Matews 25 - Uhokri Gahegbetawni Nukune akak Sawmus

Yuwit patuwesbuhka guminkis madikawku himanovwiyo

¹ — Nah akkite yit nawenyewa abektey akiw amin ku samah Uhokri gikumadukan. Minikwak madikawku gukebikis himanovwiyo. Egkis iwe gabukrakis, egkis tivik adahan patiptekene pahavwi awayg ku pariye maripkewviye gukak pahavu gukagmadakis.

² Pohowku gukebikis ka hiyak hawkri. Pohowkume gukebikis hiyak hawkri.

³ Noras ku pariye kane hiyak hawkri egkis iwe gabukrakis, heneme egkis ka iwi ayak ayesrihwan guhaptikis.

⁴ Norasme ku pariye hiyaknovwi hawkri egkis iwe ayak ayesriwhan adahan kivunsene gabukrakis.

⁵ Igme ner awayg ku pariye guwhpankis ig ayivwihwe. Nikwe noras himanovwiyo egkis isevwe he egkis himeke.

⁶ Pawka mitipka egkis timap kabimankaman. Pahavwi hiyeg awna gutkis: “Kuwis ig danuh. Kannikawnay. Su yi atak patiptakig.”

⁷ Egkis timapni hene, egkis kannikewbet. Egkis ahegbetevyo gabukrakis amexa.

⁸ Ayge nikwe noras himanovwiyo ku pariye kane hiyak hawkri egkis awna ta gutkis noras ku pariye hiyaknovwi hawkri. Guwnkis: “Wabukra me makere arakumet. Ika wotuh wabukra ayak.”

⁹ Egkisme kaytwa guwnkis: “Kawk. Udahan ka ik udahanwiy wixwiy madiktema. Su yi atak ta gitkis piyuknevwi adahan yis isim yidahan.”

¹⁰ Egkisme timapni hene, egkis tivik isimnokis gudahankis. Ewka guwenkis, ner awayg danuh atere. Noras himanovwiyo ku pariye ahegbet adahan gidawnhan egkis tivik gihapti ta abetit fet adahan maripkawka. Egkis pareke atere. Ayteke pisenwa fet akivara sabukise lapot awaku kuwis mpiye ahawkanavrik adahan hiyeg parak atere.

¹¹ Ayteke ariwnteke ini noras isimnovwi gabukrakis ayak egkis danuh atere, lapot kuwis sabuke. Egkis hiyapni hene, egkis awna ta git ner awayg ku pariye maripkewviye. Egkis awna: “Kiyavwiye, uya woka lapot udahan.”

¹² Igme kaytwa guwnkis: “Nah ka hiyakyi ku pariyene yis. Henewatbaki ka ba nah hiyakyiwa.”

¹³ Aysawnemenek nah hawata nah ayta ke ner awayg maripkewviyebe. Misakwanabay ahegbet takunipti adahan yis tivikwiye nukakuh mmanawa yis ka hiyaknima ku kabet nah danuh atan. Yis kawnata hiyaknima ku kiney kamuw nah danuh.

Mpana ibukti kawih karukri gidahan gikivarakis

¹⁴ — Nah akkite yit ku samah yis misakwa ahegbet adahan nudawnhan. In ke pahavwibe awayg kehne giwewvan ta avitit paha waxri piyawakad. Avit gitepkemni ig pahadguh gibukvig, ig avuriwkise gewkanbet gitkis. Ig awna gitkis: “Kannivwinabay gukak nor karukri he ku aysaw nah diyuh akiw.”

¹⁵ Ig iki mpuse giwakuritkis pakeku akak ku samah gannukis avuriw. Ig ike pohowkumku mil (5.000) karukri ta giwakurit pahavwi ku pariye kannuye avuriw. Giwakuritme pahavwi ku pariye kabivwiye ig ike mmukna mil (2.000) karukri. Giwakuritme pahavwi akiw ig ike pahamku mil (1.000) karukri, pakeku akak gannu. Ayteke ig tivik.

¹⁶ Ner gibuk ku pariye ikepka giwakurit pohowkumkunano mil (5.000) karukri, ig tivik kibehtenwa ig kannivwiye gukak nor karukri adahan eg kiyesihwa. Ayteke ig dax pohowkumku mil (5.000) karukri akiw, guvitmin ku samah avuriwsaka git.

¹⁷ Igme ner ku pariye avuriw mmuknanano mil (2.000) karukri ig hawata kawihe nor karukri ku pariye ikepka giwakurit, ig dax mmukna mil (2.000) karukri akiw.

¹⁸ Igme ner gibuk ku pariye ameve pahamkunano mil (1.000) karukri, ig hiyapni hene, ig tivik atike pahayku miyokwiye abet wayk, ig ayeme gikivara gikakura atere.

¹⁹ Ayteke ariwnteke ini kibite hawkri akiw ig gikivarakis diyuhe atere. Ayge ig awnasevgikis ta givetunat adahan ig hiyepne ku samah gannivwikis gukak nor karukri ba kuwisma eg kiyestema.

²⁰ Igme gibuk ku pariye ikepka giwakurit pohowkumkunano mil (5.000) karukri ig danuh atere git. Ig awna, giwn: “Kiyavwiye, pis ikise nuwakuh pohowkumku mil (5.000) karukri. Ahah, nah kuwis uti pohowkumku mil (5.000) pidahan akiw.” Nikwe ig ike git gikivara madikawkumku mil (10.000) karukri.

²¹ Igme gikivara timapni hene, ig awna git: “Kibeyne! Pis kibeyne awayg! Pis ik adahan nah iveg ta pivitit. Pis kuwis kannuh kawih aynesa arikna kabayntiwa nudahan. Kuri nikwe nah iki piwakurit pi kibite arikna akiw. Hiyawa pis batek payak nukakuh.”

²² Ayteke igme gibuk ku pariye ikepka giwakurit mmuknanano mil (2.000) karukri ig danuh atere git. Ig awna git: “Kiyavwiye, pis ikise nuwakuh mmukna mil (2.000) karukri. Ahah. Nah kuwis uti mmukna mil (2.000) pidahan akiw.”

²³ Igme gikivara timapni hene, ig awna git: “Kibeyne. Pis kibeyne awayg. Pis hawata ik adahan nah iveg ta pivitit. Pis kuwis kannuh kawih aynesa arikna kabayntiwa nudahan. Kuri nikwe nah iki piwakurit pi kibite arikna akiw. Hiyawa pis batek payak nukakuh.”

²⁴ Ayteke nikwe igme ner gibuk ku pariye ikepka giwakurit pahamkunano mil (1.000) karukri ig danuh atere git. Ig awna git: “Kiyavwiye, nah he misekwevi gukak nor pikakura awaku nah hiyakni ku pis pi kannuhte nuwhu. Pis ka pannusima. Ku kiney pis ka mutuh ariknawnema, hiyawa kuwewanek pis atere ahiw ka aynsima amutri ariw ayteke. Ku kiney pis ka sassah aynesnima amutri ayak, hiyawa kuwewanek pis atere matis ka aynsima amutri ariw ayteke.

²⁵ Nah marekevwe pibohri ku nawewnetke nah ka keh pannivwi wadit. Nikwe nah tivik nah ayeme pikakura abet wayk. Ahah, nop pikakura ay, kiyavwiye.”

²⁶ Igme gikivara timapni hene, ig awna git: “Pis mbeyevye pihiyekemni! Pis mabivwivye hiyeg. Pis kuwis hiyakni ku kiney nah ka mutuh ariknawnema, hiyawa kuwewanek nah atere ahiw ka aynsima amutri ariw ayteke. Pis kuwis hiyakni ku kiney nah ka sassah amutri ayak, hiyawa kuwewanek nah atere matis ka aynsima amutri ariw ayteke.

²⁷ Nikwe kiskama pis kawihpikam nudahan ini ku pariye nah ikise ay piwaku. Kiskama pis bayehpikam nor nukakura arikut payt abeyheki karukri adahan ignes hiyeg ayge sunapkisgu ta gitkis nawenyevwi hiyeg kahadbekam ku aysaw nah danuh atere, igkis diyuhkis nukakurakam avitmin nutuh.”

²⁸ Ayteke ig gikivara awna ta gitkis neras hiyeg ayge gihumwa, giwn: “Iwepnay giw nor karukri pahamkunano mil (1.000) adahan yis ikevgu ta git ner ku pariye kuwisnene kadahan madikawkumku mil (10.000).

²⁹ Mmanawa ku pariye darih kiyeste, igi ikaka gitnek pi kiyeste akiw. Heneme ku pariye ka darih kiyestema, nikwe ini aynesnene ku pariye ig kuwis kadahan in iwepka giwnek.

³⁰ Ivukepnay ner awayg mabivwivye ta kabaywakat, ta abetit amisnavyad, ayge ig tihnek ig kagah gaybu.”

Yuwit patuwesbuhka giminkis muwtoh akak kabrit

³¹ Ayteke ig Jesus awna gitkis: — Aysawnemenek nah, ku pariye wageswe awayg amadgaya inin, nah danuhnek atan akak madikte nukiytani, gikakkis madikte ahjnek. Pisenwa nah batnek amadga nevwi kiyatyo adahan nah hiyekne gikakkis hiyeg.

³² Avim ini madikte hiyeg amadgayavu hawkri pahadguhwa ta nuvetunatnek. Ayge nah ibekhebdihgikisnek pahabu han, pahabume han. Nah ibakhigkisnek hawata ku samah pahavwi muwtohvutne ibakha givigvu muwtoh giwkis givigvu kabrit.

³³ Neras hiyeg ku pariye kene muwtohbe, ku pariye kibeynevwi hiyeg, nah ikigikisnek aytaki kihehavriktak. Nerasme ku pariye kene kabritbe, ku pariye kane kibeynevwima, nah ikigikis aytaki patuwenavriktak.

³⁴ Ayteke nah yikivara nah awnanek ta gitkis neras ku pariye aytaki kihehavriktak. Nah awnanek gitkis: “Aytninay numkanit. Ig Wigwiy kabayhay. Ku avim inin yis darih ini Uhokri gikumadukan ku pariye kuwisnene ahegbet yidahan ku samah akavuska hawkri.”

³⁵ Ig Uhokri kabayhay mmanawa nah minikwak nah mativwevye, yisme ikevun. Nah arabyuvye un, yisme ikevun. Nah ka yihiyaknima, yisme amevevun ta yivinekut.

³⁶ Nah yuma nukawihni, yisme ike nukawihni. Nah kakahriye, yisme avuriwven. Nah ariku parakseket, yisme iwasavun atere.

³⁷ Avim ini neras hiyeg kibeynevwi timapni hene, igkis kaytwa nuwnhunek: “Kiyavwiye, kineyki usuh hiyapi pis mativwevye, usuh ikapi? Kineyki usuh hiyapi arabyuvye un, usuh ikapi?

³⁸ Kineyki usuh hiyapi pis ka uhiyaknima, usuh amavap ta uvinekut? Kineyki usuh hiyapi yuma pikawihni, usuh iki pikawihni?

³⁹ Kineyki usuh hiyapi kakahriye, ba ariku parakseket, usuh iwasap atere?”

⁴⁰ Nahme yikivara kaytwa giwnkisnek: “Minikwak ku aysaw yis amnihe pahavwi nukebyi ku pariye yumahwatnene gikiytani, amun ini nikwe yis kuwis amnihpen.”

⁴¹ Pisenwa nah awnanek ta gitkisme neras aytaki patuwenavriktak. Nah awna gitkis: “Ayguhwanay aytakihan, yis ku pariye ikaksaka adahanikwa biyukwiki! Su yi tivik ta abetit nor tiket ahawkri ku pariye ahegbetaki gidahankis wavityempu payak gikak gikivarakis. Su yi tivik atere.

⁴² Yis ikaksaka adahanikwa biyukwiki mmanawa nah minikak nah mativwevye yisme ka ikavun. Nah arabyuvye un, yisme kawnata ikavun.

⁴³ Nah ka yihiyaknima yisme ka amavan ta yivinekut. Nah yuma nukawihni yisme ka iki nukawihni. Nah kakahriye, nah ariku parakseket yisme ka iwasavun.”

⁴⁴ Avim ini nerasme hiyeg kane kibeynevwima igkis timapni hene, igkis kaytwa nuwnuhnek: “Kiyavwiye, kineyki usuh hiyapi mativwevye, pis arabyuvye un, pis ka uhiyaknima, pis yuma pikawihni, pis kakahriye, pis ariku parakseket usuhme ka amnihpi?”

⁴⁵ Ayge nikwe nahme yikivara kaytwa giwnkisnek: “Ku samah yis ka amnih pahavwinema nukebyi ku pariye yumahwatnene gikiytani, amun ini nikwe yis kawnata amnihun.”

⁴⁶ Ayteke ig Kiyavwiye Jesus pesenwehe giwn, ig awna: “Neras tiviknek arimkanit biyukwiki. Nerasme kibeynevwi igkis tiviknek aymahwa gimun Uhokri adahan avanenekwa.