Lúkas 19 - Uhokri Gahegbetawni Nukune akak Sawmus

Zakew

¹ Ayteke ariwnteke ini ig Kiyavwiye Jesus danuh ta avitit paytwempu Jerikó. Ig mpiyeviye ayegbiw paytwempu.

² Ayge pahavwi awayg giw Zakew. Ig ladwan gikivarakis. Ig igisye hiyeg.

³ Ig hiyepkerevye Kiyavwiye Jesus ku pariyene ig, heneme ig ka hiya igma hiyavgi awaku ig wakatesa. Ka aynsima hiyeg ayge kabubuk ganwa mpitha givegi.

⁴ Ig hiyapni hene, ig sigise bukihe Kiyavwiye Jesus avigku ini ahin ku kitwiye ig. Ig ute pahakti ah akat ig wagehe avewit adahan ig hiyavgi ayteke.

⁵ Ayteke nikwe ig Kiyavwiye Jesus danuh atere. Ig sarayh givegi ta inut, ig hiyap Zakew ayge avewi ah, ig awna git atere: — Kiyavwiye Zakew. Uya muhuk kibehtenwa. Nah danuhpene ta pivinekut ku avim inin.

⁶ Igme Zakew timapni hene, ig muhuke, ig amevevgi ta givinekut akak madikte gibetki.

⁷ Neras hiyeg hiyapni hene, igkis minimnihekbet gimin Kiyavwiye Jesus. Igkis awna: — Ig darihwekne gikak pahavwi ku pariye kane kibeynema.

⁸ Ayteke Zakew kannikew ayge giwtrikkis hiyeg, ig awna git Kiyavwiye Jesus: — Kiyavwiye, nah kakanhawte ta gitkis madiptavye abusku newkanbet. Hawata akiw ku nah katiwnihkise git pahavwi mpiynevevye, nah diyuhkiste gikakura awenyan mpiy akiw paxkavut avitmin akiw.

⁹ Ig Kiyavwiye Jesus hiyapni hene, ig awna: — Ku avim inin ig Zakew isahptaw payak gikakkis gimunyavu. Ig hawata amekene Abraawh gihiwhi hawata ke yisbe, heneme pitatye ig ke wotbe ig biyukevyebe giw Uhokri.

¹⁰ Nah, ku pariye wageswe awayg amadgaya inin, nah ayta adahanikwa nah ivegeviye hiyeg biyukavye adahan nah gamnihtenkis.

Mpana ibukti kawih karukri gidahan gikivarakis

¹¹ Ayteke ig Kiyavwiye Jesus awna gitkis neras timepnevwi giwn pahat iwit patuwesbuhka akiw. Ig awna inakni iwit giminwa kuri awaku ig kennesmin gidawnhan avitit Jerusalem hawata awaku neras hiyeg givewkankiskam ku ku aysaw ig danuh aterenek Uhokri gikumadukan kavusawkam.

¹² Ig awna: — Minikwak pahavwi awayg kiyatye tivikwiye ta avitit paha waxri akiw ku pariye piyawakad. Ig atere adahan ig wagesweviye ikivarat gidahankis hiyeg ayge ku kiney ig misakwa, ayteke ig diyuh akiw.

¹³ Avit gitepkemni ig pahadguhe gibukvig madikawku gikebikis. Ig ikise mpuse giwakukis pahamku karukri nopsad karukri wahano seyno. Ig awna gitkis: “Kannivwinabay gukak nor karukri he ku aysaw nah diyuh akiw.” Ayteke ig tivik.

¹⁴ Heneme gaytakkis hiyeg ku pariye misekwenevwi ayge ku kiney ig misakwa ignes amiyhevgi. Ku aysaw ig tivik igkis wasavanaw gimin gikivara. Igkis awna git gikivara: “Usuh ka muwaka ner awayg humaw ukivara.”

¹⁵ Igme gikivara ka aminama ariw inakni giwnkis. Ig ner awayg danuh atere git, ig gikivara ike madikte hiyeg ku pariye misekwenevwi ayge ta giwakurit adahan igme gikumaduketnikis ayge. Ig awayg hiyapni hene, ig diyuhe akiw. Ig danuh ta givinwat, ig pahadguhe neras gibukvig ku kawakurit ig ike karukri. Ig muwaka hiyak ku samah gannivwikis gukak nor karukri ba kuwisma eg kiyestema.

¹⁶ Igme ner pitatye gibuk danuh atere git, ig awna git: “Kiyavwiye, akak nor karukri ku pariye pis ikise nuwakuh nah kuwis uti madikawkumku akiw pidahan.”

¹⁷ Igme gikivara timapni hene, ig awna git: “Kibeyne. Pis kibeyne awayg. Ku samah pis kuwis kannuh kawih aynesa arikna kabayntiwa nudahan, kuri nikwe nah iki piwakurit paytwempu madikawku akebi.”

¹⁸ Ayteke ig ner aveynivye gibuk danuh atere. Ig awna git: “Kiyavwiye, akak nor karukri ku pariye pis ikise nuwakuh nah kuwis uti pohowkumku akiw pidahan.”

¹⁹ Igme gikivara timapni hene, ig awna git: “Pis hawata nah iki piwakurit paytwempu pohowku akebi.”

²⁰ Ayteke pahavwiwa gibuk akiw danuh atere. Ig awna git: “Kiyavwiye, ahah, nop pikakura ay. Nah he misekwevi gukak. Nah wanakamkuhpig abet kamisbet.

²¹ Nah ka kannivwi gukak nor karukri pidahan awaku nah marenpi pibohri ku nawewnetke nah ka keh pannivwi wadit. Nah hiyakni ku pis pi kannuhte nuwhu. Pis ka pannusima. Ku kiney pis ka ikis ariknawnema, hiyawa kuwewanek pis atere iwi ka aynsima arikna ayteke. Ku kiney pis ka mutuh ariknawnema, hiyawa kuwewanek pis atere iwi ka aynsima amutri ariw ayteke.”

²² Igme gikivara kaytwa giwn: “Pis mbeyevye pihiyekemni! Inakni piwn areketni ku samah pihiyekemni ka wadit. Ku pis kuwis hiyakni ku nah ka nannusima, mmahki nikwe pis ka battukaw kannivwi nudahan? Pis kuwis hiyak ku kiney nah ka ikis ariknawnema, hiyawa kuwewanek nah iwi ka aynsima arikna ayteke. Pis kuwis hiyakni ku kiney nah ka mutuh ariknawnema, hiyawa kuwewanek nah iwi ka aynsima amutri ariw ayteke.

²³ Kiskama pis kawihpikam nudahan ini ku pariye nah ikise ay piwaku. Mmahpaki nikwe pis ka bayah nor nukakura arikut payt abeyheki karukri adahan ignes hiyeg ayge sunapkisgu gitkis nawenyevwi hiyeg kahadbekam ku aysaw nah danuh atere, igkisme diyuhkis nukakurakam avitmin nutuh?”

²⁴ Ayteke ig awna gitkis neras hiyeg ayge gihumwa. Giwn: “Iwepnay giw nor karukri pahamkunano adahan yis ikevgu git ner ku pariye kuwisnene kadahan madikawkumku gikakura.”

²⁵ Igkisme awna git: “Kiyavwiye, ig kuwis kadahan madikawkumku gikakura kuwis. Ikeyvi.”

²⁶ Igme gikivarakis kaytwa giwnkis, ig awna: “Ka sam. Ku pariye darih ka aynsima, igi ikaka gitnek kiyeste akiw. Heneme ku pariye ka darih kiyestema, nikwe ini aynesnene ku pariye ig kuwis kadahan in iwepka giwnek. Henewatbaki in iwepka.”

²⁷ Ayteke ariwnteke ini ig gikivarakis awna gitkis: “Kuri, su yi atak kamaxave neras nuvetunyavu ku pariye kane muwaka nah humaw gikivarakis. Waxwanigkis ayta nutuh adahan yis umahavevgikis ay nuvetun.”

Jesus parak ta avitit Jerusalém

²⁸ Pisenwa gawnan inakni giwn, ig Kiyavwiye Jesus tiviknene akiw gavitkigkis pitati ta arimkanit Jerusalém.

²⁹ Ig danuh atere avitit ini waxri imuhgivitnene kewye Olivegvit. Ig kennesmin arit paytwempu ku pariye nopsanyuvwinen kewye Betfaje akak Betaniya. Ayge ig awahkise piyana giwatnivwi adahan igkis atak sunepnes gidahan pahavwi kaway.

³⁰ Ig awna gitkis: — Ataknay ta avitit inetra paytwempu nopsanyupnene pitak wavitwiy. Parakantenwa yis hiyap pahavwi kawayan “jumento”. Ayge ig wanak. Hiyeg kote batte giduhyamadgat. Wataknig waxwanig atan nutuh.

³¹ Ku hiyeg ayge awna yitnek: “Mmeneki yis dax?” yisme kaytwa giwnkisnek: “Kiyavwiye muwakavgi.”

³² Igkis giwatnivwi timapni hene, igkis tivik. Igkis danuh atere, igkis uti madikte ku samah ig Kiyavwiye Jesus awna gitkis.

³³ Ayteke nikwe igkis watekwiyes ner kawayan. Igkis watekempiye, ignes akivara danuh atere. Igkis awna gitkis: — Mmeneki yis dax yis watak uvig kawayan?

³⁴ Igkisme kaytwa giwnkis: — Kiyavwiye muwakavgi.

³⁵ Ayteke igkis diyuhe waxwe ner kawayan ta gimkat Kiyavwiye Jesus. Igkis danuh atere, igkis ambohe gidagmanvitkis ta giduhyamadgat kawayan. Ayteke igkis wagahkise Kiyavwiye Jesus ta giduhyamadgat.

³⁶ Ayteke nikwe ig tivikwiye. Neras hiyeg ayge igkis hiyapni hene, igkis barewhe ahin gavit pitati. Igkis awasavrike ahin akak gidagmanvitkis.

³⁷ Ig kennesmin gidawnhan ta avitit Jerusalém, igkis muhukwiyes asebha ini waxri imuhgivitnene Olivegvit. Avim ini madikte gikannuhnivwi kabubuknene ayge, igkis batek ginaktinkis. Igkis kavusa kabayha Uhokri akak madikte gibetkikis adahan madikte annut ku pariye igkis hiyap ig keh.

³⁸ Igkis awna: — Uhokri gabay gikaknek ner Ukivarawiy ku pariye ayta giwavrik Uhokri. Batekka aynte inurik. Kibeyne gidahan Uhokri!

³⁹ Neras farizewkis ku pariye ayge gibetkis hiyeg igkis timapni hene, igkis awna ta git Kiyavwiye Jesus: — Kiyavwiye, wani neras pikannuhnivwi ka muwaka awna inakni hene.

⁴⁰ Igme kaytwa giwnkis: — Amawka ku igkis awna inakni hene. Wake igkis ka awnabe hene, nor tipkam kabimankama akak batekka giwenyankiskama. Henewatbaki in. Jesus kadni akiw gidahankis jerusalémyenevwi

⁴¹ Ayteke ig Kiyavwiye Jesus danuh kennesa arimkat paytwempu Jerusalém. Ig sarayh givegi atere, ig kadni gidahankis madikte hiyeg ayge. Ig biyuk gikan ig tihene ayge.

⁴² Ig awna: — Aa, yis hiyeg paytwempuyenevwi. Nah ka aynsima muwaka yis hawata kadahan batekka ku avim inin. Heneme ku avim inin yis ka hiya ahiyaka.

⁴³ Inneki keh aysawnemenek yis hiyap mbeyne ka aynsimanek. Yivetunyavu danuh atanek igkis kiyarewnihpey akak wayk atikka. Igkis mpithevyi muwapuw adahan yis ka pes.

⁴⁴ Avim ini igkis umahavevyi. Igkis mehe yivinek madikte. Igkis ka ikis pohownema tip pavitmintak akak guyaki tip. Yis hiyap madikte ini mbeyne awaku yis mahikohpen avim inin ku aysaw nah danuh atan adahan yamnihten.

Jesus pekkis piyuknevwi arikutak Uhokri givin

⁴⁵ Pisenwa gawnan inakni iwit ig tivik. Ig pareke ta arikut ini leglis kewye Uhokri Givin. Ayge ig ute hiyeg ku pariye piyuknevwi puwikne akak kuhivra adahan hiyeg kakanhewne ta git Uhokri. Ig hiyapni hene, ig ivukavevgikis.

⁴⁶ Ig awna gitkis: — Uhokri gannasan awna: “Inin nivinuh in piriyepkewket.” Yisme kehne givin humaw amevwiyeket.

⁴⁷ Ayteke ariwnteke ini ig Kiyavwiye Jesus kannuhekne takunipti ayge ariku ini Uhokri Givin. Neras muwveg kiyatyevwi gikakkis neras kannuhekevutnevwi amin amekene Moís gikumadukan gikakkis awaykemni kiyatyevwi ayge Jerusalém igkis ivegminene gihiyekemnikis, igkis awna: — Mmenevgi wixwiy hiya giwmepka kuri?

⁴⁸ Heneme igkis ka hiya gisamanak. Mmanawa madikte hiyeg kiyatha Kiyavwiye Jesus, igkis ataybiswa git kabayntiwa.