Matews 17 - Uhokri Gahegbetawni Nukune akak Sawmus

Jesus kahayakse gikiytani kabutenne ay givit

¹ Ayteke ariwnteke ini puguhkuna hawkri, ig Kiyavwiye Jesus iwe Pedru gikak amekene Tiyagumni gikak gisamwi Joawh adahan igkis atak gihapti. Igkis wagehe ta avitit paha waxri imuwadnene. Igkiswonakis ayge.

² Ayge gimunkis ig uniyehwe gihivak nawenyewa akiw. Gihepka amuwe ke kamuwbe, gisimsa wageswe barewye ke kabutnikibe kane ahawnasima.

³ Ayteke pahaye adahan amekene Moís gikak amekene Eliyas igkis hiyapkiswe atere gitkis. Igkis ayge kinetihwenes gikak Kiyavwiye Jesus.

⁴ Igme Pedru hiyapni hene, ig awna git Kiyavwiye Jesus. Giwn: — Kiyavwiye, kibeynekata wixwiy ay kabubuk avim inin. Uyay misakwa ay. Ku pis muwaka, nah kehte mpana akebi paytbet ay. Paha pidahan, pahame gidahan kiyavwiye Moís, pahame gidahan kiyavwiye Eliyas.

⁵ Ku samah ig awnehpiye inakni iwit hene, pahaye adahan paha ukuhne kane amuwyisima biwhe givititkis. Ayteke paha ikuvimnat awna gitkis aytontak abetitak ini ukuhne. In awna: — Ner nukamkayh nubetki. Ig keh nah batek ka aynsima. Ataybiswanabay git.

⁶ Igkisme gikannuhnivwi timapni inakni hene, igkis tuguhkiswebdi mabuw ta waykborit, igkis wakaymnibdi mpiynevevye.

⁷ Igme Kiyavwiye Jesus atere gitkis, ig daxwigkis. Ig awna gitkis: — Kannikawnay. Ka yi muwaka avis.

⁸ Igkisme sarayh givegikis atere, igkis iwasa. Yumehe neras piyananene gikebikis. Igwo Kiyavwiye Jesus misekwe ayge gimunkis.

⁹ Ayteke nikwe igkis muhuke avititak ini waxri imuwadnene. Igkis muhukempiye, ig Kiyavwiye Jesus awna ta gitkis. Giwn: — Ka ba yi kinetihwa ta gitkis hiyeg aynesnima amin ku pariye yihiyvan ku avim inin. Ka yi muwaka kinetihwa nimin he ku aysawnemenek nah, ku pariye wageswe awayg amadgaya inin, nah kannikaw ariw numiremninek. Ariwnteke ini nikwe ik adahan yis kinetihwa nimin.

Joawh Batista kewa Eliyasbe

¹⁰ Igkisme ayavgi: — Kiyavwiye, ku pis Cristo, ku pis Uhokri gikanyan adahan ukumaduketni, mmahki neras kannuhekevutnevwi awna: “Amawka ku amekene Eliyas igkit danuh atan giw Cristo?”

¹¹ Igme kaytwa giwnkis: — Henewa in. Pahavwi kene amekene Eliyasbe igkit ayta adahan ahegbeteviye madikte navituh.

¹² Ihanabay inakni nuwnuh. Ayipa ig kuwis danuh atan. Heneme ig mahikohpika. Hiyeg ay arewha git ku samah gimawkanitnenes. Nah hawata akiw, nah ku pariye wageswe awayg amadgaya inin, aysawnemenek nah hawata hiyap mbeyne ay giwakukis.

¹³ Igkis gikannuhnivwi timapni hene, metakwa igkis pukuhpa ku ig kinetihwene gimin Joawh Batista ku ignewa ku pariye ner pahavwi kene amekene Eliyasbe.

Jesus pekkis wavitye givititak pahavwi bakimni

¹⁴ Ayteke ariwnteke ini igkis diyuhe ta gitkis neras hiyeg kabubuknene. Igkis danuh atere, pahavwi awayg danukwa ta git Kiyavwiye Jesus. Ig paberetusaw gikimpurit. Ig awna git:

¹⁵ — Kiyavwiye, uya amnih nukamkayh. Ig nuwiskewenpiye. Ig hiyap mbeyne ka aynsima mmanawa kiberevut ig tuguh ta abetit tiket ig tuboh ta ahakwat un.

¹⁶ Kuwis nah waxwevgi ta gitkis pikannuhnivwi, heneme igkis ka hiya gimakniwak.

¹⁷ Ig Kiyavwiye Jesus timapni hene, ig awna git: — Aa, yis hiyeg taraksavye amadgaya inin. Mmahki yis ka kamaxwa aynesnima givitit Uhokri? Aysaw akebi hawkri yimawkan nah misakwa ay yikak nah kiyaknihwa yikak he yis kamaxwa givitit Uhokri? Kuri waxwa pikamkayh ayta numkanit.

¹⁸ Igme ihe giwn. Ayteke nikwe ig Kiyavwiye Jesus himehe ner wavitye. Igme wavitye pese givititak. Aynewa ig bakimni makniw.

¹⁹ Ayteke ariwnteke ini gikannuhnivwi atere git Kiyavwiye Jesus igkiswo. Igkis ayavgi: — Ya usuh? Mmahki usuh ka hiya avukwak ner wavitye?

²⁰ Igme kaytwa giwnkis: — Awaku yis ka kamaxwa givitit Uhokri kiyesradima. Ihanabay inakni nuwnuh. Wake yis kamaxwabe givitit aynesnibe akiw, nikwekam madikte yayapni humaw yitkam. Hiyawa yikamaxwan aynesa kewa paha “mostad” ayakbe in nopsesa, heneme yayapni humaw yit. Yis ikkam adahan yis awna ta arit inin waxri imuwadnene: “Waxri, pis higihwa ayteke. Su tahan atere.” Ku aysaw yis awnakam inakni, in higihwakam ayteke. Nikwe yuma mahikoki yidahan.

²¹ Heneme akebi ner wavitye yis ka hiya givukwak henentima kema ininma. Amawka ku yis piriyepkaw ka aynsima. Amawka ku yis kiye Uhokri akak yimaxhawni.

Jesus kinetihwa akiw amin gimiremni

²² Ayteke ariwnteke ini igkis gikannuhnivwi pahadguhwa atere git aynte Galileyamnaw. Ayge ig Kiyavwiye Jesus awna ta gitkis: — Aysawnemenek nah, ku pariye wageswe awayg amadgaya inin, nah kamaykiswikanek ta gitkis hiyeg amadgayavu inin.

²³ Avim ini igkis umehpennek. Heneme abet amamnampiye hawkrinek nah kannikaw akiw ariwntak numiremninek. Igkisme gikannuhnivwi timapni hene, igkis misekwe barukibet.

Jesus katiwnih Uhokri Givin

²⁴ Ayteke ariwnteke ini igkis tivik gihapti Kiyavwiye Jesus, igkis danuh ta avitit paytwempu Kafarnawh. Ayge hiyeg patiptaka Pedru. Igkis ahiwkevutnevwi karukri adahan ini leglis kewye Uhokri Givin. Igkis danuh ta git Pedru, igkis ayavgi: — Mmah pikannuhten mmah ig ka katiwnih Uhokri Givin?

²⁵ Igme Pedru kaytwa giwnkis: — Ihi. Ig katiwnih. Ayteke ig tivik kinetihwene gikak Kiyavwiye Jesus. Ig pareke atere paytrikut. Heneme avit ig awna, igkit Kiyavwiye Jesus awna git. Giwn: — Simawh, mmahki pivewkan? Kitki guvelma amadgaya inin aya karukri adahan katiwnih ladwan? Ba ig aya gitkis gihiyegavu? Ba kawk, ba ig aya gitkis nawenevwinen?

²⁶ Igme Pedru kaytwa giwn: — Ig aya gitkis nawenevwinen. Igme Kiyavwiye Jesus awna: — Nikwe Uhokri gikamkayh ka muwaka katiwnih adahan parak givinekut Gig. Nahnewa Uhokri gikamkayh. Ka kis adahan nah katiwnihni.

²⁷ Heneme ka sam. Uya ka suguh neras ahiwkevutnevwi karukri. Ku wis ka katiwnih Givin, gitkis wis ka kiyatin. Ataknaba ta ihapkat. Padaknaba pivuh ahakwat un. Pitatye im pis ivuha, pis woka gibiy. Ayge pis utinek pahamku kirehka. Akak nore pis katiwnih udahan piyamate.