Matews 2 - Uhokri Gahegbetawni Nukune akak Sawmus

Kannuhwenevwi amin warukma igkis ayta kiyatha Jesus

¹ Ig Kiyavwiye Jesus amadga wayk avit paytwempu Belém, aynte avit waxri Judeyamnaw. Ig wayvuka avim ini ku aysaw Erodis kumadukenete izhaewyenevwi giwaxigkis. Avim ini hawkri gaytakkis awaykemni kannuhwenevwi amin warukma igkis ayta wahamavriktak adahan ta avitit paytwempu Jerusalém ku pariye kennesa arimkat paytwempu Belém.

² Igkis danuh atere, igkis ayap hiyeg: — Kineyki ig bakimni nukune ku pariye humawnek judeyenevwi gikivarakis? Usuh kuwis hiyap giwarukma pes wahamavriktak. Usuh ayta adahan usuh gikiytenitni.

³ Igme Erodis ku aysaw ig timep arak inakni giwnkis, ig wadisasew ka aynsima. Mmanawa ig ka muwaka nawenyewatma hiyeg kumaduka giwenyan. Madikte paytwempuyenevwi ayge Jerusalém igkis timapni hene ku samah gikivarakis Erodis wadisasew, nikwe igkis wadisasew hawata awaku igkis avisasew gibohri.

⁴ Ayteke nikwe ig Erodis pahadguhe madikte muwvegviyenevwi gikivarakis payak gikakkis neras kannuhekevutnevwi amin amekene Moís gikumadukan. Ig ayavgikis: — Kineyvahkinek ner pahavwi ku pariye Uhokri gikanyan adahan ukumaduketniwiy, kineyvahki ig amadgat wayknek?

⁵ Igkisme kaytwa giwn: — Ig amadgat wayk avit paytwempu Belém, ay avit Judeyamnaw. Mmanawa henewa annah givitimpi Uhokri gawneve minikwak, in awna:

⁶ “Yis hiyeg belemyenevwi ku pariye ay avit waxri Judeyamnaw, aysawnemenek yiwetri kiyathakanek gavitkis ka aynsima ikivaratviyenevwi ay avit Judeyamnaw. Mmanawa yibetitaknek pesnek pahavwi ikivarat ku pariye gihwitentenkisnek hawata gikavriwtenkisnek madikte nuhiyegavu izhaewyenevwi.”

⁷ Ig Erodis timapni hene, ig awna: — Nah kiniswite neras kannuhwenevwi amin warukma adahan nah umahkise ner bakimni. Ayteke nikwe ig watihpevgikis mownye adahan igkis ayta kinetihwa gikak. Igkisme danuh atere, ig ayavgikis: — Aysawneki ig warukma hiyapkiswe yit? Igkisme ekke git.

⁸ Ayteke pisenwa ig awahkiswigkis avitit ini paytwempu Belém. Ig awna gitkis: — Ataknay atere avitit Belém. Ivegvanay nere bakimni kabayntiwa. Ku aysaw yis utivginek, diyuhnay adahan yis iki nnetni adahan nahme atak atere kiyathig hawata ke yistabe.

⁹ Pisenwa gitimpankis inakni giwn, igkis tivik. Ayteke igkis kuwis avigku ahin, igkis hiyap ig warukma akiw, igwata warukma ku pariye gihiyvankis wahamavriktak. Ig tivik gavitkimpikis, ig misekwe wade avitmin ini iwetrit ku kiney ig bakimni misakwa.

¹⁰ Igkis hiyap ig warukma hene, igkis ka aynsima batek ginaktinkis.

¹¹ Ayteke igkis danuh atere, igkis pareke arikut ini payt. Ayge igkis ute ig bakimni gukak ginag Mahi. Igkis hiyapni hene, igkis paberetusew gitivut. Igkis kiyathevgi. Ayteke igkis woka gikiyesnikis igkis kakanhew git karukri wahano, akak imihgi, akak ah adidkan imihnevye kewye “miha”.

¹² Ayteke abetnewa garisunawakis ig Uhokri awna gitkis adahan igkis ka diyuh gimuniw Erodis. Ayge nikwe igkis diyuhe givinwatkis avigku nawenyewa ahin.

José gukak Mahi bisik avitit Ejitumnaw

¹³ Ayteke ewka giwenkis pahavwi ahj Uhokri giwatni hiyapkiswe git José garisunawak. Ig awna git: — Kannikaw. Ahekbetawnay adahan yis bisike ta avitit Ejitumnaw. Misakwanay ayge he ku aysaw nah akki pit adahan yis diyuh akiw. Mmanawa Erodis givegvetni bakimni adahan ig giwmepten.

¹⁴ Ig José timapni hene, ig kannikaw kibehtenwa ig iwe bakimni gukak ginag. Egkis pese nikwenewa tiyegem. Egkis tivikwiye tahan avitit Ejitumnaw.

¹⁵ Egkis danuh atere, egkis misekwe ayge he ku aysaw ig Erodis miyap. Madikte ini danuh hene kahadbe in kahayak ku samah minikwak Uhokri awna givitimpi gawneve. Ig awna: “Nah humeke nukamkayh avititak Ejitumnaw.”

Erodis umahkis bakimnayh

¹⁶ Ig Erodis hiyapni hene ku ig kiniswika gavitkis neras kannuhwenevwi amin warukma, ig ka aynsima dagawne. Ayge nikwe ig umahkise madikte bakimnayh awaykemni ku pariye kadahan pikana kamukri gawkis akak han buttit akiw, ay avit paytwempu Belém akak ahumwew akiw. Ig keh hene pakeku akak ku samah neras kannuhwenevwi amin warukma akka git ku kabet ig warukma hiyapkiswe gitkis.

¹⁷ Hene metakwa in kahayak ku samah minikwak Uhokri gawneve amekene Jeremiyas awna. Ig awna:

¹⁸ “Timapnay kabimanka avititak paytwempu Ramá, kennesa ahumwa Belem. Ka aynsima tihaki, ka aynsima kadniki ayge. Tinogben tihanoskis ke amakano Rakewbe eg tihano aharit gukamkayuvwi. Yuma hiyeg hiyak gaydhakkis, mmanawa gukamkaykis yuma akiw.” Henewatbaki ig amekene Jeremiyas awna.

José gukak Mahi diyuh avititak Ejitumnaw

¹⁹ Ayteke ariwnteke Erodis gimiremni, pahavwi ahj Uhokri giwatni hiyapkiswe git José garisunawak, aynte Ejitumnaw.

²⁰ Ig awna git: — Kannikaw. Ahekbetawnay adahan yis diyuhe avitit Izhaewyamnaw, mmanawa neras ku pariye muwaka giwmepten bakimni igkis kuwis miyarap.

²¹ Ig José timapni hene, ig kannikew ig iwe bakimni gukak ginag. Egkis diyuhe avitit Izhaewyamnaw.

²² Heneme avigku ahin ig José kinetni arak ku Arkilaw, Erodis gikamkayh, ig kumadukene ayge Judeyamnaw giwenyan gig. Inneki keh ig avisasew atak misakwa atere. Nikwe abetnewa garisun akiw Uhokri ekke git adahan egkis ka atak atere. Ayge nikwe egkis tivik avitit waxri Galileyamnaw.

²³ Egkis danuh atere, egkis misekwe avit paytwempu Nazaré. In danuh hene kahadbe in kahayak ku samah minikwak Uhokri gawnevevu awna. Igkis awna: “Ig Cristo kanumkanek Nazaréyene.”