Markus 10 - Uhokri Gahegbetawni Nukune akak Sawmus

Maytwawka

¹ Pisenwa ig Kiyavwiye Jesus kannikew ig pese ayteke ig tivik avitit Judeyamnaw pahabakatak warik Jordawh. Ig danuh atere, ka aynsima hiyeg pahadguhwa ta gimkanit akiw. Ayge ig gikannuhtenkis ku samah inpawa ig keh.

² Ayteke gaytakis farizewkis danuh atere git. Igkis ayaptig adahan gihikekten ba ig awna iwit taraksebetnema. Igkis ayavgi: — Ba wadit adahan wis isaksa pahavwi adahan ig mayta gihayo?

³ Igme kaytwa giwnkis: — Mmahpa amekene Moís gikumadukan akki yit?

⁴ Igkisme kaytwa giwn: — Amekene Moís isaksa pahavwi adahan ig mayta gihayo. Ig awna: “Ku pahavwi maytevye gihayo, amawka ig iki gut pahak kagta ku pariye awna: ‘Pis ka nuhayama akiw’. Ayteke nikwe hiyawa ig maytevgu.”

⁵ Igme Kiyavwiye Jesus awna gitkis: — Ig amekene Moís tameke inakni gikumadukan yidahan awaku yis yidani ihpa Uhokri giwn.

⁶ Henneme minikwak humawkariwka ka henema: “Humawkariwka ig Uhokri keh hiyeg humaw awayg gukak tino.

⁷ Ku aysaw pahavwi awayg maripkaw, ig tivik giw gig gukak ginag. Ig hamah gukak gihayo.

⁸ Amun ini nikwe egkis piyamate humaw ke wotbe egkis pahavwiwatbe guvitkis pawtak.” Ayge nikwe ke wotbe egkis pahavwiwatbe.

⁹ Amawka ku hiyeg amadgaya inin ka ibakhasa ku pariye Uhokri hamahkise pawtak.

¹⁰ Pisenwa inakni gawnan, ig Kiyavwiye Jesus tivik paytrikute. Ayge ariku payt igkisme gikannuhnivwi ayavgi akiw adahan maytwawka.

¹¹ Igme awna gitkis: — Ku pahavwi mayta gihayo, ku ig maripkaw gukak pahavuwa tino akiw, ay amun ini nikwe giwtrik Uhokri ig kuwis powkemnihwe gukak.

¹² Hawata akiw ku eg tino mayta gugihgi, ku eg maripkaw gikak pahavwiwa awayg akiw, ay amun ini nikwe giwtrik Uhokri eg kuwis powkemnihwe gikak.

Jesus kiye Uhokri gidahankis bakimnayh

¹³ Ayteke hiyeg danuh atere git Kiyavwiye Jesus. Igkis waxwe gikamkaykis ta git adahan ig sarayh giwak givititkis adahan ig kiyene Kiyavwiye Uhokri gidahankis. Igkisme gikannuhnivwi hiyapni hene, igkis awna gitkis adahan igkis ka ayta sigimwihgi.

¹⁴ Igme Kiyavwiye Jesus hiyapni hene, ig ka batek. Ig himehe gikannuhnivwi ayge. Ig awna gitkis: — Isaksanabay bakimnayh igkiste aytnite numkanit. Ka yi muwaka mpitha bakimnayh. Mmanawa ku pariye hiyeg gihiyekemnikis kene bakimnibe ignesnewa ku pariye kawih Uhokri gikumadukan.

¹⁵ Ku pahavwi ka iha Uhokri gikumadukan kema bakimnima, igi ka kawih Uhokri gikumadukan. Ihanabay inakni nuwnuh. Henewatbaki in.

¹⁶ Ayteke nikwe ig ahiwave bakimnayh, ig ugiswigkis. Ig sarayh giwak givititkis. Ig kiye Kiyavwiye Uhokri gidahankis.

Mahiko hiyeg igisavye isahptaw

¹⁷ Ayteke ig Kiyavwiye Jesus tivikwiye. Ku aysaw ig avigku ahin, pahavwi awayg sigis ta gitivut, ig paberetusaw ta gikimpuwit. Ig ayavgi: — Kiyavwiye, pis kibeynewa hiyeg. Uya akki nutuh. Pariye nah keh kuri adahan nah aymuhwa gimun Kiyavwiye Uhokri adahan avanenekwa?

¹⁸ Igme Kiyavwiye Jesus kaytwa giwn: — Mmah pis kanumun ku nah kibeyne hiyeg? Yuma pahavwinema hiyeg amadgaya inin kibeyne. Uhokri ignewa ku pariye kibeyne hiyeg.

¹⁹ Pis kuwis hiyak ku pariye amawka pis keh adahan pis aymuhwa gimun Uhokri, mmanawa pis hiyak amekene Moís gikumadukan kuwis. Inakni gikumadukan awna: “Ka muwaka umah hiyeg. Ka muwaka powkemnihwa. Ka muwaka amevwi. Ka muwaka wasaymhaw. Ka muwaka kinis. Kiyatha pig. Kiyatha pinag.”

²⁰ Igme awayg awna git: — Kiyavwiye, ku samah nah takwa nah ihpa madikte.

²¹ Igme Kiyavwiye Jesus timapni hene, ig sarayh givegi gimkat ka gibetkisima. Ig kaytwa giwn: — Pehete muwak pit ku pariye pis kote ihpate. Amawka pis batek gikak Uhokri mpiya madikte pewkanbet. Ataknaba piyuk pewkanbet madikte. Ayteke nikwe pis iki akakuravig ta gitkis madiptavye. Ayge nikwe pis uti ka aynsima igiska aynte inuriknek. Ayteke pisenwa paviykan pewkanbet pis ayta wew nukakuh.

²² Igme awayg timapni hene, ig wakaymni adahan ku samah inakni giwn. Ig barukiswe ka aynsima mmanawa ig ka aynsima gewkanbet ay gimun. Ig avise ku nawenetke ig biyuk akak ini gewkanbet. Adye ig tivik.

²³ Ig Kiyavwiye Jesus hiyapni hene, ig ivegvusa neras hiyeg ayge. Ayteke ig awna ta gitkis gikannuhnivwi. Giwn: — Ka aynsima mahiko adahan hiyeg igisavye kawih Uhokri gikumadukan.

²⁴ Igkisme gikannuhnivwi wakaymni adahan inakni giwn. Igme Kiyavwiye Jesus awna gitkis akiw. Giwn: — Nukebyuvwi, ka aynsima mahiko kawih Uhokri gikumadukan gidahan pahavwi ku pariye ivegnene ta avitit igiska.

²⁵ Ku yis hiyap ku mahiko adahan pahavwi puwikne “kamelu” parak maviya arikuw pahat kakus amiyokni, in pi mahikote akiw adahan pahavwi igisye parak ku kiney Uhokri gikumadukan.

²⁶ Igkis timapni hene, igkis wakaymnibdi mpinevevye. Igkis awna git: — Ta wotuh ku pahavwi igisye, in arakak ku ig kibeyne giwtrik Kiyavwiye Uhokri mmanawa ig kabunuga gikak Kiyavwiye Uhokri. Ku mahiko hene adahan igisavye danuh git Kiyavwiye Uhokri, nikwe yuma hiyeg amadga wayk danuhne git Kiyavwiye Uhokri.

²⁷ Igme Kiyavwiye Jesus sarayh givegi ta gimkanitkis. Ig awna gitkis: — Madikte hiyeg ka hiya ignesma danuh git Uhokri ku ka igma Uhokri amnihgikis. Heneme madikte arikna ka mahikonema gidahan Uhokri.

Ku pahavwi ikise madikte giharit esus, ig uti nikwe ka aynsima akiw

²⁸ Igme Pedru awna git: — Usuh kuwis ikise madikte wewkanbet adahan usuh wewne pikak.

²⁹ Igme Kiyavwiye Jesus kaytwa giwn: — Ku pahavwi ikiswiye givin, gikakkis gikebyuvwi, ginag, gig, gikamkayuvwi, giwasra, ku ig ikiswiye madikte adahan ig ayta nuharit, adahan ig tahan ekkene nnetni,

³⁰ ig ner uti nikwe pi kibite akiw, madikawku madikwa gukebikis (100) akiw kuri amadga inin hawkri. Ig uti madikawku madikwa (100) givin, madikawku madikwa (100) gikebyuvwi, madikawku madikwa (100) ginag, madikawku madikwa (100) gikamkayuvwi, madikawku madikwa (100) giwasra, heneme ig hawata ig hiyap mbeyne ka aynsima nudahan. Hawata akiw aysawnemenek aynte inurik ig aymuhwa gimun Uhokri adahan avanenekwa. Ihanabay nuwnuh. Henewatbaki ig utinek.

³¹ Henneme ka yi muwaka ikaw kiyate mpiy pahavwi awaku ini. Mmanawa aysawnemenek ka aynsima hiyeg ku pariye ikaka pi kiyate mpiy pahavwi, aysawnemenek ignes ka mpiya pahavwinema hiyeg. Hawata akiw ka aynsima hiyeg ku pariye ikaka yumanene gikiytanikis ay amadga inin, aysawnemenek yuma hiyeg pi kiyate mpiyigkis.

Jesus kinetihwa akiw amin gimiremni

³² Ayteke igkis ay avigku ahin tivikwiyes arimkat paytwempu Jerusalém, ig Kiyavwiye Jesus wew pitati gavitkigkis gikannuhnivwi. Igkisme wakaymnibdi ku samah ig atere kuri. Neras gihaptiyevwikis igkis avisasew gikak. Ayteke ig pahadguh giwatnivwi (12) ta git akiw, ig akkamnih gitkis amin ku pariye nehmnikuhpiye git.

³³ Ig awna gitkis: — Kuri wixwiy tivikwiye avitit Jerusalém. Nah, ku pariye wageswe awayg amadgaya inin, nah kamaykiswikanek ayge ta gitkis muwveg kiyatyevwi ta gitkis neras kannuhekevutnevwi amin amekene Moís gikumadukan. Ayge nikwe igkis ikaksevun adahanikwa miyaka. Igkis ikevun ta giwakuritkis hiyeg kane judeyenevwima.

³⁴ Igkisme mahivwihpenek, igkis tuvestevun, igkis biptevun akak tigay. Pisenwa nikwe igkis umehpen. Heneme abet amamnampiye hawkri ariwntak numiremni nah kannikaw akiwnek.

Tiyagu gikak Joawh ikewkere gavitminkis hiyeg

³⁵ Ayteke ig amekene Tiyagumni gikak Joawh, ku pariye Zebedew gukamkayuvwi, igkis danukwa atere git Kiyavwiye Jesus. Igkis aya git: — Kiyavwiye, usuh muwaka pis iki wot ku pariye wayapni pit.

³⁶ Igme Kiyavwiye Jesus ayavgikis: — Pariyeki yimawkan nutuh?

³⁷ Igkis kaytwa giwn: — Aysawnemenek avim ini ku aysaw pis kumadukenenek akak madikte pikiytani, uya amnih isaksa usuh adahan usuh bat ayge pihumwa ay amun ini iwetrit ku pariye kane nikiytanisima. Umawkan pahavwi bat kihehaptak, pahavwime bat patuwanaptak.

³⁸ Igme Kiyavwiye Jesus kaytwa giwnkis: — Yis ka hiyak ku pariye yayapni nutuh. Aysawnemenek nah hiyap mbeyne ka aynsimanek. In ke nutuhbe nah higevyebenek higapka kane ativinisima arikutak pohow higeptet. Ba yis ik adahan yis higap arikutak nor higeptet hawata ke nahbe? Ba yis ik adahan yis amava inwata mbeyne ku pariye kawihkiska ta nuvititnek?

³⁹ Igkisme kaytwa giwn: — Ihi. Usuh ik adahan amavin hawata ke pisbe. Igme Kiyavwiye Jesus awna gitkis: — Aysawnemenek yis higa ini nuhigvanek arikutak nugobla. Yis amava inwata mbeyne ku pariye kawihkiska ta nuvititnek.

⁴⁰ Henneme ka nawhma batahkis hiyeg ayge nuhumwa ine kihehaptak ine patuwanaptak. Ini iwetrit kane nikiytanisima ini gidahankis hiyeg ku kadahan Wigwiy kuwis ahegbetin.

⁴¹ Igkisme Jesus giwatnivwi asemne madikawkunene gikebikis, igkis timapni hene, igkis hahayruke gikakkis amekene Tiyagumni gikak Joawh.

Amawka wixwiy ikaw tuwatav ke ibuktibe

⁴² Igme Kiyavwiye Jesus hiyapni hene, ig humekwigkis madikte ayta danukwa git. Igkisme danuh atere, igme awna gitkis: — Ka yi muwaka ikaw gavitminnema pahavwi. Yis kuwis hiyak neras ku pariye ikewnevwi ikivarat amadgaya inin gihiyekemnikis, yis hiyak ku samah igkis ikaw gavitminkis gihiyegavukis, igkis kabukhewvi gitkis.

⁴³ Yisme ka henema. Yidahan nawenyewa. Ku pahavwi yaytak humewkere yavitmin madikte giwtrik Uhokri, amawka ig ka kabukhaw yit. Amawka ku ig ikaw ke wotbe igwa yibukbe.

⁴⁴ Ku pahavwi yaytak humewkere kiyatye hiyeg giwtrik Uhokri, amawka ku ig ikaw ke wotbe ig yumahbe gikiytanibe ay amadga inin.

⁴⁵ Amawka ku yis ikaw hawata ke nahbe. Nah, ku pariye wageswe awayg amadgaya inin, nah ka ayta adahanma hiyeg kehne kabayka nukakuh heneme nah ayta adahanikwa nah kehne kabayka gikakkis. Hawata akiw nah ayta adahan nah umahkiswene gidukwenavrikkis hiyeg kahadbe ignes isahptaw.

Jesus makniwa motviye Bartimew

⁴⁶ Ayteke ig Kiyavwiye Jesus gikakkis gikannuhnivwi igkis danuh ta avitit paytwempu Jerikó. Igkis mpiye niyegbiw. Ku samah igkis peswiye avititak ini paytwempu, ka aynsima hiyeg makeke gihavukis butte. Avimnewa ini pahavwi motviye bat ayge ahinmu. Giw Bartimew. Ig amekene Timew gikamkayh. Ig makehpene karukri gitkis hiyeg.

⁴⁷ Ig kinetni gak Kiyavwiye Jesus Nazaréyene ku ig mpiyeviye. Ig timapni hene, ig kavusa kabiman git: — Kiyavwiye, pis ukivara hawata ke amekene Davibe. Uya amnihun.

⁴⁸ Ka aynsima gaytakis neras hiyeg igkis timapni hene, igkis himehpig. Igkis awna git: — Ka muwaka kabiman hene. Igme pi kabimenpiva akiw. Ig awna: — Kiyavwiye, pis ukivara hawata ke amekene Davibe, uya amnihun.

⁴⁹ Ig Kiyavwiye Jesus timapni inakni gabiman hene, ig misekwe. Ig awna: — Wani ig ayta nutuh. Igkisme humak ner motivye. Igkis awna git: — Ka ba barukinama. Asa kannikaw. Ig humakpi.

⁵⁰ Igme timapni hene, ig padeke gidagmanvit. Ig kannikew kibehtenwa. Ig danuh atere git Kiyavwiye Jesus.

⁵¹ Ig danuh atere git, igme Kiyavwiye Jesus awna git: — Pariye pimawkan nutuh? Igme ner motivye kaytwa giwn: — Kiyavwiye, nah muwaka nah hiyap akiw.

⁵² Igme Kiyavwiye Jesus awna git: — Nukebyi, pikamaxwan nuvitit keh pis makniw. Hiyawa pis diyuhe pivinwate. Aynewa ig hiyap. Ayteke ig makekwevi gihavu avigku ahin.