Markus 1 - Uhokri Gahegbetawni Nukune akak Sawmus

¹ Inineki kibeyne inetit gidahan Kiyavwiye Jesus Cristo, ku pariye Kiyavwiye Uhokri gikamkayh.

Joawh Batista keh hiyeg ahegbet gavit Jesus gaytni

² Minikwak Uhokri gawneve amekene Izaíyas ig tamak amadga gikagtan ku pariye Kiyavwiye Uhokri awna git gikamkayh. Giwn: “Nah awahkiste pahavwi nuwatni pavitkiya adahan ig ahegbetene madikte pavit.

³ Ig ner pahavwi kinetihwanek ta gitkis hiyeg amadga amatap. Ig awnanek: ‘Ahekbetawnabay gavit Ukivarawiy gaytni. Ig nehmnik ig. Wadithanabay yihiyekemni gidahan marihwakam yis kawih gidahan Uhokri gikumadukan. Yihiyekemni kewa pahatra ahinbe mbeyevyebe. Ka ik adahan Ukivarawiy sibuhavrikin atere. Wadithavrikanabay ini ku kiney kiduwavriknene.’” Henewatbaki ig Uhokri gawneve awna minikwak.

⁴ Ayteke ariwnteke ini kibite kamukri akiw, ig Joawh Batista danuh atere amadgat amatap. Ig awna gitkis hiyeg: — Wagesnabay yihiyekemni. Kewvinabay ahakwat un adahan ekkene ku yis amevene ini ku Kiyavwiye Uhokri bayahminay ariw yitaraksan. Henewatbaki ig Joawh Batista awna.

⁵ Ka aynsima hiyeg danuh atere gimkanit Joawh Batista adahan igkis ihpene inakni giwn. Igkis danuh ariwntak madikte waxri Judeyamnaw. Igkis danuh avititak paytwempu Jerusalém. Igkis danuh atere, igkis ekkeviye gitaraksankis git Joawh Batista. Igme kaywevgikis avigku egu warik Jordawh adahan igkis amevene ini ku Kiyavwiye Uhokri bayahminigkis ariw gitaraksankis.

⁶ Ig Joawh Batista madiptivye. Ig kasimsavu akak kamelu asivgi. Ig kakabutikvu akak pak amar. Gimaname tanan akak ahayak anunu.

⁷ Ig awna gitkis hiyeg. Giwn: — Pahavwi nehmnikuhpiye nuhavuh butte ku pariye ka aynsima gikiytani mpiyan. Nah yuma nukiytanisima gitivut adahan nah paberetusaw gitivut adahan nah ayavig wiwh gikaswatni gikugkaptak.

⁸ Ku aysaw nah kaywevyi nah kawihkis un ta yivitit. Igme kaywevyinek gikak igyewa Kiyavwiye Uhokri Gitip adahan ig kawihkis gidahanwa gihiyekemni akak gannu ta yivitit.

Jesus kaywepka

⁹ Abetnewa ini hawkri ig Kiyavwiye Jesus pes avititak paytwempu Nazaré, aynte avit Galileyamnaw. Ig danuh atere git Joawh Batista. Igme Joawh Batista kaywevgi avigku egu warik Jordawh.

¹⁰ Igme Kiyavwiye Jesus iyak ahakwatak un, aynewa ig hiyap en woke. Ig hiyap Kiyavwiye Uhokri Gitip muhuke givitit, gihivak ke pahavu tukwabe.

¹¹ Ayteke pahat ikuvimnat awna aytontak inuriktak. In awna: — Pisnewa nukamkayh nubetki. Nah batek pikak ka aynsima.

Wavitye gikivarakis gihikekten Jesus

¹² Aynewa ig Kiyavwiye Uhokri Gitip awahkise Kiyavwiye Jesus ta amadgat amatap.

¹³ Ayge ig misakwa pahavo adahan paxnika madikwa (40) hawkri. He puwiknenen ayge. Ig awahkiska atere adahan wavitye gikivarakis Satanas gihikekten adahan hiyap ba hiya igma taraksasig. Ayteke ahj danuh atere, igkis ikenes Kiyavwiye Jesus gawaygi. Pisenwa ig tivik ta givinwat.

Jesus kavusa gannivwi aynte Galileyamnaw

¹⁴ Ayteke ariwnteke ini ku samah Joawh Batista paraksepka gavit Erodis, ig Kiyavwiye Jesus tivik ta avitit Galileyamnaw. Ig danuh atere, ig kavusa ekkene ini kibeyne inetit adahan Uhokri gikumadukan.

¹⁵ Ig kinetihwa ta gitkis madikte hiyeg. Giwn: — Ahawkanavrik Uhokri gikumadukan kuwis danuh. Wagesnabay yihiyekemni ariw yivathawni. Ihpanabay inakni kibeyne inetit.

Jesus kaniy gikannuhnivwi pitatyevwi

¹⁶ Ig waywe akigbimna mahakwa Galileya. Ayge ig hiyap Simawh Pedru gikak gisamwi Andre. Igkisme ivuhtyakevutnevwi. Igkis ayge ivuhtyanes akak tagamayh.

¹⁷ Ig Kiyavwiye Jesus hiyapni hene, ig awna ta gitkis: — Ba yi ayta wew nukakuh. Nah keh yis humaw ivuhtyakevutne hiyeg. Ku samah yis uti im, nah keh yis uti hiyeg nudahan.

¹⁸ Igkis timapni hene, aynewa igkis ikise gitagmayakis. Igkis tivik gikak adahan igkis humewnes gikannuhnivwi.

¹⁹ Ayteke ig wew aynesa akiw, ig hiyap Tiyagu gikak gisamwi Joawh, ku pariye Zebedew gikamkayuvwi. Igkis ayge amadga gihmunkis. Igkis kehevenes gitagmayakis ayge.

²⁰ Ig Kiyavwiye Jesus hiyapni hene, ig humekwigkis ta gimkanit. Igkisme ikise gigkis amadga gihmunkis gikakkis gihiyegavu. Igkis tivik gikak Kiyavwiye Jesus adahan igkis hawata humewnes gikannuhnivwi.

Jesus kannuhak piyihak

²¹ Ayteke ariwnteke ini igkis danuh atere avitit paytwempu Kafarnawh. Samdi abet ig Kiyavwiye Jesus lammesya ariku judeyenevwi gileglisakis adahan ig kannuhekne ayge.

²² Ignes hiyeg aygnenevwi wakaymnibdi gidahan ku samah gikannuhakni. Mmanawa ig ka kannuhak kema neras kannuhekevutnevwima amin amekene Moís gikumadukan. Heneme ig kannuhekne ayge akak madikte gikiytani.

²³ Ayge ariku ini gileglisakis pahavwi awayg wavityewnivye mbeyevye.

²⁴ Ig kabiman git: — Jesus Nazaréyene, ka ba kiyimwih usuh. Pariye pikehni ukakuh? Mmah pis ayta pisenwevye uhawkan ku avim inin? Nah hiyaknap ku pis Uhokri gikanyan barewvitye.

²⁵ Ig Kiyavwiye Jesus timapni hene, ig himehe ner wavitye. Ig awna git: — Tinwohaw. Asa pes ayteke givititak ner awayg.

²⁶ Aynewa ig wavitye nuwiswig. Ig kabiman kihaw. Ayteke ig pese givititak.

²⁷ Madikte hiyeg hiyapni hene, igkis wakaymnibdi. Igkis kinetihwenes pawtak. Igkis awna: — Mmah awitwak git inakni hiyakemniki nukune? Ig pekkis wavityempu akak madikte gikiytani. He igkis wavityempu iha giwn.

²⁸ Ayteke nikwe inakni inetit gidahan Kiyavwiye Jesus ibekhewvi muwapuw avit ini waxri Galileyamnaw.

Jesus makniwa Pedru gimatru

²⁹ Ayteke ig Kiyavwiye Jesus pese arikutak ini leglis payak gikak Tiyagu gikak Joawh. Igkis tivik. Igkis danuh ta givinekutkis Simawh Pedru gikak Andre.

³⁰ Ayge igkis ute Simawh Pedru gimatru egme harit akak nawaki. Neras hiyeg ayge amnihswe git Kiyavwiye Jesus gudahan.

³¹ Ig Kiyavwiye Jesus hiyapni hene, ig atere gut. Ig sumuh guwak. Ig kannikasig. Aynewa gunawan mpiye guw. Ayteke nikwe eg kuwegwano gidahankis.

Jesus makniwa kakahribdavye

³² Ayteke misanpi, wahanbuku kamuw, ka aynsima hiyeg danuh atere git Kiyavwiye Jesus. Igkis waxwe git ka aynsima hiyeg kakahribdavye gikakkis hiyeg wavityewnavye.

³³ Ka aynsima hiyeg ayta iwasavgi avititak ini paytwempu. Igkis pahadguvu anumeku payt alapota.

³⁴ Igme makniwe ka aynsima hiyeg ku pariye kakahribdavye akak arakembetnene karayt. Hawata ig pekkise ka aynsima wavitye givititakis hiyeg. Ig ka isaksa ignes wavitye adahan igkis awna awaku igkis hiyaknig ku pariye ig.

Jesus tivik muwapuw

³⁵ Hewke kabeyweke ig Kiyavwiye Jesus kannikew, ig tivik avawyewa ku kiney yumanene hiyeg. Ayge ig piriyepkewne.

³⁶ Igme Simawh Pedru gikakkis neras hiyeg ku pariye ayge gikak igkis ivegevgi.

³⁷ Ayteke igkis utevgi. Igkis awna git: — Ka aynsima hiyeg piverepten.

³⁸ Igme Kiyavwiye Jesus kaytwa giwnkis: — Uyay tivik tahan avitit nawenyevwi paytwempu akiw adahan nah ekkene Uhokri giwn aygwata. Adahanikwa ini nah awahkiska atan.

³⁹ Ayteke nikwe ig wew muwapuw Galileyamnaw. Ayge ig ekkene Kiyavwiye Uhokri giwn ariku judeyenevwi gileglisakis. Hawata ig pekkis wavitye givititakis hiyeg.

Jesus makniwa pahavwi ku pariye axpusakare avit busukne

⁴⁰ Avim ini pahavwi awayg danuh atere git. Ig axpusakare avit busukne. Ig paberetusew gitivut. Ig amnihswene git. Ig awna: — Kiyavwiye, uya amnihun. Ku pis muwaka piyihun pis hiya numakniwka.

⁴¹ Ig Kiyavwiye Jesus hiyapni hene, ig kayah gidahan. Ig sarayh giwak givitit. Ig daxwig atere. Ig awna git: — Ihi. Nah muwaka. Pis makniw.

⁴² Aynewa gibuskana miyvi. Ig barewvit misekwe.

⁴³ Ayteke ig Kiyavwiye Jesus awna git:

⁴⁴ — Ataybiswanaba nutuh. Ka ba kinetihwa ta arit hiyeg avigkuya ahin amin ku samah pis makniw. Su atak wade gimkanit muwveg. Akkanaba pivit ta git kahadbe ig iwasap ig hiyap ku pis makniw. Ayteke pis kakanhaw git Uhokri adahan igme barewvithap ariw pivathawni ku samah amekene Moís aya wot minikwak, adahan areketni ta gitkis hiyeg ku pis inyewa makniw. Pisenwa ig awahkiswig tivik.

⁴⁵ Igme timapni hene, ig tivik. Ig ekkewviye muwapuw ku samah ig makniw kuwis. Inakni ginetni ibekhewvi, nikwe ka ik adahan Kiyavwiye Jesus danuh ta avitit pahanema paytwempu. Heneme ig misakwa avawyewa ariw paytwempu ku kiney yumanene hiyeg. Ayge ka aynsima hiyeg danuh atere git. Igkis pes avititak madikte waxri.