Kolosénses 2 - Uhokri Gahegbetawni Nukune akak Sawmus

Numawkan yis hiyak Uhokri gihiyekemni kabayntiwa

¹ Nukebyuvwih, nah ka aynsima nuwakemni yidahan, gidahankis neras hiyeg avitnenevwi paytwempu Lawdiseya, gidahankis madikte hiyeg ayge ku pariye nah kote patiptakte gikakkis.

² Numawkan yis iw yawaygi. Numawkan yis pahatwowa yihiyekemni. Numawkan yis batekak pawtak. Numawkan yis hiyak Uhokri gihiyekemni kabayntiwa kiyesrad kahadbe yis iveg givitit Kiyavwiye Uhokri kabayntiwa. Ayge nikwe yis hiyak ini ku pariye Kiyavwiye Uhokri ka akki gitkis hiyeg minikweknenevwi. Yis hiyak igyewa Cristo.

³ Ignewa Cristo hiyakkis wotwiy madikte hiyakemniki ku pariye kibeynewatnene.

⁴ Nah awna inakni hene kahadbe yis ka kinikiswa gitkis neras ku pariye awnenevwi ke wotbe ignes hiyakemniyevwibe.

⁵ Nah piyawakad yiw heneme nuyakni ayge yimun. Nah bateke numinuh ku samah nah hiyakni ku yis wewnene wadit, yis kamaxwenene kabayntiwa givitit Cristo.

Misakwanay kabayntiwa akak yikamaxwan givitit Cristo

⁶ Ig Cristo Jesus ignewa Ukivarawiy. Yis kuwis amevevgi kabayntiwa. Kuri nikwe wewnabay pahavwiwa gikak takunipti.

⁷ Kamaxwanay givitit Cristo kabayntiwa hawata ku samah ah ahanpabet mutuhwa kabayntiwa waykekut. Aymuhwanay akak gihiyekemni. Misakwanay kabayntiwa akak ini yikamaxwan ku samah yis kuwis kannuhka. Ka yi isahkisni aynesnima. Amun ini kabayhanay Kiyavwiye Uhokri akak madikte yibetki.

⁸ Pukuhpawnabay gavitkis ku pariye hiyeg ayta yikinsetni akak gidahankiswa gihiyekemnikis ku pariye kane kibeynema waditnevyenen. Inakni gihiyekemnikis pes giwntakis hiyeg gihiyekemnikis amadgayavu inin. Hawata in pes giwntakis neras wavityempu ku pariye kumadukanevwi inin hawkri. In ka giwntakma Cristoma.

⁹ Mmanawa ig Cristo igi pahavwitewa Uhokri ay.

¹⁰ Nikwe ku samah wixwiy pahavwiwa gikak Cristo, wixwiy yuma ariknawnema muwekne wotwiy akiw. Ikeyvi kuwis. Mmanawa ig Cristo gavitminkis madikte wavityempu gikivarakis. Ig gavitminkis madikte kumadukanevwi inin hawkri.

Uhiyakemniwiy ke wotbe miya kannikaw payak gikak Cristo

¹¹ Madikte awaykemni ku pariye judeyenevwi igkis hiwhka givitkis adahan arakak ku ignes Kiyavwiye Uhokri gihiyegavu. Wixwiyme ku pariye inyewa gihiyegavu in ke wotbe wixwiy hawata hiwhkabe uvitwiybe. Heneme kawki gavitkisma hiyeg amadgayavu inin. Ku samah wixwiy pahavwiwa gikak Cristo, ignewa Cristo hiwh uhiyekemniwiy minikweknene avititak uyakniwiy kahadbe uvitwiy ka isaksaw nit akiw.

¹² Wixwiy ka muwaka hiwh uvitwiy mmanawa ku akak inin wixwiy kew ahakwat un adahan areketni ku wixwiy Kiyavwiye Uhokri gihiyegavu. Ku samah wixwiy huwikiswika ahakwat un, amun ini wixwiy amevene ini ku uhiyekemniwiy amadgaya inin in ke wotbe in avuhpikabe payak gikak Cristo in ke miyavibe ayge gikak. Hawata akiw ku samah wixwiy iyak ahakwatak un, amun ini wixwiy amevene ini ku uhiyekemniwiy nukune in ke wotbe in kannikaw payak gikak Cristo. In kannikaw hene awaku ku samah wixwiy kamaxwa givitit Kiyavwiye Uhokri adahan ig kannikasin hawata ku samah ig kannikase Cristo ariw gimiremni.

¹³ Henewa nukebyuvwi, minikwak ke wotbe wixwiy miyarevyebe giw Kiyavwiye Uhokri awaku utaraksanwiy gikak, awaku ku samah wixwiy kumadukasaw arit uhiyekemniwiy amadgaya inin abetki. Heneme, kibeyne ig Kiyavwiye Uhokri ke wotbe ig kannikasawiybe ariw miyaka ig keh wixwiy aymuhwa akiw payak gikak Cristo. Mmanawa ig kuwis bayahminevwiy ariw madikte utaraksanwiy.

¹⁴ In ke wotbe madikte utaraksanwiy tamak amadga pahak kagta. Hawata in tamak ku pugamawka wixwiy miyarap avatra ini utaraksanwiy. Igme Kiyavwiye Uhokri menpin madikte. In ke wotbe ig deddehpin aminat Cristo giyakni adahan in yuma ay akiw.

¹⁵ Amun ini nikwe ig pisenwe akak gidatnikis neras wavityempu gikivarakis neras kumadukanevwi inin hawkri. Ini Kiyavwiye Uhokri gikehni in ka ayamawnema. Kuwis ig akki giwtrikneswa madikte hiyeg ku samah Cristo wanekbete wavityempu gihawkankis akak ku samah ig umahkiswe udukwenavrikwiy amin giyakni.

Judeyenevwi gikumadukankis in ininewa Cristo “ganmap”

¹⁶ Nikwe ka yi muwaka iha giwnkis neras hiyeg ku pariye awna yit: “Yis ka Uhokriyanvuma, mmanawa yis ax im ku pariye ka kabay adahan wis ax, yis higap higapka ku pariye kawnata kabay. Yis ka Uhokriyanvuma, mmanawa yis ka fetya ukakuh gidahan Kiyavwiye Uhokri. Yis ka Uhokriyanvuma, mmanawa yis ka kiyatha samdi yis kawnata kiyatha ameremnit.”

¹⁷ Nukebyuvwi, inakni kumadukaki amadgaya inin in ka kawih udahanwiy ku akak inin. In ke pahavwibe ig waywe ganmap pitatimpi gavit. Ganmap ka ignema ig awayg. In he areketninen adahan ku pariye nehmnikuhpiye. Inakni judeyenevwi gikumadukankis in hawata in he areketninen gidahan Cristo ku pariye nehmnikuhpiye. Kuwismeki ig Cristo danuh. Nikwe ini ku pariye kene ganmapbe in ka ariknawnema wotwiy akiw.

Ka ba yi kumadukasa yihiyekemni gitkis hiyeg gihiyekemnikis amadgaya inin

¹⁸ Ka yi muwaka iha giwnkis neras hiyeg ku pariye awna yit: “Amawka yis hiyapkis mbeyne arit yivit gidahan Kiyavwiye Uhokri. Hawata amawka yis kiyatha ahj. Ku yis ka keh hene yis biyuk giw Uhokri. Mmanawa narisun akki nutuh hene.” Ku yis iha inakni gihiyekemnikis, nikwe yis biyuk akak ini kabayka ku pariye Kiyavwiye Uhokri ikekere yit. Neras hiyeg ikawnamahkis ke wotbe igkis hiyakemniyevwibe heneme Uhokri gihiyekemni yuma ay gimunkis. Gihiyekemnikis he amadgayanen inin.

¹⁹ Gihiyekemnikis ka giwntakma Cristo. Wixwiyme Cristo gihiyegavu wixwiy uti uhiyekemniwiy giwntak ignewa Cristo. Wixwiy kewa givitbe. Igme kewa utewiybe. Giwnteknewa wixwiy ke wotbe hamehbetakibe givitit. Wixwiy ke wotbe wanekbetakibe pawtak gikak akak gidahanwa gikisut akuwatnibdi. Ayge nikwe ignewa keh wixwiy aymuhwa. Ig keh wixwiy aymuhwa akak hiyakemniki inyewa giwntakwa Kiyavwiye Uhokri.

Ka akakma umaviswanwiy akak ukehbetanwiynenwatma wixwiy barewvithaw

²⁰ Wixwiy uhiyekemniwiy amadgaya inin in ke wotbe in kuwis miyabe payak gikak Cristo. Mmanawa in ke wotbe in ay givitbe Kiyavwiye Jesus amun ini ku samah ig umahkiswe minikwak. Nikwe wixwiy ka kumadukasaw arit inakni hiyakemniki akiw. Wixwiy isahptew giwkis wavityempu ku pariye kumadukenevwi inin hawkri. Kuri nikwe mmahki yis ikewne ke wotbe yihiyekemni minikweknene adukwenewa aybe? Mmahki yis ihpene giwnkis neras ku pariye awna yit:

²¹ — Ka muwaka ax ini im. Ka muwaka ewhin. Ka muwaka daxni aynesnima.

²² Inakni iwit giwntakis hiyeg gihiyekemnikis amadgaya inin. In he awna adahan arikna ku pariye he mpiyevyenen in ka parak abetit uhiyekemniwiy. Ku aysaw wis axwin kuwewa akiw wis ahinavrikuhpin. In yuma akiw. Ka innema keh wis patehwevye giwtrik Kiyavwiye Uhokri.

²³ Neras ku pariye ihpenevwi inakni gikumadukankis, nawenetke hiyeg ikiygikis ku igkis hiyak Kiyavwiye Uhokri kabayntiwa bawa he gikanmakisnen. Igkis mpiksaw iha ariwn arakembet kumadukaki. Igkiswa hiyapkis mbeyne arit givitkis adahan givewkankis igkis madiptasewne ariw givathawnikis. Gitkis amun ini igkis tuwatasewnes gitivut Kiyavwiye Uhokri. Bawa waditnevyenen. Ka innema umaptenten ariw wis patahwa.