Matews 13 - Uhokri Gahegbetawni Nukune akak Sawmus

Yuwit patuwesbuhka amin amutri

¹ Abetnewa ini hawkri ig Kiyavwiye Jesus pese paytrikutak. Ig tivik mahakwakigbit. Ayge ig batahkiswe adahan ig kannuhekne.

² Ayteke ka aynsima hiyeg pahadguhwe atere git. Igkis kiyaran ganwa. Ba akebentenwa hiyeg ayge. Ig hiyapni hene, ig katapte muhumdakat adahan igkis ka dehekbetig. Ayge ig batahkiswe. Ig gikannuhtenkis hiyeg ayteke gumadgatak umuh. Igkisme hiyeg misekwe tabirbet waxrihbak.

³ Ayteke ig kinetihwa gitkis akak ka aynsima iwit patuwesbuhka. Ig awna gitkis: — Minikwak pahavwi awayg tivik giwasra amedgete adahan ig sessehne gamutra ayak adahan ku kit in tuguh in hiyan.

⁴ Ig sessehne gamutra ayak, araytak tuguhe avigku ahin ku kiney wayk adani. Ayteke nikwe kuhivra ayta axavevgukis.

⁵ Araytakme gamutra ayak tuguhe abetit tivebdi ku kiney ka kiyesradima wayk. Egkis gamutra hiyenpiwatkama kibehtenwa mmanawa egkis ka mutuhwa mihadima awaku wayk ka kahogbi.

⁶ Kamuw inutvi, awehe gamutra. Aynewa egkis huruhrup mmanawa gahampabet he inuwewvi.

⁷ Araytakme gamutra ayak tuguhe avuwit pudukuvwi. Egnes pudukuvwi hiyenpi payak akak gamutra. Egkis tuwathe gamutra he egkis miyorap.

⁸ Araytakme gamutra ayak tuguhe abetit kibeyne wayk. Ayge egkis hiyan. Egkis aymuhwa he egkis kew. Egkis sarayh ka aynsima guwkis. Gaytakkis kew madikawku madikwa gukebikis (100). Gaytakkisme kew puguhkuna madikwa gukebikis (60). Gaytakkisme kew mpana madikwa gukebikis (30).

⁹ Pisenwa inakni gawnan, ig Kiyavwiye Jesus awna akiw. Giwn: — Yis ku pariye katayebnene, ataybiswanabay numkat.

Hiyeg ka mpiksaw aharit Uhokri gihiyekemni

¹⁰ Ayteke ariwnteke ini usuh, Kiyavwiye Jesus gikannuhnivwi, usuh atere git, usuh ayavgi: — Mmahki pis kinetihwa ta gitkis hiyeg akak patuwesbuhka iwit?

¹¹ Igme kaytwa wownuh: — Hiyeg amedgenevwi inin kote hiyakte ku samah Uhokri gikumadukan. Yisme ig Uhokri akkamnihni ta yitnek. Igkisme ka akkaka gitkis. Ta gitkis nah awna patuwesbuhkanen iwit.

¹² Mmanawa ku pahavwi mpikasaw aharit nuhiyekemni, ikaka git kiyeste akiw. Heneme ku pahavwi ka mpiksaw aharit nuhiyekemni kiyesradima, nikwe ini nuhiyekemni wiwhpika abetitak gihiyekemninek.

¹³ Nah awna patuwesbuhka iwit ta gitkis hiyeg awaku igkis iveg arimkanit nannuh ku pariye nah keh, nuhiyekemnime igkis ka aminama niw. Igkis timap nuwnuh, nuhiyekemnime igkis ka ihpekere, igkis ka pukuhpakere.

¹⁴ Metakwa in kahayak ku samah Uhokri gawneve amekene Izaíyas awna giminkis minikwak. Ig awna: “Yis ataybiswa arit Kiyavwiye Uhokri giwn kabayntiwa heneme yis ka pukuhpinnek. Yis iki yitew arimkanit giwn kabayntiwa heneme ka paduk yitiwrikutnek.

¹⁵ Hiyeg amadgayavu inin pet gihiyekemnikis. Pet gitaybikis. Manan giwtyakkis. Wake ka henema, ikkam adahan giwtyakkis hiyap ku pariye inyewatnene, ikkam adahan gitaybikis timap ku pariye hiyakemniki inyewatnene, ikkam adahan gihiyekemnikis pukuhpin. Ayge nikwe igkis wageskam gihiyekemnikiskam ta numkat, nahme makniwgikiskam.” Henewatbaki ig Uhokri gawneve awna.

¹⁶ Yisme nukannuhnivwi yis ka henema. Yis ka yibunugasima mmanawa yiwtyak hiyap ku pariye hiyakemniki inyewatnene, yitaybi timap ku pariye hiyakemniki inyewatnene.

¹⁷ Minikwak ka aynsima hiyeg Uhokri gawnevevu, ka aynsima hiyeg kibeynevwi igkis ka aynsima hiyepkere ini nannuh ku pariye yis hiyap ku avim inin. Igkis ka aynsima timepkere inakni nuwnuh ku pariye pis timap ku avim inin. Henewatbaki igkis. Heneme igkis ka hiyapni, igkis ka timapni.

Jesus akkamnih inakni giwn amin amutri

¹⁸ — Kuri nah akkamnihte yit inakni nuwnuh patuwesbuhka gimin ner amutrivutne.

¹⁹ Ku pahavwi timap nuwnuh amin Uhokri gikumadukan heneme ku ig ka ikatuswa nudahan, nikwe ner mbeyevye gihiyekemni ig Satanas ig danuh atere git. Ig wiwhpiye inakni nuwnuh abetitak gihiyekemni. Ayge nikwe inakni nuwnuh humaw kewa ini amutri ayakbe ku pariye tuguhpiye avigkut ahin.

²⁰ Inme amutri ayak ku pariye tuguhpiye abetit tivebdi innebaki arakak gidahan pahavwi ku pariye timap nuwnuh ig amavin kibehtenwa akak madikte gibetki.

²¹ Heneme ig ka kamax inakni nuwnuh kabayntiwatma abet gihiyekemni. In humaw kewa pahakti amutribe ku pariye yumanano guhampabet eg ka dep miyó. Ig batek akak nuwnuh adahan aynesa hawkri. Ayteke ku aysaw ig hiyap mbeyne nivatra, aynewa ig miniwvi niw. Ku aysaw hiyeg mahivwihpig nivatra, ig diyuhkiswe butte.

²² Inme amutri ayak ku pariye tuguhpiye abetit pudukuvwi, innebaki arakak gidahan pahavwi ku pariye timap Uhokri giwn ig amavin kabayntiwa. Heneme ig pi ikatuswete adahan arikna amadgaya inin. Ig kinikiswate arit igiska amadgaya inin. Ayge nikwe Uhokri giwn mpithaka abet gihiyekemni. Ig ka kannuhwa keh Uhokri gibetki. Amun ini nikwe ig awayg humaw waditnevyenen kewa pahakti amutribe ku pariye kane kew.

²³ Inme amutri ayak ku pariye tuguhpiye abetit kibeyne wayk innebaki arakak gidahan pahavwi ku pariye timap nuwnuh ig ikatuswa nit, ig mpiksaw niharit. Ig keh Uhokri gibetki nikwe. Gaytakkis hiyeg keh Uhokri gibetki kabayntiwa. Igkis humaw kewa amutribe ku pariye kew madikawku madikwa gukebikis (100). Gaytakkisme hiyeg humaw kewa amutribe ku pariye kew puguhkuna madikwa gukebikis (60). Gaytakkisme humaw kewa amutribe ku pariye kew mpana madikwa gukebikis (30).

Yuwit patuwesbuhka amin joyo

²⁴ Ayteke ig Kiyavwiye Jesus awna nawenyewa iwit patuwesbuhka akiw. Giwn: — Nah akkite yit pahat abektey amin ku samah Uhokri gikumadukan. Minikwak pahavwi awayg sessehe kibeyne amutri ayak amadga giwasra, fahhin ayak.

²⁵ Ayteke ariwnteke ini ku aysaw madikte hiyeg himekbet, pahavwi givetunya danuh atere. Ig danuh atere, ig sessehe ewakti ayak ta abetit ini fahhin ayak. Pisenwa ig tivik. Ini ewakti kewye joyo. Ahivak kabahte ke fahhinbe ahivak. Heneme guw ka axkama.

²⁶ Ayteke madikte ini amutri ayak hiyan. Nor amutri fahhin eg hiyan payegbitak akak nor joyo. Ayteke nor fahhin kew. Guw barewyo. Egme joyo hawata kew heneme guw mbeyevye. Ayge nikwe metakwa nor joyo kahayak.

²⁷ Ner was akivara gibukvig hiyapni hene, igkis tivik, igkis danuh ta git gikivarakis. Igkis awna git: “Kiyavwiye, mmah ahinyan nor joyo ay? Mmah pis ka sassah kibeynewatma fahhin ayak?”

²⁸ Igme kaytwa giwnkis: “Nuvetunya gannip.” Igkisme ayavgi: “Mmah usuh keh gukak nor joyo kuri? Ba pis muwaka usuh atak warekwin?”

²⁹ Igme kaytwa giwnkis: “Kawa. Ka yi muwaka warakgukis. Nawenetke ku aysaw yis warekwigneku, yis wareke payak akak fahhin.

³⁰ Isaksanay nor fahhin aymuhwa payebdak akak nor joyo. Ateke egkis ivatte. Ku aysaw fahhin ariw ivatneku nikwe avim ini nah awnanek gitkis nuhiyegavu: ‘Madivwiswinay nor joyo avuwitak fahhin. Wanakinpinwi adahan padekwiki abetit tiket. Ayteke pisenwa, hiyawa yis hiwhe fahhin yis bayehpin arikut fahhin avin.’”

Yuwit patuwesbuhka amin “mostad” ayak

³¹ Ayteke ariwnteke ini ig Kiyavwiye Jesus kinetihwa gitkis akak nawenyewa iwit patuwesbuhka. Giwn: — Uhokri gikumadukan aymuhwa amadga inin ke amutri “mostadbe”. Ku aysaw pahavwi iwi pohow “mostad” ayak, ig mutuhgu amadga giwasra.

³² Hiyawa eg pi isite ayak ariw madikte amadga inin. Heneme ku aysaw eg hiyan, eg pi wadiswete ariw madikte amutribdi. Eg imuw kibehtenwa kabahte ke ahbe. He ik adahan kuhivra ayta kibhaw guvewit.

Yuwit patuwesbuhka amin bugut abusan

³³ Ayteke ig Kiyavwiye Jesus awna nawenyewa iwit patuwesbuhka akiw ta gitkis: — Uhokri gikumadukan keh hiyeg gihiyekemnikis aymuhwa hawata ku samah bugut abusan tukugasa bugut. Ku pahavu tino iwi aynesa bugut abusan eg wagesbetin ta abetit mpana bom fahhin, ayge nikwe madikte in tukugwa.

Jesus awna iwit patuwesbuhkanen

³⁴ Ig Kiyavwiye Jesus kinetihwa ta gitkis neras hiyeg akak iwit patuwesbuhkanen. Ig ka awnati ariknawnema ta gitkis huwewe. Ig he kinetihwa akak iwit patuwesbuhkanen.

³⁵ Ig awna hene kahadbe in kahayak ku samah Uhokri gawneve awna minikwak. Igme awna: “Nah awnate iwit patuwesbuhka ta gitkis. Nah akkite gitkis hiyakemniki ku pariye hiyeg kotene hiyakte ku samah akavuska hawkri.”

Jesus akkamnih inakni giwn amin joyo

³⁶ Ayteke ig Kiyavwiye Jesus pese gibetitakkis neras hiyeg. Ig pareke paytrikute. Gikannuhnivwi hiyapni hene, igkis danuh atere git. Igkis awna git: — Uya akkamnih wotuh inakni iwit patuwesbuhka amin joyo amedgene was.

³⁷ Igme kaytwa wownuh. Ig awna: — Ner awayg ku pariye sessehe kibeyne amutri ayak, ignebaki arakak numinuh nah ku pariye wageswe awayg amadgaya inin.

³⁸ Inme giwasra, innebaki arakak adahan inin hawkri. Inme kibeyne amutri ayak, innebaki arakak gidahankis hiyeg ku pariye wewnevwi akak Uhokri gihiyekemni. Inme joyo ayak, innebaki arakak gidahankis hiyeg ku pariye wewnevwi akak wavitye gihiyekemni.

³⁹ Nerme ivetunyati ku pariye sessehe joyo ayak, ignebaki arakak gidahan wavitye gikivarakis. Inme guvatyavrik danuh, innebaki ahawkanavrik adahan amaksemni hawkri. Nerasme hiyeknevwi akak amutri, ignesbaki arakak gidahankis ahj.

⁴⁰ Ku samah nor joyo madivwiswika in bukehpika abet tiket, innebaki arakak adahan ku pariye danuh amaksemni hawkrinek.

⁴¹ Avim ini nah, ku pariye wageswe awayg amadgaya inin, nah awahkisnek nuwatnivwi ahj adahan igkis wiwhpiyes ariwntak Uhokri gikumadukan madikte patahwaki payak gikakkis madikte hiyeg patahwavye.

⁴² Ayteke nikwe igkis padekwigkisnek ta abetit tiket. Ayge hiyeg tihebdi ignes kagah gaybukisnek.

⁴³ Ignesme hiyeg kibeynevwi igkis kabutennenek ke kamuwbe aynte amun Wigwiy gikumadukan. Yis ku pariye katayebnene, ataybiswanabay numkat.

Yuwit patuwesbuhka amin igiska ayempika

⁴⁴ Ayteke ig Kiyavwiye Jesus awna gitkis nawenyewa iwit patuwesbuhka akiw. Ig awna: — Uhokri gikumadukan pi kabayte ariw madikte amadgaya inin. In kewa igiskabe ayempikanbe amadga pahak was. Ayteke in utepka gavit pahavwi awayg. Ig ner awayg hiyapni hene, ig batek ginaktin mpiynevevye. Ig awna: “Nah isimpite inin was nudahan kahadbe nah misekwe akak madikte igiska ay amadga.” Nikwe ig ayempin akiw. Ig tivik ig piyuk madikte gewkanbet. Ayteke nikwe ig isime ini was akak gewkanbet akakuravig.

Yuwit patuwesbuhka amin akabdat kane gubewisima

⁴⁵ Ayteke ig Kiyavwiye Jesus awna nawenyewa iwit patuwesbuhka. Ig awna: — Hawata akiw Uhokri gikumadukan kewa pohow akabdatbe kane gubewisima kewyo pérola. Nah kehte abektey gikak pahavwi isimkevutne ig mpiksaw ka aynsima aharitne akabdat ku pariye kane gubewisima, ig hiyap ba ig uti.

⁴⁶ Pahaye adahan ig uti pohow akabdat pi barewtenano ku pariye kane gutiwnisima. Ig hiyapni hene, ig piyuk madikte gewkanbet, ig isime nor akabdat akak gewkanbet akakuravig.

Yuwit patuwesbuhka amin tagamayh

⁴⁷ Ayteke ig Kiyavwiye Jesus awna nawenyewa iwit patuwesbuhka akiw. Ig awna: — Nah akkite yit nawenyewa abektey akiw amin ku samah Uhokri gikumadukan. In kewa pahak tagamayhbe. Ku aysaw in subukka ahakwat mahakwa, in kamax arakembet im.

⁴⁸ Ku aysaw in kivun, igkis ivuhtyakevutnevwi inuw ta ihapkat. Ayteke igkis bat nihumwat. Igkis kaniybete ku pariye kibeyne im, igkis darihavevgikis arikut givanyakis. Inme im ku pariye kane kibeynevwima, igkis padakavevgikis.

⁴⁹ Innebaki arakak adahan ku pariye danuh amaksemni hawkrinek. Avim ini ahj atak muwapuw igkis kaniybetevye hiyeg ku pariye kane kibeynevwima gibetitakis hiyeg kibeynevwi.

⁵⁰ Ayteke nikwe igkis padakavevgikis abetit tiket. Ayge hiyeg tihebdi ignes kagah gaybukisnek.

Jesus gikumadukan in nukune igiska

⁵¹ Pisenwa ig Kiyavwiye Jesus aya gikannuhnivwi: — Ba yis pukuhpa inakni nuwnuh? Igkisme kaytwa giwn: — Ihi. Usuh pukuhpin.

⁵² Ayteke nikwe ig awna gitkis: — Nah kuwis akki yit ku samah Uhokri gikumadukan kewa igiskabe. Inme amekene Moís gikumadukan in hawata ke igiskabe. In igiska ayivwivye. Mpuse kannuhekevutne amin amekene Moís gikumadukan, ku ig kannuhwa nutuh amin nudahan nukumadukan hawata, nikwe ig humaw igisye abet gihiyekemni. Ig ka gibunugasima ke pahavwi payt akivarabe ku pariye kadahan igiska nukune akak igiska ayivwivye ay givineku.

Nazareyenevwi ka kiyatha Jesus

⁵³ Pisenwa gawnan inakni iwit patuwesbuhka, ig Kiyavwiye Jesus tivik ayteke.

⁵⁴ Ig diyuhe ta avitit paytwempu Nazaré, ku kiney pitatye ig misakwa. Ig danuh atere, ayge ig kannuhne hiyeg ariku judeyenevwi gileglisakis. Neras timepnevwi giwn ayge igkis wakaymnibdi gidahan. Igkis awna: — Kitak ig uti inin hiyakemniki? Kitak ig uti inin gannu?

⁵⁵ Ka ba ig he ahevutnenen gikamkayh? Ka ba nernema kinagniyo kiyavuno Mahi? Ka ba Tiyagu gikak José, Simawh, Judas, ka ba igkisnema gisamwivwi?

⁵⁶ Ba gisamuvwi ka ba egkisnema misakwa ay ubetwiy? Mmahki ig awna inakni hene?

⁵⁷ Ayge nikwe igkis kiyimwihwe gikak Kiyavwiye Jesus, igkis tukuhwe giw. Igme hiyapni hene, ig awna gitkis: — Madikte hiyeg kiyathenekuye pahavwi Uhokri gawneve muwapuw. Ignesnewa hiyegviyene ku pariye avitya giwaxig gikakkis gimunyavu ignes ka kiyatig.

⁵⁸ Ayge nikwe ig ka keh kibitema annut awaku yumahwa gikamaxwankis givitit.