Matews 22 - Uhokri Gahegbetawni Nukune akak Sawmus

Wixwiy axnek git Uhokri

¹ Ayteke ig Kiyavwiye Jesus awna nawenyewa iwit patuwesbuhka ta gitkis akiw. Ig awna:

² — Nah akkite yit ku samah Uhokri gikumadukan. Ig Uhokri kewa pahavwi ikivaratbe ku pariye kehne fet adahan maripkawka gidahan gikamkayh.

³ Ig awahkis gibukvig tahan watiha gawnasanvu. Igkisme gawnasanvu ka ayta fetya gikak.

⁴ Igme ikivarat hiyapni hene, ig awahkis nawenyewa gibukvig giminkis akiw. Ig awna gitkis: “Su yi atak akka gitkis nawnasanvu ku nah kuwis ahegbete madikte axka. Nah kuwis umahkise nuviguh pak. Nah kuwis umahkise pak akamkayuvwi ku pariye aynengarudi. Madikte kuwis ahegbet. Wani igkis ayta ax nukakuh.”

⁵ Igkisme gibukvig atere utevgikis. Igkis ekke gitkis inakni gikivarakis giwn. Igkisme gawnasanvu ka aminama giwkis. Igkis tivik kannivwiyekuye. Pahavwi tivik ta giwasrakat, pahavwime tivik kannivwiye piyuket.

⁶ Igkisme gasemnekis kamaxave gibukvig. Igkis arewhe gitkis. Igkis umahavegikis.

⁷ Ayteke ig ner ikivarat hiyapni hene, ig dagawne. Nikwe ig awahkise gisuwtatavu giminkis neras umehekevutnevwi. Ignesme umahavevgikis, bukahave givinkis.

⁸ Ayteke nikwe ig ikivarat awna gitkis gibukvig: “Fet kuwis ahegbet, heneme nawnasanvu ka kis adahan igkis ax nukakuh.

⁹ Su yi atak wew ta avigkut madikte ahin. Ayge yis awnasa madikte hiyeg ku pariye yiwitwan adahan ignes ayta fetya nukakuh.”

¹⁰ Igkisme gibukvig ihe giwn. Igkis tivik atere avigkute ahin. Igkis pahadguhave madikte hiyeg ku pariye giwitwankis ayge, hiyeg ku pariye ikaka kane kibeynevwima payegbitak gikakkis hiyeg ku pariye ikaka kibeynevwi. Ayge nikwe fet avin kivun akak hiyeg.

Ku pariye patehwevye igi ka hiya igma parak ta git Uhokri

¹¹ — Ayteke nikwe givin kuwis kivun, ig ner ikivarat pareke atere adahan iwasevye gawnasanvu. Ayge ig hiyap pahavwi awayg ku pariye ka amava ini simis barewbetye adahan ig kawihni abet maripkawka.

¹² Ig hiyapni hene, ig ayavgi: “Nukagmada, pis yuma pisimsa barewbetye adahan pis fetya adahan maripkawka. Mmah piverekepni atan?” Igme ner awayg ig ka ik adahan ig kaytwa pahatnema iwit.

¹³ Nikwe ner ikivarat awna ta gitkis gibukvig. Ig awna: “Asa wanakminenay giwan payak akak gibagwan. Ayteke yis padekwig ta kabaywakat, ta abetit amisnavyad, ku kiney hiyeg tihebdi ignes kagah gaybukisnek.”

¹⁴ Mmanawa ig Uhokri awnasa ka aynsima hiyeg adahan ignes danuh ta git, heneme ig kaniy ka kiyesradima adahan ignes misakwa ay gimun. Henewatbaki ig Kiyavwiye Jesus awna.

Ikinay git Uhokri madikte ku pariye kawih gidahan

¹⁵ Ayteke ariwnteke ini igkis farizewkis tivik ahegbete ginetnikis adahan igkis hiyap ba igkis keh Kiyavwiye Jesus awna iwit taraksebetnema adahan igkis gimetkepten.

¹⁶ Ayteke nikwe igkis awahkise gikannuhnivwi payak gikakkis Erodis gihiyegavu gimin Kiyavwiye Jesus. Igkisme danuh atere, igkis awna git: — Kiyavwiye, usuh hiyak ku pis waditye hiyeg. Pis ka awna mpusema iwit gidahankis hiyeg. Pis awna pahatwowa iwit gitkis madikte hiyeg. Hiyawa hiyeg gihiyekemnikis nawenyewa ariw pidahan, heneme in ka sam ta pit. Pis awna pahatwowa iwit. Pis akka Uhokriyewa gihiyekemni gitkis.

¹⁷ Ayge nikwe usuh muwaka hiyak pahat hiyakemniki. Uya akki wotuh. Ig Sezar neras romayenevwi gikivarakis ig mpiksaptih wixwiy judeyenevwi adahan wixwiy katiwnihgi. Ba wadit adahan wixwiy katiwnihgi? Ba ka wadit?

¹⁸ Igme Kiyavwiye Jesus hiyak ku gihiyekemnikis in mbeyevye igkis awna inakni adahan gikinsepten. Ig hiyapni hene, ig kaytwa giwnkis: — Yis ikawnamah ke wotbe yis kibeynevwibe hiyeg bawa yis pi mbayte giwkis nawenyevwi hiyeg! Mmahki yis ayta nuhikekten hene?

¹⁹ Akkanay nutuh pahamku kirehka ku pariye wis kawih adahan katiwnih kiyavwiye Sezar. Igkisme timapni hene, igkis iwe pahamku karukri igkis ewkwig ta git.

²⁰ Ayteke nikwe ig ayavgikis: — Pariyeva kahehpakye gumadga nor kirehka? Pariyeva kiwye ay gumadga?

²¹ Igkisme kaytwa giwn: — In kiyavwiye Sezar giw akak gahehpak. Igme kaytwa giwnkis: — Nikwe nor karukri kawih gidahan kiyavwiye Sezar. Hiyawa wixwiy ikevgu git. Heneme amawka ku wixwiy iki ta git Uhokri madikte ku pariye kawih gidahan Uhokri.

²² Igkis timapni inakni giwn hene, igkis wakaymnibdi ka aynsima. Ayteke nikwe igkis maytevgi. Igkis tivik.

Wixwiy kannikaw ariw umiremniwiynek

²³ Avimnewa ini nawenyevwi hiyeg danuh atere git Kiyavwiye Jesus akiw. Igkis sadusewkis. Gitkis sadusewkis hiyeg miyap ignes pisenwe gihawkankis igkis ka kannikaw akiw.

²⁴ Igkis danuh atere, igkis awna git: — Kiyavwiye, amekene Moís awna: “Ku pahavwi hiyeg miyap guw gihayo, ku ig yuma gikamkayh gukak egu gihayo, amawka gikebyi maripkaw gukak egu giwgun marihwa eg kakamkayh hawata ke wotbe ignebe gikebyibe kakamkayh gukakbe.” Henewatbaki ig amekene Moís gikumadukan awna.

²⁵ Kuri, minikwak ntewnehker gikebikis ay ukakuh. Ig eggutye maripkew gukak pahavu tino. Ayteke ig miyap kawke ig kakamkayh gukak. Ig ikise gihayo ay giwaku gisamwi.

²⁶ Ayteke nikwe ig gisamwi givun maripkew gukak egu giwgun. Ig hawata ig miyap guw. Ig kawnata kakamkayh gukak. Ayteke nikwe ig gisamwikis gimamnampiye ig hawata ig maripkew gukakwata akiw. Hene madikte neras ntewnehkernene gikebikis miyarapwata.

²⁷ Pisenwa egme hawata eg miyop.

²⁸ Kuri, Kiyavwiye, usuh ayapi. Aysawnemenek avim ini ku aysaw hiyeg kannikew ariw gimiremnikis, pariyevahki gibetitakkis neras ntewnehkernene gikebikis darihgu? Mmanawa igkis madikte maripkewnekuye gukak.

²⁹ Igme Kiyavwiye Jesus kaytwa giwnkis: — Yis tarakse mmanawa yis ka pukuha Uhokri gannasan ine yis kawnata hiyak ku samah Uhokri gidatni.

³⁰ Aysawnemenek avim ini ku aysaw hiyeg kannikewbet ariw gimiremnikis, ayge ignes ka maripkaw akiw. Igkis misakwa henep ke ahjbe.

³¹ Kuri uyay kinetihwa amin wixwiy hiyap ba hiyeg kannikaw ariw gimiremnikis. Mmah yis kote ivegbohate ku pariye Uhokri awna ta yit?

³² Ig awna: “Nahnewa kuri Abraawh giwohkiga, nahnewa kuri Izaki giwohkiga, nahnewa kuri Jakó giwohkiga.” Inakni iwit akki wot ku igkis gidukweneswa igkis iveg. Ig Uhokri kawki miyaravyema giwohkigakisma. Ig hiyeg ivegnene giwohkigakis.

³³ Neras hiyeg kabubuknene ayge igkis timapni inakni iwit hene, igkis wakaymnibdi ka aynsima.

Uhokri gikumadukan adahan wis batek gikak Uhokri mpiynevevye, inakni pi kabayte ariw madikte kumadukaki

³⁴ Ayteke neras farizewkis time Kiyavwiye Jesus gak ku ig mateke neras sadusewkis akak giwn. Igkis timapni hene, igkis pahadguhwe atere git.

³⁵ Ayge pahavwi gaytakkis, ig kannuhekevutne amin amekene Moís gikumadukan, ig ayavgi pahat ayapka adahan gihikekten.

³⁶ Ig awna: — Kiyavwiye, pariyeva Uhokri gikumadukan pi kabayte ariw madikte kumadukaki?

³⁷ Igme Kiyavwiye Jesus kaytwa giwn: — Nah akkite yit ku pariye gikumadukan pi kabaytenene: “Batek gikak Kiyavwiye Uhokri akak madikte piyakni. Batek gikak akak madikte pibetki. Batek gikak abet madikte pihiyekemni.”

³⁸ Inakni gikumadukan pi kiyatte pi kabayte ariw madikte kumadukaki.

³⁹ Ayteke ariwnteknewa inakni iwit ay pahat gikumadukan akiw ku pariye pi kabayte ariw madikte kumadukaki: “Batek gikakkis piyakivwi hiyeg hawata ku samah pis batek akak pivit.”

⁴⁰ Inakni pitenemnene gikumadukan in huwase amekene Moís gikumadukan akak Uhokri gawnevevu giwnkis madikte.

Cristo ignewa amekene Davi gikivara

⁴¹ Ku samah igkis farizewkis pahadguvu ayge, ig Kiyavwiye Jesus ayavgikis:

⁴² — Mmahpa yivewkan gimin Cristo, ig Uhokri gikanyan adahan ukumaduketniwiy? Pariyeki gihawkri? Igkisme kaytwa giwn: — Ig Cristo ig kahawkriye amekene Davi.

⁴³ Igme Kiyavwiye Jesus ayavgikis: — Heneme igwa amekene Davi kanumgi “nukivara”. Inakni iwit ikepka git gavit Uhokri Gitip minikwak. Avim ini ig awna:

⁴⁴ “Ukivarawiy Uhokri awna ta git nukivara Cristo. Giwn: ‘Batnaba ay nuhumwa kihehaptak amun inin iwetrit kiyatye ku samah nah sibuhkisnete pivetunyavu pit.’”

⁴⁵ Ka ba yis hiyap igwa amekene Davi ka kanum Cristo “nuhiwhi”? Ig kanumgi “nukivara”. Ig Cristo ka he gihiwhinenwatma. Ig hawata ig gikivara.

⁴⁶ Neras hiyeg timepnevwi ayge igkis ka hiya adiyasak ginetni aynesnima. Ariwntak ini igkis ka kiboka ayavgi akiw.