Lúkas 17 - Uhokri Gahegbetawni Nukune akak Sawmus

Ku pahavwi taraksase pahavwi, igi uti mbeynenek

¹ Ayteke ig Kiyavwiye Jesus awna ta gitkis giwatnivwi: — Avanenekwa kadahan arikna danuhne wot adahan utaraksasepten ay amadga inin. Heneme ku pahavwi hiyeg taraksase pahavwi, ig katiwnihninek, ig hiyap mbeyne ka aynsimanek.

² Ku ig taraksase pahavwi bakimni nopsesniye, ig utinek mbayka pi mbayte akiw giw pahavwi ku pariye wanekwika gibitamna akak pohow tip nopsadnano adahan givedkepka parahwokwate.

Bayahminanay ku pariye wages gihiyekemni ariw gitaraksan

³ — Avuriwnabay ku samah yihiyekemni. Ku pikebyi tarakse pikak, amawka pis akka gitaraksan git. Ku ig awna: “Henewa nah tarakse”, ku ig wagese gihiyekemni, uya bayahminig ariw ini gitaraksan.

⁴ Ku ig tarakse pikak ntewnehkervut abet pahaynene hawkri, heneme ku ig ayta bayahminasaw pit ntewnehkervut ig awna: “Nah wagese nuhiyekemni”, ayge nikwe amawka ku pis bayahminig kiberevut ariw ini gitaraksan.

Wake wis kamaxwa aynesnibe akiw, wayapni humaw wotkam

⁵ Ayteke ariwnteke ini igkis giwatnivwi kinetihwenes gikak Kiyavwiye Jesus, igkis awna git: — Kiyavwiye, uya kiyesih ukamaxwan givitit Uhokri.

⁶ Igme awna gitkis: — Wake yis kamaxwa givitit aynesnibe akiw, madikte yayapni humaw yitkam. Hiyawa yikamaxwan nopsesa, ayesi kewa paha amutri ayakbe, ke “mostad” ayakbe, hiyawa in aynesawa, heneme yayapni humaw yitkamnek. Yis ikkam adahan yis awna gut nor ah akat nopsadnano, “Ah, pis higihwa ayteke payak akak pihampabet. Su mutuhwa tahan parahwokwat.” Ku aysaw yis awna inaknikam, eg higihwakam ayteke.

Wixwiy Uhokri gibukvig

⁷ — Ku pahavwi ibukti kewne gikivara giwasra, ku kawk ku ig avuriwne givig muwtoh, ku aysaw ner ibukti diyuhe aytontak wasamdeketak ig gikivara ka awna git: “Barewba ax.”

⁸ Kawa. Ig awna git: “Ba ayta sakahwa nudahan. Wihwa adahan pis ewk nutuh numana. Pis avuriwhun he ku aysaw nah pisenwa naxni akak nuhigvan. Ayteke butte pisme ax pisme higap.”

⁹ Ku ig gibuk iha inakni giwn, ig gikivara ka kabayha gibuk adahan ini gihpan, mmanawa ig he kehnenenwa gannivwi.

¹⁰ Yis hawata ku aysaw yis keh madikte ku pariye Uhokri aya yit, amawka yis awna: “Usuh ka ariknawnema. Usuh he ibuktinen. Usuh he kehnenenwa ku pariye muwakapka adahan usuh keh.”

Jesus makniwa madikawku awaykemni axpusakare avit busukne

¹¹ Ayteke ig Kiyavwiye Jesus gitepkemni arimkat Jerusalém. Ig mpiye ayegbiw Samariyamnaw akak Galileyamnaw.

¹² Ig danuh ta avitit paha paytwempu. Ayge ig patiptak gikakkis madikawku gikebikis awaykemni ku pariye axpusakare avit busukne. Igkis tabirbet piyawakte aynesa.

¹³ Igkis kabiman git: — Kiyavwiye Jesus, uya amnih usuh!

¹⁴ Ig timapni hene, ig kaytwa giwnkis: — Nah amnihyi. Su yi akka yivit tahan gitkis muwvegviyene kahadbe igkis iwasavyi, igkis hiyap ku yis kuwis makniw. Igkis timapni hene, igkis tivikwiyes tahan gitkis muwvegviyene. Ayge amun ini gitepkemnikis, pahaye adahan igkis makniwbet.

¹⁵ Pahavwi gaytakkis ig hiyapni ku ig makniw, ig diyuhe gimkanit Kiyavwiye Jesus. Ig kabayha Uhokri akak madikte giwakemni.

¹⁶ Ig danuh atere git Kiyavwiye Jesus, ig tuguhkiswe mabuw gitivut, ig kabayhig atere. Ner awayg ig ka judeyenema ig hiyeg samariyene.

¹⁷ Ig Kiyavwiye Jesus hiyapni hene, ig wakaymni. Ig awna: — Nah makniwe madikawku gikebikis. Kineyki gikebyuvwi?

¹⁸ Mmah nah ka hiyavgikis igkis ayta diyuh kabayha Uhokri? Ignewa ner hiyeg kane judeyenema ig kibeyhene Uhokri ay.

¹⁹ Ayteke nikwe ig awna git: — Kannikaw. Hiyawa pis tivik. Pikamaxwan keh pis makniw.

Uhokri gikumadukan in ay uvit

²⁰ Ayteke gaytakkis farizewkis danuh atere git Kiyavwiye Jesus. Igkis ayavgi: — Kabet Uhokri gikumadukan danuh atan? Igme kaytwa giwnkis: — Wis ka hiya wisma hiya Uhokri gikumadukan akak wowtyak.

²¹ Wis ka hiya wisma awna: “Iveg ayta ku kiney Uhokri gikumadukan. Inin gikumadukan aytakihan.” Ine wis kawnata hiya wisma awna: “Inetra gikumadukan ayntehan nawenyewa paytwempu.” Kawa. Mmanawa Uhokri gikumadukan in ay uvit.

Jesus gaytni kahayak wotwiynek kabayntiwa

²² Ayteke ig awna gitkis gikannuhnivwi. Giwn: — Aysawnemenek yis ka aynsima kadnibdi nuharit nah ku pariye wageswe awayg amadgaya inin. Avim ini yis hiyepkereviye nuhivak. Yis awnanek: “Wake ig danuh adahan pahaywowa hawkribe.” Heneme yis ka hiyavun ayge.

²³ Avim ini pahavwi awna yitnek: “Kuwis Cristo ay kuwis.” Pahavwime awnanek: “Ig ayntehan nawenyewa paytwempu.” Ka ba yi iha inakni giwnkis. Ka ba yi ivegvan atere.

²⁴ Ku aysaw nuhawkanavrik danuhnek adahan naytni nah, ku pariye wageswe awayg amadgaya inin, ini naytni kahayak yitnek kabayntiwa. In kahayak ke ugugunebe ku pariye hamahwa danuhte pahambakat.

²⁵ Heneme avit in danuhnek amawka nah hiyap mbeyne ka aynsima ay. Amawka ku nah tukuhptepka gavitkis hiyeg neras amedgenenvwi inin.

Yuma hiyeg ahiyekten ku kavim Jesus danuh atan akiw

²⁶ — Nah ku pariye wageswe awayg amadgaya inin, ku aysaw nah danuhnek atan akiw, hiyeg gihiyekemnikis hawata kewa hiyeg minikweknevwibe gihiyekemnikis ku kavim amekene Noé amadgate inin.

²⁷ Avim ini igkis ka aminama giw Uhokri. Igkis axnes, higepnes, maripkewnes, ku samah inpawa gikehnikis he ku aysaw ini hawkri danuhe adahan ig amekene Noé kataptew amadgat ginawya. Ayteke un digisase waxri in aniksase neras hiyeg madikte.

²⁸ Hawata akiw ku aysaw nah danuh atan akiw, hiyeg gihiyekemnikis kewa hiyeg minikweknevwibe gihiyekemnikis ku kavim amekene Ló amadgate inin. Avim ini igkis kawnata aminama giw Uhokri. Igkis axnes, higepnes, igkis piyuknes, isimwiri, igkis mutuhnes giwasrakis, igkis paytya, ka aminama.

²⁹ Heneme ku kavim ig amekene Ló pese avititak paytwempu Sodoma, ayge nikwe tiket payegbitak akak ini pisukempiye ku pariye bixihwanene arihri in tuguhe inuriktak. In tuguh ka aynsima ke muwokbe waykempiyebe. In umahave neras hiyeg madikte.

³⁰ Aysawnemenek in hawata danuh ke minikwakbe, ku aysaw nah, ku pariye wageswe awayg amadgaya inin, nah hiyapkiswa akiw.

³¹ Avim ini yis ka muwaka wakaymni aharit yewkanbet amedgene inin. Ku pahavwi ay givin higiwmadga, ig ka muwaka wakaymni aharit gewkanbet ku pariye arikunene givin adahan ig parak atere iwepni. Ku pahavwi aynte amadga giwasra ig kawnata muwaka diyuh atak givinwat akiw.

³² Kiyeminahnabay gumin amekene Ló gihayo. Eg ka wiwhkere guyakni avititak paytwempu Sodoma, eg biyuke.

³³ Ku pahavwi ka wiwhkere giyakni ariw gihiyekemni amadgaya inin, igi biyuk akak gaymahwannek giwntak Uhokri. Heneme ku pahavwi wiwhwa ariw gihiyekemni amadgaya inin, igi darih gaymahwannek giwntak Uhokri adahan avanenekwa.

³⁴ Henewa nukebyuvwi. Avim ini hawkri nudawnhan, piyana gikebikis awaykemni himakwak amadga paheknene iwetrit tiyegem. Pahavwi iwepkanek, pahavwime ikiswika.

³⁵ Hawata akiw piyana gukebikis tinogben kukwanos payak. Pahavu iwepkanek, pahavume ikiswika.

³⁶ Hawata akiw piyana gikebikis awaykemni ay amadga giwasrakis. Pahavwi iwepkanek, pahavwime ikiswika.

³⁷ Igkis gikannuhnivwi timapni hene, igkis awna git Kiyavwiye Jesus: — Kineyvahki inakni danuhnek, Kiyavwiye? Igme kaytwa giwnkis akak pahat iwit patuwesbuhka. Ig awna: — Ku kiney wis hiyap isuw wagewe, wis hiyakni kuwis ku arikna miyaviye ayge. Hawata naytninek, yis hiyapni huwewehenek. Avim ini metakwa yis hiyakninek.