Lúkas 14 - Uhokri Gahegbetawni Nukune akak Sawmus

Jesus makniwa pahavwi awayg wagawgaptivye samdi abet

¹ Ayteke ariwnteke ini ig Kiyavwiye Jesus tivik axne ta git pahavwi farisew. Igme pahavwi gaytakkis giwewkistenkis. Igme Kiyavwiye Jesus atak atere samdi abet. Ig danuh atere, hiyeg ayge avuriwgi kabayntiwa ba ig piyihak abet samdi.

² Ayteke pahavwi awayg wagawgaptivye danuh atere git.

³ Ig Kiyavwiye Jesus hiyapni hene, ig awna ta gitkis neras farizewkis gikakkis neras kannuhekevutnevwi amin amekene Moís gikumadukan. Giwn: — Ba amekene Moís gikumadukan isaksa adahan wis piyihak samdi abet?

⁴ Igkisme ka kaytwa giwn. Igkis tinwovu. Ayteke nikwe ig Kiyavwiye Jesus iwe ner awayg, ig makniwevgi, ig awahkiswig adahan ig tivik givinekute.

⁵ Ayteke ig awna ta gitkis neras hiyeg aygnenevwi: — Ku yikamkayh wiwhe arikut pahayku unihmna, ku yivig pak wiwhe arikut pahayku unihmna, mmah ka hiya yisma kahgi ayteke kibehtenwa? Hiyawa abet samdi heneme yis kahgi ayteke. Ku ka sam yis amnihgikis hene abet samdi, kawnata sam adahan nah piyihak abet samdi.

⁶ Igkis timapni hene, igkis ka hiya igkisma diyuhkis ginetni.

Amawka wis ikaw ke wotbe wis yumahbe ukiytanibe

⁷ Ayteke ariwnteke ini ig Kiyavwiye Jesus hiyap ku samah ner farisew gawnasanvu kaniynekuye iwetrit kiyatye adahan igkis betnes atere. Ig hiyapni hene, ig awna ta gitkis:

⁸ — Ku aysaw pis awnasaka abetit fet, ku aysaw pis danuh atere, ka muwaka bat amadga iwetrit ku pariye pi kiyattenene. Nawenetke pahavwi pi kiyatte mpiyap awnasepka atere.

⁹ Nawenetke ner pawnasetni awna pitnek: “Uya iki inin piwetri ta git ner.” Ayge nikwe pis mareke pivitnek pis batahkiswikanek amun iwetrit abutitvare.

¹⁰ Ka ba kehni hene. Ku aysaw pis awnasaka adahan fetya, ku aysaw pis danuh atere, batnaba amadga iwetrit ku pariye abutitvare. Ayge nikwe nawenetke ner fet akivara ayta awna pitnek: “Nukagmada, ba ayta bat atan amadgat iwetrit kabaytenano.” Ayge nikwe pis utinek pikiytani ay gibetkis neras hiyeg aygnenevwi.

¹¹ Ku pahavwi ikewkere kiyatte mpiya pahavwi, igi Uhokri wiwhe gikiytani givititaknek. Heneme ku pahavwi ikewviye ke wotbe ig yumahbe gikiytanibe, igi Uhokri iki gikiytani givititnek.

Aysawnemenek Uhokri diyuhkis uwaknek

¹² Ayteke ig Kiyavwiye Jesus awna ta git ner fet akivara. Giwn: — Ku aysaw pis kehne axka puwivwak ba aygete, ka ba awnasa pikagmadavu ine pegnivwi ine pikebyuvwi ine pihumwayevwi igisavye atere. Nawenetke igkis hawata keh axka igkis awnasapnek atere. Amun ini nikwe igkis kuwis diyuhkise piwak.

¹³ Ka ba kehni hene. Ku aysaw pis kehne axka, pis awnasa hiyeg madiptavye, hiyeg wayak, hiyeg miyavuwavye, hiyeg motavye.

¹⁴ Ku pis awnasa akebi neras hiyeg, pis uti kabaykanek. Mmanawa igkis ka hiya asamanak adahan diyuhkis piwak. Ayge nikwe igwa Uhokri diyuhkis piwaknek giwenyankis aysawnemenek abet ini hawkri ku aysaw hiyeg kibeynevwi kannikasakanek.

Wixwiy axnek git Uhokri

¹⁵ Pahavwi awayg ayge ig timapni inakni iwit hene, ig awna git Kiyavwiye Jesus: — Ka aynsima batekka ay gidahan ner ku pariye ax gimun Uhokri aynte ku kiney gikumadukan.

¹⁶ Igme kaytwa giwn akak pahat iwit patuwesbuhka. Ig awna: — Uhokri kewa pahavwi awaygbe ku pariye kehne axka kiyesad. Ig awnasa ka aynsima hiyeg adahan igkis atak axnes gikak.

¹⁷ Ayteke ku aysaw axka ahawkanavrik danuh, ig awahkis gibuk tahan watihpigkis. Igme gibuk tivik utevgikis. Ig awna gitkis: “Barewbakay ayta ax. Madikte ahegbet kuwis.”

¹⁸ Heneme igkis madikte wihwenekuye ariw. Pahavwi awna git: “Nah kuhwekwa nah isime pahak was. Amawka nah atak iwasapni. Nah ka kahawkan adahan nah ax gikak.”

¹⁹ Pahavwime awna hawata akiw: “Nah kuhwekwa nah isime madikawku gukebikis pak. Nah atekne iwasavgukis. Nah ka kahawkan adahan nah ax gikak.”

²⁰ Pahavwime awna hawata akiw: “Nah kuhwekwa nah kamaxe nuhaya. Nikwe nah ka hiya nahma ax gikak.”

²¹ Ayteke ner gibuk timapni hene, ig tivik diyuhe ta git gikivara. Ig ekke git ku samah inakni giwnkis git. Ig gikivara timapni hene, ig ka batek. Nikwe ig awna ta git gibuk: “Su atak wew ta avigkut madikte ahin nopsadminene hawata madikte ahin nopsanyupnene. Pis ivegva hiyeg madiptavye, hiyeg wayak, hiyeg motavye, hiyeg miyavuvye. Pis waxwigkis ta numkanit.

²² Ig gibuk timapni hene, ig tivik, ig ihe inakni giwn. Ayteke ig diyuhe ta git gikivara akiw. Ig awna git: “Kiyavwiye, nah kuwis keh ku samah piwn nutuh. Heneme kasemine iwetrit adahan nawenyevwi hiyeg akiw.”

²³ Ig gikivara timapni hene, ig awna git: “Pesnaba avuwitak paytwempu adahan pis atak ta avigkut ahin piyawakad. Kinista neras hiyeg ayge adahan igkis ayta numkat. Numawkan nuvinuh kivun akak hiyeg.

²⁴ Nerasme pitatyevwi ku pariye nawnasanvu igkis biyuk. Igkis ka ax nukakuh.”

Amawka wis umahkis uhiyekemni amadgaya inin

²⁵ Ayteke ariwnteke ini ig Kiyavwiye Jesus tivik. Ig waywe, ka aynsima hiyeg kuruw gihavu butte. Ig hiyapni hene, ig wagestaw, ig awna gitkis:

²⁶ — Ku pahavwi humewkereviye nuhiyega, amawka ku ig wiwhe giyakni givititak gig, guvititak ginag, guvititak gihayo, givititakkis gikamkayuvwi, givititakkis gikebyuvwi. Hawata akiw amawka ku ig miyeh givitwa. Ku ka henema, ig ka hiya igma kannuhwa nutuh.

²⁷ Amawka ku pariye nukannuhni amawka ku ig wew umahkisnenekwa gihiyekemni amadgaya inin ke wotbe ig adaddahkiswitnibe ta aminat ahbe. Ku pahavwi ka umahkis gihiyekemni hene hawata ke nahbe, igi ka hiya igma humaw nukannuhni.

²⁸ Ivegminanabay yihiyekemni adahan ba yis ahegbetnema adahan yis keh hene. Ku pahavwi yaytak kehne paha payt nopsad, avit ig kavusa keh, ig bat ig ivegminene gihiyekemni ku aysamuk atiwni pes. Ig ivegminene gihiyekemni marihwa ig hiyak ba ig kadahanema karukri adahan ig pisenwa ini payt.

²⁹ Ku nawenetke ig kavusa keh payt, heneme ig ka pisenwahni, ignesme hiyeg hiyap ig ka pisenwahni, igkis hiyaraptihpignek,

³⁰ igkis awnanek: “Ner awayg kavusa payt, ig ka hiya igma pisenwahni.”

³¹ Hawata akiw ku pahavwi ikivarat kehne kerka gikak giyaki ikivarat, avit ig atak kerye gikak, ig batahkiswa adahan ig ivegminene gihiyekemni ba ig ik adahan ig patiptak gikak. Nawenetke ig kadahan madikawku mil (10.000) gikebikis gisuwtatavu igme givetunya ku pariye aytniye patiptak gikak ig kadahan pibohra gisuwtatavu pina madikwa mil (20.000) gikebikis.

³² Ku ig ka ik adahan ig patiptak gikak givetunya, ig wasavanaw gimin ku aysaw ig piyawakte giw. Ig aya ta git adahan igkis keh pasamraki.

³³ Amawka yis hawata ivegminenekwa yihiyekemni adahan ba yis ahegbetnema adahan humaw nukannuhni. Ku pahavwi humewkereviye nukannuhni kuri akak inin, heneme ku ig ka wiwh giyakni avititak madikte ku pariye ig kadahan, ayge nikwe ig ka hiya igma humaw nukannuhni.

³⁴ Ig humaw kewa pambe patehwevyebe. Nikwe battukawnabay adahan yis avuriw yihiyekemni adahan in barewbet kewa pambe, adahan yis ka isaksa hiyakemniki amadgaya inin parak abetit yihiyekemni. Pam kabay, heneme ku in wagesbetepka payegbitak akak ibug, ka ik adahan in kabayhaka akiw.

³⁵ In ka kawih adahan ariknawnema akiw. He in ka ik adahan kabayha wayk ine adahan wages akak kuwibri. Nikwe in padekwika. Yis hawata ku yihiyekemni payebdak akak mbeyviye hiyakemniki nikwe yihiyekemni kawnata kawih adahan ariknawnema akiw. Yis ku pariye katayebnene, ataybiswanabay numkanit.