwis kannikew ariw gimiremni.” Ku igkis awna inakninek, igkis kinisnek ka aynsima hiyeg mpiy ku samah Jesus kiniswigkis pitatye.

⁶⁵ Igme Pilatus timapni hene, ig awna ta gitkis: — Iwapnay neras nusuwtatavu. Hiyawa yis atere avuriwkis gimew ta gitkis. Avuriwkisni kabayntiwa ku samah yimawkan.

⁶⁶ Igkisme timapni hene, igkis tivik. Igkis mpiyase pahat kuwawta avitmin gimew asabwat kahadbe in ka woka. Hawata igkis ikise avuriwnevwi ayge adahan nimaptenten.