Markus 5 - Uhokri Gahegbetawni Nukune akak Sawmus

Jesus awahkis wavityempu ta givuritkis pakirempu

¹ Ayteke pisenwa igkis hamah pahabakat igkis minehwe atere avit gadarayenevwi giwaxigkis.

² Igme Kiyavwiye Jesus sarayhwe waxrit. Ayge pahavwi awayg wavityewnivye atere patiptakig. Ig pes abetitak imewti.

³ Ig awayg misakwa ayge avuheket. Hiyeg ka hiya giwankaminka he akak xen.

⁴ Mmanawa takunipti igkis wanakminave gibagwan akak giwan akak sivari akak xen heneme ig matisbetepni madikte. Yuma pahavwinema hiyeg hiya gisamanak.

⁵ Mataytak, hewke tiyegem ig wewvari muwapuw avuheketiw, muwapuw waxribdiw. Avanenekwa ig kabiman, ig huwivwihtaw akak tip.

⁶ Ku aysaw ig hiye Kiyavwiye Jesus piyawakad, ig sigise atere gimin, ig paberetusaw ta gitivut.

⁷ Ig kabiman git akak gihawna. Giwn: — Aa, Kiyavwiye Jesus. Pis Kiyavwiye Uhokri gikamkayh inurikyene. Pariye pimawkan ta nutuh ku avim inin? Uya amnihun gidahan Kiyavwiye Uhokri. Ka ba hiyapkis mbeyne nutuh.

⁸ Ig awna inakni iwit hene mmanawa ig Kiyavwiye Jesus kuwis pekkiswiye ner wavitye mbeyevye aygivititak.

⁹ Ayteke nikwe ig Kiyavwiye Jesus ayavgi: — Mmah piw? Igme kaytwa giwn: — Nuwhu “Pibohram”. Mmanawa usuh wavityempu ka aynsima ay givit.

¹⁰ Ayteke ig amnihswe git Kiyavwiye Jesus akiw. Ig awna git: — Ka ba arewepma wotuh awahkiswima usuh piyawakad ariwntak inin iwetrit.

¹¹ Ayge pahabunene pakirempu axwenekis avit paha waxri imuwadnene.

¹² Igkis wavityempu hiyapni hene, igkis aya git Kiyavwiye Jesus: — Uya awahkis usuh tahan givititkis pakirempu. Isaksanaba usuh parak givititkis.

¹³ Igme Kiyavwiye Jesus isaksevgikis. Ayteke nikwe neras wavityempu mbeyevye igkis pesbetwikis givititak ner awayg. Igkis pareke givititkis ignes pakirempu. Neras pibohramnene pakir igkis pina mil (2.000) gikebikis. Igkisme wavityempu parekwigkis, igkisme pakirempu sigisbetwikis ta asebrikute. Igkis tubohbetwikis ta ahakwate mahakwa. Ayge igkis aniksewbet ahakwa mahakwa.

¹⁴ Pakirempu gikavriwtenkis igkis hiyapni hene, igkis sigisbet kibehtenwa ta paytwempuwit. Igkis danuh atere, igkis kinetihwa nimin muwapuw paytwempuriw muwapuw iwetrit aranwa paytwempu. Neras hiyeg paytwempuyenevwi timapni hene, igkis tivik atere adahan igkis hiyepnes ku pariye danuh.

¹⁵ Igkis danuh atere git Kiyavwiye Jesus, igkis ute ner awayg ku pariye kuwisnene makniw ariw wavityempu. Igme bat ayge. Ig kasimsavu kuri. Gihiyekemni diyuh adukwenewa akiw.

¹⁶ Igkis hiyapni hene, igkis avisasew. Neras ku pariye hiyepnevwi madikte ku pariye kehka gikak ner awayg igkis kinetihwa ta gitkis neras hiyeg amin madikte ku pariye danuh ta git ner awayg gikakkis neras pakirempu.

¹⁷ Igkis timapni hene, igkis awna git Kiyavwiye Jesus: — Su tivik aytakihan avititak uwaxig.

¹⁸ Igme katapte amadgat gihmun. Igme ner awayg ku pariye kuwisnene makniw ariw wavityempu, ig awna ta git: — Nah ataka pihapti.

¹⁹ Igme Kiyavwiye Jesus awna git: — Pi kabayte pis misakwa ay. Su ataknate ta pivinwat ta gitkis pikebyuvwi. Kinetihwanaba gitkis amin madikte ku samah Uhokri keh pikak ku samah ig amnihpep.

²⁰ Igme awayg timapni hene, ig tivik ta avitit paytwempu Dekapolis. Ig danuh atere ig kavusa kinetihwa ta gitkis madikte hiyeg aygnenevwi amin ku samah Kiyavwiye Jesus keh gikak. Igkisme wakaymnibdi ka aynsima.

Jayru amnihswa git Jesus

²¹ Igme Kiyavwiye Jesus manuke pahabakat mahakwa akiw amadga umuh. Ig danuh atere, ig ute ka aynsima hiyeg pahadguvu adahan igkis patiptakene ig ayge akigbimna mahakwa.

²² Ayteke pahavwi awayg danuh atere git Kiyavwiye Jesus. Giw Jayru. Ig leglis akivara, judeyenevwi gileglisalis. Ig hiyavgi, ig paberetusaw ta gikimpuwit.

²³ Ig awna git: — Kiyavwiye, uya amnihun. Nukamkayh mihenavyo pahayempi guyekwin. Ba ayta sarayh piwak ta guvitit kahadbe eg makniw eg ka miyó.

²⁴ Ig Kiyavwiye Jesus timapni hene, ig tivik gihapti. Ka aynsima hiyeg tivik gihapti. Ig waywe dahebdi gikakkis.

Pahavu tino makniw ariw guminewkan

²⁵ Ayge nikwe pahavu tino danuh gihavu butte. Eg kuwis hiyap mbeyne akak guminewkan adahan ka aynsima kamukri, madikawkubu akebi akak pikana arawna (12).

²⁶ Eg hiyap mbeyne ay giwakukis ka aynsima mekseh kuwis. Eg sarayhe gukakura madikte adahan gikatiwnihpitnikis. Heneme eg kote makniwte. Guwskawni pi mbayte ariw pitatye.

²⁷ Eg kinetni Kiyavwiye Jesus gak. Nikwe eg danuh atere giharaptak gibetimpikis neras hiyeg, adahan eg daxno gisimsa.

²⁸ Mmanawa eg awna gunaktin: — Ku nah he daxpi gisimsa, ikeyvi, nah makniw.

²⁹ Eg danuh atere, eg daxwin. Aynewa guminewkan matiswe. Eg kayah ku eg kuwis makniw ariw gukahri.

³⁰ Igme Kiyavwiye Jesus kayah ku gidatni pes aynesa ku samah ig makniwevgu. Ig hiyapni hene, ig wagestaw ayge gibetkis hiyeg. Ig awna: — Pariye dax nukawihni?

³¹ Igkisme gikannuhnivwi awna git: — Kiyavwiye, Ka ba pis hiyap ka aynsima hiyeg daykekbeti pikak? Mmahki pis awna: “Pariye daxwen?”

³² Igme ivegvari guvegepten gidaxten gikawihni.

³³ Eg tino hiyapni hene ku eg makniw kuwis, eg danukwa atere git. Eg avisasew. Eg segke. Eg paberetusaw ta gitivut. Eg akki git makisute.

³⁴ Igme awna gut: — Nukebyi, pis makniw mmanawa pis kamaxwa ta nuvitit. Hiyawa pis diyuhe pivinwate akak kabayka. Pis makniw ariw pikahri.

Jesus kannikasa Jayru gikamkayh

³⁵ Ku samah ig Kiyavwiye Jesus awnempiye inakni iwit hene, aynesa hiyeg danuh atere. Igkis ayta givinwatak ner leglis akivara. Igkis atere ewkne inetit git. Igkis awna git: — Pikamkayh ayipa miyop. Ka muwaka wewkis ukannuhtenwiy waditnevyenen.

³⁶ Igme Kiyavwiye Jesus ka aminama ariw inakni giwnkis. Ig awna ta git leglis akivara. Giwn: — Ka muwaka avis. Kamaxwanaba ta nuvitit.

³⁷ Ig ka isaksa pahavwinema hiyeg atak gihapti. Ignesnenwa Pedru gikak amekene Tiyagumni gikak Joawh ku pariye Tiyagumni gisamwi igkiswonas tivik gihapti.

³⁸ Ayteke ig Kiyavwiye Jesus danuh atere givinekut ner awayg leglis akivara. Ayge ig hiyap ka aynsima hiyeg kadukman. Igkis tihenekuyes, igkis kadniyes guharit nor bakimni ka aynsima.

³⁹ Ig hiyapni hene, ig parak atere, ig awna gitkis neras hiyeg: — Mmahki yis kadukman? Mmahki yis tih? Nor bakimni ka miyó. Himak eg.

⁴⁰ Igkisme hiyaraptihpig. Igme pekkiswigkis madikte. Ayteke ig iwe nor bakimni gig gukak gunag payak gikakkis neras gihaptiyevwi igkis parak ta arikut xam ku kiney eg haritminano.

⁴¹ Ayge ig sumuh nor bakimni guwaku. Ig awna gut: — Talita, kumi. Inakni wownavrikwiy “Mim, kannikaw”.

⁴² Aynewa eg kannikew eg wew. Mmanawa gaw madikawkubu kamukri akak pikana arawna (12). Igkis madikte wakaymnibdi ka aynsima.

⁴³ Igme Kiyavwiye Jesus awna gitkis: — Ka yi muwaka akkin ta gitkis hiyeg. Ikinay gut aynesa gumana.