Kolosénses 1 - Uhokri Gahegbetawni Nukune akak Sawmus

Nah Pol awahkis inin kagta yimin

¹ Nah Pol awahkis inin kagta yimin. Kibeyne, Kiyavwiye Uhokri kaniyven akak gibetki adahan nah humaw Cristo Jesus giwatni. Nah gikak ukebyi Timotyu,

² usuh awahkis kabayka yimin, yis Jesus gihiyegavu kolosiyenevwi. Kibeyne nukebyuvwi, yis kamaxwene kabayntiwa givitit Cristo, yis wewne pahavwiwa gikak. Wigwiy Kiyavwiye Uhokri gabay yikaknek. Ig kariswehse yiyakninek.

Usuh kinetni yak ku yis kamaxwene givitit Jesus

³ Ku aysaw usuh piriyepkewne yidahan, usuh avanenekwa kabayha Kiyavwiye Uhokri yidahan, Ukivarawiy Jesus Cristo gig. Usuh kabayhig awaku

⁴ ku samah usuh kinetni yak ku yis kamaxwene givitit Cristo Jesus kabayntiwa. Hawata usuh kinetni yak ku yis batek gikakkis madikte Jesus gihiyegavu.

⁵ Usuh kabayhig adahan ini kabayka nehmnikuhpiye ku pariye ig darih yidahan aynte inurik. Yis time ini kabayka arak minikwak ku aysaw yis timap inakni inetit inyewatnene gidahan Kiyavwiye Jesus.

⁶ Inakni kibeyne inetit ku pariye danuh yit minikwak, in kuri ibekhewvi muwapuw amadga wayk. In wagesne hiyeg gihiyekemnikis muwapuw hawata ku samah in wagesne yidahan yihiyekemni. Mmanawa ku samah yis timap inakni inetit minikwak, ku samah yis inyewa pukuhpe ini Kiyavwiye Uhokri gamnihra, ayge inakni inetit kavusa wages yihiyekemni.

⁷ Yis time inakni inetit gibiyaptak kiyavwiye Epafras. Ig ukebyi kibeyne ku pariye kannivwiye payak ukakuh. Ig kabivwiye kannivwiye gidahan Cristo. Ig atere ekkene Kiyavwiye Uhokri giwn yit uwenyan.

⁸ Kurime ig kuwis diyuhe wotuh akiw. Ignewa kinetihwa wotuh ku samah yis batekak pawtak akak Kiyavwiye Uhokri Gitip gamnihra ay yivit.

Usuh piriyepkewnenekwa yidahan

⁹ Ku samah usuh kinetni yak usuh ka matiswati piriyepkaw yidahan. Usuh ayepne git Kiyavwiye Uhokri adahan ig kehne yis hiyak kabayntiwa ku pariye ini Kiyavwiye Uhokri gibetki, adahan yis humaw hiyakemniyevwi akak Kiyavwiye Uhokri Gitip gihiyekemni.

¹⁰ Ku yis kamax ini gihiyekemni, inneki keh yis ikaw Uhokriyanbetnewa. Ayge amun ini nikwe yis keh ig bateke gimin. Ayge yis ka waditnevyenentima, yis kehne madikte kabayka. Ayge yis hiyeknewa Kiyavwiye Uhokri kabayntiwa.

¹¹ Usuh piriyepkaw adahan Kiyavwiye Uhokri iki yawaygi adahan yis ka yannusima akak Kiyavwiye Uhokri gannu ay yivit. Ini gannu ka nikiytanisima. In keh yis ka tuguhkis yihiyekemni ku aysaw yis abet mbeyne. In keh yis abet mbeyne heneme yisnewa yidukwenewa bateknenekwa,

¹² yis kibeyhene Wigwiy ayge nibet. Mmanawa ignewa keh wixwiy kis adahan darih madikte ini kabayka ku pariye ig darihe gidahankis gihiyegavu aynte abet kabutniki.

Wixwiy isahptaw ariw Satanas gikumadukan amisnavye

¹³ Kibeyne, ig keh wixwiy isahptaw ariw wavitye gikumadukan amisnavye. Ig manukse wixwiy abetit gikamkayh gibetki gikumadukan.

¹⁴ Ku samah wixwiy pahavwiwa gikak gikamkayh, amun ini nikwe wixwiy isahptaw, wixwiy bayahminepka ariw utaraksanwiy.

Jesus Cristo Uhokriwa ig

¹⁵ Ig Jesus Cristo kahayaksa wotwiy igyewa Kiyavwiye Uhokri ku pariye kane hiyapkarati akakma wowtyak amadgaya inin. Ig ay minikwak avit hawkri humaw. Ig avitmin madikte amedgene hawkri.

¹⁶ Mmanawa ig Kiyavwiye Uhokri kehkis madikte hawkri git ner gikamkayh. Igme keh madikte aynte inurik. Ig keh madikte ay amadga inin. Ig keh madikte ku pariye wixwiy hiyap. Ig keh madikte ku pariye wixwiy kane hiyap. Ig keh madikte inurikyenevwi gikivarakis. Ig keh madikte ahj detyevwi. Ig keh madikte kumadukenevwi inin hawkri. Madikte hawkri kehka gavit ig Kiyavwiye Uhokri gikamkayh. Madikte in hawata gidahanwata.

¹⁷ Avit hawkri humaw ig ayipa ay. Madikte hawkri kamew givitit.

¹⁸ Ig hawata gavitminkis gihiyegavu. Wixwiy gihiyegavu wixwiy kewa givitbe. Igme utewiy. Ignewa pitatye keh ini givit humaw. Ig atiwkekne kannikawka ariw miyaka. Ayge nikwe ig avitmin madikte.

¹⁹ Ignewa pahavwitewa Uhokri ay. Henewa Kiyavwiye Uhokri gibetki hene.

Jesus wages madikte hawkri avigkut ku samah Uhokri gimawkan

²⁰ Givitimpi ner gikamkayh ig Kiyavwiye Uhokri wagese madikte hawkri avigkut ku samah gimawkan. Ig pisenwa akak madikte mbayka inurikya, ay amadgaya inin hawata. Mmanawa ig gikamkayh watekbete madikte inin hawkri ahawkan awaku ku samah ig sukase gimig amin giyakni.

²¹ Ig hawata ig watekbete uhawkanwiy wixwiy gihiyegavu gikak Kiyavwiye Uhokri. Minikwak wixwiy piyawakad giw Kiyavwiye Uhokri. Avim ini wixwiy suguhnig abet uhiyekemniwiy. Hawata wixwiy suguhnig akak ku pariye ukehniwiy mbeyevye.

²² Heneme kuri ig watekbete uhawkanwiy gikak Kiyavwiye Uhokri awaku ku samah gidahan gih gihaptiyewa miya amin giyakni. Ayge nikwe ig keh wixwiy ke wotbe wixwiy yumahbe utaraksanwiy aynesnima giwtrik Kiyavwiye Uhokri, ke wotbe wixwiy barewvitye yumahbe uvathawniwiy.

²³ Ig keh wixwiy barewvitye hene awaku ku samah wixwiy kamaxwene givitit Cristo. Heneme amawka ku wixwiy tiviknene gikak, wixwiy ka isahkiswa giw. Amawka ku ini ukamaxwanwiy awaygye ativut madikte ku pariye ayta tuguhkiswiye uhiyekemniwiy. Amawka ku wixwiy ka tuguhkis ukamaxwanwiy givititak Cristo. Yis kamaxwe givitit minikwak ku aysaw yis time inakni Kiyavwiye Uhokri ginetni gidahan. Kuri madikte hiyeg amadga wayk timepnekuye inakni ginetni. Kibeyne, nah Pol, nah awahkiska gavit Kiyavwiye Uhokri adahan nah nakkamnihten gitkis hiyeg.

Nah Uhokri giwatni yimin yis hiyeg kane judeyenevwima

²⁴ Nah hiyepne mbeyne kuri awaku ku samah nah ekkene inakni Kiyavwiye Uhokri ginetni yit yis hiyeg kane judeyenevwima. Heneme ka sam. Nah bateke numinuh mmanawa nah makisuhne ini ku pariye Kiyavwiye Uhokri ikiswanaw nudahan. Mmanawa kuwis ig ikakse nudahan nah hiyepne mbeyne ke Cristobe. Henewa nuvituh hiyepne mbeyne gidahan Cristo givit. Mmanawa Cristo gihiyegavu igkisnewa Cristo givit.

²⁵ Ig Kiyavwiye Uhokri gimawkan nah wagahkisne Cristo gihiyegavu. Nikwe ig awahkisun adahan nah atak kannivwiye yibetit yis hiyeg ku pariye kane judeyenevwima, kahadbe giwn hiyakan kabayntiwa muwapuw.

²⁶ Ig muwaka yis hiyak ini gihiyekemni ku pariye hiyeg minikweknene kotenene hiyakte. Minikwak ig ka akki ini gihiyekemni heneme kuri ig ekkepni gitkis gihiyegavu.

²⁷ Ig muwaka madikte hiyeg hiyak ini gihiyekemni ku pariye minikwak hiyeg kotenene hiyakte. Inakni gihiyekemni adahan ku samah Cristo misakwa ay uvitwiy. In gihiyekemni kibeynewatnene kane nikiytanisima. Ku samah ig ay uvitwiy nikwe wixwiy iveg givitit ku ig iki gikiytani uvititwiynek.

²⁸ Nikwe usuh kinetihwene gimin Cristo gitkis madikte hiyeg. Usuh ikene gihiyekemnikis, usuh gikannuhtenkis akak madikte uhiyekemni kahadbe igkis wageswevye kiyavwiyebetnawa, ka kema bakimnima ka hiyak hawkri. Umawkan madikte gihiyekemnikis wadit avigkut ku samah Cristo gihiyekemni.

²⁹ Adahanikwa ini nah kannivwiye. Nah mpiksewnene akak Cristo gannu ay nuvituh, mmanawa, kibeyne, ig iki nannuh kiyesrad.