Joawh 9 - Uhokri Gahegbetawni Nukune akak Sawmus

Jesus makniwa pahavwi motviye

¹ Ayteke ariwnteke ini samdi abet, ig Kiyavwiye Jesus avigku ahin, ig hiyap pahavwi awayg bat ahinmu ig amnihswene gitkis hiyeg. Ig awayg motviye ku samah ig amadgate wayk.

² Igkis gikannuhnivwi hiyapni hene, igkis ayap Kiyavwiye Jesus: — Kiyavwiye, pariye kavatra ner awayg ig amadga wayk motviye? Ba awakutke ginag gutaraksan? Ba awakutke gig gitaraksan? Batke awakutke gidahanwa gitaraksan?

³ Igme kaytwa wown: — Yuma arikna kavatrene. Ine ka ginagma gutaraksan, ine kawnata gigma gitaraksan, ine kawnata gitaraksanma. Ig amadga wayk hene kahadbe hiyeg hiyap Uhokri gannu givitit.

⁴ Ku samah nah ekkene Uhokri gannu, amun ini nah kehne ini gannivwi ku kadahan ig awahkisun atan. Amawka ku wis keh gannivwi kurinewa akak inin mmanawa kuri wis kahawkan. Aysawnemenek wis ka kahawkan akiw.

⁵ Nikwe ku samah nah aynete amadga inin nah kehne ini gannivwi. Nah humaw kewa paha abukribe adahan uguhne madikte hiyeg gihiyekemnikis amadga inin.

⁶ Pisenwa inakni gawnan, ig tuvese waygborit. Ig kehe ibug akak gaybi. Ayge ig manote ner motviye akak ini ibug.

⁷ Pisenwa ig awna git: — Su atak sukuh piwtyak arikut ini un atiy kewye Siloe. Inakni wownavrikwiy “Un Awahkiska kahinahaki arikut atiy”. Ig awayg timapni hene, ig tivik. Ig danuh atere. Ig sukuhe giwtyak. Aynewa ig hiyap. Ayteke nikwe ig tivik.

⁸ Ig tivikwiye, ayge gihumwayevwi gikakkis neras ku pariye gihivetnivwi ku ig motviye igkis hiyavgi atere. Igkis awna: — Ka ba nernema betnene ahinmu ku pariye gibetki amnihswa gitkis hiyeg?

⁹ Gaytakis awna: — Ignewa. Gaytakisme awna: — Ka ignema. Henewatmeki gihivak. Igme ner makniwtinene ariw gimotpen ig awna gitkis: — Nahnewa.

¹⁰ Igkis timapni hene, igkis awna git: — Pariye keh pis hiyap?

¹¹ Igme kaytwa giwnkis: — Pahavwi awayg giw Jesus, ig kehe ibug ig manotevun akak. Ig awna nutuh: “Su atak sukuh piwtyak arikut ini un atiy kewye Siloe.” Nah tivik, nah danuh atere, nah sukuhotaw, nah hiyap.

¹² Igkis timapni hene, igkis awna git: — Kineykig? Igme kaytwa giwnkis: — Nah ka hiyak ku kiney ig.

¹³ Igkis hiyeg timapni hene, igkis waxwevgi tahan gitkis farizewkis.

¹⁴ Mmanawa ig Kiyavwiye Jesus kehe ibug, ig piyihe giwtyak abet samdi.

¹⁵ Igkis danuh atere, igkisme farizewkis hawata ayavgi: — Pariye keh pis hiyap? Igme kaytwa giwnkis: — Pahavwi awayg manotevun akak ibug. Ayteke nah sukuhotaw, nah hiyap.

¹⁶ Gaytakis igkis farizewkis igkis timapni hene, igkis kinetihwa pawtak. Giwnkis: — Ner ku pariye piviyhetni ig ka giwntakma Kiyavwiye Uhokri mmanawa ig ka kiyatha samdi, ig piyihak abet samdi. Gaytakisme awna: — Ku ig taraksevye, kitak ig uti gannu adahan ig keh annut ke inibe? Ayge nikwe neras farizewkis gihiyekemnikis ka patiptak.

¹⁷ Igkis kavusa ayapte ner makniwtinene ariw gimotpen. Igkis ayavgi: — Ya pis? Mmahpa ig pit, ner awayg ku pariye piviyhetni? Igme kaytwa giwnkis: — Nutuh ig Uhokri gawneve.

¹⁸ Ariwnteke ini igkis ka iha giwn ku ig minikwak ig motviye heneme kuri ig hiyap. Ayteke nikwe igkis watihe gig gukak ginag.

¹⁹ Egkisme danuh atere, igkisme ayavgukis: — Mmah ig ner yikamkayh ku kamin yis awna ku ig motviye ku samah ig amadga wayk? Mmah nikwe ig hiyap kuri?

²⁰ Egme ginag gikak gig egkis kaytwa giwnkis: — Usuh hiyak ku ignewa ukamkayh. Usuh hiyak ku ig motviye ku samah ig amadga wayk.

²¹ Heneme usuh ka hiyak ku samah givegven kuri. Usuh ka hiyak ku pariye keh ig hiyap. Ig kiyavwiye kuwis. Ayapnig. Igwa akki yit.

²² Egkis awna inakni hene awaku egkis avise gibohrikis neras judeyenevwi giwewkistenkis. Mmanawa igkis giwewkistenkis kuwis ahegbete ginetnikis adahan givukeptenkis hiyeg arikutak gileglisakis. Giwnkis: “Ku pahavwi kanum Jesus ku ig Uhokri gikanyan adahan ukumaduketniwiy, igi ivukepkanek.”

²³ Inneki keh egkis ayaptase gukamkayhkis gitkis.

²⁴ Igkis farizewkis hiyapni hene, igkis watihevgi akiw. Ig danuh atere, igkis awna git: — Ka ba muwaka kabayha Jesus. Usuh hiyakni ku ig taraksevye. Kabayha Uhokrinen.

²⁵ Igme kaytwa giwnkis: — Nah ka hiyak ba ig taraksevyema, heneme nah akkite yit pahat arikna ku pariye nah hiyak kabayntiwa. Kuhwekwa nah motwiye, heneme kuri kuwis nah hiyap.

²⁶ Igkisme awna git akiw: — Mmahpa ig keh pikak? Mmah aviyhepka piwtyak git?

²⁷ Igme kaytwa giwnkis: — Ayiva nah kuwis akki yit, heneme yis ka timepkere nuwnuh. Mmahki yis muwaka nah akki yit akiw? Mmah yis wageswekerevye gihiyegavu?

²⁸ Igkis timapni hene, igkis mahivwihpig. Igkis awna git: — Pisnewa gihiyega. Usuhme amekene Moís gihiyegavu.

²⁹ Usuh hiyakni ku Kiyavwiye Uhokri kinetihwa gikak amekene Moís. Nerme usuh ka hiyak ku pariyevahki ner hiyeg.

³⁰ Igme ner makniwtinene ariw gimotpen ig kaytwa giwnkis: — Mmah henewatbaki? Yis ka hiyak ku pariyene ig, heneme ig keh nah hiyap!

³¹ Wis hiyakni ku Kiyavwiye Uhokri ka timap pahavwinema taraksevye giviryepkawni. Ig timap giviryepkawni ignenwa pahavwi ku pariye kiyathig ku pariye keh gibetki.

³² Ku samah akavuska hawkri yuma pahavwinema awayg hiya giviyhak pahavwi awayg ku pariye motviye ku samah ig amadga wayk.

³³ Wake ner awayg ka giwntakbe Uhokribe, nikwekam ig ka hiya aviyhakkam nuwtyak adahan keh nah hiyap.

³⁴ Igkisme awna git: — Pis taraksevye ku samah pis amadgat wayk. Pariyenekap pis? Ka pisnema hiya ukannuhka. Su tivik aytaki. Ka ba diyuh atan Uhokri givinekut akiw. Ayge nikwe igkis ivukevgi.

³⁵ Ariwnteke ini ig Kiyavwiye Jesus kinetni ner awayg gak ku samah igkis ivukevgi. Ig timapni hene, ig tivik iwasevgi. Ig danuh atere git, ig awna git: — Ba pis kamaxwa givitit ner ku pariye wageswe awayg amadgaya inin?

³⁶ Igme kaytwa giwn: — Kiyavwiye, uya akki nutuh ku pariyene ig kahadbe nah kamaxwa givitit.

³⁷ Igme Kiyavwiye Jesus awna git: — Ku avim inin pis hiyavgi. Nah ku pariye kinetihwene pikak nahnewa ku pariye wageswe awayg amadgaya inin.

³⁸ Igme kaytwa giwn: — Kiyavwiye, nah kamaxwa pivitit. Aynewa ig paberetusew gitivut, ig kiyathig.

³⁹ Ayteke ariwnteke ini ig Kiyavwiye Jesus awna gitkis hiyeg. Giwn: — Nah ayta atan amadgat inin adahan hiyapkisne ku pariye hiyeg kibeynevwi, akak ku pariye hiyeg kane kibeynevwima. Hiyeg amadgayavu inin igkis ka hiyak ku samah Uhokri gihiyekemni. Nah ayta adahan nah kehne igkis hiyakni. In ke wotbe nah kehnebe motavye hiyap. Gaytakisme hiyeg ikaw ke wotbe igkis kuwis hiyakbe ku samah Uhokri gihiyekemni. Nah ayta adahan nah ahiyaksetni gitkis ku igkis ka hiyaknima igkis ke motavyebe abet gihiyekemnikis.

⁴⁰ Gaytakis farizewkis timapni hene, igkis awna git: — Mmah pis ikiy usuh hawata ke motviyebe abet uhiyakemn? Kawa. Usuh hiyak Uhokri gihiyekemni kabayntiwa.

⁴¹ Ig timapni hene, ig awna gitkis: — Wake yis ikaw ke motavyebe abet yihiyekemni, wake yis mpiksewne aharit Uhokri gihiyekemni, nikwekam yuma yitaraksankam. Heneme yis ikewne ke wotbe yis hiyepnevwi kuwisbe. Yis ka mpiksaw aharit Uhokri gihiyekemni akiw. Nikwe yis yidukwenewa akak madikte yitaraksan.