Matews 19 - Uhokri Gahegbetawni Nukune akak Sawmus

Maytwawka

¹ Pisenwa inakni gawnan, ig Kiyavwiye Jesus tivik avititak Galileyamnaw gihaptikis gikannuhnivwi. Igkis diyuhe avitit Judeyamnaw pahambakaytak warik Jordawh.

² Ig Kiyavwiye Jesus danuh atere, ka aynsima hiyeg makeke gihavu butte. Ayge ig piyihpigkis.

³ Ayteke gaytakkis farizewkis danuh atere git. Igkis ayaptig adahan gihikekten ba ig awna iwit taraksebetnema. Igkis ayavgi: — Ba wadit adahan wis isaksa pahavwi mayta gihayo, ku aysaw ig maytwekerevye?

⁴ Igme kaytwa giwnkis: — Mmah yis kote ivegbohate Uhokri gannasan? Ku kiney in awna: “Humawkariwka ig Uhokri kehe hiyeg humaw awayg gukak tino.”

⁵ Ayteke nikwe ig Uhokri awna: “Ku aysaw pahavwi awayg maripkaw, ig tivik giw gig gukak ginag. Ig hamah gukak gihayo. Amun ini nikwe egkis piyamate humaw pahavwiwa guvitkis pawtak.”

⁶ Ayge nikwe ke wotbe egkis pahavwiwatbe. Amawka ku hiyeg amadgaya inin ka ibakhasa ku pariye Uhokri hamahkise pawtak.

⁷ Igkisme ayavgi: — Mmahki nikwe ig amekene Moís awna: “Ku pahavwi maytwevye gihayo, amawka ig iki gut pahak kagta ku pariye awna: ‘Pis ka nuhayama akiw.’ Ayteke nikwe hiyawa ig maytwevgu.”

⁸ Igme Kiyavwiye Jesus kaytwa giwnkis: — Ig amekene Moís isakse hiyeg maytwa gihayokis awaku igkis gidanikis ihpa Uhokri giwn. Heneme minikwak humawkariwka ka henema.

⁹ Kurime nahme awna yit, ku pahavwi maytwa gihayo waditnevyenen, ka awakuma eg powkemnihwe, ku ig maripkaw gukak pahavuwa tino akiw, amun ini nikwe giwtrik Uhokri ig kuwis powkemnihwe gukak.

¹⁰ Igkis gikannuhnivwi timapni inakni giwn hene, igkis awna git: — Ku wixwiy awaykemni ku ka hiya wixwiyma maytwa uhayowiy hene, nikwe pi kabayte wixwiy ka maripkaw.

¹¹ Igme kaytwa giwnkis: — Henewa. Heneme ka madiktema awayg amava inakni yiwn. Igneswa ku pariye ikaka givititkis adahan igkis misakwa mahayo, igkis amavin.

¹² Ay arakembet ku pariye mpitha pahavwi adahan ig ka daxtasaw gut tino. Gaytakkis hiyeg aytniyewa gitkis hene. Gaytakkisme hiwhka gavitkis hiyeg adahan igkis ka wew gukak tino. Gaytakkisme giwntekneswa misakwa mahayo adahan igkis ekkene Uhokri gikumadukan. Ku pahavwi amavin, hiyawa ig amavin.

Jesus kiye Uhokri gidahankis bakimnayh

¹³ Ayteke hiyeg danuh atere git Kiyavwiye Jesus. Igkis waxwe gikamkaykis ta git adahan ig sarayh giwak givititkis adahan ig kiyene Uhokri gidahankis. Igkisme gikannuhnivwi hiyapni hene, igkis awna gitkis adahan igkis ka ayta sigimwihgi.

¹⁴ Ig Kiyavwiye Jesus hiyapni hene, ig awna gitkis: — Isaksanabay bakimnayh ites aytnite numkanit. Ka yi muwaka mpithigkis. Mmanawa ku pariye hiyeg gihiyekemnikis kene bakimnibe ignesnewa ku pariye kawih Uhokri gikumadukan.

¹⁵ Ayteke nikwe ig sarayh giwak givititkis. Ig kiye Uhokri gidahankis. Pisenwa ig tivik.

Mahiko hiyeg igisavye isahptaw

¹⁶ Avim ini pahavwi awayg takweye danuh atere git Kiyavwiye Jesus. Ig ayavgi: — Kiyavwiye, uya akki nutuh. Pariye kabayka nah keh kuri adahan nah uti dehetniki gimun Uhokri adahan avanenekwa?

¹⁷ Igme Kiyavwiye Jesus kaytwa giwn: — Mmahki pis ayavun amin kabayka? Ay pahavwiwa ku pariye kehne kabayka. Ignewa Uhokri. Ku pis muwaka uti dehetniki gimun Uhokri, ihpanaba Uhokri gikumadukan.

¹⁸ Igme awayg ayavgi: — Pariyeki ini gikumadukan? Igme Kiyavwiye Jesus kaytwa giwn: — Ka muwaka umah hiyeg. Ka muwaka powkemnihwa. Ka muwaka amevwi. Ka muwaka wasaymaw.

¹⁹ Kiyatha pig. Kiyatha pinag. Batek gikakkis piyakivwi hiyeg hawata ku samah pis batek akak pivit.

²⁰ Igme takweye awna git: — Nah kuwis ihpa madikte inaknivyene. Pariye muwaka nutuh akiw adahan nah keh?

²¹ Igme Kiyavwiye Jesus kaytwa giwn: — Ku pis muwaka keh avigkutavrik ku samah Uhokri gimawkan, su atak piyuk madikte pewkanbet. Ayteke nikwe pis iki akakuravig ta gitkis madiptavye. Ayge nikwe pis uti ka aynsima igiska aynte inuriknek. Ayteke pisenwa paviykan pewkanbet pis ayta wew nukakuh.

²² Igme takweye timapni hene, ig wakaymni ig barukiswe ka aynsima mmanawa ig ka aynsima gewkanbet ay gimun. Ig avise ku nawenetke ig biyuk akak ini gewkanbet. Adye ig tivik.

²³ Ig Kiyavwiye Jesus hiyapni hene, ig awna gitkis gikannuhnivwi. Giwn: — Ka aynsima mahiko adahan hiyeg igisavye kawih Uhokri gikumadukan. Henewatbaki in.

²⁴ Nah awna inakni pahaynewata akiw. Ku yis hiyap ku mahiko adahan pahavwi puwikne “kamelu” parak maviya arikuw pahat kakus amiyokni, in pi mahikote akiw adahan pahavwi igisye parak ku kiney Uhokri gikumadukan.

²⁵ Igkis timapni hene, igkis wakaymnibdi mpiynevevye. Igkis awna: — Ta wotuh ku pahavwi igisye, in arakak ku ig kibeyne giwtrik Uhokri mmanawa ig kabunuga gikak Uhokri. Ku mahiko hene adahan igisavye danuh git Uhokri, nikwe yuma hiyeg amadga wayk danuhne git Uhokri.

²⁶ Igme Kiyavwiye Jesus sarayh givegi ta womkanit. Ig awna: — Madikte hiyeg ka hiya ignesma danuh git Uhokri ku ka igma Uhokri amnihgikis. Heneme madikte arikna ka mahikonema gidahan Uhokri.

Ku pahavwi ikise madikte giharit Jesus, ig uti nikwe ka aynsima akiw

²⁷ Igme Pedru awna git: — Usuh kuwis ikise madikte wewkanbet adahan usuh wewne pikak. Pariye usuh uti nikwe?

²⁸ Igme Kiyavwiye Jesus awna gitkis: — Aysawnemenek abet nukune hawkri nah, ku pariye wageswe awayg amadgaya inin, nah bat akak madikte nukiytani amadga nevwi kiyatyo ku kiney adahan nah hiyekne gikakkis hiyeg. Avim ini yis ku pariye wewnevwi nukakuh yis hawata batnek amadga yevwi kiyatyo madikawkunono gukebikis akak pisoya gawnakis (12) adahan yis hiyekne gikakkis neras hiyegiviyenevwi izhaewyenevwi madikawkunene gikebikis gikakkis piyana gawnakis (12). Ihanabay inakni nuwnuh. Henewatbaki in.

²⁹ Madikte hiyeg ku pariye ikiswiye givinkis, gikakkis gikebyuvwikis, gigkis, ginagkis, gikamkayhkis, giwasrakis, ku igkis ikise madikte adahan igkis ayta nuharit, igkis uti nikwe pi kibite akiw, madikawku madikwa gukebikis (100) akiw. Hawata igkis aymuhwanek gimun Uhokri adahan avanenekwa.

³⁰ Heneme ka yi muwaka ikaw kiyattema mpiy pahavwi awaku ini. Mmanawa aysawnemenek ka aynsima hiyeg ku pariye ikaka pi kiyatte mpiy pahavwi, aysawnemenek ignes ka mpiya pahavwinema hiyeg. Hawata akiw ka aynsima hiyeg ku pariye ikaka yumanene gikiytanikis ay amadga inin, aysawnemenek yuma hiyeg pi kiyattempiyigkis.