Matews 15 - Uhokri Gahegbetawni Nukune akak Sawmus

Jesus gihiyekemni kabayte mpiy amekenegben gihiyekemnikis

¹ Ayteke gaytakis farizewkis gikakkis gaytakkis kannuhekevutnevwi amin amekene Moís gikumadukan igkis danuh atere git Kiyavwiye Jesus aytontak Jerusalémtak. Igkis danuh atere, igkis aya git:

² — Mmahki pikannuhnivwi ka iha amekenegben gihiyekemnikis? Igkis ka sukokaw avit igkis ax ku samah amekenegben sukokaw adahan ignes barewvit giwtrik Uhokri.

³ Igme Kiyavwiye Jesus kaytwa giwnkis: — Yis ihpene amekenegben gihiyekemnikis kabayntiwa heneme yis ka iha Uhokri gikumadukan kabayntiwatma. Mmanawa yis pi ihpate amekenegben gihiyekemnikis mpiy Uhokri gikumadukan.

⁴ Nah akkite yit ku samah. Ig Uhokri awna amadga gikumadukan: “Kiyatha pig, kiyatha pinag.” Hawata akiw ig awna: “Ku pahavwi miyatha gig, miyatha ginag, pugamawka ig umehpika.” Henewatbaki ig Uhokri awna.

⁵ Yisme ka iha inakni giwn. Yis awna: “Ka sam. Ku pahavwi ik adahan ig amnih gigkis heneme ku ig awna gutkis: ‘Ka hiya nahma amnihyi akak inin newkanbet mmanawa nah kuwis ikakse ku nah kawih madikte newkanbet gidahannen Uhokri.’

⁶ Nikwe ka sam ig ka amnih gig adahan ig kiyatig. Kawnata sam ig ka amnih ginag.” — Ku aysaw yis awna inakni giwnkis amekenegben hene, amun ini nikwe yis kuwis ikene amekenegben gihiyekemnikis pi kabayte mpiy ini Uhokri gikumadukan. Mmanawa yis isaksa hiyeg ka kiyatha gigkis.

⁷ Yis ikawnamah ke wotbe yis kibeynevwibe hiyeg bawa yis pi mbayte giwkis nawenyevwi hiyeg. Minikwak amekene Izaíyas kuwis kinetihwa yimin. Ig ekkene Uhokri giwn, ig awna:

⁸ “Neras hiyeg kiyathan akak gibiykisnen bawa gihiyekemnikisme piyawakad nuwhu.

⁹ Igkis kiyathan waditnevyenen. Igkis kannuhekne amin hiyeg gikehbetankis ke wotbe in nuhiyekemnibe.”

Ku pariye ay abet uhiyekemni innebaki keh wis patehwevye

¹⁰ Ayteke ig Kiyavwiye Jesus pahadguhe madikte hiyeg ayge ta gimkanit. Ig awna ta gitkis: — Ataybiswanabay numkanit. Pukuhpanabay nuwnuh.

¹¹ Ku pariye axka wis iki ubiyrikut ka innema keh wis patehwevye giwtrik Uhokri. Heneme ku pariye mbayka pes ubiyaptak innebaki keh wis patehwevye giwtrik Uhokri.

¹² Ayteke ariwnteke ini igkis gikannuhnivwi danukwa kennesa ta gihumwat. Igkis awna git: — Ka ba pis hiyap ku samah neras farizewkis dagawne avatra inakni piwn?

¹³ Igme kaytwa wownuh akak patuwesbuhka iwit, giwn: — Neras farizewkis igkis kewa ewaktibe ku pariye hiyan abet amutribdi. Ka sam. Madikte ku pariye Wigwiy inurikyene ka mutuh, egnekis aysawnemenek egkis warakavepkanek.

¹⁴ Ka ba yi ivegmina yihiyekemni giminkis neras farizewkis. Gitkis farizewkis hiyeg kewa motavyebe abet gihiyekemnikis, igkisme gihwitentenkis. Bawa igkisnewa ku pariye kene motavyebe abet gihiyekemnikis. Ka ik adahan pahavwi awayg motviye huwitha giyaki motviye. Ku ig huwitig, igkis piyamate tuguhenek.

¹⁵ Igme Pedru timapni hene, ig awna git: — Uya akkamnih wotuh inakni iwit patuwesbuhka amin ku pariye keh hiyeg patehwevye giwtrik Kiyavwiye Uhokri.

¹⁶ Igme Kiyavwiye Jesus kaytwa giwn: — Mmah yis kuviknene ka pukuha nuwnuh?

¹⁷ Ka ba yis hiyap ku pariye arikna wis iki ubiyrikut in ka parak abetit uhiyekemni in he mpiyevyenen wayhrikuw, kuwewa akiw wis ahinavrikuhpin?

¹⁸ Heneme ku pariye mbayka pes ubiyaptak, in ayta abetitak uhiyekemni. Innebaki ik adahan keh wis patehwevye giwtrik Uhokri.

¹⁹ Mmanawa abetitak uhiyekemni ayteke pes mbeyevye hiyakemniki, umahaka, powkemniki, mehka imunti, amevwiki, wasaymka, miyathaka.

²⁰ Innebaki ku pariye keh wis patehwevye. Heneme ku wis ax ka sukokaw, ka innema keh wis patehwevye giwtrik Uhokri.

Jesus amnih pahavu tino kane judeyanoma

²¹ Ayteke pisenwa ig Kiyavwiye Jesus tivik ayteke. Gikannuhnivwi tivik gihapti. Igkis danuh ta avitit ini waxri ku kiney paytwempu Tiru akak paytwempu Sidoh misakwa.

²² Ayge pahavu tino kane judeyanoma ku pariye avitya ini waxri eg danuh atere git. Eg Kanaahyano. Eg amnihswe ta git. Eg awna: — Kiyavwiye, pis ukivara hawata ke amekene Davibe, uya amnihun. Nukamkayh hiyapno ka aynsima mbeyne awaku eg wavityewnivyo.

²³ Igme Kiyavwiye Jesus ka kaytwa guwn akak pahatnema iwit. Ayteke nikwe igkis gikannuhnivwi awna git: — Higihkisnig ayteke, Kiyavwiye. Eg makekempi uhavwiy butte eg awnihnano akak guhawna.

²⁴ Igme Kiyavwiye Jesus kaytwa giwnkis: — Nah awahkiska adahan gamnihtenkis igkisnewa izhaewyenevwi. Ignes kewa muwtohbe biyukavyebe nutuh. Kote nuhawkanavrikte adahan nah amnihne hiyeg kane judeyenevwima.

²⁵ Heneme eg danukwa kennesa atere git, eg paberetusaw ta gikimpuwit. Eg awna git: — Kiyavwiye, uya amnihun.

²⁶ Igme Kiyavwiye Jesus kaytwa guwn: — Ka kis adahan nah hiyak pikak kuri pis kane judeyanoma. Ku nah hiyak pikak kuri, in ke wotbe nah iwevyebe nukamkayuvwi gimanakis nah padekwin ta gitkis pewru.

²⁷ Egme kaytwa giwn: — Henewa, Kiyavwiye. Heneme he pewruyan ax arebdibdi tuguhavye amadgatak gikivarakis gaxten.

²⁸ Ig Kiyavwiye Jesus timapni hene, ig awna gut: — Kiyavuno, pis ka aynsima pikamaxwan. In danuh ta pit ku samah payapni nutuh. Ig awna inakni, aynewa gukamkayh makniw.

Jesus makniwa ka aynsima hiyeg

²⁹ Pisenwa ig Kiyavwiye Jesus tivik ayteke. Ig mpiya akigbimnew mahakwa Galileya. Ayteke ig wagehe ta avitit paha waxri imuhgivitnene. Ayge ig batahkiswe.

³⁰ Nikwe ka aynsima hiyeg danuh atere gimkat. Igkis waxwe ka aynsima kakahribdavye ta git. Igkis waxwe miyavuvye gikakkis kidubetavye, motavye, monavye, ka aynsima nawenyewa kakahravye akiw. Igkis sarayhpigkis gikimpuwit Kiyavwiye Jesus, igme makniwevgikis madikte.

³¹ Neras hiyeg hiyapni hene ku samah monavye awna, kidubetavye wadithaw, miyavuvye wew, motavye hiyap, igkis hiyapni hene, igkis wakaymnibdi. Igkis awna: — Uwohkigawiy wixwiy izhaewyenevwi ig ka gabayisima ka gidatnisima!

Jesus iki im ta gitkis hiyeg akiw

³² Ayteke ig Kiyavwiye Jesus pahadguhe gikannuhnivwi ta gimkanit. Ig awna gitkis: — Neras hiyeg kuwis misekwe ay ukakwiy adahan mpana hawkri. Gimanakis madike kuwis. Nah wakaymni gidahankis. Nah ka muwaka awahkisgikis ta givinwatkis akak mativwa. Nawenetke gaytakkis tuguhenek pakwa ahin awaku mabimnaki.

³³ Igkisme gikannuhnivwi ayavgi: — Mmah awitwak wotwiy bugut gidahankis ay amadga inin amatap? Igkis ka aynsima hiyeg.

³⁴ Igme Kiyavwiye Jesus ayavgikis: — Aysaw akebi bugut yis kadahan? Igkisme kaytwa giwn: — Usuh kadahan ntewnehkerbu akebi akak aynesa im nopsanyovwi masaraku.

³⁵ Ayteke nikwe ig Kiyavwiye Jesus keh neras hiyeg batahkiswa waykborit.

³⁶ Ku aysaw kuwis igkis batebdebdihpikis, ig iwe ini ntewnehkerbunene bugut akak ini im. Ig kabayha Kiyavwiye Uhokri adahan ini. Ayteke ig sigkabdihavepni. Ig ikepni ta gitkis gikannuhnivwi. Igkisme ibekhepni givuwiwkis neras hiyeg.

³⁷ Igkisme ax kabihribdave. Ka aynsima asemne misekwe. Pisenwa nikwe gikannuhnivwi ahiwavemni, igkis kivunse ntewnehker akebi panye akak asemne gimanakis.

³⁸ Igkis ka aynsima hiyeg. Awaykemninen pukuhka kaba danuh paxnika mil (4. 000) gikebikis. Ka aynsima tinogben ayge hawata gikakkis gukamkayhkis.

³⁹ Pisenwa nikwe ig awahkiswigkis tivik tahan givinwatkis. Ayteke ig katapte muhumdakat ig tivik ta avitit Magadamnaw.