Matews 12 - Uhokri Gahegbetawni Nukune akak Sawmus

Jesus samdi akivara

¹ Pisenwa inakni gawnan, ig Kiyavwiye Jesus tivik mpiye amadgew pahak was abet samdi. Igkis gikannuhnivwi tivik gihapti. Igkis mativwe. Nikwe igkis matise fahhin ariw, igkis axwig.

² Nerasme farizewkis hiyapni hene, igkis awna ta git Kiyavwiye Jesus: — Iveg neras pikannuhnivwi. Igkis ka iha amekene Moís gikumadukan. Igkis kannivwiye abet samdi.

³ Igme Kiyavwiye Jesus kaytwa giwnkis: — Mmah yis kote ivegbohate Uhokri gannasan ku kiney in kinetihwa amin ku pariye amekene Davi gikehni? Minikwak ig mativwe payak gikakkis gihaptiyevwi.

⁴ Nikwe ig pareke arikut ini leglis kewye Uhokri Givin. Ayge ig axe ini bugut ku pariye kuwis ikepka givetunat Uhokri. Hawata ig ikepni ta gitkis gihaptiyevwi. Amekene Moís gikumadukan awna ku muwvegnenwa kis adahan ignes ax ini bugut. Igkisme axwin heneme igkis ka taraksa mmanawa ig muwveg amnihpigkis.

⁵ Hawata akiw, mmah yis kote ivegbohate amekene Moís gikumadukan ku kiney in kinetihwa amin ku samah muwvegviyene arikuya Uhokri Givin ignes kannivanene abet samdi? Heneme igkis ka taraksa mmanawa amawka ku igkis keh hene adahan kiyathene Uhokri Givin.

⁶ Timapnay nuwnuh yit. Ay pahavwi yibet ku pariye pi kiyatte ariw Uhokri Givin. Ihanabay inakni nuwnuh. Henewatbaki ig.

⁷ Uhokri gannasan minikwekene awna: “Nah ka muwaka yis he kakanhawnen nutuh. Nah pi muwakate yis amnih hiyeg.” Wake yis pukuhpabe inakni iwit, nikwekam yis ka ikiykam ku neras nukannuhnivwi ku igkis ka kibeynevwima. Igkis ka keh mbaynema.

⁸ Mmanawa nah, ku pariye wageswe awayg amadgaya inin, nahnewa samdi akivara.

Jesus makniwa pahavwi awayg kidubetwiye giwak

⁹ Ayteke ig Kiyavwiye Jesus tivik lammesya ariku judeyenevwi gileglisakis.

¹⁰ Ayge pahavwi awayg kidubetwiye giwak. Igkisme neras hiyeg ayge hiyapni hene, igkis awna git Kiyavwiye Jesus: — Ba amekene Moís gikumadukan isaksa adahan wis piyihak samdi abet? Igkis awna inakni hene adahan gihikekten marihwa igkis hiyap ba ig taraksa amekene Moís gikumadukan. Igkis muwaka uti gitaraksan adahan igkis gikamyehpitni.

¹¹ Igme Kiyavwiye Jesus kaytwa giwnkis: — Ku pahavwi yivig muwtoh wiwhe arikut miyokwiye mihad abet samdi, mmah ka yisma kahgi ayteke abetnewa ini samdi?

¹² Ku ka sam wis amnih muwtoh abet samdi, kawnata sam wis amnih hiyeg abet samdi. Hiyeg ka aynsima pi kavigte git Uhokri ariw muwtoh. Amekene Moís gikumadukan isaksa adahan wis keh kabayka abet samdi.

¹³ Ayteke ig Kiyavwiye Jesus awna ta git ner awayg kidubetwiye giwak. Giwn: — Taraknaba piwak. Igme tareke giwak. Aynewa giwak makniw hawata ku samah giwak pahambakya.

¹⁴ Igkisme neras farizewkis hiyapni hene, gitkis ig Kiyavwiye Jesus ig taraksevye hiyeg. Nikwe igkis pese ayteke, igkis kavusaw ahegbete ginetnikis adahan igkis giwmasepten.

Jesus ig hiyeg tuwatviye

¹⁵ Igme Kiyavwiye Jesus hiyak ku pariye gikehnikis. Ig hiyapni hene, ig tivik ariwntak ini iwetrit. Ka aynsima hiyeg kuruwnene gihavu butte. Ayge ig makniwe madikte ku pariye kakahribdavye.

¹⁶ Heneme ig awna ta gitkis: — Ka yi muwaka keh yiwanti nukakuh.

¹⁷ Inakni giwn danuh hene kahadbe in kahayak ku samah Uhokri gawneve amekene Izaíyas awna. Ig awna:

¹⁸ “Kiyavwiye Uhokri awna: ‘Ivegnay nubukuh nukanyan. Ignewa nah batek gikak. Ig keh nah batek ka aynsima. Nah kawihkis nutivuh givititnek. Ayge nikwe ig ekkene nuhiyekemni waditye ta gitkis madikte hiyeg.

¹⁹ Henneme ig ka kabayhaknawa ta gitkis hiyeg. Ig ka kabiman adahan kehne giwatni. Ig ikaw tuwatevye giwtrikkis hiyeg.

²⁰ Ig amnih hiyeg yumanene gawaygi. Ig ka dunih gawaygi akiw. Ku ig hiyap pahavwi hiyeg kene abukribe igigihpisa ig ka awakig akiw. Aysawnemenek ig ayta matekbeta madikte givetunyavu gihawkankis awaku ku samah ig kibeyne hiyeg.

²¹ Ayge nikwe hiyeg muwapuw kamaxwenekuye givititnek.’” Henewatbaki ig amekene Izaíyas awna.

Jesus ka piyihak akakma wavitye gannu

²² Ayteke hiyeg waxwe pahavwi awayg ta git Kiyavwiye Jesus, ig motviye ig hawata mownpiye. Ig kadahan wavitye ay givit. Igme Kiyavwiye Jesus piyihpig. Ig keh ig awna. Ig keh ig hiyap.

²³ Neras hiyeg hiyapni hene, igkis wakaymnibdi. Igkis kinetihwa pawtak. Igkis awna: — Mmah ig ukivarawiy ku pariye wixwiy wahepne? Ignewatbaki!

²⁴ Igkisme neras farizewkis timapni hene, igkis awna: — Kawa. Ig pekkis wavitye givititak ner awayg akak wavitye gikivarakis gannu ay givit. Igwa Belzebu ay givit.

²⁵ Igme Kiyavwiye Jesus hiyak ku pariye abet gihiyekemnikis. Nikwe ig awna gitkis: — Ku hiyeg avitya pahanene waxri ku ignesweke kerbetkis, igkis madikekenek. Paytwempuyenevwi hawata, ku ignesweke kerbetkis, igkis ka ayivwi akiw. Pakebyekne hawata, ku ignesweke kerbetkis, igkis kawnata ayivwi akiw.

²⁶ Wavitye hawata. Wake ig Satanas pekkis gidahanwatbe gihiyegavu wavitye givititakkis hiyeg, amun ini nikwe gikakwa ig keryekam. Wake ig keh henebe, ig pisenwakam akak gikumadukan.

²⁷ Mmah nikwe yis awna numinuh ku nah pekkis wavitye akak Belzebu gannu ay nuvituh? Ya yis yikannuhnivwi? Igkis hawata pekkis wavitye givititakkis hiyeg. Pariye iki gidahankis gannukis? Wake nah pekkis wavitye akak Belzebu gannube, nikwekam igkis yikannuhnivwi nopinawatkam. Igkisnewa arakak ku yis ka awna wadit.

²⁸ Ka ba yis hiyapknima ku nah pekkis wavitye akak Uhokri Gitip gidatni ay nuvituh? Inineki arakak ku Uhokri gikumadukan kuwis danuh.

²⁹ Nah kehte abektey akak pahavwi ku pariye parekkere ta givinekut pahavwi hiyeg detye adahan ig kidisne gewkanbet atere. Avit ig parak atere amawka ku ig wanakminanete ner hiyeg detye. Pisenwa nikwe ik adahan ig parak atere kidis ku pariye ay gimun. Henewa nah keh gikak wavitye gikivarakis. Inneki keh nah detye adahan nah wanekbeta gihawkankis ku pariye kavinawnene ay givitkis hiyeg.

Ka ik adahan wis misakwa henenwatma

³⁰ — Mmahkay yis ka amavan? Ku pahavwi ka amavan, amun ini nikwe ig kuwis kavetunsevun. Ku pahavwi ka darihwak nukakuh, amun ini nikwe ig kuwis suguhpen. Ka ik adahan yis misakwa henenwatma.

Ku yis ka kiyatha Uhokri Gitip, yis ka bayahminaka

³¹ — Ik adahan Uhokri bayahmina hiyeg ariw madikte gitaraksankis, ariw madikte miyathaki. Heneme ku ignes ka kiyatha Uhokri Gitip, nikwe ig ka hiya igma bayahminigkis ariw ini gitaraksankis. Henewatbaki in.

³² Ku pahavwi ka kiyathan nah ku pariye wageswe awayg amadgaya inin, ka sam. Nawenetke kuwewanek ig Uhokri Gitip dax avit giyakni adahan ig kiyathan. Ayge nikwe ig Uhokri bayahminig ariw ini gitaraksan ku samah pitatye ig ka kiyathan. Heneme ku pahavwi ka kiyatha Uhokri Gitip, nikwe ka ik adahan ig Gitip dax avit giyakni adahan ig wagese gihiyekemni. Ayge nikwe kawnata ik adahan ig Uhokri bayahminig ariw ini gitaraksan. Ine ku avim inin, ine aysawnemenek akiw. Ini gitaraksan nidukwenewa.

Ku pariye ay abet uhiyekemni innewa wis awnin

³³ — Ku yis hiyap nah keh kabayka, nikwe yis hiyak ku nah kibeyne hiyeg. In ke ahbe akat. Ku pariye ah akat kabaynowa, eg sarayh guw kabaynovwi guw. Egme ah akat ku pariye kane kabaynoma, guw kawnata kabaynovwima. Ku wis hiyap pahakti amutri sarayh guw kabaynovwi, nikwe wis hiyak ku egu amutri kabaynowa.

³⁴ Yis kaybunyene hiyeg pahaywotneyevwi! Yis ka ik adahan awna kibeyne iwit mmanawa yihiyekemni mbeyevyenen. Mmanawa ku pariye ay abet uhiyekemni innewa wis awnin.

³⁵ Ku pariye kibeynewa hiyeg igi ivegminenekwa gihiyekemni adahan kabaykanenwa. Nikwe he kabaykanen pes giwntak. Igme ku pariye mbeyevye hiyeg igi ivegminenekwa gihiyekemni adahan mbaykanenwa. Nikwe he mbaykanen pes giwnktak.

³⁶ Aysawnemenek avim ini ku aysaw Uhokri gihivetnikis hiyeg ba ignes kibeynevwiwatma, avim ini ig keh igkis akkamnihnek madikte ginetnikis ku pariye tuguh gibiyrikutkis. Ihanabay inakni nuwnuh. Henewatbaki in.

³⁷ Ku ig hiyap yis awna kibeynevwinen iwit, nikwe ig hiyap yis kibeynevwi hiyeg. Heneme ku ig hiyap yis awna mbeyevyenen iwit, nikwe ig hiyap yis ka kibeynevwima hiyeg.

Jesus wakaymni adahan ku samah hiyeg ka amavig

³⁸ Igkis kannuhekevutnevwi amin amekene Mois gikumadukan gikakkis farizewkis igkis timapni inakni hene, igkis awna git: — Kiyavwiye, uya keh annut wowtrik adahan areketni pidatni wotuh kahadbe usuh hiyapi ba pis ayta giwntakwatma Uhokri.

³⁹ Igme Kiyavwiye Jesus kaytwa giwnkis: — Aa, yis hiyeg amadgaya hawkri. Yis mbeyevye yihiyekemni. Yis kuwis isahkiswe giw Uhokri. Inneki keh yis kehkis annut nutuh adahan areketni nudatni yit. Pahatwowa annut akkakanek yit, ini annut ku samah Uhokri keh gikak gawneve amekene Jonas.

⁴⁰ Minikwak ig amekene Jonas misekwe mpana hawkri im gayhriku heneme ig ka miya. In humaw areketni gitkis neras hiyeg avitnenevwi paytwempu Ninnivi ku ig inyewa ekkene Uhokri giwn. Nah hawata nah ku pariye wageswe awayg amadgaya inin, nah misakwanek mpana hawkri waykiku. Inerenewa humaw areketni nudatni yitnek.

⁴¹ Aysawnemenek ku aysaw Uhokri gihivetnikis hiyeg ba ignes kibeynewatma, ka aynsima hiyeg ayge hiyekevyinek ku yis mbeyevye yihiyekemni. Avim ini neras hiyeg avitya paytwempu Ninnivi, igkis hiyekevyinek ay givetun Uhokri ku yis mbeyevye yihiyekemni. Mmanawa minikwak igkis ihe amekene Jonas giwn igkis wagese gihiyekemnikis. Yisme ka iha nuwnuh. Hiyawa nah kiyatte giw amekene Jonas, heneme yisnewa ka iha nuwnuh.

⁴² Hawata akiw nor tino ku pariye gikivarakis amekenegben tiwrikyenevwi egu hawata hiyekevyinek ayge givetun Uhokri ku yis mbeyevye yihiyekemni. Eg kane Uhokriyanma eg misakwa piyawakad, hiyaksa eg ayta atan adahan timapno amekene Salomão giwn awaku ig ka gihiyekemnisima. Yisme ka timepkere nuwnuh. Hiyawa nah hiyakemnite giw amekene Salomão, heneme yisnewa ka timepkere nuwnuh.

Wavitye diyuh givitit pahavwi

⁴³ — Yis kewa pahavwi awaygbe ku pariye wavitye pese givititak. Ig wavitye pese, ig wewvari ku kiney yumanene un. Ig ivegvene pahayku mayeket heneme ig ka uti.

⁴⁴ Ig hiyapni hene, ig awna: “Nah diyuhpite ta nuvinwat akiw, givitit ner awayg ku kitak nah pese.” Ig tivik. Ig danuh atere, ig uti givin miyakerik, barewarik, ahegbet adahan pahavwi parak atere.

⁴⁵ Ig hiyapni hene, ig awna: “Nah iwapte nukebyuvwi atan.” Ig tivik, ig iwe ntewnehker gikebikis wavityempu akiw ku pariye pi mbaytenene gihiyekemnikis giw. Ayteke nikwe igkis diyuh atere misakwa ayge givit ner awayg. Nikwe ner awayg giwskawni pi mbayte ariw pitatye. Yis hiyeg ku akak inin yis kewa ner awaygbe. Yahawkrivwi ayipa kuwis wagese gihiyekemnikis minikwak, yisme ihiwhitviyene ka amavan. Yis yuma kibeyne hiyakemniki abet yihiyekemni. Nikwe aysawnemenek in danuh yit hawata ku samah in danuhe git ner awayg. Yiwskawni pi mbaytenek ariw pitatye.

Jesus kakebyihwa ta gitkis hiyeg ihpenevwi giwn

⁴⁶ Ku samah ig Kiyavwiye Jesus awnempiye inakni iwit, ginag gikakkis gisamwivwi egkis danuh atere. Egkis misekwe kabaywak. Aytontak kabaywaktak egkis wasavanaw gimin Kiyavwiye Jesus ku egkis awnakere gikak.

⁴⁷ Pahavwi hiyeg ayge hiyapni hene, ig awna git: — Kiyavwiye, pinag ay kabaywak gikakkis pisamwivwi. Egkis muwaka awnakere pikak.

⁴⁸ Igme Kiyavwiye Jesus kaytwa giwn: — Pariyeki nnaguh? Pariyeki nusamwivwi? Nah akkite pit.

⁴⁹ Ig tawan gimkatkis neras hiyeg gikannuhnivwi ayge. Ig awna git: — Iveg ayta. Norasnewa ku pariye nnaguh. Nerasnewa ku pariye nukebyuvwi.

⁵⁰ Mmanawa ku pariye hiyeg kehnevwi Wigwiy inurikyene gibetki, ignes nah ikiygikis kewa nukebyuvwibe, egnesme tinogben nah ikiygukis kewa nnaghube.