Matews 23 - Uhokri Gahegbetawni Nukune akak Sawmus

Farizewkis ikaw kibeyne he kiniseknenen

¹ Ayteke ig Kiyavwiye Jesus kinetihwa akiw gitkis neras hiyeg pahabunene gikakkis gikannuhnivwi. Ig awna gitkis:

² — Neras kannuhekevutnevwi amin amekene Moís gikumadukan gikakkis neras farizewkis igkis kadahan gikiytanikis adahan akkamnih yit amekene Moís gikumadukan.

³ Ayge nikwe amawka yis ihpa giwnkis. Amawka yis keh ku samah igkis awna yit adahan ku pariye amawka yis keh. Heneme ka ba yi ahehpa gikehnikis. Mmanawa igkis ekkenes amekene Moís gikumadukan, heneme igkis ka keh ku samah in awna.

⁴ Igkis mpiksaptih hiyeg adahan ignes iha kumadukaki ku pariye mahikonene adahan ignes ihpin, igkisme ka ihpin aynesnima. Igkis ikaw ke pahavwibe ku pariye mpiksaptih gikebyi adahan ig hiyuh awiyka giduhyamadga, heneme igwa ka hiyuhkere ini awiyka, ine ig ka daxkere akak pahatnema giwak.

⁵ Madikte kabayka ku pariye igkis keh igkis kehpin adahan igkis hiyapka gavitkis hiyeg adahan igkis ikaka ku igkis kibeynevwi hiyeg. Igkis tamak ka aynsima iwit ariwntak Uhokri giwn amadga kagta igkis wanakni ay giwanminkis, ay gidevakis adahan areketni ku igkis ka miyeh Uhokri gihiyekemni. Bawa waditnevyenen. Igkis kawihni he areketninen ku igkis kibeyne hiyeg. Hawata akiw igkis ba gibetkatunkis wewnamahkis ariku gibereswetnikis.

⁶ Hawata igkis batek bat amadga epti kiyatyo abet fet. Hawata igkis batek bat amadga epti ku pariye pi kiyattenene ariku leglis.

⁷ Hawata igkis batek hiyeg aytnihgikis higiwmadga akak kiyathaki. Gitkis ka kis adahan hiyeg kanumgikis giwavrikkis. Igkis pi batekte hiyeg kanumgikis “kiyavwiye nukannuhten”.

⁸ Yisme amawka yis ka kanumkiswa ku yis hiyeg gikannuhtenkis ke wotbe yis gavitminkisbe. Mmanawa wixwiy madikte hehpekuye ukiytaniwiy ke wotbe wixwiyweke pakebyeknebe. Wixwiy kadahan pahavwiwa ukannuhtenwiy. Ig aynte inurik.

⁹ Ine ka yi muwaka kighaw git pahavwinema hiyeg amadgaya inin adahan yis kanumgi “niguh” mmanawa wixwiy madikte pahavwiwa Wigwiy inurikyene.

¹⁰ Ine ka yi muwaka kanumkiswa ku yis hiyeg giwewkistenkis. Mmanawa wixwiy madikte pahavwiwa uwewkistenwiy. Ignewa Cristo ku pariye Uhokri gikanyan adahan ukumaduketniwiy.

¹¹ Ku pariye yaytak yavitmin madikte amawka ku ig ka kabukhaw yit. Amawka ku ig ikaw ke wotbe ig yibukbe.

¹² Ku pahavwi ikewkere pi kiyatte mpiya pahavwi, igi Uhokri wiwhe gikiytani givititaknek. Heneme ku pahavwi ikewviye ke wotbe ig yumahbe gikiytanibe, igi Uhokri iki gikiytani givititnek.

Farizewkis uti mbeyne ka aynsimanek

¹³ — Akayih. Aysawnemenek yis kannuhekevutnevwi amin amekene Moís gikumadukan yis farizewkis, yis hiyap mbeyne ka aynsimanek. Yis ikewne ke wotbe yis kibeynevwibe hiyeg bawa yis pi mbayte giwkis nawenyevwi hiyeg. Yis kannuhwa amin Uhokri giwn, yis ik adahan yis woka Uhokri gikumadukan ta gitkis hiyeg, heneme yis sabukwin giwkis. Yis ka ihpin ine yis ka isaksa nawenevwi hiyeg adahan ignes ihpin.

¹⁴ — Akayih. Yis kannuhekevutnevwi amin amekene Moís gikumadukan yis farizewkis, aysawnemenek yis hiyap mbeyne ka aynsimanek. Yis ikewnevwi ke wotbe yis kibeynevwibe hiyeg bawa yis pi mbayte giwkis nawenyevwi hiyeg. Yis wiwh madankunovwi guvinkis guwkis payak akak gewkanbetkis, heneme yis piriyepkaw kiyabawkad marihwa hiyeg ikiyi ku yis kibeynevwi hiyeg. Aysawnemenek Uhokri hiyapkis mbeyne ka aynsima yitnek avatra ini yihiyekemni. Avim ini yis pi hiyapte mbeyne giwkis nawenyevwi hiyeg taraksavye.

¹⁵ — Akayih. Yis kannuhekevutnevwi amin amekene Moís gikumadukan yis farizewkis, aysawnemenek yis hiyap mbeyne ka aynsimanek. Yis ikewne ke wotbe yis kibeynevwibe hiyeg bawa yis pi mbayte giwkis nawenyevwi hiyeg. Yis keh yiwewvan muwapuw ahakwew parahwokwa amadga wayk adahan yis yivewkan wagesne hiyeg gidahan Uhokri. Heneme ku aysaw yis uti pahavwi yis wages gihiyekemni pi mbayte ariw yidahan yihiyekemni he ig humaw ke wavityeyanbe mpiy yis pimavut akiw.

¹⁶ — Akayih. Yis hiyapkiska mbeyne yit ka aynsimanek avatra ku samah yis ikewne hiyeg gihwitentenkis bawa yis motavye abet yihiyekemni awaku yis he aharitnenen gikakurakis. Nah akkite yit ku samah. Yis awna: “Ku pahavwi kanum Uhokri Givin gawneve ku giwn ka kiniskama, nikwe ku ig kehkere ku samah inakni giwn ig kehni, ku kawk, ig ka mpiksaw kehni. Heneme ku pahavwi kakanhaw karukri wahano adahan Uhokri Givin, ku ig kanum nor karukri wahano gawneve, nikwe ini areketni ku henewa ig ka kinis, ig inyewa kehnek ku samah giwn.”

¹⁷ Yis madikte motavye abet yihiyekemni. Yis ka hiyak hawkri aynesnima. Ka ba yis hiyap ku Uhokri Givin pi kiyatte ariw nor karukri wahano arikunano Givin? Innewa Givin ikene akiytani arit nor karukri wahano.

¹⁸ Hawata yis awna: “Ku pahavwi kanum ini kakanhawket gidahan Uhokri in gawneve ku giwn ka kiniskama, nikwe ku ig kehkere ku samah inakni giwn ig kehni, ku kawk, ig ka mpiksaw kehni. Heneme ku pahavwi kakanhaw puwikne ta git Uhokri amadga egu kakanhewket ku ig kanum ini gikan ku in gawneve, nikwe ini areketni ku henewa ig ka kinis, ig inyewa kehnek ku samah giwn.”

¹⁹ Yis madikte motavye abet yihiyekemni. Mmahkay yis pi kiyathate hiyeg gikankis mpiy ini kakanhawket gidahan Uhokri ku pariye ikene akiytani arit gikankis?

²⁰ Ku pahavwi kanum egu kakanhawket gawneve nikwe pugamawka henewa ig ka kinis. Mmanawa amun ini, eg kakanhawket humaw gawneve payak akak madikte ku pariye ay nimadga.

²¹ Hawata akiw, ku pahavwi kanum Uhokri Givin gawneve nikwe pugamawka henewa ig ka kinis. Mmanawa amun ini, in Uhokri Givin humaw gawneve payak gikak Uhokri ku pariye kavinene ayge.

²² Hawata akiw, ku pahavwi kanum inurik gawneve nikwe pugamawka henewa ig ka kinis. Mmanawa amun ini, in Uhokri giwetri humaw gawneve payak gikak Uhokri ku pariye aygnene.

²³ — Akayih. Yis kannuhekevutnevwi amin amekene Moís gikumadukan, yis farizewkis, aysawnemenek yis hiyap mbeyne ka aynsimanek. Yis ikawnema ke wotbe yis kibeynevwibe hiyeg bawa yis pi mbayte giwkis nawenyevwi hiyeg. Yis kakanhaw git Uhokri ariwntak madikte yamutra he madikte nopsanyuvwinene yamutrebdi. Yis wiwh pahakti ariwntak mpuse gaytakkis madikawku adahan yis kakanhaw git Uhokri. In kabay, heneme yis ka iha nawenyewatma Uhokri gikumadukan ku pariye pi kabaytenene. Yis ka keh wadit gikakkis yiyakivwi hiyeg. Yis yumahwa amnihka ay abet yihiyekemni. Yis yumahwa yikamaxwan givitit Uhokri. In kabay yis kakanhaw git Uhokri, heneme kiskama yis wew akak inakni gihiyekemni madikte.

²⁴ Yis ikewne hiyeg gihwitentenkis bawa yis motavye abet yihiyekemni. Yis kewa pahavwi awaygbe ku pariye hiyap pahavwi yu nopsesa ay ahakwa gihigvan ig wiwhpin akak madikte gasana. Heneme ig ka aminama ariw pahavwi puwikne “kamelu” aygwata ahakwa gihigvan. Ig dakerevgi pahavwite. Henewatbaki yis. Mmanawa yis ka aminama ariw yitaraksan ku pariye pi mbaytenene.

²⁵ — Akayih. Yis kannuhekevutnevwi amin amekene Moís gikumadukan yis farizewkis, aysawnemenek yis hiyap mbeyne ka aynsimanek. Yis ikawnema ke wotbe yis kibeynevwibe hiyeg bawa yis pi mbayte giwkis nawenyevwi hiyeg. Yis barewarika yigobla akak yimewkan adahan in barewarikave giwtrik Uhokri. Ayteke yis kivunsin akak ariknebdi ku pariye yamevwi ku pariye yimirihwan.

²⁶ Yis farizewkis yis motavye abet yihiyekemni. Amawka pitatye yis wiwh ini patahwaki arikutak yigobla amadgatak yimewkan. Ku yis wiwhpin madikte ayteke, ayge nikwe in barewarikave giwtrik Uhokri.

²⁷ — Akayih. Yis kannuhekevutnevwi amin amekene Moís gikumadukan yis farizewkis, aysawnemenek yis hiyap mbeyne ka aynsimanek. Yis ikawnema ke wotbe yis kibeynevwibe hiyeg bawa yis pi mbayte giwkis nawenyevwi hiyeg. Yis kewa imewtibe ku pariye tamaktaka seyne. In barewye awkinenwa nivitiw heneme mikahrikinen ayge ariku.

²⁸ Yis ikewne ke wotbe yis kibeynevwibe ta gitkis hiyeg bawa ay abet yihiyekemni yis kivun akak kinisaka hawata akak patahwaki.

²⁹ — Akayih. Yis kannuhekevutnevwi amin amekene Moís gikumadukan yis farizewkis, aysawnemenek yis hiyap mbeyne ka aynsimanek. Yis ikawnema ke wotbe yis kibeynevwibe hiyeg bawa yis pi mbayte giwkis nawenyevwi hiyeg. Yis keh barewye payt adahan gimewkis Uhokri gawnevevu pitatyevwi, yis barewha gimewkis hiyeg kibeynevwi.

³⁰ Yis awna: “Wake usuh aybe minikwak ku samah uhawkrivwi aynete amadga hawkri, usuh ka kehkam ku samah gikehnikis, usuh ka umahkam Uhokri gawnevevu.”

³¹ Bawa nutuh ku samah yis awna inakni, yis ekkewne ku yis gihiwhivwikis neras ku pariye umahavevye Uhokri gawnevevu. Yis humaw hawata giwetnikiswata.

³² Kuri hiyawa yisme pisenwehe ini mbayka ku pariye yahawkrivwi kavuse.

³³ Yis kaybunyene hiyeg pahaywotneyevwi hawata ke yahawkrivwibe! Yis ikaksaka adahanikwa ini iwetrit ku kiney kane aynsima kayahwaki. Yuma ariknawnema hiya yimaptankanek ariw ini mbeyne.

³⁴ Aysawnemenek nah awahkis yimin nawenyevwi nawnevevu, nah awahkis yimin hiyeg hiyakemniyevwi, nah awahkis yimin kannuhekevutnevwi amin Uhokri gihiyekemni. Gaytakkis yis umahavevgikisnek. Gaytakkisme yis daddahavevgikisnek aminat ah. Gaytakkisme akiw yis biptavevgikisnek akak tigay ay ariku yileglisa, yis haraksavevgikisnek avititak paha paytwempu danuhte avitit nawenyewa paytwempu akiw.

³⁵ Inneki keh ig Uhokri diyuhkisnek gimigkis ta yivitit. Ig diyuhkis gimigkis madikte hiyeg kibeynevwi ku pariye umahavepka amadga inin. Ig diyuhkis ta yivititnek gimigkis madikte gawnevevu ku samah giwenketeke amekene Abew gimig he danuhe ta git amekene Zakariyas gimig. Ig amekene Zakariyas igi ner amekene Barakiyas gikamkayh ku pariye umehpika ayegbi Uhokri Givin akak kakanhawket.

³⁶ Henewa ig diyuhkisnek gimigkis ta yivitit yis ku pariye amedgenevwi hawkri ku akak inin. Ihanabay inakni nuwnuh. Henewatbaki ku samah nah awna yit.

Jesus kadni gidahankis jerusalémyenevwi

³⁷ Ayteke ig Kiyavwiye Jesus awna akiw. Giwn: — Aa, yis jerusalémyenevwi, yis jerusalémyenevwi, yis umahave Uhokri gawnevevu. Yis padaktave madikte hiyeg ku pariye Uhokri gawahkisni yimin. Bawa ka aynsima hawkri nah muwaka kavigsay ke pahavu takarakbe awahpusano gukamkayh anavi guhanpi, hiyaksa yisme ka muwaka hene.

³⁸ Aysawnemenek yiwetri misekwe inworenek. Uhokri ka avuriwni akiw.

³⁹ Yis ka takunima hiyavun akiw he ku aysawnemenek metakwa yis ahegbet adahan amavan, yis awna nutuhnek: “Kibeyne pis danuh. Pis ayta giwntakwa Uhokri.” Ihanabay inakni nuwnuh. Henewatbaki in.