Matews 16 - Uhokri Gahegbetawni Nukune akak Sawmus

Farizewkis kehkis annut git Jesus

¹ Ig danuh atere, gaytakkis neras farizewkis gikakkis gaytakkis neras sadusewkis igkis danuh atere git Kiyavwiye Jesus adahan gihikekten. Igkis awna git: — Asa keh annut inuriktekne wowtrik adahan areketni pidatni wotuh kahadbe usuh hiyakpi ba pis ayta giwntakwatma Uhokri.

² Igme Kiyavwiye Jesus kaytwa giwnkis: — Ku yis hiyap en duwweh wahanbuku kamuw, yis yibetki awna: “Takuwanek barewye hawkri, mmanawa en duwweh.”

³ Hawata akiw ku yis hiyap en duwweh hawkanawa yis yibetki awna: “Muwokad nehmnik, mmanawa en duwweh, ukuhne katamnap.” Yis pukuhpa en kabayntiwa. Heneme yis ka hiya yisma pukuhpa ku pariye Uhokri gikehni ku avim inin hawkri.

⁴ Ayteke ig awna akiw: — Aa, yis hiyeg amadgaya hawkri. Yis mbeyevye yihiyekemni. Yis kuwis isahkiswe giw Uhokri. Inneki keh yis kehkis annut nutuh adahan areketni nudatni yit. Pahatwowa annut akkakanek yit, ini annut ku samah Uhokri keh gikak gawneve amekene Jonas ku samah ig wiwhpig abetitak miyaka abet amamnampiye hawkri. Ig awna inakni, ig tivik ikiswigkis. Igkis gikannuhnivwi tivik gihapti.

Farizewkis gihiyekemnikis in kewa bugut abusanbe

⁵ Igkis manuke danuh pahambakat mahakwa. Heneme igkis miyehe ewk bugut ayta uhapti.

⁶ Igkis danuh atere, ig Kiyavwiye Jesus awna gitkis: — Avuriwnabay, pukuhpawnabay abohri ini bugut abusan gidahankis neras farizewkis gikakkis neras sadusewkis.

⁷ Igkis timapni hene, igkis kinetihwa pawtak amin inakni giwn. Igkis awna: — Ig awna inakni awaku wixwiy ka ewk bugut ayta uhaptiwiy.

⁸ Igme Kiyavwiye Jesus timapni hene, ig awna gitkis: — Mmahpaki yis yivewkan ku nah awna inakni awaku yis yuma yibuguta? Yis hiyeg avisatruvye.

⁹ Mmah yis kote pukuhpate ku nah ka kiyimwihwa aharit naxni? Mmah yis kuwis miyehe ku samah nah ibakhase pohowkunene bugut givuwiwkis pohowku mil (5.000) gikebikis hiyeg? Mmah yis hawata miyehe ku samah yis kivunse ka aynsima panye akak ini bugut asemne?

¹⁰ Hawata akiw mmah yis kuwis miyehe ku samah nah ibakhase ntewnehkernene bugut givuwiwkis paxnika mil (4.000) gikebikis hiyeg? Mmah yis kuwis miyehe ku samah yis kivunse ka aynsima panye akak ini bugut asemne?

¹¹ Mmah yis ka pukuha ku nah ka kinetihwenema amin bugut? Pukuhpawnabay abohri ini bugut abusan gidahankis neras farizewkis gikakkis neras sadusewkis.

¹² Igkis timapni hene, metakwa igkis pukuhpa ku ig ka kinetihwenema amin bugut abusan; ig kinetihwene amin gihiyekemnikis neras farizewkis gikakkis neras sadusewkis adahan igkis ka ikaw hawata kema igkisma. Mmanawa gihiyekemnikis ik adahan wagesbeta uhiyekemni mownye hawata ku samah bugut abusan tukugasa bugut.

Pedru hiyeke Jesus ku ignewa Uhokri gikanyan adahan ukumaduketniwiy

¹³ Ariwnteke ini igkis danuh ta avitit waxri kennesa amun paytwempu kewye “Sesareya gidahan Kiyavwiye Filip”. Ayge ig Kiyavwiye Jesus aya gikannuhnivwi, giwn: — Pariyeki givewkankis neras hiyeg ikanuh nah kuri, nah ku pariye wageswe awayg amadgaya inin?

¹⁴ Igkisme kaytwa giwn: — Gaytakkis hiyeg iki ku pis Joawh Batistamni kannikew akiw. Gaytakkisme iki ku pis amekene Eliyas. Igkisme gaytakkis hiyeg iki ku pis amekene Jeremiyas, ku kawk pis pahavwi akiw gaytakkis Uhokri gawnevevu pitatyevwi.

¹⁵ Igme Kiyavwiye Jesus timapni hene, ig awna gitkis: — Ya yis. Mmahpa yis ikanuh kuri?

¹⁶ Igme Simawh Pedru kaytwa giwn: — Pis Cristo pis Uhokri gikanyan adahan ukumaduketni. Pis Kiyavwiye Uhokri dehetniye gikamkayh.

¹⁷ Igme Kiyavwiye Jesus kaytwa giwn: — Simawh, pis ku pariye kiyavwiye Joawh gikamkayh, pis ka pibunugasima. Mmanawa ka hiyegima amadgaya inin akki pit inakni. Ignewa Wigwiy inurikyene ku pariye ekkepni pit.

¹⁸ Pis kuwis akkan ku pariyene nah, kuri nahme akkap ku pariyene pis. Pis Pedru inakni piw “tip nopsadnano”. Ku samah pis kinetihwa inakni numinuh pis humaw nutuh kewa pohow tipbe ku pariye kabayno adahan eg humaw payt akamaxten. Nuhiyegavu hawata igkis kewa ka aynsima tipbe ku pariye nah ahegvin adahan nah kehne paha leglis gukakkis adahan Uhokri kavinawne ayge. Pisme humaw kewa ini payt akamaxtenbe. Igkisme nuhiyegavu humaw kewa paha payt tiptiyebe ka awinisima ku pariye ka hakuh. Mbayavye akak miyaka in ka hiya gisamanakis adahan wanekbetene gihawkankis.

¹⁹ Hawata akiw pis humaw kewa ini payt akavriwtenbe. Ku aysaw payt akivara tivikwiye ig iki payt arakavig ta giwakurit payt akavriwten. Nah hawata aysawnemenek nah keh pis humaw giwewkistenkis neras ku pariye kumadukasewnevwi ta git Uhokri. Avim ini pis awna nuwntakwa. Ku pariye pis wanekbete ahawkan ay amadga inin, ayta inuriktak hawata wanekbetnata nihawkan. Hawata akiw ku pariye pis watekbete ahawkan ay amadga inin, ayta inuriktak hawata watekbetnata nihawkan.

²⁰ Ayteke ig Kiyavwiye Jesus awna ta gitkis: — Ka yi muwaka kinetihwa ta gitkis hiyeg ku nahnewa ku pariye Uhokri gikanyan adahan yikumaduketni.

Jesus kinetihwa amin gimiremni

²¹ Ayteke ariwnteke ini han pitatit, ig Kiyavwiye Jesus kavusaw akkamnih gitkis huwewe amin ku pariye nehmnikuhpiye gimkanit. Ig awna gitkis: — Amawka nah danuh atere Jerusalém, nah hiyap mbeyne ka aynsima aygenek ay giwakukis neras uwewkistenwiy gikakkis muwveg kiyatyevwi, gikakkis neras kannuhekevutnevwi. Ayteke nah umehpikanek. Heneme abet amamnampiye hawkri nah kannikasaka ariw numiremninek.

Pedru mpithevye Jesus ariw gimiremni

²² Igme Pedru timapni hene, ig wewkiswa gikak atakesa aynesa adahan ig awnene git. Ig awna: — Kiyavwiye, ka muwaka awna inakni hene. Uhokri ka isaksati ini mbayka danuh ta pit.

²³ Ig awna inakni hene, igme Kiyavwiye Jesus wagese giduhya gimkat Pedru, ig awna git: — Pes ayteke, Satanas. Simawh, pis ka awna inakni akakma Uhokri gihiyekemni. Pis awna akak gihiyekemnikis hiyeg amadgayavu inin. Ku samah pis awna inakni pis mpithan adahan nah ka keh Uhokri gibetki. Amun ini pis humaw nutuh kewa pohow tipbe ku pariye ik adahan nah tes guvitit nah tuguh dunibdivi.

Amawka wixwiy miyeh uvitwiy

²⁴ Ayteke ig Kiyavwiye Jesus awna ta gitkis madikte gikannuhnivwi. Giwn: — Ku pahavwi wageswekerevye nuhiyega, amawka ku ig ikise gidahan gibetki. Amawka ku ig umahkise gihiyekemni amadgaya inin ke wotbe ig daddahkiswinbe ta aminat ah. Amawka ku ig ikaw hawata ke nahbe.

²⁵ Mmanawa pahavwi ku pariye kiye givitnen, igi biyukenek giw Uhokri adahan avanenekwa. Pahavwime ku pariye miyehe givitwa nudahan, igi aymuhwanek gimun Uhokri adahan avanenekwa.

²⁶ Ku pahavwi darih madikte igiska amadgaya inin heneme ku ig biyuke giw Uhokri, amun ini nikwe ini igiska waditnevyenen gidahan. Yuma ariknawnema igiska ik adahan kawenyene pahavwi gidehetni akiw.

²⁷ Mmanawa aysawnemenek nah, ku pariye wageswe awayg amadgaya inin, nah aytanek gikakkis nuhiyegavu ahj akak Wigwiy gikiytani. Nah danuh atan, nah iki madikte hiyeg gitiwnikis pakekunawa akak ku samah gikehnikis ay amadga inin.

²⁸ Kennesa nudawnhan adahan nah yikumaduketni, nah ku pariye wageswe awayg amadgaya inin. Yaytak ku pariye ay ku akak inin, avit yis miyarap yis hiya nudawnhannek. Ihanabay inakni nuwnuh. Henewatbaki in.