Kolosénses 3 - Uhokri Gahegbetawni Nukune akak SawmusWewnay akak hiyakemniki inurikyene 1 Wixwiy uhiyekemniwiy nukune in ke wotbe in kuwis kannikawbe payak gikak Cristo. Kuri nikwe uyay mpiksaw wew akak hiyakemniki inurikyene. Mmanawa ig Cristo kuri ig ayntehan inurik. Ig kumadukene ayge gihumwa Kiyavwiye Uhokri ayge amun ini iwetrit ku pariye kane nikiytanisima kihehaptak. 2 Nikwe uyay ka ivegmina uhiyekemniwiy amin ku pariye amedgenema inin. Uyay ivegmina uhiyekemniwiy amin ku pariye aynte inurik. 3 Mmanawa wixwiy ke wotbe wixwiy kuwis miyarap ariw inin hawkri. Woskawniwiy kuri aynte gimun Cristo, aynte gimun Kiyavwiye Uhokri ku kiney hiyeg amadgayavu inin kotenene hiyapte. 4 Heneme aysawnemenek ignes hiyapnek atere. Ignewa Cristo udehetniwiy. Aysawnemenek ig hiyapkiswa gitkis madikte hiyeg. Ayge wixwiy hawata hiyapkiskanek payak gikak ka ukiytaniwiysima akak gikiytani. Umahkisnay yihiyekemni amadgaya inin Ef 4.17 ; 1Ped 4.7 5 Nikwe umahkisnay ini yihiyekemni amadgaya inin git Kiyavwiye Uhokri. Ka yi muwaka iveg adahan mahayakemniki, patahwaki, sigiska, kinikwaki. Ka yi muwaka miyarhaw aharit ariknawnema amedgene inin. Ku yis miyarhaw aharit pahat arikna, amun ini yis pi batekte akak ini arikna mpiy giw Kiyavwiye Uhokri. 6 Kiyavwiye Uhokri ka batek akak ini patahwaki. Aysawnemenek hiyeg ku pariye patahwa hene ku pariye ka ihpenevwima giwn ignes ivukepkanek hanpa arimkanit biyukwiki. 7 Minikwak yis hawata patahwa hene. Yis wewnete akak neras kane Uhokriyanvuma gihiyekemnikis. 8 Heneme kuri yis ka henema akiw. Nikwe miniwvinay ariw madikte patahwaki. Ka yi muwaka misakwa dagawnawbetnema akiw. Ka yi muwaka kamabyanaw akiw. Ka yi muwaka iki iwetrit arit amiyhawka arit kanumtaki. Ka yi muwaka isaksa pahatnema iwit mbeyevye pes yibiyaptak. 9 Ka yi muwaka kinisak pawtak akiw mmanawa kuwis yis padeke yihiyekemni amadgaya inin payak akak nikehni. Kawihminawnay akak yihiyekemni nukune Ro 12.2 ; Ef 4.23 ; 1Tes 4.1 ; 1Ped 2.11 10 Kibeyne, kuwis yis kawihminaw akak yihiyekemni nukune. Ini yihiyekemni nukune in aymuhwene akak Uhokri gihiyekemni he ku aysaw in wageswanek avigkutavrikut ku samah gihiyekemni. Mmanawa ignewa ahumten ini uhiyekemniwiy nukune. 11 Wixwiy kadahan pahatwowa uhiyekemniwiy pawtak kuri. Ka sam ini uwayvukawiy. Ku pariye hiyeg judeyene, ku pariye hiyeg kane judeyenema, ku pariye hiwhka givit, ku pariye kane hiwhkama givit, ku pariye yumanene gikiytani, ku pariye ahavwikune, ku pariye ibukti, ku pariye kane ibuktima, wixwiy pahatwowa uhiyekemniwiy kuri. Ka sam ku pariye uwayvukawiy. Ignewa Cristo sam. Ig madikte wotwiy. Gihiyekemni ay uvitwiy madikte. 12 Wixwiy Kiyavwiye Uhokri gibetkivu. Wixwiy barewvityevwi giwtrik Kiyavwiye Uhokri. Ig batek ukakwiy. Nikwe uyay kawihminaw akak gihiyekemni. Amnihaknay, kehnay kabayka pawtak. Ikawnay tuwatevye huwipegevye. Kiyaknihwanay pawtak. 13 Ka yi muwaka kiyimwihwa akak hiyeg gitaraksankis. Bayahminanay neras ku pariye taraksevye yikak hawata ku samah Ukivarawiy bayahminawiy. Uyay pasamrak pawtak 14 Nukebyuvwi, wewnay akak Kiyavwiye Uhokri gamnihra ay yivit. Yuma hiyakemniki pi kabayte ariw ini. Ininewa keh wixwiy pasamrak pawtak kabayntiwa. 15 Isaksanay Cristo kisevyih yiyakni adahan yis pasamrak pawtak takunipti. Adahanikwa ini ig Kiyavwiye Uhokri humekwewiy gimkat. Mmanawa wixwiy Cristo givit. Amawka wixwiy pasamrak pawtak nikwe ke pahavwi hiyeg giwanbetbe. Kabayhaknay pawtak. Kabayhanay Kiyavwiye Uhokri avanenekwa. Paknay avat gidahan Uhokri Ef 5.19 16 Kamaxnay Cristo giwn kabayntiwa abet yihiyekemni. Kannuhaknay, hiyakemnihaknay pawtak akak madikte Uhokri gihiyekemni. Kannuhaknay amin ini gihiyekemni abetnewa yavanwekwey hawata. Paknay avat kanumne Kiyavwiye Uhokri. Paknay avat kiyathene Kiyavwiye Uhokri. Paknay akak Kiyavwiye Uhokri Gitip. Kabayhanay Kiyavwiye Uhokri yavanwekwey avititakwa yiyakni. Awnanay akak Jesus gihiyekemni 17 Madikte ku pariye yis keh, kehnibay akakwa Kiyavwiye Jesus gihiyekemni. Madikte ku pariye yis awna, awninnabay akakwa Kiyavwiye Jesus gihiyekemni. Kabayhanay Wigwiy Kiyavwiye Uhokri akak gihiyekemniwa Kiyavwiye Jesus. Ihpaknay pawtak Ef 5.22 ; 1Ped 3.1 18 Yis tinogben, ihpanay yigihgi giwn kabayntiwa ku samah Ukivarawiy ikiswanaw yidahan. 19 Yisme awaykemni, amnihnay yihayo. Ka yi muwaka kanaktinema gukakkis. 20 Yisme bakimnayh, ihpanay madikte yig giwn. Ihpanay yinag guwn madikte. Henewa Kiyavwiye Uhokri ikiswanaw yidahan. In keh ig batek. 21 Yisme awaykemni, ka yi muwaka keh yikamkayh kanaktinema yikak. Ku nawenetke yis tuguhkis gawaygikisnek. 22 Ku aysaw yis kannivwiye gidahan pahavwi amedgene inin, ihpanay giwn. Ihpanay madikte giwn. Ka yi muwaka ikaw kema pahavwima giwtrik gikivara ig kannivwiye, giharavrikme ig ka kannivwikere. Ka yi muwaka kannivwi adahannenwatma hiyeg amadgaya inin batek yikak. Ihpanay giwnkis avititak yiyakni awaku yis kiyene Ukivarawiy. 23 Ku pariye yis keh, kehnibay akak madikte yibetki. Kannivwinay ke gidahanbe Ukivarawiy Kiyavwiye Uhokribe, ke wotbe yis ka kannivwiyema gidahan hiyegima amadgaya inin. 24 Mmanawa aysawnemenek igwa Ukivarawiy Kiyavwiye Uhokri katiwnihyinek ariwntak ini kabayka ku pariye ig darihe udahanwiy aynte inurik. Mmanawa Cristo ignewa yikivara ku kadahan yis kannivwiye. 25 Heneme ku pahavwi ka keh kabayntiwatma gidahan Ukivarawiy, ig uti gitiwni pakekunawa akak ini gikehni. Ig Kiyavwiye Uhokri ka mpiyasa pahavwinema gikehni henenwatma. |
© 2018, Wycliffe Bible Translators, Inc. All rights reserved.
Wycliffe Bible Translators, Inc.