Markus 16 - Uhokri Gahegbetawni Nukune akak Sawmus

Jesus kannikew

¹ Ariwnteke ini, samdi kuwis mpiye kuwis, eg kiyavuno Mahi Madalena gukakkis eg kiyavuno Mahi ku pariye Tiyagu ginag, egwata kiyavuno Salome egkis isime imihgi adahan gimihetni Kiyavwiye Jesus givit adahan ig avuhpiki.

² Paka abet kabeyweke, pesantene kamuw, egkis tivikwiyos ta arimkanit gimew.

³ Ayge avigku ahin egkis kinetihwa pawtak, egkis awna: — Pariyeva hiyeg adahan wiwhne udahanwiy nor tip ku pariye asabwat gimew?

⁴ Ayteke egkis sarayh guvegyikis atere egkis hiyap ku nor asabwatip ayipa wiwhpika. Nor tip kanopsimahad.

⁵ Egkis hiyapni hene, egkis parak aterenewa arikut gimew. Ayge egkis hiyap pahavwi takweye inurikyene bat ayge kihehavrik. Igme kasimsavu simis seyne. Egkis hiyapni hene, egkis kawadsan egkis avisasew.

⁶ Igme awna ta gutkis: — Ka yi muwaka avis. Yis ivegeviye Kiyavwiye Jesus Nazaréyene ku pariye kuwis deddehpika. Ig yuma ay. Ig kuwis kannikew. Hiyawa yis iwasa gidukwen ay ku kiney igkis sarayhpig. Egkis iwasa gidukwen.

⁷ Ayteke ig ahj awna gutkis: — Kuri ataknabay ta gitkis gikannuhnivwi, hawata ta git Pedru. Awnanay gitkis: “Ig Kiyavwiye Jesus tivik pitati yavit ta avitit Galileyamnaw. Ayge yis hiyavginek ku samah ig kuwis akki yit.”

⁸ Egkis hiyapni hene, egkis pese kibehtenwa arikutak gimew. Egkis wakaymni ka aynsima he egkis segke awaku egkis wadisasew. Egkis ka awna git pahavwinema hiyeg avigkuya ahin awaku gavisnikis.

Jesus hiyapkiswa gut Mahi Madalena

⁹ Ig Kiyavwiye Jesus kannikew hawkanawa paka abet. Ig hiyapkiswe pitatye ta gut kiyavuno Mahi Madalena. Eg nor ku kavititak minikwak ig ivuke ka aynsima wavitye guvititak, ntewnehker gikebikis. Ayge ig hiyapkiswe gut.

¹⁰ Eg hiyapni hene, eg tivik ta gitkis neras ku pariye wewnevwi gikak. Eg danuh atere gitkis, eg utevgikis kabubuk kadniyekis ayge. Igkis tihenekis. Eg awna gitkis:

¹¹ — Kiyavwiye Jesus iveg akiw. Ig hiyapkiswe nutuh. Igkisme timapni gunetni hene, igkis ka iha inakni guwn.

Jesus hiyapkiswa ta gitkis piyana gikannuhnivwi

¹² Ariwnteke ini ig Kiyavwiye Jesus hiyapkiswe nawenyewa gihivak ta gitkis piyana gikebikis gikannuhnivwi, avim ini ku aysaw igkis waywepnene ta amatmadgetwiye.

¹³ Igkis hiyapni hene, igkis diyuhe ta avitit paytwempu Jerusalém. Igkis danuh atere, igkis ekkepni ta gitkis gikannuhnivwi asemne. Heneme igkis kawnata iha inakni giwnkis.

Jesus hiyapkiswa gitkis giwatnivwi

¹⁴ Ariwnteke ini ig hiyapkiswe ta gitkis giwatnivwi madikawkunene gikebikis gikak pahavwi gawnakis (11). Igkis axnes, ig hiyapkiswe atere. Ig himehpigkis atere. Ig awna gitkis: — Yidaniskata yis ihpa giwnkis neras ku pariye nuhivetnivwi ku nah kuwis kannikew.

¹⁵ Ayteke ig awna gitkis: — Ataknabay muwapuw amadgat hawkri. Akkanabay ini kibeyne inetit numinuh ta gitkis madikte hiyeg.

¹⁶ Ku pariye hiyeg iha inakni yinetni, ig kewviye, igi isahptawnek. Igme ku pariye ka iha yinetni, igi biyuknek giw Uhokri.

¹⁷ Igkisme ku pariye ihpenevwi nuwnuh, Uhokri iki gannu ta givitkisnek adahan igkis kehnes annut. Avim ini igkis pekkis wavitye givititakis hiyeg nuwavrik. Igkis awna ariku nawenyewa iwit.

¹⁸ Ku igkis sumuhe kaybuneva, ig ka kehgikis ariknawnema. Ku igkis higa iveyti pahaywotneyeva in kawnata kehgikis ariknawnema. Ku aysaw igkis sarayh giwakkis givititkis hiyeg kakahribdavye, ignes makniwnek.

Jesus iwepka ta inurikut

¹⁹ Pisenwa inakni gawnan, ig Kiyavwiye Jesus iwepka ta inurikut. Ayge ig batahkiswe adahan ig kumadukene gihumwa Kiyavwiye Uhokri ay amun ini iwetrit ku pariye kane nikiytanisima kihehaptak.

²⁰ Igkisme giwatnivwi tivik ekkene inakni kibeyne inetit muwapuw. Igme Kiyavwiye Uhokri iki ini gannukis adahan igkis kehnes annut kahadbe hiyeg iha inakni giwnkis.