Lúkas 15 - Uhokri Gahegbetawni Nukune akak Sawmus

Muwtoh biyukwiye

¹ Ka aynsima hiyeg ladwan gikakkis nawenyevwi hiyeg ku pariye ikaka kane kibeynevwima hiyeg igkis danuh atere adahan igkis timepnes giwn.

² Neras farizewkis gikakkis neras kannuhekevutnevwi amin amekene Moís gikumadukan igkis hiyapni hene, igkis minimnihekbet gimin Kiyavwiye Jesus. Igkis awna: — Ner hiyeg darihwak gikakkis hiyeg kane kibeynevwima.

³ Ig Kiyavwiye Jesus hiyapni hene, ig awna gitkis pahat iwit patuwesbuhka. Giwn: — Mmahkay yis asene neras hiyeg? Igkis ka gavigikisima nutuh. Igkis kewa muwtoh biyukavyebe nutuh.

⁴ Ku pahavwi yaytak kadahan ka aynsima givig muwtoh, madikawku madikwa (100) gikebikis, ku pahavwi gaytakkis biyuke, nikwe ig ikise givig akebyuvwi (99) ayge amadga amatap, ig ta ivegvevye givig biyukwiye. Ig ivegvig, ivegvig, he ku aysaw ig utevgi.

⁵ Ig utevgi, ig hiyuhpig ta giteyapminat mmanawa ka aynsima ig batek.

⁶ Ig tivik, ig danuh ta givinwat. Ayge ig pahadguh gikagmadavu gikakkis gihumwayevwi. Ig awna gitkis: “Uyay batek payak nukakuh. Mmanawa nah kuwis ute nuviguh biyukwiye.”

⁷ Hawata akiw aynte inurik ka aynsima batekka ayge ku aysaw pahavwi taraksevye wages gihiyekemni. Ayge igkis pi batekte akak ku samah pahavwi taraksevye wages gihiyekemni mpiya ku samah igkis batek gikakkis kaba madikawku madikwa (99) gikebikis ikewnevwi waditye.

Karukri biyukwiyo

⁸ Ayteke ig Kiyavwiye Jesus awna pahat iwit patuwesbuhka akiw adahan ekkene ku samah hiyeg ka avigikisima git. Ig awna: — Ku pahavu tino yaytak kadahan madikawkumku karukri, ku pahamku biyuke guw, eg hakis gabukra, eg sagahakuh guvin, eg ivegvig kabayntiwa he ku aysaw eg utevgu.

⁹ Ayteke ku aysaw eg utevgu, eg humak gukagmadavu gikakkis guhumwayevwi. Eg awna gutkis: “Uyay batek payak nukakuh mmanawa kuwis nah ute nukakura biyukwiyo.”

¹⁰ Hawata akiw ka aynsima batekka gimunkis Uhokri gihiyegavu ahj ku aysaw pahavwi taraksevye wages gihiyekemni.

Awayg gikamkayh biyukwiye

¹¹ Ayteke ig Kiyavwiye Jesus awna pahat iwit patuwesbuhka akiw adahan ekkene ku samah hiyeg ka avigikisima git. Ig awna: — Minikwak pahavwi awayg kakamkayh piyana gikebikis.

¹² Pahay hawkri gikamkayh butye awna ta git gig: “Pa, nah muwaka pis iki nutuh abusku pewkanbet ku pariye pis ikeviye nutuh. Nah muwaka pis ikepni nutuh kurinewa.” Ig gig timapni hene, ig ibekhe gewkanbet gitkis gikamkayuvwi.

¹³ Nikwenewa gikamkayh butye piyuke gidahan gewkanbet madikte. Ig ahiwe akakuravig madikte kuwis, ig awna: “Nah peswite givinekutak niguh.” Ig tivik ta avitit paha waxri ku pariye piyawakad. Ig danuh atere, ig mahayakemnihwenenwa, ig sarayhnenenwa gikakura.

¹⁴ Ayteke gikakura madike kuwis, mihetniki biwhe avitit ini waxri. Ig kamaxe mativwa ka aynsima nikwe. Ig yuma ariknawnema gimun.

¹⁵ Ig hiyapni hene, ig aya gannivwi ta git pahavwi hiyeg aygnene avit ini waxri. Igme awahkiswig ta wasamdakat adahan ig avuriwne givigvu pakirempu.

¹⁶ Ig danuh atere, ig mativwe mpiynevevye he ig axkere pakir gimanakis. Heneme ka ikaka git ariknawnema.

¹⁷ Amun ini ig ivegminene gihiyekemni ig hawkamnihwa ariw. Ig awna: “Niguh gibukvig ka aynsima axka gidahankis. Yuma ariknawnema muwekne gitkis. Nahme ay nah hiyepne mbeyne, nah me miya awaku mativwamet.

¹⁸ Nah atak hikekwate diyuhe git niguh. Nah kinetihwate gikak, nah awna git: ‘Pa, nah tarakse gikak Kiyavwiye Uhokri. Nah tarakse pikak hawata.

¹⁹ Nah ka kis adahan pis kanumun pikamkayh akiw. Uya amnihun amavan adahan nah humaw he pibuknenwa.’”

²⁰ Ig awna inakni, ig ahegbetewvi, ig tivikwiye ta gimkanit gig. Piyawak ig gig sarayh givegi, ig hiyap gikamkayh nehmnik. Ig amnihpig ka aynsima. Ig kayah avit giyakni. Ig sigis piyawakad ta gitivut gikamkayh. Ig aytihpig akak madikte gibetki. Ig ugiswig. Ig ayhpokig.

²¹ Igme gikamkayh awna git: “Pa, nah tarakse gikak Kiyavwiye Uhokri. Nah tarakse pikak hawata. Nah ka kis adahan pis kanumun pikamkayh akiw.”

²² Inme inakni gikamkayh giwn ka ariknawnema ta git gig. Nikwe ig awna ta gitkis gibukvig. Giwn: “Iwawhawnay. Ewknay nudagmanvit ku pariye pi barewtenene. Kawihkisnay givitit. Kawihkisnay akawakti ta giwakurit. Kawihkisnay kasavat ta gikugkavrikut.

²³ Ataknay kamax ner pak akamkayh ku pariye aynengarudi. Igi yis umah adahan wixwiy fetya. Uyay batek.

²⁴ Mmanawa ner nukamkayh ig ke wotbe ig miyarevyebe nuwhu kuwisbe. Kurime ig ay numunuh akiw. Ig ke wotbe biyukwiyebe nuwhu. Kurime ig utepka akiw.” Ayteke nikwe igkis kavusa fetya.

²⁵ Nikwenewa avim ini gikamkayh eggutye aynte wasamdak. Ig peswiye ta givinwat. Ig hiyukamin ta arimkat givin kuwis, ig timap arigman ayteke givinwatak. Ig timap hiyeg kaynekis ayteke.

²⁶ Ig timapni hene, ig humeke pahavwi gig gibuk. Ig awna git: “Mmahkay ku avim inin?”

²⁷ Igme gibuk kaytwa giwn: “Awaku pisamwi diyuhe avim inin hawkri. Pig ka aynsima batek. Ig umahkise pak akamkayh aynengarudi awaku ku samah ig ute gikamkayh makniw akiw.”

²⁸ Ig eggutye timapni hene, ig dagawne. Ig awna: “Ku hene nikwe nah ka parak uvinekut akiw.” Ig tabirasew ayge kabaywak, igme gig pese atere gimkanit adahan ig gikinistetni atere.

²⁹ Igme kaytwa giwn: “Pa, pikehni ka wadit. Ka aynsima kamukri nah kannivwiye pidahan. Nah ka taraksa pahatnema pikumadukan. Hiyaksa pisme ka ikiwa nutuh pahavwinema kabrit adahan nah fetya gikakkis nukagmadavu.

³⁰ Igme pikamkayh ku pariye he sarayhpinen pikakura gukakkis tinogben powkemnavyo, pis umahkise pak akamkayh ku pariye aynengarudi gidahan. Mmahki inere?”

³¹ Igme gig hiyapni hene ku samah ner gihiyekemni hene, ig kaytwa giwn: “Nukamkayh, pis ay numunuh avanenekwa. Madikte ku pariye nudahan in pidahanwata.

³² Heneme in kabay adahan wixwiy fetya awaku ku samah pisamwi diyuhe wotwiy akiw. In kabay wixwiy batek gidahan mmanawa ner pisamwi ig ke wotbe ig miyarevyebe wowiy kuwisbe. Kurime ig ay umunwiy akiw.”