Lúkas 13 - Uhokri Gahegbetawni Nukune akak Sawmus

Ku wis ka wages uhiyekemni, wis biyuknek

¹ Nikwenewa nawenyevwi hiyeg danuh atere akiw. Igkis ewknes inetit atere git Kiyavwiye Jesus. Igkis awna git: — Kiyavwiye, ner hiyaptigi Pilatus ig kuhwekwa umahkisave gaytakkis galileyenevwi. Igkis umahavepka abetnewa ku aysaw igkis umehnes puwikne adahan igkis kakanhawnes ta git Kiyavwiye Uhokri. Gimigkis payegbitak akak puwikne amig. In danuh gitkis awaku gitaraksankis.

² Ig Kiyavwiye Jesus timapni hene, ig awna gitkis hiyeg: — Ka yi muwaka iki ku in ku pariye danuh gitkis neras galileyenevwi, ku in areketni ku igkis pi mbayte giwkis giyakikis galileyenevwi.

³ Kawa. Yis hawata taraksavye. Ku yis ka wages yihiyekemni, yis hawata yis biyuknek.

⁴ Ya neras hiyeg madikawkunene gikebikis gikakkis ntewnehkernene gikak pahavwi gawnakis akiw (18) aynte paytwempu Siloé? Payt imuwad tiptiye higohe givititkis, umahavevgikis madikte. Ka yi muwaka iki ku ini areketni ku igkis pi mbayte giwkis giyakikis jerusalémyenevwi.

⁵ Kawa. Yis ka kabaytema giwkis. Ku yis ka wages yihiyekemni, yis hawata yis biyuknek.

Uhokri ka giyaknisima ukak adahan wis wages uhiyekemni

⁶ Ayteke ig Kiyavwiye Jesus kinetihwa gitkis akak pahat iwit patuwesbuhka. Ig awna: — Uhokri kewa pahavwi awaygbe ig mutuhe pahakti ah akat amadga giwasra. Eg aymuhwe. Ahawkanavrik danuh adahan eg sarayh guw. Kiberevut ig gukivara atere iwasene gamutra guw heneme ig ka uti.

⁷ Ig hiyapni hene, ig awna ta git giwasra akavriwten. Ig awna: “Mpanabu kamukri kuwis nah ayta iwasene namutra guw, heneme yuma guwisima. Asa ihukepnig. Eg he mpithanonen iwetrit adahan amutapta.”

⁸ Igme giwasra akavriwten kaytwa giwn: “Kiyavwiye, uya waha pahakwa kamukri akiw. Nah madivwiste ganwew. Pisenwa nah iki kuwibri ta gukimpurit.

⁹ Nawenetke eg sarayh guw avim ini kamukri aytwenempiye. Ku kawnata, nikwe pis ihukiswig.”

Jesus makniwa pahavu tino buybetnevyo

¹⁰ Ayteke ariwnteke ini ig Kiyavwiye Jesus kannuhne hiyeg ariku paha leglis.

¹¹ Pahavu tino ayge ku pariye kakahriyo adahan ka aynsima kamukri, madikawkubu akebi akak ntewnehkerbu akak pahak arawna akiw (18) awaku wavitye ay guvit. Ig keh eg buybete misakwa. Eg ka hiya egma wadithaptihwa kabayntiwatma.

¹² Ig Kiyavwiye Jesus hiyapni hene, ig humekwig ta gimkanit. Egme danuh atere git, igme awna gut: — Kiyavuno, pis isahptaw ariw ini pikahri.

¹³ Ayteke ig sarayh giwak ta guvitit. Nikwenewa eg wadithaptihwe. Eg hiyapni hene, eg kabayha Uhokri ka aynsima.

¹⁴ Leglis akivara ig hiyapni hene, ig ka aynsima dagawne awaku ig Kiyavwiye Jesus piyihak abet samdi. Ig awna ta gitkis hiyeg: — Ay puguhkuna hawkri avim pahay paka adahan hiyeg kannivwiye. Abet inere hawkri hiyawa yis piyihkiswa. Abetme samdi ka yi muwaka piyihkiswa.

¹⁵ Igme Kiyavwiye Jesus kaytwa giwn: — Yis ikawnamah ke wotbe yis kibeynevwibe hiyeg bawa yihiyekemni pi mbayte giwkis nawenyevwi hiyeg. Abetwa samdi yis wateknekuye yivig pak, yivig kaway ariwntak gaxkegkis adahan yis giwaxwitnikis arit un adahan igkis higepnes un ayge.

¹⁶ Nor tino kabayte ariw pak. Eg amekene Abraawh gihiwhi. Kuwis eg wanekwika gavit Satanas adahan ka aynsima kamukri, madikawkubu akebi akak ntewnehkerbu akak pahak arawna (18) akiw. Mmah ka hiya nahma watakgu ariw ini mbayka samdi abet?

¹⁷ Ig awna inakni iwit hene, madikte givetunyavu marekevwebdi ku samah gihiyekemnikis ka wadit. Heneme madikte hiyeg ku pariye kabubuknene ayge igkis batek ginaktinkis awaku ku samah ig keh ini kibeyne annut.

Yuwit patuwesbuhka amin “mostad” ayak

¹⁸ Ayteke ig Kiyavwiye Jesus awna ta gitkis hiyeg akiw. Ig awna: — Mmah nuwnuh kuri adahan nah akki yit ku samah Uhokri gikumadukan?

¹⁹ Uhokri gikumadukan aymuhwa amadga inin ke amutri “mostadbe”. Ku aysaw pahavwi iwi pohow “mostad” ayak, ig mutuhgu amadga giwasra, eg nopsesniyo. Heneme eg hiyan eg aymuhwa ka aramusima ke ahbe akat. He ik adahan kuhivra kibhaw guvewit.

Yuwit patuwesbuhka amin bugut abusan

²⁰ Ayteke ig Kiyavwiye Jesus awna akiw. Giwn: — Pariye iwit patuwesbuhka akiw adahan nah akki yit ku samah Uhokri gikumadukan?

²¹ In keh hiyeg gihiyekemnikis aymuhwa hawata ku samah bugut abusan tukugasa bugut. Ku pahavu tino iwi aynesa bugut abusan, ku eg wagesbetin ta abetit mpana bom fahhin, ayge nikwe madikte in tukugwa.

Mpiksawnay kawih Uhokri gikumadukan

²² Ayteke ig Kiyavwiye Jesus tiviknene ta arimkanit paytwempu Jerusalém. Ig mpiye muwapuw awvre avuwiw madikte paytwempu nopsadmin hawata avuwiw paytwempu nopsanyupnene akiw. Ku kiw ig mpiya ig kannuhne hiyeg.

²³ Ayge pahavwi awna git: — Kiyavwiye, mmah ka kiyesadima hiyeg isahptawnek? Igme kaytwa giwn, ig awna gitkis hiyeg:

²⁴ — Pareket ta arikut ku kiney Uhokri gikumadukan in kewa pahatra ahin mahamwisniyebe. Mpiksawnabay parak atere. Aysawnemenek hiyeg ka aynsima parekere aterenek, heneme igkis ka hiya igkisma paraknek. Henewatbaki in.

²⁵ Uhokri gikumadukan kewa paha paytbe. Aysawnemenek ig payt akivara kannikawnek adahan ig sabukwiye alapota awaku kuwis mpiye ahawkanavrik adahan hiyeg parak atere. Avim ini yis humaw kewa hiyegbe ku pariye tabibetnene ay kabaywak. Yis tesnek anumeku gilapotanek. Yis kabiman git payt akivaranek: “Kiyavwiye, uya woka lapot udahan.” Igme kaytwa yiwnek: “Nah ka hiyakyi ku pariyene yis.”

²⁶ Ayge nikwe yis kaytwa giwnek: “Ka ba pis hiyapk usuh, Kiyavwiye? Minikwak usuh axne pikak. Usuh higepne payak pikak. Pis kannuhekne ay avit uwaxig.”

²⁷ Igme kaytwa yiwnek: “Kawa. Nah ka hiyakyiwa ku pariyene yis. Higihwanabay aytakihan, yis mbayavye.”

²⁸ Ayge nikwe yis tihebdinek. Avim ini yis hiyap amekene Abraawh gikak amekene Izaki gikak amekene Jakó igkis ayge ku kiney Uhokri gikumadukan. Yis hiyap madikte Uhokri gawnevevu ayge. Yis hiyapni hene ku samah yis aynte kabaywak, ayge nikwe yis tihebdinek. Yis kagah yaybunek.

²⁹ Aysawnemenek ka aynsima hiyeg wahamavriktak, uvitkiyavriktak, mekavriktak, tiwrikavriktak, ignes madikte ax numunuh ayge ku kiney Uhokri gikumadukan.

³⁰ Ka aynsima hiyeg ku pariye ikaka yumanene gikiytanikis ay amadga inin, ayge avim ini igkis kiyatyevwinen hiyegnek. Hawata akiw ka aynsima hiyeg ku pariye ikaka kiyatyevwinen ay amadga inin, igkis yuma gikiytanikisnek.

Jesus kadni gidahankis jerusalémyenevwi

³¹ Avimnewa ini hawkri gaytakkis neras farizewkis danuh atere git Kiyavwiye Jesus. Igkis awna git: — Su tivik. Pes aytaki. Mmanawa kiyavwiye Erodis pihavu piwmepten.

³² Igme kaytwa giwnkis: — Su yi atak awna ta git ner amepye kinisekatya ku nah nudukwenewa pekkisnene wavitye givititakkis hiyeg, nah piyiheknene ku avim inin, takuwanek nuhawkanavrik danuhnek adahan nah pisenwe inin nannivwi.

³³ Ig ka hiya igma pisenwa akak nannivwi. Heneme ahawkanavrik kaba danuh adahan in pisenwa. Nah tiviknene ku avim inin, takuwanek akak hawkanek adahan nah danuh avitit paytwempu Jerusalém. Mmanawa ka kis adahan pahavwi Uhokri gawneve miya avit nawenyewa paytwempu ku ka Jerusalémma.

³⁴ Aa, yis jerusalémyenevwi, yis jerusalémyenevwi, yis umahave Uhokri gawnavevu. Yis padaktave madikte hiyeg ku pariye Uhokri gawahkisni yimin. Bawa ka aynsima hawkri nah muwaka kavigsay ke pahavu takarakbe awahpusano gukamkayh anavi guhanpi. Hiyaksa yisme ka muwaka hene.

³⁵ Aysawnemenek yiwetri misekwe inworenek. Uhokri ka avuriwni akiw. Yis ka takunima hiyavun akiw he ku aysawnemenek metakwa yis ahegbet adahan amavan, yis awna nutuhnek: “Kibeyne pis danuh. Pis ayta giwntakwa Uhokri.” Ihanabay inakni nuwnuh. Henewatbaki in.