Lúkas 1 - Uhokri Gahegbetawni Nukune akak Sawmus

Jesus gihawkan tamaka ay

¹ Kiyavwiye Teófilu, kuwis ka aynsima hiyeg mpiksaw adahan igkis tameknes amadga kagta adahan igkis ekkenes inakni inetit ku pariye danuh ta wotwiy avim inin hawkri.

² Inakni inetit ekkepka wotwiy gavitkis neras ku pariye hiyapni akakwa giwtyakkis ku samah akavuska, ayteke igkis ekkepni muwapuw.

³ Nah kuwis kinetihwa kabayntiwa gikakkis neras ku pariye atiwkeknevwi inakni inetit. Inneki keh nah nuvewkan kabay adahan nah tamakni pehetempi amadga kagta pidahan, kiyavwiye.

⁴ Nah tamaknite kahadbe pis hiyakni kabayntiwa ku inakni inetit ku pariye pikannuhwan in inyewatbaki.

Ahj akka Joawh Batista giwayvuka ta git Zakariyas

⁵ Minikwak ku samah ner hiyaptigi Erodis kumadukenete ay Judeyamnaw, pahavwi awayg ig judeyenevwi gimuwvegakis giw Zakariyas. Ig pahavwi gaytakkis amekene Abiyas gihiyegavu ku pariye kannivwiyes ariku ini leglis kewye Uhokri Givin. Gihayo eg amekene Arawh gihiwhi. Guw Isabel.

⁶ Egkis piyamate wadityekuyokis giwtrik Kiyavwiye Uhokri. Egkis ka taraksa Uhokri gikumadukan aynesnima.

⁷ Egkis yuma gukamkayhkis mmanawa amakano Isabel eg ka keh bakimni. Egkis piyamate kuwis kiyavwibdip.

⁸ Avim ini hawkri ig amekene Zakariyas gihawkanavrik danuh adahan ig kehne gannivwi ariku ini leglis kewye Uhokri Givin awaku ku samah ig muwveg.

⁹ Ayteke nikwe neras muwvegviyene ibekhe gannivwikis ku samah igkis inpawa igkis keh. Avim ini ig amekene Zakariyas kaniyka adahan ig parak arikut Uhokri giwskeki adahan ig bukehne imihgi givetunat Uhokri. Nikwe ig pareke atere.

¹⁰ Madikte hiyeg misekwe kabubuk aynte kabaywak. Ayge igkis piriyepkewnekuyes ku samah ig aynete ariku payt bukehne ini imihgi.

¹¹ Pahaye adahan pahavwi ahj Uhokri giwatni hiyapkiswe ta git amekene Zakariyas. Ig tabir kihehavriktak ini piriyepkewket adahan bukehne imihgi.

¹² Ig amekene Zakariyas hiyapni hene, pahaye adahan ig kawadsan ig avisasew ka aynsima.

¹³ Igme ahj awna git: — Kiyavwiye Zakariyas, ka muwaka avis. Kiyavwiye Uhokri kuwis timap piviryepkawni. Kuwewanek pihayo kiyavuno Isabel kakamkayhnek. Pis sarayh giw Joawh.

¹⁴ Ayge pis ka aynsima batek pinaktinek. Hawata ka aynsima hiyeg batek ginaktinkisnek ku samah ig amadga wayk.

¹⁵ Ig humaw kiyatye hiyegnek giwtrik Kiyavwiye Uhokri. Ig ka higapti win. Ig kawnata higapti higapka ku pariye katiwye. Ig gitiphaw Kiyavwiye Uhokrinek ku samah ig gutunriktak ginagnek.

¹⁶ Aysawnemenek ig keh ka aynsima izhaewyenevwi wages gihiyekemnikisnek gidahan Uwohkigawiy.

¹⁷ Ig ayta gavitkiya Ukivarawiynek. Avim ini ig gitiphewne Kiyavwiye Uhokri ke amekene Eliyasbe. Gannu hawata ke gidahanbe. Avim ini ig keh igti kabeywotviye gikakkis gikamkayuvwi akiw. Ig keh hiyeg kane ihpenevwima wages gihiyekemnikis adahan kibeyne hiyakemniki. Ayge nikwe ig keh igkis waditha gihiyekemnikis marihwa igkis ahegbet adahan Ukivarawiy gaytni.

¹⁸ Ig amekene Zakariyas timapni hene, ig awna git ahj: — Mmah ahiyaka nutuh ku inakni piwn inyewa kahayak? Mahiko adahan nah ihpin mmanawa nah kuwis kiyaparivye. Nuhaya hawata eg kiyaparuvyo.

¹⁹ Igme ahj awna git: — Nah Gabriyew, nah avanenekwa nah misakwa gimun Kiyavwiye Uhokri. Nah awahkiska atan pimin adahan nah kinetihwene pikak adahan nah ekkene inakni inetit ta pit.

²⁰ Pisme ka iha inakni nnetni. Avatra ini pis mataybinek pis mownpinek. Pis ka awna pahatnema iwitnek he inakni nuwnuh kahayak pitnek. Mmanawa inyewa in kahayak avim ini ku aysaw ahawkanavrik danuh.

²¹ Igkis kinetihwenes ayge, neras hiyeg aynte kabaywak igkis wahepnes amekene Zakariyas adahan ig pes. Igkis wakaymnibdi awaku ku samah ig ayivwihwe mpiynevevye aynte ariku Uhokri giwskeki.

²² Ayteke metakwa ig pes arikutak ini payt. Ig mpiksaw adahan ig awna gitkis neras hiyeg, heneme ig ka ik adahan ig awna. Igkis hiyapni hene, igkis awna: — Ba ig kamapti ayge ariku Kiyavwiye Uhokri giwskeki? Igme misekwe ahehwavwi akak giwaknenwa. Ig ka ik adahan ig awna.

²³ Ariwnteke ini gannivwi pisenwa. Nikwe ig tivik ig danuh ta givinekut.

²⁴ Awenketeke ini gihayo amakano Isabel biwhkise. Eg kavigse gukamkayh, eg ka pes paytrikutak adahan pohowku kayg. Eg awna:

²⁵ — Kiyavwiye Uhokri ka gabayisima nukakuh. Kibeyne, ig amnihpen. Ig keh nah ka maraka nuvituh akiw giwtrikkis hiyeg.

Ahj akka Jesus giwayvuka ta gut Mahi

²⁶ Eg amakano Isabel biwhkisno adahan puguhkuna kayg gaw, nikwe ner ahj Gabriyew awahkiska gavit Uhokri ta avitit paha paytwempu kewye Nazaré ku pariye aynene avit waxri Galileyamnaw.

²⁷ Ig awahkiska gumin pahavu himano guw Mahi ku pariye kuwis ahegbet gunetni gikak pahavwi awayg. Ig awayg giw José. Ig amekene Davi gihiwhi.

²⁸ Ig ahj danuh atere ta guvinekut kiyavuno Mahi. Ig awna gut: — Ba pi ay? Kiyavwiye Uhokri kabayhap. Ig ay pikak.

²⁹ Eg timapni hene, eg wakaymni. Eg awna: — Mmahki ner awna nutuh inakni hene?

³⁰ Igme ahj awna gut: — Ka muwaka avis, kiyavuno Mahi. Pis kabunuga gikak Kiyavwiye Uhokri.

³¹ Pis biwhkisnek. Pis sarayhnek pikamkayh awayg. Pis sarayh giw Jesus.

³² Ig humawnek kiyatye hiyeg. Ig kanumkanek Kiyavwiye Uhokri inurikyene gikamkayh. Kiyavwiye Uhokri keh ig kumaduka hiyeg hawata ke gihawkribe amekene Davi.

³³ Ig kumadukanek amekene Jakó gihiwhivwi akiwka akiwkanek. Gikumadukan yuma amaksemninek.

³⁴ Eg kiyavuno Mahi timapni hene, eg kaytwa giwn: — Mmahki ini danuh nutuh? Nah kote wewte gikak pahavwinema awayg.

³⁵ Igme ahj kaytwa guwn: — Ig Kiyavwiye Uhokri Gitip ig muhuksa ta pivititnek. Ig gidatni parakpinek. Ayge nikwe pis sarayh pikamkayh, ig barewvityenek. Ig Kiyavwiye Uhokriwa gikamkayh.

³⁶ Ku pis hiyap pikebyi kiyavuno Isabel kuwis biwhkisno, pis hawatanek. Eg kiyaparuvyo, eg kanumka manpigviyo, heneme gubiwhkisni puguhkuna kayg gaw kuwis.

³⁷ Ig Kiyavwiye Uhokri detye adahan ig keh madikte. Madikte arikna ka mahikonema gidahan.

³⁸ Eg kiyavuno Mahi timapni hene, eg awna git: — Nop nah ay. Nah Uhokri gibuk. Hiyawa ig keh ku samah piwn ta nuvitit. Ig ahj timapni hene, ig tivik.

Mahi gukak isabel

³⁹ Ariwnteke ini eg kiyavuno Mahi ahegbetewvi, eg tivik kibehtenwa ta avitit paha paytwempu ku pariye aynene avit waxribdi ay Judeyamnaw.

⁴⁰ Eg danuh atere, eg pareke givinekut amekene Zakariyas. Ayge eg ute amakano Isabel. Eg aytnihgu: — Ba pi ay?

⁴¹ Ku aysaw eg amakano Isabel time inakni guwn hene, gukamkayh mukuse ay gunaktiniku. Ayge amun ini eg kawihpika gavit Uhokri Gitip.

⁴² Nikwe eg awna gut kiyavuno Mahi akak madikte guwegewni. Guwn: — Pis pi kabunugate gikak Kiyavwiye Uhokri ariw madikte tinogben. Pikamkayh hawata ka gibunugasima.

⁴³ Pis kiyathan ku samah pis ayta danuhpano nutuh mmanawa pis Ukivarawiy ginag.

⁴⁴ Ku aysaw nah time piwn, nukamkayh mukuse ay nunaktiniku akak batekka.

⁴⁵ Pis uti kabaykanek ka aynsima awaku ku samah pis ihe Kiyavwiye Uhokri giwn. Mmanawa ig inyewa kehnek madikte ku pariye ig wasavanaw pimin.

Mahi kabayha Uhokri

⁴⁶ Egme kiyavuno Mahi awna: — Nah kabayha Kiyavwiye Uhokri avititakwa nuyakni.

⁴⁷ Nah ka aynsima batek ku samah ig amnihpen.

⁴⁸ Mmanawa ig kiyenuh nah gibuk yumanano nukiytani. Akiwka akiwkanek madikte hiyeg kinetihwa numinuhnek ku samah nah kabunuga gikak Kiyavwiye Uhokri.

⁴⁹ Ig detyewa. Ig keh kibeyne annut nudahan. Ig barewvitye.

⁵⁰ Akiwka akiwkanek ig ka gamnihrasima gikakkis madikte hiyeg ku pariye avisnevwi gibohri.

⁵¹ Ig ka gannusima. Akak giwannen ig pasuhave neras ku pariye kane kumadukasewkere git.

⁵² Ig wiwh gikiytanikis givititakis neras ku pariye detyevwi. Ignesme ku pariye yumanene gikiytanikis ig iki gikiytanikis givititkis.

⁵³ Ig iki ka aynsima kabayka gitkis hiyeg ku pariye kayehnevwi ku pariye gimawkanitnenes giwntak Kiyavwiye Uhokri. Heneme ig ka iki ariknawnema gitkis hiyeg ku pariye ikewnevwi ku yuma arikna muwekne gitkis.

⁵⁴ Kibeyne. Ig parak abet uhawkanwiy wixwiy gihiyegavu izhaewyenevwi. Ig ka miyeh giwn ku samah ig awna minikwak: “Nah amnihgikisnek.”

⁵⁵ Ku samah ig awna inakni ta git amekene Abraawh gikakkis gihiwhivwi, ignes uhawkrivwiy, henewa ig amnihwiy adahan avanenekwa. Henewatbaki eg kiyavuno Mahi awna.

⁵⁶ Pisenwa nikwe ariwnteke ini eg kiyavuno Mahi misekwe gumun amakano Isabel. Eg mpiyase mpana kayg ayge. Ayteke eg diyuhe ta guvinwat.

Joawh Batista giwayvuka

⁵⁷ Ariwnteke ini eg amakano Isabel guhawkanavrik danuh. Eg pamakuteke. Eg sarayh gukamkayh ig awayg.

⁵⁸ Guhumwayevwi gukakkis gukebyuvwi egkis time arak inakni ku samah Uhokri amnihpig egkis iwasavgu atere. Egkis batekyokis payak gukak.

⁵⁹ Ariwnteke ini pahay paka akiw hiyeg danuh atere adahan hiwhpiye gukamkayh givit ku samah judeyenevwi gihiyekemnikis. Igkis sarayhpiye ig bakimni giw giwavrik gig amekene Zakariyas.

⁶⁰ Egme ginag awna: — Kawa. Amawka wis sarayh giw Joawh.

⁶¹ Igkisme kaytwa guwn: — Mmahki? Yuma pahavwinema pikebyuvwi giwkis hene.

⁶² Ayteke igkis iveg ta gimkat gig igkis barasevgi adahan igme akki ku samah gimawkan giw.

⁶³ Igme aya kagta gitkis. Ayge amadga ini kagta ig tamak: “Giw Joawh”. Neras hiyeg hiyapni hene, igkis wakaymnibdi ka aynsima.

⁶⁴ Aynewa ig amekene Zakariyas gibiy ik adahan ig awna akiw. Ig awna, ig kibeyhene Uhokri.

⁶⁵ Madikte misekwenevwi ayge igkis time inakni gak hene, igkis wakaymnibdi gidahan ka aynsima. Inakni inetit gimin ibekhewvi muwapuw avitiw ini waxribdi ayge Judeyamnaw.

⁶⁶ Madikte hiyeg ku pariye time gak igkis baruwkiswa gimin. Igkis awna: — Pariye ner bakimni humawnek? Mmanawa in kahayak huwewe wotwiy ku Kiyavwiye Uhokri ay gikak.

Zakariyas awna iwit ku pariye pes giwntak Uhokri

⁶⁷ Igme bakimni gig amekene Zakariyas, Uhokri Gitip kawihpig, ig awna iwit ku pariye pes giwntak Uhokri. Giwn:

⁶⁸ — Kibeyne gidahan Kiyavwiye Uhokri, ku pariye uwohkigawiy wixwiy izhaewyenevwi. Ig kuwis parak abet uhawkanwiy wixwiy gihiyegavu. Kuri ig keh wixwiy isahptaw.

⁶⁹ Ig kuwis awahkise uminwiy pahavwi wamnihtenwiy detye. Igi gihiwhi amekene Davi ku pariye gibuk Kiyavwiye Uhokri.

⁷⁰ Ig Kiyavwiye Uhokri keh gawnevevu pitatyevwi kinetihwa gidahan hene minikwak.

⁷¹ Ig awna ku ig keh wixwiy isahptaw giwkis uvetunyavuwiy giwkis madikte ku pariye wamiyetnivwiy.

⁷² Ig awna gitkis uhawkrivwiy amekenegben: “Nah amnihyinek. Nah ka miyeh ku samah nah ikaksin yit.”

⁷³ Mmanawa ig ikakse minikwak git uhawkriwiy amekene Abraawh

⁷⁴ ku ig wiwhpewiynek giwakutakis uvetunyavuwiy kahadbe wixwiy ka avisnema kawohkigahaw ta git Kiyavwiye Uhokri,

⁷⁵ adahan wixwiy wew waditye, barewvitye giwtrik Kiyavwiye Uhokri madikte ku samah wowskawniwiy amadga hawkri.

⁷⁶ Pis nukamkayh, pis kanumkanek Kiyavwiye Uhokri inurikyene gawneve mmanawa pis danuh gavitkiya Ukivarawiynek adahan pis ahegbeteviye madikte avit gaytni.

⁷⁷ Pis akkanek gitkis gihiyegavu ku igkis isahptawnek awaku ku samah Kiyavwiye Uhokri bayahminigkis ariw givathawnikis.

⁷⁸ Mmanawa ig Kiyavwiye Uhokri ka gamnihrasima ukakwiy. Inneki keh ig paraksa abet uhakanwiy pahavwi kabutennene inutak

⁷⁹ adahan ig uguhne gihiyekemnikis hiyeg ku pariye abetnenevwi amisnavye, abetnenevwi aviska abohri miyaka. Igi keh wixwiy misakwanek abet pasamraka. Henewatbaki ig amekene Zakariyas awna.

⁸⁰ Ayteke ariwnteke ini ig bakimni aymuhwe. Ig kawih Uhokri gihiyekemni kabayntiwa. Ayteke barew gikivay kuwis ig tivik misekwe amadgate amatap ku kiney yumanene hiyeg misakwa. Ayge ig misekwe he ku aysaw gihawkanavrik danuh adahan ig ekkene Uhokri gihiyekemni ta gitkis hiyeg izhaewyenevwi.