Joawh 6 - Uhokri Gahegbetawni Nukune akak Sawmus

Jesus iki im gitkis hiyeg

¹ Ariwnteke ini ig Kiyavwiye Jesus tivik manuke mahakwa Galileya. In hawata kewye mahakwa Tiberiyadis.

² Ig manuke mahakwa, pahabu hiyeg mpiye akigbimnew mahakwa adahan igkis giharaksetni bute. Igkis atekere gihapti awaku igkis hiyap madikte gannu ku samah ig makniwe hiyeg.

³ Igme igkit danuh giwkis. Ig wagehe avitit paha waxri imuwadnene. Ayge ig batahkiswe. Igkisme gikannuhnivwi batabdawak** ayge gikak.

⁴ Kaba danuh ahawkanavrik adahan hiyeg judeyenevwi gifetrakis adahan igkis axne muwtohyan arih. Igkis axni adahan kiyene ku samah minikwak Kiyavwiye Uhokri umahkise muwtohyan gidukwenavrikkis amekenegben adahan ig giwiwhkiswitnikis giwakutakis hiyeg ejituyenevwi.

⁵ Ku samah ig Kiyavwiye Jesus betnene ayge, ig sarayh givegi warikwit. Ig hiyap neras pahabunene hiyeg kuruw gimkanit. Ig hiyapni hene, ig awna git Filip: — Kit wixwiy isim im adahan gaxnikis?

⁶ Ig awna inakni hene git adahan gihikekten. Ig kuwis hiyak ku pariye ig keh.

⁷ Igme Filip kaytwa giwn: — Amawka wixwiy sarayh ka aynsima karukri mpiy pimavut madikawku madikwa (200) karukri. Metakwa nikwe igkis muwavwite ax aritnanyumni ariwntak.

⁸ Igme pahavwi gaytakis gikannuhnivwi kewye Andre, ku pariye Simawh Pedru gisamwi, ig timapni hene, ig awna git Kiyavwiye Jesus:

⁹ — Ay pahavwi bakimni ay in. Ig kadahan pohowku akebi bugut kehka akak fahhin kewye “sevada”. Hawata ig kadahan piyana akebi im nopsanyovwi masaraku. Heneme in ka ariknawnema gitkis awaku ka aynsima hiyeg.

¹⁰ Igme Kiyavwiye Jesus awna gitkis: — Wani neras hiyeg batahkiswa. Ayge barewye amatap adahan igkis batenne atere. Igkis hiyeg hiyapni hene, igkis batahkiswebdi atere. Igkis ka aynsima hiyeg. Awaykemninen pukuhka kaba danuh pohowku mil gikebikis (5.000).

¹¹ Ayteke nikwe ig Kiyavwiye Jesus iwe ini bakimni gibuguta. Ig kabayha Kiyavwiye Uhokri adahan ini bugut. Ayteke ig ibekhepni givuwiwkis gikannuhnivwi. Igkisme ibekhepni givuwiwkis neras batebdebdihpiye. Ku samah ig keh akak bugut ig keh hawata akak im. Ig ibakhasepni. Igkisme hiyeg kidis ku samah gimawkankis niwntak.

¹² Igkis ax kabihribdave. Ig Kiyavwiye Jesus hiyapni hene, ig awna gitkis: — Ahiwvinay gimanakis asemne adahan yuma aynesnima biyukne.

¹³ Igkisme ahiwavepni. Igkis kivunse ka aynsima panye, madikawku akebi akak pisaya arawna (12) akak ini pohowkunene bugut asemne.

¹⁴ Neras hiyeg hiyapni hene ku Kiyavwiye Jesus kehe ini annut giwtrikkis, igkis awna: — Oo! Ner igyewa Uhokri gawneve ku kamin amekene Moís kinetihwa minikwak, ku ig aytanek amadgat inin.

¹⁵ Igkis givewkankis mpiksaptihpig adahan ig humaw gikivarakis. Igme Kiyavwiye Jesus hiyapni hene, ig tivik giwkis. Ig manuke avitit paha waxri imuwadnene akiw, ig pahavo.

Jesus wew ahakwew un

¹⁶ Aygete kuwis, gikannuhnivwi muhuke tahan akigbimnat mahakwa.

¹⁷ Igkis awna: — Kuwis aygete. Uyay diyuhe pahabakat avitit paytwempu Kafarnawh. — Uyay. Ayge igkis katapte amadgat gihmunkis. Misanpi gawkis, ig Kiyavwiye Jesus kote danuhte gitkis. Igkis hiyapni hene, igkis tivik.

¹⁸ Pahaye adahan mayg kamayghew. In kannikase paraw.

¹⁹ Igkis puwehnene ativut bobo piyawakad adahan pimavut madikawku madikwa (200) iwanti aviyukan. Pahaye adahan igkis hiyap Kiyavwiye Jesus waywe ahakwew un. Igkis ka hiyakgi ku pariyene ig. Ig aytweni kennesa arimkat gihmunkis. Igkis hiyapni hene, igkis avisasewbet gibohri.

²⁰ Igme awna gitkis: — Nahnewa ay. Ka yi muwaka avis.

²¹ Igkis timapni inakni giwn hene, igkis batek ka aynsima. Igkis amavig amadgat wahmun. Aynewa igkis danuh atere ku kit umawkan.

Hiyeg ivegva Jesus

²² Hewke akiw ka aynsima hiyeg misekwevye aynte pahabak. Igkis hiyakni ku amaka pahamkuwa umuh ayge. Igkis hiyap gikannuhnivwi tivikwiye gumadga nore umuh, igme Kiyavwiye Jesus ka atak gihaptikis. Nikwe givewkankiskam ku Kiyavwiye Jesus misekwe ayge gimunkis. Bawa kawa. Ig ayge gikakkis gikannuhnivwi.

²³ Ayteke nawenyevwi hiyeg danuh atere pahabakat amadga gihmunkis. Igkis ariwntak paytwempu Tiberiyades. Igkis danuh atere ku kiney amaka Kiyavwiye Jesus keh annut ig kabayha Kiyavwiye Uhokri adahan gimanakis, madikte hiyeg axnekuye niwntak.

²⁴ Neras hiyeg aygnenevwi hiyapni hene ku Kiyavwiye Jesus yuma ayge akiw, ine gikannuhnivwi yumahwata ayge, igkis awna: — Kibeyne. Ay nawenyewa umuh akiw. Uyay ivegve Kiyavwiye Jesus tahan pahabakat avitit paytwempu Kafarnawh. — Uyay. Igkis katapte amadgat gihmunkis neras hiyeg danuhpenevwi.

²⁵ Igkis manuke mahakwa. Igkis danuh atere avitit Kafarnawh. Ayge igkis ute Kiyavwiye Jesus. Igkis awna git: — Kiyavwiye, aysawneki pis danuhe atan? Usuh ivegvep muwapuw.

²⁶ Igme awna gitkis: — Yis ka ivegvan awakuma nannuh keh yis hiyak ku pariyene nah. Kawa. Yis ivegvan ininewa awaku ku samah yis axe yimana kabiha. Ini yis aharit akiw.

Jesus kewa umanabe ku pariye keh wis aymuhwa adahan avanenekwa

²⁷ Ayteke ig awna gitkis akiw: — Ka yi muwaka mpiksaw aharit yimana ku pariye kane dehwevyema yimun. Mpiksawnay aharit ini yimana ku pariye dehwevye adahan avanenekwa, ku pariye keh yis aymuhwa adahan avanenekwa. Nah, ku pariye wageswe awayg amadgaya inin, nahnewa iki yit akebi ini yimana. Kuwis Niguh Uhokri ekke ku ig awahkisun adahanikwa ini.

²⁸ Igkis hiyeg timapni hene, igkis awna git: — Mmahpa usuh keh nikwe adahan usuh kehne Kiyavwiye Uhokri gibetki?

²⁹ Igme Kiyavwiye Jesus kaytwa giwnkis: — Nah akkite yit ku pariye Uhokri gibetki. Gibetki ini adahan yis kamaxwa nuvitit nah gawahkisni.

³⁰ Igkisme awna git: — Akkanaba pannu wotuh akiw adahan areketni pidatni wotuh adahan usuh kamaxwa pivitit. Ba pis ik adahan pis keh pahat annut ke amekene Moísbe?

³¹ Minikwak amekenegben ax gimanakis kewye “maná” aynte amadga amatap. Uhokri gannasan awna: — Ig iki gitkis gimanakis ayta inutak. Ba ik adahan pis hawata iki wotuh umana ayta inutak?

³² Igme Kiyavwiye Jesus kaytwa giwnkis: — Ka ignema amekene Moís iki ini gimanakis inutak. Ig Niguh ignewa ikepni gitkis. Kurime ig akaka yit yimana ku pariye inyewa inuriktak. Henewatbaki ig iki.

³³ Ini yimana giwntekne Uhokri in ayta inuriktak adahan hiyeg amedgenevwi inin aymuhwa adahan avanenekwa.

³⁴ Igkisme kaytwa giwn: — Kiyavwiye, iknaba wotuh akebi ini umana takunipti.

³⁵ Igme Kiyavwiye Jesus kaytwa giwnkis: — Nahnewa yimana ku pariye keh yis aymuhwa adahan avanenekwa. Ku pahavwi amavan, igi bateknek ke pahavwibe ku pariye ax kabiha. Ig ka mativwati abet gihiyekemni akiw. Ku pahavwi kamaxwa nuvitit, ig ka arabyuti abet gihiyekemni akiw.

³⁶ Henewa in ku samah nah awna: “Yis kuwis hiyavun heneme yidukwenewa yis kote kamaxwate nuvitit.”

³⁷ Ignesme ku pariye Uhokri gikan nutuh igkis kamaxwa nuvititnek. Igkis ku pariye kamaxwevwi nuvitit nah ka tukuhgikisnek aynesnima.

³⁸ Nah ayta atan inuriktak ka adahanma kehnema nubetki, heneme adahan nah kehne nawahkisten gibetki.

³⁹ Nah akkite yit ku pariye nawahkisten gibetki. Ini gibetki adahan nah ka biyuksa pahavwinema ku pariye gikan nutuh, heneme adahan nah gikannikasetnikis madikte amaksemni hawkrinek.

⁴⁰ Ini gibetki adahan ku pariye hiyeg iveg numkat ignes kamaxwevye nuvitit nah gikamkayh, igkis aymuhwa gimun Uhokri adahan avanenekwa. Ini gibetki adahan nah gikannikasetnikis amaksemni hawkrinek.

⁴¹ Igkis judeyenevwi giwewkistenkis timapni hene, igkis minimnihekbet pawtak gimin Kiyavwiye Jesus mmanawa ig ikewne ku ignewa umana inuriktekne.

⁴² Igkis awna: — Mmahki ig awna inakni iwit hene? Ig ikawvari ku ig inurikyene. Ka ba pis hiyap ku ner he amekene Josenen gikamkayh? Usuh hiyak gig gukak ginag. Ig ka inurikyenema.

⁴³ Ig Kiyavwiye Jesus hiyapni hene, ig awna gitkis: — Ka ba yi minimnihak pawtak hene numinuh.

⁴⁴ Ka ik adahan pahavwinema hiyeg kamaxwa nuvitit ku ka ignema Niguh nawahkisten kinistig nudahan. Ku pahavwi timap giwn, ku ig kamaxwa nuvitit, nikwe nah kannikasig amaksemni hawkrinek.

⁴⁵ In hawata ku samah Uhokri gawnevevu pitatyevwi giwnkis. Igkis awna: “Igwa Kiyavwiye Uhokri humaw gikannuhtenkis madikte hiyeg.” Madikte hiyeg ku pariye timap Niguh giwn ku pariye iha inakni giwn, igkisnewa ku pariye kamaxwenevwi nuvitit.

⁴⁶ Hiyeg amadgayavu inin ka hiyapti Niguh. Nahnewa gihivetni mmanawa nah ayta giwntak.

⁴⁷ Ku pahavwi kamaxwa nuvitit, nikwe ig aymuhwa gimun Uhokri adahan avanenekwa.

⁴⁸ Nahnewa yimana ku pariye inyewa keh yis aymuhwa. Ihanabay inakni nuwnuh. Henewatbaki nah.

⁴⁹ Minikwak yahawkrivwi amekenegben ax nor gimanakis kewye “maná” aynte amadga amatap. Heneme igkis ka aymuhwa adahan avanenekwatma. Ariwnteke ini igkis miyarap.

⁵⁰ Nahme kinetihwa amin nawenyewa yimana ariw ignes gimanakis. Ini yimana inuriktekne. Ku pahavwi ax ariwntak ini gimana, ig ka miya adahan avanenekwatma.

⁵¹ Nahnewa ini yimana inuriktekne ku pariye inyewa keh hiyeg aymuhwa. Ku pahavwi ax nuwntak, ig aymuhwa gimun Uhokri adahan avanenekwa. Ini yimana ku pariye nah akki yit, innebaki nihuh ku pariye nah sigkebdihkisnek gidahankis madikte hiyeg amedgenevwi inin kahadbe ignes aymuhwa gimun Uhokri adahan avanenekwa. Henewatbaki ig Kiyavwiye Jesus awna.

⁵² Igkis judeyenevwi giwewkistenkis timapni hene, igkis awnebdi pawtak akak gihawnakis. Igkis awna: — Mmah akaka wotwiy gih adahan wixwiy ax?

⁵³ Ig Kiyavwiye Jesus hiyapni hene, ig awna gitkis: — Ku yis ka ax nihuh, nah ku pariye wageswe awayg amadgaya inin, ku yis kawnata higap numiguh, nikwe yis ka aymuhwa gimun Uhokri. Ihanabay inakni nuwnuh. Henewatbaki in.

⁵⁴ Henneme ku pahavwi ax nihuh, ku ig higap numiguh, igi aymuhwanek gimun Uhokri adahan avanenekwa. Nahme kannikasig amaksemni hawkrinek.

⁵⁵ Nihuh inyewa keh hiyeg aymuhwa. Numiguh hawata keh hiyeg aymuhwa akiw.

⁵⁶ Ku pahavwi ax nihuh, ku ig higap numiguh, amun ini nikwe igi humaw pahavwiwa nukakuh. Ig ay nuvituh. Nahme ay givit.

⁵⁷ Niguh ku pariye nawahkisten ig dehetniki akivara adahan avanenekwa. Nah uti nudehetni giwntak. Hawata ku pahavwi ax nuwntak, ig uti gidehetni nuwntak.

⁵⁸ Inneki keh nah awna yit ku nahnewa yimana inuriktekne. Nah ka kema neras amekenegbenma gimanakis ku pariye igkis ax heneme igkis miyarap. Ku pahavwi ax nuwntak, ig aymuhwa adahan avanenekwa.

⁵⁹ Inakni iwit ig Kiyavwiye Jesus awna ariku judeyenevwi gileglisakis ayge Kafarnawh.

Ka aynsima hiyeg miniwvi giw Jesus

⁶⁰ Ka aynsima gaytakis neras timepnevwi Kiyavwiye Jesus giwn igkis timapni inakni giwn hene, igkis awna: — Inakni giwn mahiko. Mmahpaki wis pukuhpin?

⁶¹ Ig Kiyavwiye Jesus kateksan avit giyakni ku samah igkis minimnihekbet hene. Ig hiyapni hene, ig awna gitkis: — Mmah inakni nuwnuh mmah in mahiko yit?

⁶² Henneme aysawnemenek in ka mahiko yit akiwnek. Ku aysaw yis hiyavun Nah, ku pariye wageswe awayg amadgaya inin, nah diyuhe inurikut akiw, avim ini in ka mahiko yit.

⁶³ Ku wis ax ihti, ka innema keh wis aymuhwa adahan avanenekwa. Ignewa Uhokri Gitip ay uvit, ignewa ku pariye keh wis aymuhwa gimun Uhokri adahan avanenekwa. Kaksa nah awna yit patuwesbunka iwit giwntak Uhokri Gitip. Ku yis iha inakni nuwnuh, in keh yis aymuhwa adahan avanenekwa.

⁶⁴ Yaytakme ka iha nuwnuh. Ig Kiyavwiye Jesus awna inakni hene, mmanawa ayipa ig hiyakni kuwis ku pariye hiyeg ka ihpa giwn. Ig hawata hiyak ku pariye gikamaykiswitni gitkis givetunyavu.

⁶⁵ Nikwe ig awna: — Ignewa Uhokri Gitip ku pariye keh wis aymuhwa gimun Uhokri adahan avanenekwa. Inneki keh nah awna yit kaksa: “Ka ik adahan pahavwinema hiyeg kamaxwa nuvitit ku ka ignema Niguh kinistig nudahan.”

⁶⁶ Avim ini ka aynsima gikannuhnivwi awna: — Inakni giwn amin axne gih, inakni mahiko adahan wis pukuhpin. Ayge nikwe igkis tivik giw. Igkis ka wew gikak akiw.

Jesus gikannuhnivwi ka miniw giw

⁶⁷ Ayteke ig Kiyavwiye Jesus hiyapni hene, ig awna gitkis gikannuhnivwi madikawkunene gikebikis akak piyananene gawnakis (12). Giwn: — Mmah yis hawata tivikere nuwhu?

⁶⁸ Igme Simawh Pedru kaytwa giwn: — Kiyavwiye, karimkanitva usuh tiviknek? Pisnewa awna iwit ku pariye akki wotuh adahan ku samah usuh aymuhwa gimun Kiyavwiye Uhokri adahan avanenekwa.

⁶⁹ Usuh kamaxwa pivitit. Usuh hiyak ku pis Uhokri giwatni barewvitye.

⁷⁰ Igme Kiyavwiye Jesus awna gitkis: — Nah kaniye yis madikawkunene yikebi akak piyana yawna (12) adahan yis wewne nukakuh. Heneme ay pahavwi yaytak ig wavitye ay givit.

⁷¹ Ig awna inakni gimin Judas Iskariyotismin, ku pariye amekene Simawh gikamkayh. Mmanawa ig Judas Iskariyotismin gaytakis neras madikawkunene gikebikis gikakkis piyananene gawnakis (12) heneme ig gikamaykiswitninek Kiyavwiye Jesus gitkis givetunyavu.