Joawh 4 - Uhokri Gahegbetawni Nukune akak Sawmus

Tino samariyano wages guhiyekemni

¹ Avim ini neras farizewkis kinetni Kiyavwiye Jesus gak ku ig kaywa hiyeg kibite giw Joawh Batista. Igkis kinetni arak ku kibite hiyeg wageswevye gikannuhnivwi Kiyavwiye Jesus.

² Bawa ka ignema Kiyavwiye Jesus kaywene hiyeg, heneme igkis gikannuhnivwi gikaywetkis.

³ Ig Kiyavwiye Jesus time gakkis neras farizewkis ku igkis kinetni gak hene. Ayge nikwe ig pese avititak judeyamnaw. Ig tivik avitit Galileyamnaw. Igkis gikannuhnivwi tivik gihapti.

⁴ Avim ini amawka ku ig mpiya avitiw Samariyamnaw.

⁵ Igkis ayge Samariyamnaw, ig danuh avitit paha paytwempu kewye Sikar kennesa arimkat amekene Jakó giwaxig. Minikwak ig amekene Jakó ikepni git gikamkayh amekene José.

⁶ Amekene Jakó giwnpina ayge. Ig Kiyavwiye Jesus mabe awaku giwewni piyawakad. Nikwe ig batahkiswe aranwa ini unihmna.

⁷ Igkisme gikannuhnivwi tivik paytwempuwit adahan isimwiye gimanakis. Igme Kiyavwiye Jesus misekwe ayge.

⁸ Puwipka abet pahavu tino samariyano danuh atere kavukno guwnra. Ig Kiyavwiye Jesus hiyapni hene, ig awna gut: — Uya amnih ikavun akak un.

⁹ Egme kaytwa giwn: — Mmahki pis awna nukakuh? Pis judeyene. Hiyeg judeyenevwi gikakkis hiyeg samariyenevwi igkis ka awnakti pawtak.

¹⁰ Igme kaytwa guwn: — Wake pis hiyakbe ku pariye Kiyavwiye Uhokri ik adahan iki pit, wake pis hiyakbe ku pariyene nah, nikwekam pis makahpawkam un nutuh. Nahme ikkam pit un ku pariye keh pis aymuhwa adahan avanenekwa.

¹¹ Egme nor tino awna git: — Kiyavwiye, pis yuma ariknawnema ay piwaku adahan pis kavukne piwnra. Inin unihmna mihad in. Nikwe mmah awitwak pit ini un ku pariye keh wis aymuhwa adahan avanenekwa?

¹² Mmah pis ik adahan iki nutuh un ku pariye pi kabayte ariw uhawkriwiy amekene Jakó gidahan? Mmah pis pi kiyate giw? Mmanawa igwa amekene Jakó ike wotuh inin unihmna. Igwa higap niwntak payak gikakkis gikamkayuvwi made akak givigvu.

¹³ Igme Kiyavwiye Jesus kaytwa guwn: — Ku pahavwi higap inin un, kuwewa ig arabyu un akiwnek.

¹⁴ Henneme ku pahavwi higap un nuwntak, igi ka arabyuti un akiw. Ini un nuwntak humaw ke un ariwtyakbe kane makarati in padeknenekwa dehetniki adahan avanenekwa.

¹⁵ Egme nor tino kaytwa giwn: — Kiyavwiye, uya iki nutuh ariwntak ini piwnra adahan nah ka arabyu un akiw, adahan nah ka diyudyuka kavukanga akiw.

¹⁶ Igme awna gut: — Su atak iwa pigihgi ayta.

¹⁷ Egme kaytwa giwn: — Nah yuma nugihgi. Igme Kiyavwiye Jesus awna: — Piwnavriknawa ku samah pis awna. Pis yuma pigihgi.

¹⁸ Mmanawa ayipa pohowku gikebikis pigihgiwenevwi kuwis. Igme ner pahavwinene ku kakak pis ay kuri, ig ka pigihgima. Henewa piwnavriknawa.

¹⁹ Egme kaytwa giwn: — Kiyavwiye, kuri nah hiyakpi ku pis Uhokri gawneve.

²⁰ Uya akki nutuh nikwe adahan ku kiney wixwiy kiye Kiyavwiye Uhokri. Madikte amekenegben samariyenevwi igkis kiye Kiyavwiye Uhokri ay avit inin waxri. Yisme yis hiyeg judeyenevwi yis awna ku amawka hiyeg kiye Kiyavwiye Uhokri aynte avit paytwempu Jerusalém. Pariye pivewkan? Pariye Kiyavwiye Uhokri akki pit adahan ku kiney wixwiy kiyegi?

²¹ Igme kaytwa guwn: — Kiyavuno, ihanaba nuwnuh kuri nah awna pit. Aysawnemenek yis ka kiye Wigwiy aywonema avit inin waxri, ine aynte Jerusalém.

²² Yis hiyeg samariyenevwi yis kiye Kiyavwiye Uhokri kuri heneme yis ka hiyakgi ku pariyene ig. Usuhme hiyeg judeyenevwi usuh hiyaknig ku pariyene ig. Mmanawa ner ku pariye ayta gamnihtenkis madikte hiyeg ig ayta gibetitakis hiyeg judeyenevwi.

²³ Henneme aysawnemenek, inyewa in kuwis danuh, madikte hiyeg ku pariye inyewa kiye Wigwiy, ignes kiyeginek ay abet gihiyekemnikis. Ayge iwetrit adahan ku kiney wis inyewa kiyene Wigwiy. Hene Wigwiy gimawkan adahan wis kiyegi.

²⁴ Mmanawa ig Kiyavwiye Uhokri yuma givit kema hiyegma amadgaya inin adahan ig misakwa amun pahayriknenema iwetrit. Ku pariye hiyeg kiyenevwi Kiyavwiye Uhokri amawka ignes kiyegi ay abet gihiyekemnikis. Amawka igkis kiyegi inyewa.

²⁵ Egme tino kaytwa giwn: — Nah hiyakni ku Uhokri gikanyan adahan ukumaduketniwiy, ig Cristo, ig danuh atanek. Ayge nikwe ig akkamnih madikte wotwiynek.

²⁶ Igme Kiyavwiye Jesus kaytwa guwn: — Nahnewa ku pariye kinetihwene pikak ay kuri, nahnewa Cristo. Henewatbaki ig Kiyavwiye Jesus awna gut.

²⁷ Ayteke nikwe, igkis gikannuhnivwi danuh atere. Igkis wakaymnibdi ku samah ig awna gukak pahavu tino ku pariye samariyano. Heneme igkis marenpi gibohri adahan igkis ayavgi amin ku pariye gimawkan gut. Nikwe igkis ka ayavgi mmahki ig kinetihwa gukak.

²⁸ Ayteke eg tino ikise gunratiy ayge, eg sigise ta paytwempuwit. Eg danuh atere, eg awna gitkis hiyeg aygnenevwi:

²⁹ — Ba yi ayta iwasa pahavwi awayg ay. Ig akkamnihe nutuh madikte ku pariye nukehnitnene. Mmah kawki nernema Uhokri gikanyan adahan ukumaduketniwiy?

³⁰ Igkis timapni hene, igkis pese paytwempuritak. Igkis tivik gimkanit Kiyavwiye Jesus.

Jesus kehne Uhokri gannivwi, in kewa gimanabe git

³¹ Avimwata ini igkis gikannuhnivwi awna git Kiyavwiye Jesus: — Kiyavwiye, ahah pimana. Uyay ax.

³² Igme awna gitkis: — Nah kadahan numana ku pariye yis kane hiyak.

³³ Igkis timapni hene, igkisweke kinetihwa pawtak: — Mmah nawenyewatma hiyeg kuwis ewke gimana git?

³⁴ Igme awna gitkis: — Nah kehne nawahkisten gibetki, ini iki nawaygi ke numanabe. Nah kehne gannivwi, in humaw ke numanabe nutuh.

Hiyeg kewa wasbe ivatrik

³⁵ Ayteke ig awna akiw. Giwn: — Ta yit muwaka paxnika kayg adahan tariswiki was. Heneme nutuh ka henema. Araytak ayiva ahegbet kuwis. Sarayhnay yivegyi gimkatkis neras samariyenevwi aytniyevwi. Igkis kuwis ahegbet adahan kamaxwevye nuvitit. Nutuh igkis kewa pahak wasbe ku pariye ivatrik ahegbet adahan tariswiki. Kuwis Kiyavwiye Uhokri giwn ke wotbe in mutuhkabe ay gibetkis. Kuri muwaka hiyeg kene tarisnevwibe. Ku pahavwi ekkene gitkis hiyeg adahan ku samah igkis kamaxwa nuvitit ig ke wotbe tarisnebe hiyeg nudahan.

³⁶ Ku pahavwi hiyeg wagesne hiyeg hene nudahan, igi katiwnihkanek. Hawata neras hiyeg ku pariye kamaxwevye nuvitit igkis aymuhwanek gimun Kiyavwiye Uhokri adahan avanenekwa. Ayge nikwe ig ner pahavwi bateke ginaktinek payak gikakkis madikte neras ku pariyekit kinetihwa numinuh gitkis.

³⁷ Hiyeg gibetkikis awna: “Mpuse wannivwiy. Pahavwi gannivwi adahan mutuhne was, pahavwime gannivwi adahan tarisne was.” Inakni iwit hawata kawih yidahan.

³⁸ Nah kuwis awahkisyi adahan yis wagesne hiyeg nudahan. Heneme ka yisnema ku pariye ahegbete gihiyekemnikis adahan igkis kamaxwa nuvitit. Inere nawenyevwi hiyeg gannivwikis. In Uhokri gawnevevu pitatyevwi gannivwikis. Minikwak igkis kinetihwa gitkis hiyeg numinuh. Kuri yisme akki gitkis adahan ku samah igkis kamaxwa nuvitit. Yisme ke pahavwibe ku pariye tariswiye pahak was ku pariye nawenyewa hiyeg gamuthan. Henewatbaki ig Kiyavwiye Jesus awna.

Samariyenevwi wages gihiyekemnikis

³⁹ Ayiva kuwis ka aynsima neras samariyenevwi paytwempuyenevwi igkis ihe ku Kiyavwiye Jesus ig Uhokri gikanyan adahan ukumaduketniwiy. Igkis ihe guwn nor tino ku pariye awna gitkis: “Ig akkamnihe nutuh madikte ku pariye nukehnitnene.”

⁴⁰ Ayteke nikwe igkis danuh atere git Kiyavwiye Jesus, igkis awna git: — Kiyavwiye, uya misakwa ay umunuh aynesa hawkri. Igme kaytwa giwnkis: — Ihkata nikwe. Ig tivik gihaptikis, ig misekwe ayge gimunkis adahan pina hawkri.

⁴¹ Ayge nikwe ka aynsima hiyeg akiw kamaxwevye givitit Kiyavwiye Jesus awaku ku samah igkis timap giwn.

⁴² Avim ini igkis awna gut nor tino: — Kuri usuh kamaxwa givitit Kiyavwiye Jesus. Ka ininewatma awaku ku samah pis kinetihwa gimin, heneme awaku ku samah usuhwa timap giwn ku samah ig awna. Kuri usuh hiyakni ku ig igyewa wamnihtenwiy, ig keh madikte hiyeg isahptawnek.

Jesus makniwa pahavwi bakimni akak gibiynen

⁴³ Ariwnteke ini pinenene hawkri ig Kiyavwiye Jesus pese ayteke. Ig tivik avitit Galileyamnaw. Heneme ig ka atak avitit giwaxigwa Nazaré.

⁴⁴ Mmanawa ig Kiyavwiye Jesus gibetki awna: — Yuma pahavwinema Uhokri gawneve kiyathaka gavitkis hiyegviyene ku pariye avitya giwaxigwa. Henewa in danuh ku samah inakni giwn.

⁴⁵ Ig danuh atere avitit Galileyamnaw, igkis galileyenevwi ayge amavig kabayntiwa. Igkis amavig awaku ku samah igkis hiyap madikte gannu ku pariye ig keh abet fet aynte paytwempu Jerusalém. Mmanawa igkis hawata igkis fetya ayge.

⁴⁶ Ayteke ariwnteke ini ig diyuhe avitit paytwempu Kana ku kiney amakohnokwa ig wagese un win. Kennesa arimkat Kana paha paytwempu akiw kewye Kafarnawh. Ayge pahavwi awayg ku pariye kannivwiye gimun pahavwi hiyaptigi. Ig ner awayg gikamkayh ka aynsima ig kakahrip.

⁴⁷ Ig awayg kinetni Kiyavwiye Jesus gak ku ig ayta judeyamnawtak avitit Galileyamnaw. Ig timapni hene, ig tivik atere gimkat Kiyavwiye Jesus. Ig danuh atere, ig awna git: — Kiyavwiye, uya amnihun. Uya atak nuhapti nuvinwat adahan pis piyih nukamkayh. Ig me miyapmet.

⁴⁸ Igme Kiyavwiye Jesus awna: — Mmah avit yis hiyeg iha nuwnuh, mmah amawka nah kehnete annut?

⁴⁹ Igme awayg kaytwa giwn: — Kiyavwiye, nah kuwis iha piw, heneme nahnewa awnasap adahan pis atak nuvinwat marihwa nukamkayh ka miya.

⁵⁰ Igme Kiyavwiye Jesus kaytwa giwn: — Ka sam. Nah kuwis piyihpig. Ig pikamkayh makniw ig. Hiyawa pis diyuhe pivinwat. Ig awayg timapni hene, ig kamaxwa avitit inakni giwn. Ig diyuhe givinwat.

⁵¹ Hewke akiw ig kaba danuh givinwat, ig patipteke gikakkis gihiyegavu. Igkisme awna git: — Kiyavwiye, ig pikamkayh kuwis makniw.

⁵² Igme awna gitkis: — Kiney kamuw ig makniw? Igkisme kaytwa giwn: — Amaka, daraka kamuw ig unirpu.

⁵³ Ig awayg timapni hene, ig awna: — Nukamkayh kannikaw pakeku akak ku samah Kiyavwiye Jesus awna nutuh: “Pikamkayh makniw ig”. Ig hiyapni hene, ig kamaxwe givitit Kiyavwiye Jesus. Gimunyavu hawata kamaxwe givitit.

⁵⁴ Ini aveynivye annut Kiyavwiye Jesus keh aynte avit Galileyamnaw ku samah gidawnhan avititak judeyamnaw.