Matews 10 - Uhokri Gahegbetawni Nukune akak Sawmus

Jesus awahkis giwatnivwi muwapuw

¹ Ayteke ariwnteke ini ig Kiyavwiye Jesus pahadguhe giwatnivwi madikawkunene gikebikis akak piyana gawnakis (12). Ayge ig ike kumadukaki gitkis adahan igkisme pekkiswiye wavitye givititakkis hiyeg adahan igkis makniwene hiyeg ariw madikte karaytpiyene ariw madikte mabimnakatru.

² Nah akkite wowhu yit: Pitatye kiyavwiye Simawh ku pariye kewye Pedru gikak gisamwi kiyavwiye Andre. Ayteke Tiyagumni gikak gisamwi kiyavwiye Joawh ku pariye Zebedew gikamkayuvwi.

³ Ayteke kiyavwiye Filip gikak kiyavwiye Bartolomew. Ayteke kiyavwiye Tome nukakuh nah Matews nah ladwan. Ayteke kiyavwiye Tiyagu, ku pariye Alfew gikamkayh, gikak

⁴ kiyavwiye Tadew. Ayteke kiyavwiye Simawh Zeloti gikak Judas Iskariyotismin ner kamaykistinene Kiyavwiye Jesus.

⁵ Ig Kiyavwiye Jesus gawahkiswitnikis muwapuw neras madikawkunene gikebikis akak piyana gawnakis (12). Ig awna gitkis: — Ka yi muwaka atak ta avitit hiyeg kane judeyenevwima giwaxigkis ine kawnata yi muwaka atak ta avitit givinkis hiyeg samariyenevwi.

⁶ Heneme ataknay ta gitkis neras uyakivwiy izhaewyenevwi. Igkis kewa muwtoh biyukavyebe nutuh.

⁷ Ataknabay, akkanay ku ahawkanavrik Uhokri gikumadukan kuwis danuh.

⁸ Makniwanabay hiyeg kakahribdavye. Kannikasanabay hiyeg miyaravye. Makniwanabay hiyeg axpusakare avit busukne. Pekkisnabay wavitye givititakkis hiyeg. Nah ikene ini yannu he nukannenwa yuma atiwni. Kuri yisme amnih hiyeg hawata yuma atiwni.

⁹ Ataknay henen yiwakyekata. Ka yi muwaka atak akak aynesnima karukri ariku yivusra, ine karukri wahano kuwikwiyo, ine karukri wahano seyno, ine karukri kuriwra.

¹⁰ Yis kawnata muwaka atak akak yisakola adahan yiwewni. Yis kawnata muwaka atak akak pikanema yisimsa ine akak yikaswatni, yasuga. Kis adahan yis uti yimawkanitnene giwntakkis neras ku pariye yis amnih.

¹¹ Ku pariye paytwempu yis danuh arit, ivegvanay pahavwi ku pariye kibeyne awayg ayge. Misakwanay ayge gimun he ku aysaw yis pes ayteke paytwemputak.

¹² Ku aysaw yis pitatye parak givinekut, awnanay ta gitkis hiyeg aygnenevwi, “Uhokri gabay yikaknek.”

¹³ Ku igkis hiyeg amavay kabayntiwa, henewa ig Uhokri gabay misakwa ayge gibetkisnek. Heneme ku igkis ka amavay nikwe Uhokri gabay ka misakwa ayge gibetkis.

¹⁴ Ku igkis hiyeg ka amavay aynesnima, ku igkis ka timepkere yiwn, nikwe ku aysaw yis pes ayteke paytwemputak, yis sassah yikugku ariw avathawni adahan areketni gitkis gitaraksankis.

¹⁵ Aysawnemenek avim ini ku aysaw hiyeg katiwnivwevye avatra gitaraksankisnek, neras hiyeg avitya inere paytwempu ignes pi hiyapte mbeynenek mpiya neras hiyeg avitya paytwempu Sodoma akak Gomoha. Heneki igkisnek hiyap mbeynenek.

Aysawnemenek yis hiyapkiska mbeyne yitnek

¹⁶ — Nah yawahkisten gibetitkis hiyeg ke wotbe nah awahkiswiyebe muwtoh ta gibetitkis axtigiviyenebe. Nikwe misakwanabay ahegbetnenekwa gavitkis hiyeg ke pahavwi kaybunebe ig ahegbetnenekwa adahan hiyeg ka sibuhgi. Heneme ikawnabay tuwatavye ayge gibetkis ke pahavu tukwabe.

¹⁷ Misakwanay ahegbet gavitkis hiyeg mmanawa aysawnemenek igkis kamaxweynek waxwevyi ta givetunatkis hiyeg giwewkistenkisnek. Hawata igkis biptevyinek ariku gileglisakis.

¹⁸ Avim ini yis kamiyepkanek ta gitkis hiyaptigi ta gitkis yikivaravu. Yis waxwepka ta givetunatkis avatra ku samah yis nuhiyegavu. Ka sam. Ini humaw yihawkanavriknek adahan yis awnene nudahan ay givetunkis. Ayge yis awnene nudahan givetunkis hiyeg judeyenevwi hawata givetunkis hiyeg kane judeyenevwima.

Uhokri Gitip iki yit iwit adahan yis awna

¹⁹ — Ku aysaw hiyeg kamiyevyi ta givetunatkis hiyaptigi avatra ku samah yis nuhiyegavu, ka yi muwaka ivegmina yihiyekemni adahan ku pariye yis awna gitkis avim ini hawkri. Mmanawa avimnewa ini iwit ikaka yitnek adahan yis awna gitkis avim ini.

²⁰ Ayge nikwe ka yisnema awnene, heneme Wigwiy Gitip ignewa awnene ay yivititak.

²¹ Avim ini hawkri ignesweke pakebyekne kamaykisekbetnek adahan miyaka. Ignesme igti kamaykis gikamkayhkis. Ignesme ikamkayit hawata kavetunsa gigkis gukakkis ginagkis. Ignes kamaykiswigkis adahan miyaka.

²² Ayge madikte hiyeg amiyhevyinek awaku ku samah yis nuhiyegavu. Ka sam. Ku yis ka isahkiswa nuwhunek danuhte amaksemni hawkri, yis isahptawnek.

²³ Ku aysaw yis hiyapkiska mbeyne yit avit paha paytwempu, higihwanabay ayteke ta avitit nawenyewa paytwempu akiw. Avit yis muwavwisa paytwempu ay Izhaewamnaw, nah danuh akiw nah ku pariye wageswe awayg amadgaya inin. Ihanabay inakni nuwnuh. Henewatbaki in.

²⁴ Yuma pahavwinema hiyeg pi kiyatte giw gikannuhten. Yuma pahavwinema ibukti pi kiyatte giw gikivara.

²⁵ Ku pahavwi mataka gikannuhten gikiytani, ikeyvi. Ku yis hiyap nah yikivara kanumka wavityeyan, yiskata nuhiyegavu akiw? Yis hawata kanumka wavityeyannek.

Mmahki yis avis gibohrikis hiyeg gibohrime Uhokri yis ka avis?

²⁶ — Heneme ka yi muwaka avis gibohrikis hiyeg amadgayavu inin. Gitkis gikehnikis mbayka ka kahayak. Heneme aysawnemenek madikte ku pariye ayempiki ini kahayak kabayntiwanek. Madikte ku pariye awastepka, aysawnemenek in mawasaptihpikanek.

²⁷ Nuhiyekemni hawata akiw. Ku pariye nah akki yit yisyekata, yisme akkin ta gitkis madikte hiyeg. Ku pariye nah akki yit kabayanesa yisme akkin gitkis hiyeg akak madikte yihawna.

²⁸ Ka yi muwaka avis gibohrikis neras ku pariye umehpiye yivit, yitipme igkis ka hiya ariwmhak. Heneme avisnay gibohri Uhokri ku pariye kadahan gidatni adahan umah yivit. Ig kadahanata gidatni adahan ig umah yitip aynte amun ini iwetrit ku kiney kane aynsima kayahwaki. Avisnay gibohri igi.

²⁹ Ig kadahan gidatni adahan ig umehpey, ig hawata kadahanata gidatni adahan avuriwyi. Ka ba yis hiyap ku samah ig avuriw madikte kuhivra? Egkis ka ariknawnema; egkis piyukka piyana gukebikis adahan pahamkuwa kirehka, heneme Wigwiy avuriwgukis. Yuma pahavunema tuguh waykborit ku ka igma Uhokri isaksig eg tuguh waykborit.

³⁰ Ku yis hiyap ig avuriw kuhivra, wixwiykata akiw ig ka hiya ukavriwkay hawata akiw? Yuma aynesnima ku pariye ig ka hiyak. Ku pis hiyap usemniwiy ig hiyak ku aysaw akebi.

³¹ Ka yi muwaka avis. Wixwiy pi kavigte git Uhokri mpiy madikte kuhivra. Ig avuriwiy hawata.

Kinetihwanabay nudahan

³² — Ku pariye hiyeg kinetihwene numinuh ta gitkis hiyeg ay amadga inin, aysawnemenek nah kinetihwa giminkis hawata ta git Wigwiy aynte inurik.

³³ Heneme ku pahavwi wihwe nuwhu ay gimunkis hiyeg amadga inin, nah hawata aysawnemenek nah wihwe giwnek aynte inurik gimun Wigwiy.

Hiyeg kavetunsaynek

³⁴ — Ka yi muwaka ikiy ku nah ayta adahan kehne madikte hiyeg amadga inin pasamrak pawtak avim inin. Kawa. Nah ayta adahan kehne hiyeg kerye yikaknek nuvatra.

³⁵ Ikamkayti kavetunsa gigkis gukakkis gunagkisnek awaku ku samah egkis kamaxwenes nuvitit. Ihinyot kavetunsa gumatrukisnek awaku egkis gumatrukis kamaxwanos nuvitit.

³⁶ Awayg gimunyavu igkiswa humaw givetunyavunek.

Amawka wis umahkis uhiyekemni amadgaya inin

³⁷ — Ku pahavwi pi batekte gikak gig gukak ginag mpiyan, igi ka kis adahan ig kanumwa ku ig nuhiyega. Ku pahavwi pi batekte gikak gikamkayh mpiyan, ig kawnata kis adahan ig kanumwa ku ig nuhiyega.

³⁸ Amawka ku nuhiyegavu umahkis gihiyekemnikis amedgene inin ke wotbe igkis daddahkiswinbe ta aminat ahbe, igkis ka ik adahan igkis keh nibetki akiw. Ku pahavwi ka umahkis gihiyekemni hene hawata ke nahbe, igi ka kis adahan ig kanumwa ku ig nuhiyega.

³⁹ Ku pahavwi ka miniwkere ariw gihiyekemni amadgaya inin, igi biyuk akak gaymahwannek giwntak Kiyavwiye Uhokri. Henneme ku pahavwi miniw ariw gihiyekemni amadgaya inin nudahan, igi darih gaymahwan giwntak Kiyavwiye Uhokri adahan avanenekwa.

Amavanabay Uhokri gawneve kabayntiwa

⁴⁰ — Ku pahavwi amavay, amun ini nikwe in ke wotbe ig kuwis amavan hawata. Ku pahavwi namerepten, amun ini nikwe in ke wotbe ig kuwis amava ku pariye nawahkisten atan amadgat inin hawata.

⁴¹ Ku pahavwi amava pahavwi Uhokri gawneve awaku ig Uhokri gawneve, igi uti inwata kabayka ku pariye Uhokri gawneve utinek. Hawata akiw ku pahavwi amava pahavwi awayg kibeyne awaku ig kibeyne hiyeg, igi uti inwata kabayka ku pariye awayg kibeyne utinek.

⁴² Hawata akiw ku pahavwi amnih pahavwi nukannuhni yumahwatnene gikiytani awaku ig nukannuhni, ku ig he iki aynesa un kisevye ta git, ayge nikwe ig uti gitiwninek. Ihanabay inakni nuwnuh. Henewatbaki in.