Matews 14 - Uhokri Gahegbetawni Nukune akak Sawmus

Joawh Batista umehpika

¹ Avim ini hawkri ner hiyaptigi Erodis ig time Kiyavwiye Jesus gak ku samah ig keh annut.

² Ig timapni hene, ig awna ta gitkis gihiyegavu: — Ke nutuhbe ignewa Joawh Batistamni. Ig kuwis kannikew akiw ariw gimiremni. Innebaki keh ig ka gannusima keh annut.

³ Ig awna inakni hene mmanawa ignewa kamaykistinene Joawh Batista. Ig wanakkisgwig, ig sarayhkiswig arikut parakseket. Ig keh hene guvatra amakano Erodiyas ku pariye gegni Filip gimaytwa.

⁴ Mmanawa ig Joawh Batista himehpig. Ig awna git: — Pis ka keh wadit ku samah pis kamax pegni gihayo adahan pis maripkaw gukak. Ka henema Kiyavwiye Uhokri aya wotwiy.

⁵ Ayge nikwe ig Erodis aharitne giwmasepten. Heneme ig avisemun gibohrikis neras judeyenevwi awaku igkis ikiy Joawh Batista ku ig Uhokri gawneve.

⁶ Avim ini ig Erodis keh gifetra adahan ku samah ig amadga wayk. Ayge abet ini fet eg amakano Erodiyas gukamkayh himano eg kayno eg pahavo gidahankis gawnasanvu. Eg keh ig Erodis batek ginaktin mpiynevevye.

⁷ Ig ba gibetkitenwa gukak keh ig awna ta gut, giwn: — Uhokri timap nuwnuh ku nah awna pit. Nah ikaksa pit madikte ku pariye payapni nutuh.

⁸ Egme kaytwa giwn ku samah gunag kuwis akki gut. Eg aya git: — Uya ike nutuh Joawh Batista gitew. Ikepni nutuh kurinewa amadga pahak miruk.

⁹ Ig hiyaptigi hiyapni hene, ig wakaymni mmanawa ig ka ihpekere inakni guwn. Heneme kuwis ig ikaksin gut giwtrikneswa gawnasanvu. Nikwe ig awna ta git pahavwi gisuwtata: — Asa ikepni gut.

¹⁰ Su atak bukihe Joawh Batista gibita ta arikut parakseket. Ewk gitew atan.

¹¹ Ayteke nikwe gitew ewkwika atere amadga pahak miruk, in ikepka ta gut nor himano. Egme ewkwin ta gut gunag.

¹² Ayteke ig Joawh Batista gikannuhnivwi danuh atere. Igkis iwe givit, igkis avuhpig. Pisenwa igkis tivik ta git Kiyavwiye Jesus igkis ekke git ku pariye danuh git.

Jesus iki im ta gitkis hiyeg

¹³ Ig Kiyavwiye Jesus timapni inakni ginetnikis hene, ig tivikwiye muhumdakew. Gikannuhnivwi tivik gihapti. Igkis manukwiye ta avitit paha iwetrit ku kiney yumanene hiyeg. Heneme ku aysaw hiyeg time gak ku ig kuwis tivik, igkis mpiye akigbimnew mahakwa adahan igkis tivikwiyes gihapti. Igkis pesbetwikis avititak madikte paytwempu ayge.

¹⁴ Igme Kiyavwiye Jesus sarayhwe atere waxrihpakat. Ayge ig hiyap ka aynsima hiyeg kabubuknakis. Igkiskit danuh giw atere. Ig hiyapni hene, ig kayah gidahankis. Ig amnihpigkis ig makniwe madikte hiyeg kakahribdavye.

¹⁵ Ayteke ariwnteke ini tepti kamuw, igkis gikannuhnivwi danukwa atere git. Igkis awna git: — Kiyavwiye, kuwis aygete. Inin iwetrit yuma hiyeg misekwene ay. Wani neras hiyeg tivik paytwempuwit adahan igkis isim gimanakis atere.

¹⁶ Igme Kiyavwiye Jesus kaytwa giwnkis: — Kawa. Ka muwaka igkis tivik. Yisnewa iki axka ta gitkis ku avim inin.

¹⁷ Igkisme awna git: — Usuh kadahan pohowkubuwa akebi bugut akak piyanmowa im masaraku.

¹⁸ Igme Kiyavwiye Jesus awna gitkis: — Ewkni ayta.

¹⁹ Igkis ewkwin git. Nikwe ig keh neras pahabunene hiyeg batahkiswebdi amadga ini amatap ayge. Ku aysaw kuwis igkis batebdebdihpikis, ig iwe ini pohowkubunene bugut akak piyananene im. Ig sarayh givegi ta inut, ig kabayha Kiyavwiye Uhokri adahan ini. Ayteke ig sigkabdihavepni. Ig ikepni ta gitkis gikannuhnivwi. Igkisme gikannuhnivwi ibekhepni givuwiwkis neras hiyeg.

²⁰ Igkis madikte ax kabihribdave. Ka aynsima asemne misekwe. Pisenwa nikwe igkis gikannuhivwi ahiwavemni, igkis kivunse madikawku akebi panye akak pisaya arawna (12) akak asemne gimanakis.

²¹ Igkis neras hiyeg ka aynsima gikebikis. Awaykemninen pukuhka kaba danuh pohowku mil (5.000) gikebikis. Ayge hawata ka aynsima tinogben gikakkis gukamkayhkis heneme egkis ka pukuhka.

Jesus wew ahakwew un

²² Ayteke ariwnteke ini ig Kiyavwiye Jesus awna ta gitkis gikannuhnivwi. Giwn: — Kataptawnabay amadgat wahmunwiy. Manukwinay pitati tahan pahambakat. Kuwewanek nah atere. Igkis timapni hene, igkis tivikwiye. Igme misekwe ayge adahan ig ekkewviye ta gitkis neras hiyeg.

²³ Pisenwa gekkewven, ig awna: — Nah atak piriyepkawte. Ig wagehe avitit paha waxri imuwadnene adahan ig piriyepkewne atere. Misanpi gaw, adukwenewa ig ayge pahavo.

²⁴ Nikwenewa avim ini nor wahmun piyawakte ariw waxri. Eg padekwika avit paraw mmanawa mayg aytniva gutivut.

²⁵ Kabeyweke ig Kiyavwiye Jesus aytweni ta womkanit, ig waywe ahakwew un.

²⁶ Usuh hiyapni hene, usuh avisasew gibohri. Usuh awna: — Ner anmapti. Ayge usuh kabimanbet awaku wavisni.

²⁷ Igme kabiman wotuh: — Kibokahwanabay. Nahnewa ay. Ka yi muwaka avis.

²⁸ Ayge nikwe ig Pedru awna git: — Kiyavwiye, ku inyewa pisnewa, uya isaksan nah atak ta pimkat ahakwew un.

²⁹ Igme kaytwa giwn: — Ba ayta. Igme Pedru timapni hene, ig tubuke ahakwate un. Ig kavusa wew ahakwew un ta gimkanit Kiyavwiye Jesus.

³⁰ Pahaye adahan kamaygviye kihawnehwe. Ig avisasew. Aynewa ig digise ahakwat un. Ig hiyapni hene, ig kabiman: — Kiyavwiye, amnihnan!

³¹ Aynewa ig Kiyavwiye Jesus tarak giwak ig sumuhpig. Ig awna git: — Awayg avisatruvye. Uhokri ik adahan pis kamaxwa givitit. Mmahki pis pukuhpaw?

³² Ayteke igkis katapte amadgat wahmun. Aynewa mayg misekwe.

³³ Igkisme amadgayavu umuh igkis hiyapni hene, igkis kabayhig. Igkis awna: — Pis igyewa Uhokri gikamkayh.

Jesus makniwa hiyeg kakahribdavye aynte Jenesaremnaw

³⁴ Igkis manuke mahakwa, igkis danuh ta avitit Jenesaremnaw.

³⁵ Ku aysaw neras hiyeg ayge murotvi git Kiyavwiye Jesus, igkis wasavanaw giminkis hiyeg muwapuw avit giwaxigkis. Ayteke nikwe ignes waxwave madikte hiyeg kakahribdavye ta gimkat Kiyavwiye Jesus.

³⁶ Igkis awna git: — Kiyavwiye, uya amnih neras kakahribdavye. Uya isaksa igkis dax abet pikawihninen kahadbe igkis makniw ariw gikahrikis. Igme isaksevgikis. Madikte hiyeg ku pariye daxni igkis makniw.