Markus 7 - Uhokri Gahegbetawni Nukune akak Sawmus

Jesus gihiyekemni kabayte mpiy amekenegben gihiyekemnikis

¹ Ayteke gaytakis neras farizewkis gikakkis gaytakis kannuhekevutnevwi amin amekene Moís gikumadukan igkis danuh atere aytontak avititak Jerusalém. Igkis pahadguhwa ta git Kiyavwiye Jesus.

² Igkis ayge gikak, igkis hiyap ku Kiyavwiye Jesus gikannuhnivwi ka sukokaw avit igkis ax kema amekenegbenma adahan igkis humaw barewvit giwtrik Kiyavwiye Uhokri. Igkis hiyapni hene, gitkis gikannuhnivwi ax akak giwakkis patehwevye giwtrik Kiyavwiye Uhokri.

³ Mmanawa neras fareswkis gikakkis madikte judeyenevwi giwewkistenkis akiw, igkis kiyatha amekenegben gihiyekemnikis, igkis sukokaw kabayntiwa avit igkis ax. Ku igkis ka sukokaw hene, igkis ka ax. Ta gitkis ini keh igkis humaw barewvit giwtrik Kiyavwiye Uhokri.

⁴ Hawata akiw ku aysaw igkis diyuh ariwntak im gavikekri igkis sakta gimanakis akak un adahan in barewbet giwtrik Kiyavwiye Uhokri. Ku igkis ka saktin hene, igkis ka axni. Igkis hawata kiyatha ka aynsima amekenegben gihiyekemnikis akiw kewa inibe. He igkis sukuheku gigoblakis akak gisuwyegakis akak gikaravakis kehka kuwiwra adahan in barewegikave giwtrik Kiyavwiye Uhokri. Igkis sukuhekuni kabayntiwa ku samah amekenegben gihiyekemnikis.

⁵ Ayteke nikwe neras farizewkis gikakkis neras kannuhekevutnevwi amin amekene Moís gikumadukan igkis aya Kiyavwiye Jesus: — Mmahki pikannuhnivwi ka iha amekenegben gihiyekemnikis? Avit igkis ax igkis ka sukokaw kabayntiwatma kema igkisma. Igkis ax akak giwakkis patehwevye giwtrik Kiyavwiye Uhokri.

⁶ Igme Kiyavwiye Jesus kaytwa giwnkis: — Yis farizewkis ikewne ke wotbe yis kibeynevwibe hiyeg bawa yis pi mbayte giwkis nawenyevwi hiyeg. Minikwak amekene Izaíyas kuwis kinetihwa yimin. Ig ekkene Uhokri giwn, ig awna: “Neras hiyeg kiyathan akak gibiykisnen bawa gihiyekemnikisme piyawakad nuwhu.

⁷ Igkis kiyathan waditnevyenen. Igkis kannuheknes amin hiyegnen gihiyekemnikis amadgaya inin ke wotbe in nuhiyekemnibe.”

⁸ Inakni iwit kinetihwa yimin. Mmanawa yis kuwis miyehe Uhokri gikumadukan heneme yis kiyene kabayntiwa hiyeg gihiyekemnikis amadgaya inin.

⁹ Ayteke ig Kiyavwiye Jesus awna gitkis akiw. Ig awna: — Yis ka yannusima mayta Uhokri gikumadukan adahan yis pi ihpate giwnkis amekenegben awenyan igwa Uhokri gikumadukan.

¹⁰ Nah akkite yit ku samah. Ig amekene Moís awna: “Kiyatha pig, kiyatha pinag.” Hawata akiw ig awna: “Ku pahavwi miyatha gig, miyatha ginag, pugamawka ig umehpika.” Henewatbaki ig Uhokri awna.

¹¹ Yisme awna: “Ku pahavwi ik adahan ig amnih gig gukak ginag heneme ku ig awna ta gutkis: ‘Nah ka hiya nahma amnihyi akak ini newkanbet mmanawa in “Korbah”. Inakni iwit akki ku nah kuwis ikakse ku nah kawih madikte newkanbet gidahannen Kiyavwiye Uhokri.’

¹² Ku pahavwi awna inakni hene, nikwe yis ka isaksig adahan ig ayava gig gukak ginag.

¹³ Ku aysaw yis iha inakni giwnkis amekenegben ku kamin yis kannuhne hiyeg, amun ini nikwe yis kuwis ikene amekenegben gihiyekemnikis pi kabayte mpiy Uhokri gikumadukan. Mmanawa yis mpitha hiyeg adahan ignes ka kiyatha gigkis. Yis keh arakembet akebi ini.

Ku pariye ay abet uhiyekemni innebaki keh wis patehwevye

¹⁴ Ayteke ig Kiyavwiye Jesus pahadguhe madikte hiyeg ayge ta gimkanit akiw. Ig awna gitkis: — Ataybiswanabay numkanit. Pukuhpanabay nuwnuh.

¹⁵ Ku pariye arikna wis iki ubiyrikut ka innema keh wis patehwevye giwtrik Uhokri. Heneme ku pariye mbayka pes ubiyaptak innebaki keh wis patehwevye giwtrik Uhokri.

¹⁶ Ku yis katayeb, ataybiswanabay nutuh.

¹⁷ Ayteke ig Kiyavwiye Jesus pes gibetitakis neras hiyeg. Ig pareke paytrikut. Igkis gikannuhnivwi hiyapni hene, igkis danuh atere git. Igkis ayavgi: — Uya akkamnih wotuh inakni iwit patuwesbunka amin ku pariye keh hiyeg patehwevye giwtrik Kiyavwiye Uhokri.

¹⁸ Igme Kiyavwiye Jesus kaytwa giwn: — Mmah yis kawnata pukuha nuwnuh? Ka ba yis hiyap ku pariye arikna wis iki ubiyrikut ka innema keh wis patehwevye giwtrik Uhokri,

¹⁹ awaku in ka parak abetit uhiyekemni, in he mpiyevyenen wayhrikuw, kuwewa akiw wis ahinavrikuhpin? Akak inakni iwit ig akki ku madikte axkaritnenevwi kabay giwtrik Kiyavwiye Uhokri.

²⁰ Ayteke ig awna: — Heneme ku pariye mbayka pes ubiyaptak, in ayta abetitak uhiyekemni. Innebaki ik adahan keh wis patehwevye giwtrik Uhokri.

²¹ Mmanawa abetitak uhiyekemni ayteke pes mbeyevye hiyakemniki, mehka imunti, amevwiki, umahaka, powkemniki,

²² miyarhawka, mbayka, kinisaka, meksaki, atihpaki, miyathaka, kawantiki, puwvuki.

²³ Madikte ini mbayka pes abetitak hiyeg gihiyekemnikis. Innebaki ku pariye keh wis patehwevye.

Jesus amnih pahavu tino kane judeyanoma

²⁴ Ayteke pisenwa ig Kiyavwiye Jesus kannikew ig tivik ta avitit ini waxri ku kiney paytwempu Tiru akak paytwempu Sidoh misakwa. Ig danuh atere, ig pareke paytrikut. Ig ka muwaka hiyeg hiyakni ku ig ayge, heneme ka hiya igma ayamwa giwkis.

²⁵ Ayteke pahavu tino kane judeyanoma eg time gak ku ig misakwa ayge. Gukamkayesa wavityewnivyo. Eg hiyapni hene, eg tivik, eg danuh atere git, eg paberetusew ta gikimpuwit.

²⁶ Eg tino eg gresiyano. Eg amadga wayk aynte Sirufenisiyamnaw. Eg danuh atere, eg amnihswe git. Eg awna: — Kiyavwiye, uya amnihun. Pekkisnaba ner wavitye ayteke guvititak nukamkayh.

²⁷ Igme Kiyavwiye Jesus kaytwa giwn: — Kote ikte. Amawka ku nah amnih nukamkayuvwi judeyenevwi pitatye. Ka kis adahan nah hiyak pikak kuri pis kane judeyanoma. Ku nah hiyak pikak kuri in ke wotbe nah iwevyebe nukamkayuvwi gimanakis nah padekwin ta gitkis pewru.

²⁸ Egme kaytwa giwn: — Henewa, Kiyavwiye. Heneme he pewruyan ku pariye misakwa anavi gikivarakis gaxten ignes ax arebdibdi tuguhavye giwntakis gikamkayuvwi.

²⁹ Ig Kiyavwiye Jesus timapni hene, ig awna gut: — Kiyavuno, inakni pikaytwan kabayntiwa. Kuri nikwe hiyawa pis diyuhe pivinwat akak kabayka. Ner wavitye ayipa pese guvititak pikamkayh.

³⁰ Eg timapni hene, eg tivik ta guvinekut. Eg danuh atere, eg ute gukamkayh mayakno amadga gulita. Ayipa ner wavitye kuwis pese guvititak.

Jesus makniwa pahavwi awayg mataybivye, mownpiye

³¹ Pisenwa ig Kiyavwiye Jesus tivik avititak ini waxri ayge ahumwa paytwempu Tiru. Ig tivik avutiw paytwempu Sidoh, avitiw ini waxri ku kiney paytwempu Dekapolis. Ayteke ig danuh ta akigbimnat mahakwa Galileya.

³² Nikwe ka aynsima hiyeg danuh atere gimkat. Igkis waxwe ta git pahavwi awayg mataybivye, mownpiye. Igkis awna git: — Kiyavwiye, uya amnihgi sarayh piwak givitit kahadbe ig makniw.

³³ Igme Kiyavwiye Jesus iwevgi avawyewa giwkis neras hiyeg, igwo. Ayge ig idis pahat giwak ta gitaybikut ner awayg. Ayteke ig tuves, ig dax ta ginenborit ner awayg akak gaybi.

³⁴ Pisenwa ig sarayh givegi ta inurikut, ig kahekanaw. Ig awna git: — Efatá. Inakni wownavrikwiy, “turuh”.

³⁵ Aynewa ner awayg gitaybi turuhe. Ginen isehe. Ig awna kabayntiwa.

³⁶ Ayteke nikwe ig Kiyavwiye Jesus awna ta gitkis neras hiyeg. Giwn: — Ka yi muwaka kinetihwa ta gitkis hiyeg amin ku pariye nukehni gikak ner awayg. Heneme ku samah ig pi awneva inakni hene ta gitkis hiyeg, igkis pi awneva akiw.

³⁷ Igkis wakaymnibdi gidahan mpinevevye. Igkis awna: — Ig keh madikte kabayntiwa. He ig keh mataybivye timap, mownpiye awna.