Lúkas 8 - Uhokri Gahegbetawni Nukune akak Sawmus

Tinogben gihaptiyovwi Jesus

¹ Ayteke ariwnteke ini ig Kiyavwiye Jesus mpiye muwapuw avuwiw paytwempu nopsadmin, avuwiw paytwempu nopsanyupnene akiw. Ayge ig kinetihwene amin Uhokri gikumadukan. Igkisme giwatnivwi madikawkunene gikebikis gikakkis piyananene gawnakis (12) igkis atak gihapti.

² Tinogben danuhpanos payak gikak egkis hawata. Egkis noras ku kavititak ig kuwis pekkise wavitye gukakkis noras ku pariye ig makniwe ariw gukahrikis. Pahavu tino ayge gaytakkis ku kavititak minikwak ig pekkise ka aynsima wavityempu, ntewnehker gikebikis wavitye. Guw Mahi Madalena.

³ Hawata pahavu tino guw Joana gaytakkis. Eg gugihgi giw Kuza ku pariye avuriwne Erodis gewkanbet. Hawata Susana ayge gukakkis, ka aynsima nawenyovwi tinogben ayge akiw. Egkis ku pariye hiyaknovwi gikak Kiyavwiye Jesus gikakkis giwatnivwi, egkis ku pariye katiwnih gimawkanitnenes akak gudahankiswa gukakurakis.

Yuwit patuwesbuhka amin amutri

⁴ Ka aynsima hiyeg pahadguhwa atere git Kiyavwiye Jesus. Igkis danuhpenes atere git avititak madikte paytwempu. Ig hiyapni hene, ig kinetihwa ta gitkis akak pahat iwit patuwesbuhka. Giwn:

⁵ — Minikwak pahavwi awayg tivik giwasra amedgete adahan ig pekhene gamutra ayak. Ig pekhene gamutra ayak, gaytakkis tuguhe avigku ahin ku kiney wayk adani. Egnes sibuhavepka atere. Hawata akiw kuhivra ayta axavevgukis.

⁶ Gaytakkisme gamutra ayak tuguhe abetit tivebdi. Egnes hiyenpiwatkama kibehtenwa heneme aynewa egkis huruhrup. Mmanawa wayk ka anukbetnema akak un.

⁷ Gaytakkisme gamutra ayak tuguhe avuwit pudukuvwi. Egnes pudukuvwi hiyenpi payegbitak akak gamutra. Egkis tuwathe gamutra he egkis miyorap.

⁸ Gaytakkisme gamutra ayak tuguhe abetit kibeyne wayk. Ayge egkis hiyan. Egkis gamutra aymuhwa he egkis kew. Egkis sarayh ka aynsima guwkis, madikawku madikwa gukebikis (100). Pisenwa inakni gawnan, ig Kiyavwiye Jesus awna akiw. Giwn: — Yis ku pariye katayebnene, ataybiswanabay numkanit.

Hiyeg ka mpiksaw aharit Uhokri gihiyekemni

⁹ Ayteke ariwnteke ini ig Kiyavwiye Jesus gikannuhnivwi igkis ayavgi: — Kaminki pis awna inakni iwit patuwesbuhka?

¹⁰ Igme kaytwa giwnkis: — Hiyeg amadgayavu inin kote hiyakte ku samah Uhokri gikumadukan. Yisme Uhokri akkamnihni ta yitnek. Igkisme ka akkaka ta gitkis. Ta gitkis nah awna patuwesbuhkanen iwit. Hiyawa igkis iki gitewkis nimkanit kabayntiwa heneme ka paduk ta abetit gihiyekemnikis. Hiyawa igkis ataybiswa nit kabayntiwa heneme igkis ka pukuhin.

Jesus akkamnih giwn amin amutri

¹¹ — Kuri nah akkamnihte yit inakni nuwnuh patuwesbuhka gimin ner amutrivutne. Nor amutri ayak egnesbaki arakak gidahan Uhokri giwn.

¹² Gaytakkis hiyeg kewa ini ahinbe. Ignes timap nuwnuh ayteke wavitye danuh atere gitkis. Ig wiwhpiye nuwnuh abetitak gihiyekemnikis marihwa igkis ka iha inakni nuwnuh kahadbe igkis ka isahptaw.

¹³ Egnesme nor amutri ayak ku pariye tuguhe ta abetit tivebdi egnesbaki arakak gidahankis hiyeg ku pariye timap nuwnuh ignes amavin akak madikte gibetkikis, heneme igkis ka kamax inakni nuwnuh kabayntiwatma abet gihiyekemnikis. In humaw kewa pahakti amutribe ku pariye yumanano guhanpabet eg ka dep miyó. Igkis batek akak nuwnuh adahan aynesa hawkri. Ayteke ku aysaw igkis hiyap mbeyne, aynewa igkis miniw ariw nuwnuh.

¹⁴ Egnesme nor amutri ayak ku pariye tuguhe ta abetit pudukuvwi, egnesbaki arakak gidahankis hiyeg ku pariye timap Uhokri giwn ignes amavin. Heneme kibeye, kibeye, igkis pi ikatuswate adahan arikna amadgaya inin. Igkis kinikiswate arit igiska, arit batekka amadgaya inin. Ayge nikwe igkis ka kannuhwa keh Uhokri gibetki. Amun ini nikwe igkis humaw waditnevyenen kewa pahakti amutribe ku pariye sarayh guw, heneme egkis ka kahawkan ivat egkis kigise madikte.

¹⁵ Egnesme nor amutri ayak ku pariye tuguhe ta abetit waxri kibeyne waxri egnesbaki arakak gidahankis hiyeg ku pariye timap nuwnuh ignes kamaxni kabayntiwa. Gihiyekemnikis inyewa kibeynewa. Igkis ka isahkiswa nuwhu aynesnima. Ayge nikwe igkis keh Uhokri gibetki kabayntiwa. Amun ini nikwe igkis humaw kewa pahakti amutribe ku pariye kew kabayntiwa.

Wis ka hakis abukri adahan asabkeptenma

¹⁶ Ayteke ig awna gitkis akak pahatwa iwit patuwesbuhka akiw. Giwn: — Nuwnuh kewa pohow abukribe adahan uguhne hiyeg gihiyekemnikis. Wis ka hakis abukri adahan wis asabkeptenma anavi suwyeg. Ine wis kawnata hakisgu adahan ayempitnima ta anavit payt abukaveyni. Kawa. Wis ikigu ta inut akekrit adahan eg uguhno madikte hiyeg ku pariye parekwiye ta uvinekut.

¹⁷ Aysawnemenek madikte ku pariye ayempiki ini kahayaknek. Inakni nuwnuh patuwesbuhka in ke wotbe in awastepkabe, heneme aysawnemenek in mawasaptihpikanek, in kahayak kabayntiwanek.

¹⁸ Ikinay yitew nutuh kabayntiwa. Ku pahavwi darih nuhiyekemni kabayntiwa, nikwe ig Uhokri akka git pi kiyeste akiw. Heneme ku pahavwi ka darih nuhiyekemni kiyesradima, nikwe ini nuhiyekemni wiwhpikanek abetitak gihiyekemni.

Jesus kakebyihwa ta gitkis hiyeg ihpenevwi giwn

¹⁹ Ayteke ariwnteke ini ig Kiyavwiye Jesus ginag gikakkis gisamwivwi egkis danuh atere. Heneme egkis ka ik adahan danuh kennesnima ta git Kiyavwiye Jesus awaku ba akebentenwa hiyeg ayge.

²⁰ Pahavwi hiyeg ayge hiyapni hene, ig awna ta git: — Kiyavwiye, pinag ay kabaywak gikakkis pisamwivwi. Egkis ayta danuhpanokis pit.

²¹ Igme Kiyavwiye Jesus kaytwa giwn, ig awna gitkis hiyeg: — Ku pariye timepnevwi Uhokri giwn, ku pariye ihpenevwi inakni giwn, egnes nah ikiygukis ke nnaguhbe, ignesme awaykemni nah ikiygikis ke nukebyuvwibe.

Jesus misak mayg akak paraw

²² Ayteke ariwnteke ini ig Kiyavwiye Jesus kataptew ta muhumdakat payak gikakkis gikannuhnivwi. Ig awna gitkis: — Uyay manuke ta pahambakaytak mahakwa. Igkisme kaytwa giwn: — Uyay. Igkis tarekwe ayteke.

²³ Igkis tivikwiyes, ig Kiyavwiye Jesus himeke. Ku aysaw igkis aynte pakwa amadga mahakwa, pahaye adahan mayg kannikew gimkanitkis. Gihmunkis me buwisemet. Igkis hiyepnes mbeyne ka aynsima.

²⁴ Igkis gikannuhnivwi hiyapni hene, igkis atere wadise Kiyavwiye Jesus. Igkis awna git: — Kiyavwiye. Kiyavwiye. Wixwiy me biyukapmet! Ig timapni hene, ig kannikew ig himehe mayg akak paraw. Aynewa madikte kariswehwe. Paraw mavawanew.

²⁵ Pisenwa ig awna gitkis gikannuhnivwi. Giwn: — Mmahki yis ka kamaxwa givitit Uhokri? Igkisme avisasew, igkis wakaymnibdi gidahan. Igkis kinetihwa pawtak. Igkis awna: — Pariyeneki ner hiyeg? Ig kumaduka he mayg akak paraw. He mayg akak paraw iha giwn.

Jesus awahkis wavityempu ta gibetitkis pakirempu

²⁶ Ayteke pisenwa igkis hamah ta pahambakat ariw Galileyamnaw. Igkis minehwe atere avit hiyeg jerasayenevwi giwaxigkis.

²⁷ Igme Kiyavwiye Jesus sarayhwe waxrit. Ayge pahavwi awayg paytwempuyene atere patiptakig. Ig wavityewnivye. Ka aynsima hawkri ig wew makawihan. Ig yuma givin. Ig misakwa abet imewtinen ayge avuheket.

²⁸ Ku aysaw ig hiye Kiyavwiye Jesus, ig kabiman, ig padakwa ta gitivut. Ig awna git akak madikte gihawna. Giwn: — Aa, Jesus! Pis Uhokri gikamkayh inurikyene. Pariye pimawkan ta nutuh ku avim inin? Uya amnihun. Ka ba hiyapkis mbeyne nutuh.

²⁹ Ig awna inakni iwit hene mmanawa ig Kiyavwiye Jesus kuwis pekkiswiye ner wavitye mbeyevye ayteke givititak ig awayg. Ka aynsima hawkri kuwis ig wavitye keh ig awayg nuwiskewempiye. Ig awayg wanakminepka inpawa kuwis. Gibagwan akak giwan wanakminepka akak xen hawata akak sivari. Heneme ig matisbetepni madikte. Ayteke ner wavitye keh ig sigis ta abetit imewti.

³⁰ Ig amnihswene atere git Kiyavwiye Jesus, igme ayavgi: — Mmah piw? Igme kaytwa giwn: — Nuwhu “Pibohram”. Ig awna inakni iwit awaku ka aynsima wavityempu ay givit.

³¹ Ayteke neras wavityempu amnihswe git Kiyavwiye Jesus akiw. Igkis awna git: — Ka ba arewepma wotuh awahkiswima usuh ta arimkat miyaravye giwetrikis.

³² Ayge pahabunene pakirempu axwenekis avit paha waxri imuwadnene. Igkis wavityempu hiyapni hene, igkis aya git Kiyavwiye Jesus: — Uya awahkise usuh tahan givuwitkis pakirempu. Isaksa usuh parak atere givititkis. Igme Kiyavwiye Jesus isaksevgikis.

³³ Ayteke nikwe igkis wavityempu pesbetwikis givititak ner awayg. Igkis pareke givititkis ignes pakirempu. Igkisme pakirempu sigisbetwikis ta asebrikute. Igkis tubohbetwikis ta ahakwate mahakwa. Ayge igkis aniksewbet.

³⁴ Pakirempu gikavriwtenkis igkis hiyapni hene, igkis sigisbet kibehtenwa ta paytwempuwit. Igkis danuh atere, igkis kinetihwa amin muwapuw paytwempuriw, muwapuw iwetrit aranwew paytwempu akiw.

³⁵ Neras hiyeg paytwempuyenevwi igkis timapni hene, igkis tivik atere adahan igkis hiyepne ku pariye danuh. Igkis danuh atere git Kiyavwiye Jesus, igkis ute ner awayg ku kavititak wavityempu pesbetwikis. Igme bat ayge gikimpu Kiyavwiye Jesus. Ig kasimsavu kuri. Gihiyekemni diyuh kabayntiwa akiw. Igkis hiyapni hene, igkis avisasew.

³⁶ Neras ku pariye hiyepnevwi madikte ku pariye kehka gikak ner awayg igkis kinetihwa ta gitkis neras hiyeg amin ku samah ig makniw ariw wavityempu.

³⁷ Neras jerasayenevwi timapni hene, igkis madikte aya git Kiyavwiye Jesus adahan ig tivik ayteke mmanawa igkis avisasew gibohri ka aynsima. Igme Kiyavwiye Jesus hiyapni hene, ig katapte amadgat gihmun adahan ig diyuhpiye ta pahambakat akiw.

³⁸ Igme ner awayg ku pariye kuwisnene makniw ariw wavityempu, ig awna git Kiyavwiye Jesus: — Nah ataka pihapti. Igme Kiyavwiye Jesus awna git: — Pi kabayte pis misakwa ay.

³⁹ Su ataknate ta pivinwat. Kinetihwanaba gitkis pikebyuvwi amin madikte ku samah Uhokri keh pikak. Igme awayg timapni hene, ig tivik ta paytwempuwit. Ig danuh atere, ig kinetihwa gitkis madikte hiyeg aygnenevwi amin ku samah Kiyavwiye Jesus keh gikak.

Jayru amnihswa git Jesus

⁴⁰ Igme Kiyavwiye Jesus manuke pahambatak mahakwa akiw. Ig danuh atere, ig ute ka aynsima hiyeg pahadguvu adahan igkis patiptakig mmanawa igkis giwhpetni ayge.

⁴¹ Ayteke pahavwi awayg danuh atere. Giw Jayru. Ig pahavwi leglis akivara, judeyenevwi gileglisakis. Ig danuh atere, ig mabukwe ta gitivut Kiyavwiye Jesus, ig awna git: — Kiyavwiye, uya amnihun. Uya atak ta nuvinekut.

⁴² Nukamkayh pahavuwa tino. Eg madikawkubu kamukri gaw akak pikana arawna (12). Kuri eg mihenavyo, pahayempi guyekwin. Ig Kiyavwiye Jesus timapni hene, ig tivik gihapti. Ig waywe dehebdi akak hiyeg.

Pahavu tino makniw ariw guminewkan

⁴³ Ayge nikwe pahavu tino danuh gihavu butte. Eg kuwis hiyap mbeyne akak guminewkan adahan ka aynsima kamukri kuwis, madikawkubu akebi akak pikana arawna (12). Yuma hiyeg hiya gusamanak adahan gumakniwetni.

⁴⁴ Eg danuh atere giharaptak, eg daxe gikanwapta akigbimna. Aynewa guminewkan matiswe.

⁴⁵ Ayteke nikwe ig Kiyavwiye Jesus awna: — Pariye daxwen? Madikte gikannuhnivwi wihwebdipkis niw. Ayteke Pedru awna git: — Kiyavwiye, Ka ba pis hiyap ka aynsima hiyeg daykekbeti pikak?

⁴⁶ Igme Kiyavwiye Jesus kaytwa giwn: — Kawa. Pahavwi hiyeg daxwen. Nah kayah nudatni pes aynesa adahan nah makniwene pahavu.

⁴⁷ Eg tino hiyapni hene ku eg hiyekepka kuwis, eg segke, eg mabukwe ta gitivut, eg ekkew ta git. Ayge giwtrikkis ignes hiyeg eg kinetihwa amin ku kawaku eg daxgi. Eg kinetihwa amin ku samah eg daxwig aynewa eg makniw.

⁴⁸ Igme Kiyavwiye Jesus awna gut: — Nukebyi, pis makniw mmanawa pis kamaxwa ta nuvitit. Hiyawa pis tivik akak kabayka.

Jesus kannikasa Jayru gikamkayh

⁴⁹ Ku samah ig Kiyavwiye Jesus awnempiye inakni iwit hene, pahavwi awayg danuh atere. Ig ayta givinwatak ner leglis akivara. Ig atere ewkne inetit git. Giwn: — Pikamkayh ayipa miyop. Ka muwaka wewkis ukannuhtenwiy waditnevyenen.

⁵⁰ Igme Kiyavwiye Jesus timapni hene, ig awna ta git Jayru. Giwn: — Ka muwaka avis. Ku pis kamaxwa nuvitit, eg kannikaw akiwnek.

⁵¹ Ayteke igkis danuh atere givinekut. Ig Kiyavwiye Jesus ka aympa pahavwinema hiyeg parak atere. Ignewa Pedru gikakkis amekene Tiyagumni, Joawh ig aympigkis. Hawata akiw ig aympa nor bakimni gig gukak gunag.

⁵² Madikte hiyeg ayge tihenekuye, igkis kadniyes guharit ka aynsima. Ig Kiyavwiye Jesus hiyapni hene, ig awna gitkis: — Ka yi muwaka tih. Nor bakimni ka miyó. Himak eg.

⁵³ Igkisme hiyaraptihpig. Igkis hiyak kabayntiwa ku eg ayipa gumiromni.

⁵⁴ Igme atere sumuhe guwaku. Ig awna gut akak gihawna. Giwn: — Mim, kannikaw.

⁵⁵ Ig awna inakni, aynewa ner awnparinene diyuhe ta guvitit. Aynewa eg kannikew. Ayteke nikwe ig Kiyavwiye Jesus awna gutkis adahan egkis ikapkisgu.

⁵⁶ Eg gunag gikak gig egkis ka gubetkikisima. Heneme ig Kiyavwiye Jesus aya gutkis adahan egkis ka kinetihwa amin ku pariye ig keh gudahankis.