Joawh 17 - Uhokri Gahegbetawni Nukune akak Sawmus

Jesus piriyepkaw gidahanwa

¹ Pisenwa gawnan inakni iwit ig Kiyavwiye Jesus sarayh givegi inut. Ig awna: — Pa, kuwis nuhawkanavrik danuh. Kiyathasanaba pikamkayh marihwa pikamkayh kiyathasap hawata. Ininewa ku samah pis kannikasan, pis iwevun ta pimkanit akiw ininewa kiyathasan.

² Kibeyne, pis ike nutuh nudatni adahan nah kumadukene madikte hiyeg amadgayavu inin. Ayge nikwe nah keh nuhiyegavu, neras ku pariye pikan nutuh, igkis aymuhwa pimun adahan avanenekwa.

³ Pisnewa igyewatnene Uhokri. Yuma pahavwinema kema pisma. Nahme pawahkisni Jesus Cristo. Ini ku samah igkis hiyakpi ini ku samah igkis hiyakun, innewa ku pariye keh igkis aymuhwa pimun adahan avanenekwa.

⁴ Pa, kuwis nah kiyathasap ay amadga inin. Nah kuwis pisenwa akak pannivwi madikte ku pariye pikehkisni nutuh.

⁵ Kuri Pa, hiyawa pis iwevun ta pimkanit akiw. Uya kiyathasan ayge pimun hawata ku samah wis kiyathaka ayge minikwak avit hawkri humaw.

Jesus piriyepkaw gidahankis giwatnivwi

⁶ Nah kuwis akkap ku samah pihiyekemni gitkis nukannuhnivwi ku pariye pikan nutuh amadga inin. Igkis pidahan pisme ikevgikis nutuh. Igkisme kuwis iheiha piwn.

⁷ Kuri igkis hiyakni ku madikte ku pariye nah keh, nah keh piwntak.

⁸ Mmanawa nah kuwis akki gitkis madikte iwit ku pariye pakkan nutuh. Igkisme ihpin. Igkis hiyakni ku nah inyewa piwntekne. Igkis iha ku pisnewa nawahkisten.

⁹ Nah piriyepkaw gidahankis. Nah piriyepkaw kuri ka gidahankisma hiyeg ku pariye kane Uhokriyanvuma. Nah piriyepkaw gidahankis neras ku pariye pikan nutuh. Mmanawa igkis pidahanwa pihiyegavu.

¹⁰ Madikte ku pariye nudahan ignes pidahanwata. Madikte ku pariye pidahan ignes nudahanwata. Nah kiyathaka awaku ku samah igkis nudahan.

¹¹ Kuri nah ka misakwa ay amadga inin akiw. Nah tivikwiye pimkanit. Igkisme misekwe ay amadga inin. Pa barewvitye, uya avuriwgikis nudahan akak madikte pannu ku pariye pis kuwis iki nuvitit. Igkisnewa pikan nutuh. Avuriwnigkis kahadbe igkis pahavwiwa pawtak hawata ke wisbe.

¹² Ku samah nah aynete gikakkis ay amadga inin, nahnewa avuriwgikis akak ini pannu. Nah avuriw madikte nukannuhnivwi ku pariye pikan nutuh. Yuma pahavwinema biyukne piw. Ignewa Judas Iskariyotismin ku pariye ikaksaka adahanikwa biyukwiki igi biyukenek kahadbe in kahayak ku samah pannasan awna.

¹³ Kuri nah tivikwiye pimkanit. Ku samah nah ay amadga inin nah kuwis ekke inakni pinetni gitkis nuhiyegavu kahadbe igkis misakwa batek ginaktinkis hawata ke nahbe.

¹⁴ Nah kuwis ekke piwn gitkis kahadbe igkis kannuh wew akak pihiyekemni. Ayge nikwe neras kane Uhokriyanvuma amedgenevwi inin igkis ka batek gikakkis. Mmanawa gihiyekemnikis ka patiptak gikakkis hawata ku samah uhiyekemni ka patiptak gikakkis.

¹⁵ Pa, nah ka piriyepkaw adahan pis giweptenkisma amadgatak inin. Heneme nah piriyepkaw adahan pis gikavriwtenkis adahan igkis ka isaksaw arit mbayka.

¹⁶ Gihiyekemnikis ka patiptak gikakkis hiyeg kane Uhokriyanvuma amedgenevwi inin hawata ku samah uhiyekemni ka patiptak gikakkis.

¹⁷ Uya barewbetha gihiyekemnikis akak hiyakemniki ku pariye inyewatnene. Ini piwn innewa hiyakemniki ku pariye inyewatnene.

¹⁸ Ku samah pis awahkiswen atan amadgat inin nahme kuri awahkiswigkis hawata muwapuw amadga inin adahan igkis ekkenes pihiyekemni gitkis hiyeg.

¹⁹ Nah ikaw pit adahan nah kehne pibetki kahadbe igkisme hawata ikaw pit adahan igkis kehne pibetki.

Jesus piriyepkaw gidahankis madikte gihiyegavu

²⁰ — Pa, nah ka piriyepkaw gidahankiswonema neras nukannuhnivwi ay. Nah piriyepkaw hawata gidahankis neras ku pariye aysawnemenek timepnevwi giwn kis ignes kamaxwanek nuvitit hawata akiw.

²¹ Nah piriyepkaw adahan igkis madikte darihwak pawtak akak pahatwowa gihiyekemnikis hawata ku samah nah pikak pis, Pa, wis darihwekne pawtak akak pahatwowa uhiyekemni. Numawkan igkis hawata darihwak ukak hene kahadbe hiyeg kane Uhokriyanvuma amedgenevwi inin ignes ihpa ku pisnewa ku pariye nawahkisten.

²² Pa, kuwis pis ike nukiytani. Kuri nahme iki ini nukiytani givititkis nuhiyegavu kahadbe igkis pahavwiwa pawtak hawata ke wisbe.

²³ Nahme pahavwiwa gikakkis. Pisme pahavwiwa nukakuh. Nah iki gikiytanikis kahadbe igkis humaw inyewa pahavwiwa pawtak. Kahadbe hiyeg kane Uhokriyanvuma amedgenevwi inin igkis hiyapni hene, igkis hiyakni ku pisnewa nawahkisten, kahadbe igkis hiyakni ku pis batek gikakkis hawata ku samah pis batek nukakuh.

²⁴ Pa, nah muwaka nuhiyegavu ku pariye pikan nutuh nah muwaka igkis misakwa umun ku kiney wis misakwa kahadbe igkis hiyap ayge ku samah pis kiyathasan. Mmanawa pis batek nukakuh ku samah yumahte hawkri.

²⁵ Pa waditye, neras kane Uhokriyanvuma amedgene inin igkis ka hiyakpi. Heneme nah hiyaknap. Nerasme nuhiyegavu ku pariye pikan nutuh igkis hiyakni ku pisnewa nawahkisten.

²⁶ Nah kuwis akkap ku samah pihiyekemni gitkis. Aysawnemenek nah akkap gitkis akiwnek kahadbe igkis batekak pawtak hawata ku samah pis batek nukakuh. Kahadbe igkis iwenes nuhiyekemnitnene nuwntak.