Markus 9 - Uhokri Gahegbetawni Nukune akak Sawmus

¹ Ayteke ig awna ta gitkis akiw. Giwn: — Kennesa adawnhan Uhokri gikumadukan akak madikte nikiytani. Yaytak ku pariye ay ku akak inin, avit yis miyarap yis hiyapninek. Ihanabay inakni nuwnuh. Henewatbaki in.

Jesus kahayakse gikiytani kabutenne ay givit

² Ayteke ariwnteke ini puguhkuna hawkri, ig Kiyavwiye Jesus iwe Pedru gikak Tiyagumni, gikak Joawh adahan igkis atak gihapti. Igkis wagehe ta avitit paha waxri imuwadnene. Igkiswonakis ayge. Ayge gimunkis ig uniyehwe gihivak nawenyewa akiw. Gihepka amuwe ke kamuwbe.

³ Gisimsa wageswe barewbet tigigihwe. Yuma usukever amadga inin hiya asukak seyne kema inima.

⁴ Ayteke pahaye adahan amekene Eliyas gikak amekene Moís igkis hiyapkiswe atere gitkis. Igkis ayge kinetihwenes gikak Kiyavwiye Jesus.

⁵ Igme Pedru hiyapni hene, ig awna git Kiyavwiye Jesus. Giwn: — Kiyavwiye, kibeynekata wixwiy ay kabubuk avim inin. Uyay misakwa ay. Usuh kehbetate mpana paytbetyanyuvwi ay. Paha pidahan, pahame gidahan Moís, pahame gidahan kiyavwiye Eliyas.

⁶ Ig he awnevyenen mmanawa ig ka hiyak ku samahpa ig awna. Mmanawa igkis ka giwakemnikisima.

⁷ Pahaye adahan paha ukuhne biwhe givititkis. Ayteke paha ikuvimnat awna gitkis aytontak abetitak ini ukuhne. In awna: — Ner nukamkayh nubetki. Ataybiswanabay git.

⁸ Igkisme sarayh givegikis atere, igkis iwasa. Yumehe neras piyananene gikebikis. Igwo Kiyavwiye Jesus misekwe ayge gimunkis.

⁹ Ayteke nikwe igkis muhuke avititak ini waxri imuwadnene. Igkis muhukempiye, ig Kiyavwiye Jesus awna gitkis. Giwn: — Ka ba yi kinetihwa ta gitkis hiyeg aynesnima amin ku pariye yihiyvan ku avim inin. Ka yi muwaka kinetihwa nimin he ku aysawnemenek Nah, ku pariye wageswe awayg amadgaya inin, nah kannikaw ariw numiremninek. Ariwnteke ini nikwe ik adahan yis kinetihwa nimin.

¹⁰ Igkisme timapni hene, igkis iha giwn igkis ka kinetihwa nimin ta gitkis hiyeg. Heneme igkisweke aya pawtak: — Mmahki ig awna inakni iwit hene ku ig kannikaw ariw gimiremninek?

Joawh Batista kewa amekene Eliyasbe

¹¹ Ayteke igkis aya Kiyavwiye Jesus: — Kiyavwiye, ku pis Cristo, ku pis Uhokri gikanyan adahan ukumaduketni, mmahki neras kannuhekevutnevwi awna: “Amawka ku amekene Eliyas igkit danuh atan giw Cristo?”

¹² Igme kaytwa giwnkis: — Henewa in. Pahavwi kene amekene Eliyasbe igkit ayta adahan ahegbeteviye madikte navituh. Hawata inakni Uhokri gannasan minikwekenene kinetihwa numinuh nah ku pariye wageswe awayg amadgaya inin. In awna ku amawka nah hiyap ka aynsima mbeyne, ku amawka nah mahivwihpika.

¹³ Ku samah in kinetihwa numinuh henewa in danuh nutuhnek hawata ku samah in kuwis danuh ta git ner ku pariye kene amekene Eliyasbe. Mmanawa ig ner kuwis danuh atan amadgat inin. Ignesme hiyeg ay arewha git ku samah gimawkanitnenes. Ku samah Uhokri gannasan kinetihwa gidahan, henewatmeki in danuhpiwa git.

Jesus pekkis wavitye givititak pahavwi bakimni

¹⁴ Ayteke ariwnteke ini igkis danuh atere gitkis gikannuhnivwi asemne. Igkis hiyap ka aynsima hiyeg kabubuknene ganwakis. Igkis hiyap kannuhekevutnevwi amin amekene Moís gikumadukan igkis iniyeknes gikakkis ayge.

¹⁵ Ignes hiyeg ku aysaw igkis hiye Kiyavwiye Jesus igkis batek ginaktinkis, igkis sigisbetkis ta gimkanit. Igkis aytnihgi atere.

¹⁶ Igme ayavgikis: — Pariye yinetni gikakkis neras kannuhekevutnevwi ayge?

¹⁷ Pahavwi gaytakis neras hiyeg kaytwa giwn: — Kiyavwiye, uya amnihun. Nah waxwene nukamkayh pit. Ig wavityewnivye. Pahavwi wavitye keh ig mownpi.

¹⁸ Ku aysaw ig wavitye parakgi ig padakgi ta waygborit. Igme bakimni kahawyu gibiy. Ig kagah gaybu. Ig datpup. Nah kuwis aya gitkis pikannuhnivwi adahan igkis pekkis ner wavitye givititak, heneme igkis ka hiya gisamanak.

¹⁹ Ig Kiyavwiye Jesus timapni hene, ig awna git: — Aa, hiyeg taraksavye amadgaya inin. Mmahki yis ka kamaxwa aynesnima givitit Uhokri? Aysaw akebi hawkri yimawkan nah misakwa ay yikak nah kiyaknihwa yikak he yis kamaxwa givitit Uhokri? Kuri waxwa pikamkayh ayta numkanit.

²⁰ Ayteke nikwe igkis hiyeg waxwevgi ta gimkat. Ku aysaw ig wavitye hiye Kiyavwiye Jesus, aynewa ig nuwise bakimni ka ahawnasima akiw. Igme bakimni tuguhe waygborit, ig wagesminew, ihawyot pese gibiyaptak.

²¹ Ig Kiyavwiye Jesus hiyapni hene, ig aya gig: — Aysaw akebi hawkri ariwntak ku samah ig ute inin? Giwn: — Ku samah ig bakimnite ig ute inin. Akaknewa ig aymuhwe.

²² Ig wavitye kuwis tuguhkisgi kiberevut ta abetit tiket, ig tubohkisgi ahakwat un adahan giwmasepten. Kiyavwiye, ku pis hiya wayavak uya amnih usuh, ayava usuh.

²³ Igme Kiyavwiye Jesus kaytwa giwn: — Mmahki pis awna inakni iwit, “ku nah hiya yayavak”? Nah hiya gayavakkis madikte hiyeg ku pariye kamaxwa nuvitit. Madikte arikna ka mahikonema nudahan.

²⁴ Igme bakimni gig timapni hene, ig awna: — Nah kamaxwa pivitit. Uya ayavan keh nah pi kamaxwate pivitit akiw.

²⁵ Nikwenewa ka aynsima hiyeg kavusa pahadguhwa atere gitkis. Ig Kiyavwiye Jesus hiyapni hene, ig himehe ner wavitye kibehtenwa. Ig awna git: — Pis mownpiki akivara, pis mataybiki akivara, nahnewa awna pit, asa pes ayteke givititak bakimni. Ka ba parak givitit akiw.

²⁶ Igme wavitye kabiman. Ig nuwise ner bakimni ka aynsima akiw. Pisenwa ig pese givititak. Igme bakimni misekwe harit kewa miyaviyebe. Neras hiyeg hiyapni hene, kaba madikte awna: — Ig kuwis miyap.

²⁷ Heneme ig Kiyavwiye Jesus sumuhe giwaku, ig kannikasig. Igme bakimni kannikaw ig tabira ayge.

²⁸ Pisenwa ig Kiyavwiye Jesus tivik pareke paytrikute. Gikannuhnivwi atak gihapti igkiswonas. Igkis ayavgi: — Ya usuh? Mmahki usuh ka hiya avukwak ner wavitye?

²⁹ Igme kaytwa gitkis: — Akebi ner wavitye yis ka hiya givukwak henentima kema inima. Amawka ku yis piriyepkaw ka aynsima.

Jesus kinetihwa akiw amin gimiremni

³⁰ Ayteke ariwnteke ini igkis tivik ayteke, igkis waywe awmte avitiw Galileyamnaw. Ig Kiyavwiye Jesus ka muwaka hiyeg hiyakni ku ig ayge.

³¹ Mmanawa ig kannuhne igkiswonas gikannuhnivwi. Ayge ig Kiyavwiye Jesus awna gitkis: — Aysawnemenek Nah, ku pariye wageswe awayg amadgaya inin, nah kamaykiswikanek ta gitkis hiyeg amadgayavu inin. Avim ini igkisme nuwmepten. Heneme abet amamnampiye hawkri ariwntak numiremni nah kannikaw akiwnek.

³² Igkisme gikannuhnivwi timap inakni hene, igkis ka pukuha inakni giwn. Heneme igkis marenpi gibohri adahan igkis ayavgi amin ku samah inakni giwn.

Hiyeg tuwatavye ignesnewa kiyatye giwtrik Uhokri

³³ Ayteke igkis danuh ta avitit paytwempu Kafarnawh. Ayge nikwe igkis pareke paytrikute. Ayge ig Kiyavwiye Jesus ayavgikis: — Mmah yinetni kaksa avigku ahin?

³⁴ Igkisme ka kaytwa giwn. Mmanawa avigku ahin igkis mavihpak amin ku pariye gaytakis pi kiyatenene giwkis.

³⁵ Igme Kiyavwiye Jesus hiyakni hene, ig batahkiswe atere, ig pahadguhe giwatnivwi (12) ta givetunat. Ig awna gitkis: — Ku pahavwi ikewkerevye kiyatye hiyeg giwtrik Uhokri, amawka ku ig ka ikaw hene. Amawka ku ig ikaw ke wotbe ig yumahbe gikiytanibe. Amawka ig ikaw kewa ibuktibe gidahankis madikte hiyeg.

³⁶ Ig awna inakni hene, ig muwaka akki gitkis adahan ku samahpa igkis ikaw kewa ibuktibe gidahankis hiyeg. Nikwe ig iwe pahavwi bakimni. Ig tabirasig giwtrikkisnewa. Ig ugiswig ayge, ig awna ta gitkis:

³⁷ — Ku pahavwi amnih pahavwi bakimni kene nerbe nudahan, amun ini nikwe in ke wotbe ig kuwis amnihunbe. Ku pahavwi hiyeg amnihun, amun ini nikwe in ke wotbe ig kuwis amnihbe ku pariye nawahkisten atan amadgat inin.

Ku pariye ka suguhwi, igi udahan

³⁸ Ayteke ig Joawh awna git: — Kiyavwiye, usuh hiyap pahavwi awayg ig pekkisne wavitye piwavrik. Usuh hiyapni hene, usuh awna git: “Ka ba pekkis wavitye giwavrik Kiyavwiye Jesus.” Usuh mpithevgi hene awaku ig ka wew ukakwiy.

³⁹ Igme Kiyavwiye Jesus kaytwa giwn: — Ka yi muwaka awna git hene, mmanawa pahavwi ku pariye kehne annut nuwavrik igi ka hiya igma aynewatma awna mbayka numinuh.

⁴⁰ Mmanawa pahavwi ku pariye ka suguhwi, igi udahan.

⁴¹ Ku pahavwi amnihyi awaku yis Cristo gihiyegavu, ku ig he iki aynesa un kisevye ta yit, ayge nikwe ig uti gitiwninek. Ihanabay nuwnuh. Henewatbaki in.

Ku pahavwi taraksase pahavwi, igi uti mbeynenek

⁴² — Hawata akiw ku pahavwi taraksase pahavwi bakimni nopsesniye ku pariye kamaxwene nuvitit, igi katiwnihninek. Ig utinek mbayka pi mbayte akiw giw pahavwi ku pariye wanekwika gibitamna akak pohow tip nopsadnano adahan ig padekwika parahwokwate. Henewatbaki in.

Kabayte wis hiyap mbeyne ay mpinekata wis hiyap mbeyne aynte abet tiket

⁴³ — Battukawnaba adahan pis avuriw pihiyekemni ba in kabayntiwatma adahan pis ka taraksa. Ku pis hiyap pis me taraksemet akak piwak, pi kabayte pis bukihpin mpinekata pis tarakse. Mmanawa aysawnemenek pis katiwnivwenek avatra pitaraksan. Pi kabayte pis aymuhwa gimuh Uhokri mawokuh mpinekata pis padekwika piwoknamte piwak ta arimkanit ini iwetrit ku kiney kane aynsima kayahwaki, ta ariwtrikut egu tiket ku pariye kane awakti.

⁴⁴ Ayge mikehriki avanenekwa. Ayge akatwa kewa tiketbe ahaksan avanenekwa.

⁴⁵ Nikwe battukawnaba adahan pis avuriw pihiyekemni adahan pis ka taraksa. Ku pis hiyap pis me taraksemet akak pikugku, pi kabayte pis bukihpin mpinekata pis tarakse. Mmanawa aysawnemenek pis katiwnivwenek avatra pitaraksan. Pi kabayte pis aymuhwa gimun Uhokri yumanene pikugku mpinekata pis padekwika pegbakte pikugku ta arimkanit ini iwetrit ku kiney kane aynsima kayahwaki.

⁴⁶ Ayge miyehriki avanenekwa. Ayge akatwa kewa tiketbe ahaksan avanenekwa.

⁴⁷ Ku pis hiyap pis me taraksemet awaku pis iveg arimkat ku pariye arikna kane kabay, pi kabayte pis wareke piwtyak mpinekata pis tarakse. Mmanawa pi kabayte pis aymuhwa amun Uhokri gikumadukan mowtih mpinekata pis padekwika pebkakte piwtyak ta arimkanit ini iwetrit ku kiney kane aynsima kayahwaki.

⁴⁸ Ayge mikehriki avanenekwa. Ayge akatwa kewa tiketbe ahaksan avanenekwa.

⁴⁹ Madikte hiyeg ayge pemehepkanek akak tiket.

⁵⁰ Nikwe battukawnay adahan yis avuriw yihiyekemni adahan in barewbet kewa pambe, adahan yis ka amava hiyakemniki amadgaya inin abetitma yihiyekemni. Pam kabay, heneme ku in wagesbetepka payebdak akak wayk, wis ka hiya wisma barewbethin akiw.