Matews 21 - Uhokri Gahegbetawni Nukune akak Sawmus

Jesus parak ta avitit jerusalém

¹ Ayteke igkis tivikwiye akiw. Igkis kennesmin gidawnhankis arimkanit paytwempu Jerusalém, igkis danuh ta avitit paha paytwempu nopsesa kewye Betfaje ayge avit ini waxri imuwvitnene kewye Olivegvit. Ayge ig Kiyavwiye Jesus awahkiswiye piyana giwatnivwi adahan igkis atak sunepnes gidahan kaway.

² Ig awna gitkis: — Ataknay avitit inin paytwempu nopsesniye pahambakaytak. Parakantenwa yis hiyap pahavu kaway “jumenta”. Ayge eg wanak payak akak gukamkayh. Wataknigkis waxwanigkis atan nutuh.

³ Ku hiyeg ayge awna yitnek: “Mmeneki yis dax?” yisme kaytwa giwnkisnek: “Kiyavwiye muwakavgukis. Ig ka ayivwihwa, ig diyuhkiswigkis atanewa akiwnek.”

⁴ Ini danuh hene kahadbe in kahayak ku samah Uhokri gawneve awna minikwak. Ig awna:

⁵ “Awnanabay ta gitkis hiyeg siyawhyenevwi: ‘Sarayhnay yivegi. Yikivara nehmnik. Ig ayta yimkat. Ig ikewvi ke wotbe ig yumahbe gikiytanibe. Mmanawa ig ka kaniy kaway barewyema adahan giwewkisten, heneme ig bat giduhyamadga pahavwi ku pariye pi mbaytenene ariw madikte, ig nopsesa kawayan, ig kaway ibukti gukamkayh.’”

⁶ Ayteke nikwe igkis giwatnivwi tivik. Igkis ihe Kiyavwiye Jesus giwn.

⁷ Pisenwa igkis diyuhe waxwe nor kaway payak akak gukamkayh ta gimkanit Kiyavwiye Jesus. Igkis danuh atere, igkis ambohe gidagmanvitkis ta giduhyamadgatkis. Pisenwa ig Kiyavwiye Jesus sarayhwe giduhyamadgat ner kawayan.

⁸ Ka aynsima hiyeg ayge igkis hiyapni hene, igkis awna: — Uyay amavig kabayntiwa. Uyay barewha ahin gavit pitati. Igkis awasavrike ahin akak gidagmanvitkis. Gaytakkisme ihuke ahamna ke kariktimnabe. Igkis awasavrike ahin nikak.

⁹ Neras hiyeg kuruwhpiye gavitkig gikakkis neras kuruwhpiye gihavu butte igkis kabiman: — Kibeyne gidahan Kiyavwiye Jesus, ig ukivarawiy hawata ke amekene Davibe. Uhokri gabay gikaknek ner ku pariye ayta giwavrik Uhokri. Kibeyne gidahan Uhokri!

¹⁰ Ayteke ig Kiyavwiye Jesus pareke avuwit paytwempu Jerusalém. Madikte paytwempuyenevwi ayge igkis hiyapni hene, igkis wakaymnibdi. Igkis aya: — Pariyenekig ner hiyeg?

¹¹ Neras hiyeg ku pariye kabubuknene ganwa igkis kaytwa giwnkis: — Ner Uhokri gawneve Kiyavwiye Jesus. Ig ariwntak paytwempu Nazaré aynte Galileyamnaw.

Jesus ivukwave piyuknevwi arikutak Uhokri givin

¹² Ayteke ariwnteke ini ig Kiyavwiye Jesus pareke ta arikut ini leglis kewye Uhokri Givin. Ayge ig ivukwave madikte neras ku pariye piyuknevwi kakanhawka puwikne kuhivra gikakkis neras ku pariye isimnevwi ayge. Ig tukuhave gaxtenkis neras ku pariye uniyehkevutnevwi karukri. Ig tukuhave gevwikis neras ku pariye piyuknevwi tukwa.

¹³ Pisenwa ig awna ta gitkis: — Uhokri gannasan awna: “Inin nuvinuh in piriyepkewket.” Yisme kehne Givin humaw amevwiket.

¹⁴ Ayteke ariwnteke ini hiyeg motavye danuh atere git ayge ariku ini leglis. Hawata akiw hiyeg miyavuvye danuh atere git. Ig hiyapni hene, ig piyihpigkis.

¹⁵ Igkisme neras muwveg kiyatyevwi gikakkis neras kannuhekevutnevwi amin amekene Moís gikumadukan igkis hiyapni hene, igkis ka batek. Igkis hiyap ig keh kibeyne annut. Igkis hiyap madikte bakimnayh ayge ignes kabimenenes. Giwnkis: — Kibeyne gidahan Kiyavwiye Jesus. Ig ukivarawiy hawata ke amekene Davibe. Igkisme timapni inakni hene, igkis dagawnebdi.

¹⁶ Ayge nikwe igkis awna ta git Kiyavwiye Jesus: — Ka ba pis timap inakni giwnkis? Igme Kiyavwiye Jesus kaytwa giwnkis: — Ihi, nah timap. Mmah yis ka ivegbohati Uhokri gannasan ku kiney in awna: “Pis keh he bakimnayh nopsanyovwinene kabayhap kabayntiwa payak akak bakimnayh nukuvesniyevwi.”

¹⁷ Ayteke nikwe ig Kiyavwiye Jesus ikiswigkis. Ig pese avuwitak paytwempu Jerusalém. Ig danuh ta avitit paytwempu Betaniya. Ayge ig mpiyase mitipka.

Jesus huruhruse pahakti ah adahan areketni ku wis akak ukehbetanenwa, wis ka hiya wisma keh Uhokri gibetki

¹⁸ Hewke akiw ig Kiyavwiye Jesus diyuhpiye ta arimkat paytwempu Jerusalém akiw. Ig mativwe.

¹⁹ Ig hiyap pahakti ah akat ayge akigbimna ahin. Nor ah akat kewyo “figeyra”. Ig hiyapni hene, ig atere iwasene guw. Heneme ig danuh atere yuma guwisima. Ig uti he gavanenwa. Nikwe ig awna ta gut nor ah akat. Giwn: — Pis ka takunima kew akiw. Aynewa eg huruhrup.

²⁰ Igkis gikannuhnivwi hiyapni hene, igkis wakaymnibdi ka aynsima. Igkis awna: — Mmahki nor ah akat huruhrup hene pahaye adahan?

Wake wis kamaxwa givitit Uhokri madikte wayapni git humaw wot

²¹ Igme Kiyavwiye Jesus awna gitkis: — Ku yis aya git Uhokri akak madikte yikamaxwan, ku yis hiyak ku inyewa in yayapni git in humaw, nikwe madikte ku pariye yayapni git in humaw yitnek. Ik adahan yis keh mpiy ku pariye nah keh gukak nor ah akat. Ik adahan yis awna ta arit inin waxri imuwadnene: “Waxri, pis tivik ayteke. Su padakwa ta ahakwat parahwokwa.” Ku aysaw yis awna inaknikam inme higihwanek ayteke. Ihanabay inakni nuwnuh. Henewatbaki in.

²² Ku yis kamaxwa givitit Uhokri, madikte yayapni git humaw yitnek.

Kariwntak Jesus uti gikumadukan?

²³ Ayteke ig Kiyavwiye Jesus tivik pareke Uhokri Givinekut. Ku samah ig kannuhekne ayge, neras muwveg kiyatyevwi gikakkis judeyenevwi giwewkistenkis igkis patiptakig atere. Igkis ayavgi: — Mmahki pis keh inin ku pariye pikehni ay? Kariwntak pis uti pikumadukan adahan pis keh hene?

²⁴ Igme kaytwa giwnkis: — Nah hawata ayavyi pahat ayapka. Ku yis akkamnihni nutuh, nikwe nah hawata akkamnih yit ku kariwntak nah uti nukumadukan adahan nah keh hene.

²⁵ Uyay akki nutuh. Kariwntak Joawh Batistamni uti gikumadukan adahan ig kaywa hiyeg? Ba giwntakwatma Uhokri? Ba kawk, ba he giwntakkisnenwa hiyeg amadgaya inin? Igkis timapni hene, igkis kinetihwa pawtak adahan ahegbeteviyes ginetnikis. Ayge igkis awna: — Ku wixwiy kaytwanek giwn ku ig Joawh Batista uti gikumadukan giwntakwa Uhokri, nikwe ig awna wotwiynek: “Mmahki nikwe yis ka iha giwn?”

²⁶ Heneme ku wixwiy kaytwanek giwn ku ig uti gikumadukan he giwntakkisnen hiyeg amadgayavu inin, nikwe madikte neras hiyeg ay hahayruke ukakwiynek. Mmanawa gitkis neras hiyeg ig Joawh Batistamni ignewa Uhokri gawneve.

²⁷ Ayteke nikwe igkis kaytwa giwn Kyavwiye Jesus: — Usuh ka hiyak ku kariwntak ig uti gikumadukan. Ayge nikwe igme Kiyavwiye Jesus awna gitkis: — Ku samah yis ka akki nutuh, nikwe nah kawnata akki yit ku kariwntak nah uti nukumadukan adahan nah kehne inin ku pariye nukehni ay.

Pahavwi iha gig giwn, pahavwime ka iha

²⁸ Ayteke ig Kiyavwiye Jesus awna gitkis akiw. Giwn: — Kuri numawkan yis watekbeta nuwnuh. Minikwak pahavwi awayg ig kakamkayh piyana gikebikis. Pahay hawkri ig danuh ta git gikamkayh eggutye, ig awna git: “Nukamkayh, ku avim inin su atak kannivwi amadga uwasra.”

²⁹ Igme gikamkayh kaytwa giwn: “Nah ka atekere.” Heneme ayteke ig ivegminene gihiyekemni, ig awna: “Ka sam. Nah atakte.” Ig tivik ta giwasraketis.

³⁰ Igme gig atak ta git gikamkayh buttye. Ig danuh atere, ig awna git inwata iwit. Igme gikamkayh kaytwa giwn: “Ihi, Pa. Nah atak.” Bawa ig ka atak.

³¹ Kuri nah ayavyi. Pariyeva gaytakkis igkis piyananene gikebikis kehe gig gibetki? Igkis judeyenevwi giwewkistenkis kaytwa giwn: — Ner gikamkayh eggutye. Ayteke nikwe ig Kiyavwiye Jesus watekbete inakni iwit patuwesbuhka gidahankis. Ig awna: — Ka aynsima hiyeg ku pariye yis iki kane kibeynevwima, ka aynsima tinogben powkemnavyo egkiskit kawih Uhokri gikumadukan yiwnek. Ihanabay inakni nuwnuh.

³² Mmanawa kuwis ig Joawh Batistamni danuh ta yit. Ig ekke yit kibeyne ahin adahan yis danuh ta git Uhokri heneme yis ka iha giwn. Nerasme hiyeg ku pariye yis iki kane kibeynevwima gukakkis noras tinogben powkemnavyo egkis ihe giwn. Hiyawa yis kuwis hiyap ku samah egkis wagese guhiyekemnikis, yisme kuviknene ka wageskere yidahan yihiyekemni adahan yis iha giwn. Yis awna: “Usuh iha giwn.” Bawa yis ka ihpin.

Yuwit patuwesbuhka amin akavriwten was kane kibeynevwima

³³ Ayteke ig Kiyavwiye Jesus awna pahat iwit patuwesbuhka akiw. Ig awna: — Ataybiswanabay. Timapnabay nawenyewa iwit patuwesbuhka akiw. Minikwak pahavwi awayg mutuhe giwasra. Giwasra “uva”vunen. Ayteke ig kiyaraniwhe ini giwasra. Ayteke ig atikeku pohow tip nopsadnano adahan kumuktet adahan wiwhne uva araku. Pisenwa nikwe ig keh avuriwket imuwad. Ayteke ig ibekhe giwasra pabakak gikakkis neras ku pariye giwasra akavriwten. Pisenwa ig tivik ta avitit nawenyewa waxri akiw.

³⁴ Ku aysaw danuh avatyavrik amutri, ig awahkise gihiyegavu ta giminkis neras akavriwten was adahan igkis iweviye gamutra guw adahan ewkwiye ta git.

³⁵ Igkisme akavriwten was igkis kamaxe gihiyegavu. Igkis bipte pahavwi. Pahavwime igkis umehe. Pahavwime akiw igkis padakte akak tip.

³⁶ Ig was akivara hiyapni hene, ig awahkis nawenyevwi gihiyegavu atere akiw pi kibite giwkis neras pitatyevwi. Igkisme akavriwten keh hawata gikakkis akiw.

³⁷ Ayteke nikwe ig was akivara awahkise igwa gikamkayh ta giminkis. Ig awna: “Nawenetke ner nukamkayh igkis kiyatha.”

³⁸ Heneme neras akavriwten was ku aysaw igkis hiye gikamkayh ig nehmnik, igkis amiyhevgi. Igkis kinetihwa pawtak, igkis awna: “Nernewa was akivara gikamkayh. Uyay umehpig mpinekata kuwewanek inin was misekwe madikte gidahan. Pi kabayte wixwiy umehpig adahan was misekwe udahanwiy.”

³⁹ Ayteke nikwe igkis kamaxwig igkis tukuhptevgi ayteke amadgatak giwasra, igkis umehpig.

⁴⁰ Pisenwa gawnan inakni iwit patuwesbuhka, ig Kiyavwiye Jesus awna gitkis: — Kuri uyay akki nutuh. Ku aysaw ig was akivara danuh atere, pariye yivewkan ig keh gikakkis neras akavriwten was?

⁴¹ Igkisme kaytwa giwn: — Ig umahkise neras akavriwten giwasra awaku igkis mbeyevye gihiyekemnikis. Pisenwa nikwe ig ibekhe giwasra pabakak gikakkis nawenyevwiwa akavriwten akiw. Ig ikepni giwakuritkis hiyeg ku pariye iki gamutra guw ta git ku aysaw danuh avatyavrik gamutra.

⁴² Igme Kiyavwiye Jesus awna gitkis: — Mmah yis ka ivegbohati Uhokri gannasan ku samah in kinetihwa amin inakniwata hiyakemniki? In awna: “Hiyeg kehne paha payt tiptiye, igkis tukuhe pohow tip. Givewkankiskam ku egu tip ka kawihkam. Bawa egu tip egu pi awaygtenano ariw madikte. Eg humaw adahan payt akoksa. Igwa Uhokri ikaksig hene. In kabayntiwa wotwiy ig keh hene.” Henewatbaki ig Uhokri gannasan awna.

⁴³ Inneki keh nah awna yit ku Uhokri gikumadukan iwepka yiwnek yis hiyeg judeyenevwi, in ikepkanek ta gitkis nawenyevwi hiyegviyenevwi akiw ku pariye ikewnevwi Uhokriyanbetnewa.

⁴⁴ Mmanawa ig Uhokri gannasan awna: “Ku pariye hiyeg teswiye ta guvitit nor tip igkis tuguhe dunibdiwarumpikisnek. Egme nor tip ku eg tuguhe givititkis hiyeg, batewbetwarumpi igkisnek.”

⁴⁵ Neras muwveg kiyatyevwi gikakkis neras farizewkis igkis timapni inakni iwit patuwesbuhka hene, igkis pukuhpe ku ig awna inakni iwit giminkis ku samah igkis tukuhptevgi.

⁴⁶ Ayge nikwe igkis mpiksew giharit adahan gikamaxwitni. Heneme igkis avisemun gibohrikis neras hiyeg kabubuknene ayge awaku ignes hiyeg iki Kiyavwiye Jesus ku ig Uhokri gawneve.