Matews 11 - Uhokri Gahegbetawni Nukune akak Sawmus

¹ Pisenwa inakni gawnan ig Kiyavwiye Jesus awahkise giwatnivwi muwapuw neras madikawkunene gikebikis gikakkis piyana gawnakis (12). Ayteke nikwe ig tivik gihavukis ta avitit mpuse paytwempu adahan ig kannuhekne adahan ig ekkene Uhokri giwn ta gitkis hiyeg aygnenevwi.

Joawh Batista aya Jesus, “Mmah pisnewa?”

² Avim ini ig Joawh Batista ig ayge ariku parakseket. Ayge ig kinetni Cristo gak ku ig kehne ka aynsima annut. Ig timapni hene, ig awahkise gikannuhnivwi atere gimin Kiyavwiye Jesus.

³ Igkisme tivik, igkis danuh atere git, igkis awna git: — Joawh Batista awna wotuh ku pahavwi nehmnikuhpiye gihavu butte. Mmah ka pisnema? Ba kawk? Ba usuh waha nawenyewa akiw ku pariye nehmnikuhpiye gihavu butte akiw?

⁴ Igme Kiyavwiye Jesus kaytwa giwnkis: — Ataknabay akka git Joawh Batista ini annut ku pariye yis timap yis hiyap ku avim inin.

⁵ Yis hiyap motavye hiyap, miyavuvye wew. Yis hiyap axpusakare avit busukne miypit, mataybavye timap, miyaravye kannikaw. Yis hiyap neras ku pariye kane hiyak kabayka, ku avim inin igkis ekkepka kabayka gitkis.

⁶ Ku pariye hiyeg ka tukuhun igkis uti kabayka nuwntaknek.

Jesus kabayha Joawh Batista

⁷ Igkis Joawh Batista giwatnivwi timapni hene, igkis diyuhe gimkat. Igkis tivikanten, ig Kiyavwiye Jesus awna gitkis neras hiyeg kabubuknene ayge. Ig kinetihwa gimin Joawh Batista. Ig awna: — Yis kuwis atak iwasa Joawh Batista ta amadgat amatap. Ku samah yis atere, mmahpa yivewkan yis utivgi ayge? Mmah yivewkankama ku yis utivgi yuma gidatni ke pahat sivavabe ku pariye mitibetnevye ayge? Kawa. Yis hiyak ku ig ka wagekiswa gimun.

⁸ Mmahpa yivewkan yis utivgi ayge? Mmah yivewkankama ku yis utivgi akak gisimsa kibeyne mitibete? Kawa. Hiyeg ku pariye kasimsavu mitibete ku pariye igisavye ignes ka misakwa amadga amatap. Igkis misakwa ariku ikivarat givin barewyewatnene.

⁹ Mmah yis yivewkan ku yis utivgi Uhokri gawneve ayge? Henewa. Ignewa Uhokri gawneve yis uti. Heneme ig mpiybeta Uhokri gawnevevu pitatyevwi mmanawa ig ekkene ku Uhokri gikumadukan kuwis ahawkanavrik.

¹⁰ Mmanawa ig Joawh Batista ignewa ku kamin Uhokri gannasan kinetihwa. Inakni gannasan akki wot ku pariye Uhokri awna git gikamkayh. Giwn: “Nah awahkiste pahavwi nuwatni pavitkiya adahan ig ahegbetene madikte pavit.” Henebaki inakni iwit awna gimin Joawh Batista.

¹¹ Yuma pahavwinema awayg wayvuka amadga inin kabaytema giw Joawh Batista. Heneme pahavwi ku pariye kuwis kawih Uhokri gikumadukan igi pi kabayte giw. Hiyawa ig pahavwi yuma gikiytani giwtrikkis hiyeg amadgaya inin heneme ig pi kabayte giw mmanawa ginetni kabayte ariw Joawh Batista ginetni.

¹² Igme Joawh Batista ginetni kabayntiwa. Kibeyne, ku samah ig kavusa akka adawnhan Uhokri gikumadukan he kuviknene, ka aynsima hiyeg mpiksewne kawih ini gikumadukan. Igkis mpiksaw niharit akak madikte gawaygikis.

¹³ Ig Joawh Batista kabayte giwkis neras Uhokri gawnevevu pitatyevwi. Mmanawa ginetni kabayte ariw ginetnikis. Uhokri gawnevevu pitatyevwi igkis madikte awnanekuye ku aysawnemenek Uhokri gikumadukan danuhnek. Hawata amekene Moís gikumadukan akki inakniwata. Igme Joawh Batista ekkene ku gikumadukan ahawkanavrik ayipa danuh kuwis.

Joawh Batista ke amekene Eliyasbe

¹⁴ — Igkisme neras Uhokri gawnevevu pitatyevwi igkis awna: “Aysawnemenek pahavwi awayg kewa amekene Eliyasbe ig danuhnek adahan ig ekkeviye adawnhan Uhokri gikumadukan.” Kuri, ku yis hiyekere inyewa ku kamin igkis awna, nah akkite yit ku pariye ner awayg. Ignewatbaki Joawh Batista.

¹⁵ Yis ku pariye katayebnene, ataybiswanabay nutuh. Ihanabay inakni nuwnuh. Henewatbaki ig ke amekene Eliyasbe.

Hiyeg ka amevekere ine Joawh Batista ine Jesus

¹⁶ — Mmah nuwnuh kuri adahan nah akki yit ku samah hiyeg gihiyekemnikis amadgaya inin? Gihiyekemnikis kewa bakimnayhbe nopsanyovwi. Nah akkite yit abektey akak ku bakimnayh arehwene higiwmadga. Ig Uhokri ig kewa pahabu bakimnayhbe ku pariye wakaymni aharit gidahewektenkis. Igkis bakimnayh kabiman ta gitkis gidahewektenkis.

¹⁷ Igkis awna gitkis, “Usuh agighene, usuh kayepne, yisme ka ayta kayepkere ukakuh. Yis ka batekkere payak ukakuh. Ayteke nikwe usuh wages warehwan adahan avuhekwiye usuh tihene. Yisme kawnata tihekere payak ukakuh. Mmahki yis ka amevekere uhiyekemni?” Ihanabay inakni nuwnuh. Henewatbaki ig Uhokri. Hiyeg amadgenevwi inin ka amevekere pahavwinema Uhokri giwatni ku pariye gawahkisni giminkis.

¹⁸ Mmanawa ig Joawh Batista danuh atan ig maxhewne ig ka higap win. Ignesme hiyeg ka amavig. Igkis awna: “Ig wavitye givit.”

¹⁹ Nahme nah ku pariye wageswe awayg amadgaya inin, nah danuh atan nah ka henema. Nah ka maxhaw, nah higap win. Heneme kawnata hiyeg amavan. Igkis awna: “Ka ba yis hiyap ner awayg kayhpiye kahigvekevye? Ig gibetki darihwak gikakkis ladwan, gikakkis hiyeg kane kibeynevwima akiw. Ig kawnata kibeynema hiyeg.” Ka sam. Ku pariye hiyeg hiyeknevwi hiyakemniki ignesnewa ka mahikohnek Uhokri gihiyekemni. Igkis amavinnek.

Jesus wakaymni adahan ku samah hiyeg ka wageskere gihiyekemnikis

²⁰ Ayteke ig Kiyavwiye Jesus kavusa wakaymni gidahankis hiyeg avitnenevwi madikte paytwempu ku kiney ig kuwis keh ka aynsima gannu. Ig ka giwakemnisima awaku ku samah igkis ka wageskere gihiyekemnikis.

²¹ Ig awna: — Akayih. Aysawnemenek ka aynsima mbayka ay yidahannek yis hiyeg paytwempuyenevwi Korazih. Hawata ka aynsima mbayka yidahannek yis paytwempuyenevwi Betsayda. Mmahkay yis ka wageskere yihiyekemni? Wake nah kehbe inwata nannuhbe aynte avit paytwempu Tiru akak Sidoh, ku samah nah keh ayge yibet, nikwekam igkis paytwempuyenevwi mbayavye gihiyekemnikis igkis ayipakam kayehe gitaraksankis, ayipakam igkis wagese gihiyekemnikis. Igkis kawihminawkam akak sak kasiwboye, igkis padakkam tiket ahewra gitewharitkis adahan areketni giwakemnikis.

²² Nikwe aysawnemenek avim ini ku aysaw madikte hiyeg katiwnivwevye avatra gitaraksankisnek, avim ini yis pi hiyapte mbeyne mpiya neras paytwempuyenevwi Tiru akak Sidoh. Heneki yisnek hiyap mbeynenek.

²³ Ya yis hiyeg avitya paytwempu Kafarnawh. Yis ikawnamah pi avitminte hiyeg madikte. Heneme yis tukuhavepkanek ta warikwit arimkanit ini iwetrit ku kiney kane aynsima kayahwaki. Wake nah kehbe inwata nannuhbe aynte avit paytwempu Sodoma ku samah nah keh ayge yibet, nikwekam ignes paytwempuyenevwi mbayavye gihiyekemnikis ignes ayipa wagese gihiyekemnikiskam. Nikwekam ini paytwempu kuviknene ay.

²⁴ Nikwe aysawnemenek avim ini ku aysaw hiyeg katiwnivwevye avatra gitaraksankisnek, yis pi hiyapte mbeyne mpiy neras hiyeg avitnenevwi Sodoma. Heneki yisnek hiyap mbeynenek.

Uhokri akka gihiyekemni ta gitkis hiyeg kene bakimnayhbe

²⁵ Pisenwa gawnan inakni ig Kiyavwiye Jesus piriyepkaw ta git Uhokri. Ig awna: — Kibeyne, Niguh. Pis en akivara. Pis waxri akivara. Nah kabayhap awaku ku samah pis ka akka pihiyekemni gitkis hiyeg hiyakemniyevwi. Gitkisme neras kene bakimnayhbe yumanene gihiyekemnikis giwntekneswa, atere pis akka pihiyekemni.

²⁶ Henewa Niguh, mmanawa innewa ku pariye pimawkan.

²⁷ Ayteke ig awna ta gitkis hiyeg ayge. Giwn: Ig Wigwiy kuwis ekke nutuh madikte gihiyekemni. Yuma hiyeg nuhiyekten nah Uhokri gikamkayh. Ignewa Wigwiy ig pahapo nuhiyekten. Hawata akiw yuma hiyeg gihiyekten Wigwiy. Nahnewa gikamkayh gihiyekten. Ku karit nah muwaka akkig, ignesnewa hawata hiyakgi.

Wewnabay pahamteke gikak Jesus

²⁸ Ayteke ig awna akiw: — Aytninabay numkanit, yis ku pariye yuma kit, yis mpiksewnevwi ke pahavwibe hiyuhwene awika mpiy gidatni. Ba yi ayta mayuwasa yihihwan nutuh. Nah keh yis mayak ta nuvitit.

²⁹ Wewnabay pahemteke nukakuh kewa piyana pakbe dahaka gibitamnakis akak pahat ah adahan kahkiska awika gitkis. Kannuhwanabay nutuh. Mmanawa nah kibeyne hiyeg, nah tuwatasewne hiyeg, nah ikaw warikapte giwkis madikte hiyeg. Ku yis kannuhwa hene nutuh, nikwe yis uti mayaka abet yihiyekemninek.

³⁰ Ku pahavwi wew pahemteke nukakuh, igi ka mpiksaw mpinevevyema akiw. Hagehege gihiyan.