Matews 24 - Uhokri Gahegbetawni Nukune akak Sawmus

Ka aynsima mbeyne nehmnik

¹ Pisenwa inakni gawnan, ig Kiyavwiye Jesus tivikwiye adahan giveswen ayteke arikutak Uhokri Givin. Ig pesante, gikannuhnivwi pahadguhwe ta gihumwat. Usuh kavusa kinetihwa pawtak amin ini leglis Uhokri Givin ku samah in barewyewa paytwempu.

² Igme Kiyavwiye Jesus timapni hene, ig awna gitkis: — Mmah yis hiyap ini paytwempu? Aysawnemenek yis hiyapni madikte mehpikanek. In higohe madikte waykboritenek. Ine pohow tip ka misakwanek pavitmintak akak guyaki tip akiw. Ihanabay inakni nuwnuh. Henewatbaki in.

³ Ayteke ig tivik ig danuh atere avitit ini waxri imuhgivitnene Olivegvit. Ayge ig batahkiswe asebha. Ayteke gikannuhnivwi danuh atere git igkiswo. Igkis awna git: — Kiyavwiye, uya akki wotuh ku pariye nehmnikuhpiye amadga inin. Kabetpahki inere Uhokri Givin mehpikanek? Pariye danuh adahan areketni ku aysaw ahawkanavrik danuh adahan pidawnhan adahan ukumaduketni? Pariye danuh adahan areketni amaksemni hawkri?

⁴ Igme Kiyavwiye Jesus kaytwa wownuh akak kiyabawkad iwit. Ig awna: — Ka yi muwaka kinikiswa ta gitkis hiyeg.

⁵ Mmanawa aysawnemenek ka aynsima hiyeg kahayaknek nuwavrik ke wotbe igkis ayta nuwntakbe. Igkis awnanek: “Nahnewa Cristo, nah Uhokri gikanyan adahan yikumaduketni.” Avim ini igkis kinisnek ka aynsima hiyeg.

⁶ Ayge avim ini yis timap kutimniki kennesa. Hawata yis timap arak kutimniki piyawakad. Heneme ka yi muwaka wadisasaw. Amawka ku ini kutimniki danuh, heneme kote danuhte amaksemni hawkri.

⁷ Mmanawa aysawnemenek pahabunene hiyegviyenevwi kerbetpikisnek gikakkis nawenyewa hiyegviyenevwi akiw. Guvelma kerbetpikis igkisweke guvelma. Avim ini hawkri ka aynsima mihetniki danuh muwapunek. Hawata ka aynsima sagkaki muwapuw waxribdi.

⁸ Heneme in he akavuskanenwa mbeyne. In ke pahavu tinobe ku aysaw eg kavusa kayah gukamkayh adahan eg pamakutekwiyo. In he akavuskanen.

Aysawnemenek Jesus gihiyegavu hiyapkiska mbeyne gitkisnek

⁹ — Avim ini yis kamaxavepkanek yis iwavavepkanek adahan yis hiyapkiska mbeyne yit. Hawata yis umahavepkanek. Ayge madikte hiyegviyenevwi amiyhevyinek awaku ku samah yis nuhiyegavu.

¹⁰ Avim ininek ka aynsima hiyeg isahkiswevye giw Uhokri. Igkis kamaykisak pawtaknek. Hawata igkis amiyhak pawtaknek.

¹¹ Ayge nikwe ka aynsima hiyeg kahayaknek ku pariye ikawnamahkis Uhokri gawnevevu. Bawa igkis ka giwntakwatma Uhokri. Heneme igkis kinis ka aynsima hiyegnek.

¹² Avim ini mbeyevye mbayka wagehnene arimkat pi mbaytenene akiw. In keh kaba madikte hiyeg ka amnihak akiw.

¹³ Ka sam. Ku yis ka isahkiswa nuwhunek he amaksemni hawkri, yis isahptawnek.

¹⁴ Aysawnemenek inin kibeyne inetit amin Uhokri gikumadukan in ekkepkanek givuwiwkis madikte hiyegviyenvwi amadga inin, kahadbe madikte hiyegviyenevwi timapni. Ayteke ariwnteke ini amaksemni hawkri danuhnek.

Avit amaksemni hawkri ka aynsima mbeyne

¹⁵ — Aysawnemenek hiyeg amedgenevwi inin igkis hiyap ini ku pariye Uhokri gawneve amekene Daniel kinetihwa nimin. Igkis hiyapnek pahavwi aseneweknevye umehekevutne, ig tabirnek ay ariku Uhokri giwetri. Yis ku pariye ivegbohevye inakni iwit, ku aysaw in kahayaknek metakwa yis pukuhpinnek.

¹⁶ Ku aysaw hiyeg hiyap in danuhnek amawka igkis tivik kibehtenwa. Amawka ku pariye misekwenevwi ay Judeyamnaw amawka igkis bisike ta ahavwikute avuhekut waxribdi.

¹⁷ Ku pahavwi ay givin higiwmadga, ig ka muwaka parak akiw ta givinekut adahan iweviye gewkanbet adahan ig bisikwiye.

¹⁸ Ku pahavwi aynte amadga giwasra, ig kawnata muwaka diyuh ta givinwat adahan iweviye gikawihni adahan bisikwiye.

¹⁹ Akayih. Ka aynsima mahikoriki avim ini hawkri gudahankis tinogben ku pariye biwhkisnovwi, gudahankis tinogben ku pariye sukkisanyovwi. Ka aynsima mahiko adahan egkis bisiknek.

²⁰ Piriyepkawnay adahan in ka danuh yit abetnema kamukri ine abetnema samdi.

²¹ Mmanawa avim ini hawkri yis hiyap mbeyne ka aynsimanek. Ku samah akavuska hawkri yumahte mbeyne kema inima. Ariwntak ini akiw, yuma mbeyne akiw kema inima.

²² Wake Uhokri ka matkuhpima ini hawkri, yumakam pahavwinema bisikne ariw miyaka. Heneme kibeyne, ig matkuhenek ini hawkri gidahankis gihiyegavu gikanyanvu.

Kinisekevutnevwi keh annutnek ke wotbe igkis Cristobe

²³ — Avim ini gaytakkis hiyeg awnanek: “Kuwis Cristo ay.” Gaytakkisme awnanek: “Ig ayntehan nawenyewa paytwempu.” Ku pahavwi awna yit inakni hene, ka yi muwaka iha giwn.

²⁴ Mmanawa avim ini kinisekevutnevwi kahayaknek. Gaytakkis awnanek: “Nahnewa Cristo.” Bawa waditnevyenen. Gaytakkisme ikawnamah Uhokri gawnevevu bawa ignes ka giwntakma Uhokri. Igkis keh ka aynsima annutnek ku pariye keh hiyeg wakaymni ke wotbe in areketnibe Uhokri gidatni. Akak ini annutnek igkis hiyap ba igkis hiya gikinsakkis Uhokri gikanyanvu.

Jesus gaytni kahayak wotwiynek kabayntiwa

²⁵ Kuri nah kuwis akkamnih yit madikte ku pariye nehmnikuhpiye.

²⁶ Ayge nikwe ku hiyeg awna ta yitnek: “Ig aynte amadga amatap”, ka ba yi iha inakni giwnkis. Ka ba yi ivegvan atere. Ku hiyeg awna ta yitnek: “Ig ay ariku xam”, kawnata ba yi iha giwnkis.

²⁷ Nah, ku pariye wageswe awayg amadgaya inin, ku aysaw nah aytanek, in naytni kahayak yitnek kabayntiwa. In kahayak kabayntiwa ke ugugunebe ku pariye hamahwa wahamaravriktak danuhte uvitkiyavrikut.

²⁸ Ku kiney wis hiyap isuw wagewe, wis hiyakni kuwis ku aygebaki arikna miyaviye. Hawata naytninek yis hiyapni huwewehenek. Avim ini metakwa yis hiyakninek.

Jesus gidawnhan atan

²⁹ — Aynewa ariwnteke ini mbeye hawkri, kamuw misanpinek, kayg ka kabutni akiwnek, warukma akak waravyu tuguhenek inuriktak. Madikte arikunene hawkri, avim ini in ayguhwebdinek ariw niwetri.

³⁰ Ayteke nikwe pahat arakak nudahan, nah ku pariye wageswe awayg amadgaya inin, in kahayaknek aynte inurik. Madikte hiyegviyenevwi amadga inin ignes hiyapni hene, igkis kayah gitaraksankisnek igkis tihenes. Ayteke igkis hiyavunnek, nah ku pariye wageswe awayg amadgaya inin. Nah ayta abetimpi ukuhne inurikyene akak madikte nudatni akak madikte nukiytani kabutenene.

³¹ Ayteke nah agighasa tohompet. Akak ini nah awahkisnek nuhiyegavu ahj ayta pahadguhpiye Uhokri gikanyanvu muwapuw amadgatak hawkri. Igkis pahadguhpigkisnek wahamaravriktak, tiwriktak, mekaptak, uvitkiyavriktak, he danuhe amaksemni waxri.

Yuwit patuwesbuhka amin “figeyra” akat

³² — Ivegnay ta gumkat nor ah akat “figeyra”. Kannuhwanay gut. Ku aysaw gutawna imihwa akiw, ku aysaw eg kavanhaw akiw, wis hiyakni ku guhawkanavrik kennesa danuh adahan eg kew.

³³ Hawata aysawnemenek ku aysaw yis hiyap madikte ini mbeyne danuh, metakwa yis hiyakni ku nuhawkanavrik kennesa danuh. Nah kennesa nudawnhan ke wotbe nah kuwis anumekube pareket.

³⁴ Hiyeg ku pariye amedgenevwi inin avim ini hawkri, avit ignes madikte miyarap ayipa inakni madikte danuh gitkisnek ku samah nuwnuh. Ihanabay inakni nuwnuh. Henewatbaki in.

³⁵ En biyuke, waxri biyuke, heneme nuwnuh ka biyuk.

Yuma hiyeg ahiyekten ku kavim Jesus danuh atan akiw

³⁶ — Heneme nah danuh pahaye adahan. Yuma hiyeg ahiyekten ku kavim nah diyuh. Ine ahj inurikyenevwi ka hiyak. Ine nahwa Uhokri gikamkayh nah kawnata hiyak. Ignewa Wigwiy hiyak.

³⁷ Nah ku pariye wageswe awayg amadgaya inin, ku aysaw nah danuh atan akiw, hiyeg gihiyekemnikis hawata ke hiyeg gihiyekemnikisbe minikwak ku kavim amekene Noé amadga inin.

³⁸ Mmanawa avim ini hawkri avit un digisase waxri ignes ka aminama giw Uhokri. Igkis axnes, higepnes, maripkewnes, ku samah inpawa gikehnikis he ku aysaw ini hawkri danuh adahan ig amekene Noé katapte amadgat ginawya.

³⁹ Igkis ka pukuhpawnema aynesnima avit ku pariye me danuhmet, he un digisase waxri in aniksasevgikis madikte. Nudawnhan hene, nah ku pariye wageswe awayg amadgaya inin.

⁴⁰ Avim ini hawkri nudawnhan, piyana gikebikis awaykemni ay amadga giwasrakis. Pahavwi iwepka, pahavwime ikiswika.

⁴¹ Hawata akiw piyana gukebikis tinogben kukwanos payak. Pahavu iwepka, pahavume ikiswika.

⁴² Pukuhpawnabay nikwe. Mmanawa yis ka hiyaknima ku kabet nah yikivara danuh.

⁴³ Misakwanabay ahegbet takunipti. Wake pahavwi payt akivara hiyaknibe ku kabet amepye danuhbe givinekut, ig pukuhpawnakam adahan ig mpitig marihwa ig ka parak amevwiye atere.

⁴⁴ Yisme kawnata hiyaknima ku kabet nah danuh, nah ku pariye wageswe awayg amadgaya inin. Nah danuh pahaye adahan. Amawka ku yis ahegbet takunipti.

Ikawnabay ke kibeyne ibuktibe gidahan Uhokri

⁴⁵ — Ikawnabay ke kibeyne ibuktibe. Ku pahavwi ibukti hiyakemniye, ku ig kis adahan gikivara iveg givitit, nikwe ku gikivara tivikwiye, avit gitepkemni igme avuriwkis gibukvig nawenyevwi ta git. Pisenwa nikwe ig tivik. Igme gibuk misekwe. Ig ikene gimanakis mpuse hawkri.

⁴⁶ Ku aysaw ner gikivara diyuh atere akiw, ku ig uti ig gibuk avuriwnene gibukvig kabayntiwa, nikwe ig iki git ka aynsima kabayka.

⁴⁷ He ig avuriwkis madikte gewkanbet ta giwakurit ner gibuk. Ihanabay inakni nuwnuh. Henewatbaki ig keh. Nah hawata nah keh yikaknek.

⁴⁸ Heneme ku ner gibuk mbeyevye gihiyekemni, ku ig ka avuriw gibukvig kabayntiwatma, ig ner ka uti kabayka. Kawa. Nawenetke ig ivegminene gihiyekemni, ig awna: “Nukivara ka ayta kibehtenwatma. Ig ayivwihwe ka aynsima akiw.”

⁴⁹ Ayge nikwe ig kavusa biwh giyakivwi ibukti, ig kayhsaw amin axka, amin higapka, ig uwkihwene gikakkis hiyeg uwkihwatruvye.

⁵⁰ Ayteke ku aysaw ig ka wahapnigma pahaye adahan ig gikivara danuhnek. Ig danuh ku aysaw gibuk ka iknima adahan ig danuh.

⁵¹ Ayge nikwe ig katiwnise gitaraksan ta git gibuknek. Ig sarayhkiswig ta arimkanit ini iwetrit gidahankis neras ku pariye ikawnamahkis ke wotbe ignes kibeynevwibe hiyeg bawa igkis pi mbayte giwkis nawenyevwi hiyeg. Ayge ku kiney hiyeg tihebdi. Ignes kagah gaybukis.