Joawh 11 - Uhokri Gahegbetawni Nukune akak Sawmus

Lazaru gimiremni

¹ Aynte paytwempu Betaniya ayge pahavwi awayg kakahriye. Giw Lazaru. Ig misakwa ayge gukakkis gisamuvwi kiyavuno Mahi gukak kiyavuno Marta.

² Egu kiyavuno Mahi ku pariye imihatinano Kiyavwiye Jesus akak imihgi eg manpusa gikugku akak gusemnu. Ignewa gegni Lazaru ku pariye kakahrip.

³ Egkis gisamuvwi hiyapni hene, egkis wasavanew gimin Kiyavwiye Jesus. Egkis awna: — Kiyavwiye, ner pikagmada kakahrip.

⁴ Ig Kiyavwiye Jesus timapni hene, ig awna: — Kawki ininema karayt gisayreptenek. In adahan areketni Uhokri gikiytani. In adahan areketni nukiytani nah Uhokri gikamkayh.

⁵ Ig Kiyavwiye Jesus ka aynsima batek gukakkis Marta gukak Mahi gikak Lazaru.

⁶ Heneme ig ka atak gutkis nikwenewatma. Hiyawa ig tima Lazaru gak ku ig kakahrip, ignewa misekwe ayge adahan pina hawkri akiw.

⁷ Ayteke ig awna gitkis gikannuhnivwi: — Uyay atak givinwat Lazaru tahan avitit judeyamnaw.

⁸ Igkisme awna git: — Kiyavwiye, mmahki pis atere akiw? Neras uwewkistenwiy ayge kuhwekwa igkis aharit pivedkepten.

⁹ Igme kaytwa giwnkis: — Ka sam. Igkis ka hiya nusamanak. Kote danuhte ahawkanavrik adahan nah pisenwa nukehni Uhokri gannivwi. Niguh iki nutuh hawkri adahan nah kehne gibetki amadga inin hawata ku samah ig iki hawkri arit kamuw adahan igme uguhne hawkri mataytak adahan madikawku ler akak pina arawna (12). Ku aysaw ig pisenwa gannivwi metakwa ig pituk. Hiyeg hawata. Ku aysaw pahavwi wew puwivwak, ig ka ik adahan ig tuguh mmanawa kamuw abutni uguh gihina.

¹⁰ Heneme ku aysaw misanpewke, nikwe avim ini ik adahan ig tuguh mmanawa yuma kabutniki akiw adahan uguhne gihina.

¹¹ Pisenwa inakni giwn ig awna gitkis: — Ukagmadawiy Lazaru kuwis himeke. Heneme nah atere iwasavgi adahan nah giwadsetni.

¹² Usuh timapni hene, usuh awna git: — Kiyavwiye, mmahki pis giwadsepten? Kabay ig himak adahan ig makniw.

¹³ Heneme ig Kiyavwiye Jesus awna amin Lazaru gimiremni. Igkisme givewkankiskama ku ig awna amin ku ig mayekne.

¹⁴ Ig hiyapni hene, ig awna gitkis huwewe. Giwn: — Lazaru kuwis miyap.

¹⁵ Kibeynekata nah ka aygenema ku samah ig kakahrip. Aysawnemenek yis kamaxwate nuvitit akiw awaku ini. Heneme uyay atere git kuri.

¹⁶ Tome timapni hene, ig awna gitkis giyakivwi Kiyavwiye Jesus gikannuhnivwi, ig ku pariye usuh kanumgi Abes. Ig awna: — Uyay atak gihapti adahan wixwiy umahkiswe peyeke gikak. — Uyay. Usuh tivik atere.

Jesus kannikasene hiyeg ariw miyaka

¹⁷ Ig Kiyavwiye Jesus danuh atere ewka giwen Lazaru. Igme ayiva avuhpika paxnika hawkri gaw.

¹⁸ Ini paytwempu Betaniya in kennesa arimkat Jerusalém. Mpana kilomet arimkanit.

¹⁹ Inneki keh ka aynsima judeyenevwi giwewkistenkis jerusalémyenevwi atere gutkis kiyavuno Marta gukak kiyavuno Mahi. Igkis atere adahan gaydhetnikis adahan egkis ka kadni giharit gegnikis mpinevevyema.

²⁰ Eg kiyavuno Marta kinetni Kiyavwiye Jesus gak ku ig nehmnik. Eg timapni hene, eg pese gitivut eg patiptakig atere avigkut ahin. Egme kiyavuno Mahi misekwe paytrik.

²¹ Eg kiyavuno Marta patiptake Kiyavwiye Jesus atere, eg awna git: — Kiyavwiye, wake pis aybe amakohnokwabe, negni ka miyakam.

²² Heneme nah nudukwenewa kamaxwa pivitit. Nah hiyakni ku Kiyavwiye Uhokri iki pit madikte ku pariye payapni git.

²³ Igme awna gut: — Pegni kannikaw akiwnek.

²⁴ Egme kaytwa giwn: — Nah hiyak ku ig kannikaw akiwnek amaksemni hawkri ku aysaw madikte miyaravyenpu kannikaw.

²⁵ Igme awna gut: — Nahnewa kannikasene hiyeg. Nahnewa keh igkis aymuhwa. Ku pahavwi kamaxwevye nuvitit, hiyawa ig miyap heneme ig aymuhwanek gimun Uhokri adahan avanenekwa.

²⁶ Ku pahavwi kadeheten, ku ig kamaxwevye nuvitit, igi ka miyati. Ba pis ihpa inakni nuwnuh?

²⁷ Egme kiyavuno Marta kaytwa giwn: — Ihi, Kiyavwiye. Nah iha ku pis Cristo, pis Uhokri gikanyan adahan ukumaduketni. Pis Uhokri gikamkayh ku pariye danuhne atan amadgat inin. Igme awna gut: — Ka muwaka avis. Wani pisamu ayta numkat.

Mahi patiptaka Jesus

²⁸ Pisenwa inakni gunetnikis eg kiyavuno Marta tivik diyuhe gut gusamu kiyavuno Mahi. Eg danuh atere, eg humekwig mownye. Eg awna gut: — Mim. Ukannuhten kuwis danuh. Ig muwaka pis atak git.

²⁹ Eg kiyavuno Mahi timapni hene, eg kannikew kibehtenwa. Eg tivik gimkat Kiyavwiye Jesus.

³⁰ Igme Kiyavwiye Jesus kote avitma paytwempu. Ig gidukwenewa ku kiney kiyavuno Marta patiptakevgi.

³¹ Neras judeyenevwi giwewkistenkis ku pariye ayge paytrik adahan gaydhetnikis igkis hiyapni hene ku kiyavuno Mahi kannikew kibehtenwa eg tivik, igkis makeke guhavu butte. Gitkis eg tahan arit Lazaru gimew adahan eg tihano giharit.

³² Egme kiyavuno Mahi danuh atere git Kiyavwiye Jesus. Eg hiyavgi, eg paberetusaw gikimpuwit. Eg awna git: — Kiyavwiye, wake pis aybe amakohnokwabe, negni ka miyakam.

³³ Eg tihano. Neras guhaptiyevwi judeyenevwi giwewkistenkis igkis hawata tihenes. Ig Kiyavwiye Jesus hiyapni hene, ig katiw avit giyakni. Ig kahekanaw.

³⁴ Ig awna: — Kineyva yis sarayhpig? Igkisme kaytwa giwn: — Kiyavwiye, ba ayta iwasavgi. Aynte ig.

³⁵ Ig Kiyavwiye Jesus hiyapni hene, ig suke gikantak.

³⁶ Neras judeyenevwi giwewkistenkis hiyapni hene, igkis awna: — Ivegnamwi ku samah ig batek gikak.

³⁷ Igkisme gaytakis awna: — Ignewa ku pariye kehe pahavwi motviye hiyap. Mmah nikwe ig ka mpitha amekenemni Lazaru ariw miyaka?

Jesus kannikasa Lazaru

³⁸ Ayteke nikwe igkis danuh atere arit Lazaru gimew. Ayge ig Kiyavwiye Jesus kahekanaw akiw. In Lazaru gimew ariku tip amiyokni. Asabwatip egwata tip.

³⁹ Ayteke nikwe ig Kiyavwiye Jesus hiyapni hene, ig awna gitkis hiyeg: — Wokanay asabwat. Eg kiyavuno Marta ner miyaviye gisamu eg timapni hene, eg awna git: — Kiyavwiye, ka ba wokisni. Ig negni givit kuwis busip. Mmanawa paxnika hawkri gaw kuwis ig ayge ariku gimew.

⁴⁰ Igme awna gut: — Ka ba pis tima ku samah nah kuwis awna pit: “Ku pis kamaxwa nuvitit, nikwe Kiyavwiye Uhokri hiyapkis gikiytani pit”? Ihpanaba inakni nuwnuh.

⁴¹ Ayteke nikwe igkis woke gimew asabwat. Ig Kiyavwiye Jesus hiyapni hene, ig sarayh givegi inut. Ig awna: — Niguh, kibeyne pis timap nuviryepkawni.

⁴² Nah hiyakni ku pis avanenekwa timap nuviryepkawni. Heneme nah awna inakni hene gidahankis neras hiyeg tabirbetnene ay kahadbe igkis iha ku pisnewa ku pariye nawahkisten.

⁴³ Pisenwa gawnan inakni iwit, ig awna akak madikte gawaygi: — Lazaru, pesnaba arikutak pimew.

⁴⁴ Aynewa ig miyaviye kannikaw ig pese arikutak gimew. Ig wanamin akak kamis. Gihepka hawata awasap. Igme Kiyavwiye Jesus awna gitkis hiyeg: — Mawastanig ariw kamis adahan ig wew. Aynewa igkis mawastevgi. Igme tivik ta givinwat.

⁴⁵ Ka aynsima neras judeyenevwi giwewkistenkis guhaptiyevwi kiyavuno Mahi igkis hiyapni hene ku samah Kiyavwiye Jesus kannikasevgi, metakwa igkis kamaxwa givitit.

⁴⁶ Heneme gaytakis tivik gitkis neras farizewkis. Igkis danuh atere, igkis ekke gitkis ku ig Kiyavwiye Jesus kannikase Lazaru.

Jesus givetunyavu ahegbetevye ginetnikis adahan giwmasepten

⁴⁷ Ayteke nikwe ariwnteke ini neras muwveg kiyatyevwi kehe givahdukawnikis gikakkis neras farizewkis adahan igkis ahegbetenes ginetnikis. Igkis awna: — Mmah wixwiy keh? Ner awayg keh ka aynsima annut.

⁴⁸ Ku wixwiy ka mpithig, madikte hiyeg kamaxwa givititnek waditnevyenen. Igkis kehginek ig humaw gikivarakis. Ayge nikwe neras ukivarawiy romayenevwi igkis ikiynek ku ig uwiwhpitniwiy giwakutakis. Nawenetke gisuwtatavukis ayta patiptakevwiy. Nawenetke igkis xuwehe uwakutakwiy ini uwetriwiy ku kiney wixwiy kiyathene Kiyavwiye Uhokri. Nawenetke igkis xuwehe uhiyegavuwiy judeyenevwi uwakutakwiy. Henewatbaki igkis kinetihwa.

⁴⁹ Ayteke pahavwi awayg gaytakis ig ikene gihiyekemnikis atere. Giw Kayfas. Ignewa muwvegviyene gikivarakis adahan ini peheknene kamukri. Ig awna gitkis: — Yis ka hiyak ariknawnema.

⁵⁰ Yis ka hiyak ku pariye kabayte adahan wixwiy keh. Nah akkite yit ku pariye watekbeta uhawkanwiynek. Pugamawka ig Jesus umehpika. Kabayte pahavwiwa awayg miya gidahankis madikte hiyeg mpinekata madikte hiyeg miyarap. Henewatbaki ig amekene Kayfas awna.

⁵¹ Kawki gikehbetanma inakni iwit. Igwa Kiyavwiye Uhokri iki git inakni iwit. Ku samah ig muwvegviyene gikivarakis, ig humaw Uhokri gawneve adahan ekkene ku samah Kiyavwiye Jesus umahkiswa gidahankis madikte hiyeg judeyenevwi.

⁵² Ka gidahankiswonema judeyenevwi, heneme ig umahkiswa adahan madikte Kiyavwiye Uhokri gikamkayuvwi muwapunevye adahan igkis humaw pahavwiwa pawtak.

⁵³ Ariwntak ini hawkri neras judeyenevwi giwewkistenkis igkis ahegbetevye ginetnikis adahan giwmasepten Kiyavwiye Jesus.

⁵⁴ Ig Kiyavwiye Jesus hiyapni hene, ig ka wew gibetimpikis hiyeg ayge judeyamnaw akiw. Ig pese tahan avitit paha waxri kennesa arimkat amatap. Ayge ig misekwe avit paytwempu Efrayh payak gikakkis gikannuhnivwi.

⁵⁵ Ahawkanavrik kaba danuh adahan hiyeg judeyenevwi kehne ini fet adahan axne muwtohyan arih. Igkis axni adahan kiyene ku samah minikwak Kiyavwiye Uhokri umahkise muwtohyan gidukwenavrikkis amekenegben adahan ig giwiwhkiswitnikis giwakutakis hiyeg ejituyenevwi. Avit gifetrakis kavusa, ka aynsima hiyeg tivik avitit Jerusalém. Igkis atere adahan barewvithewnekis ariw givathawnikis.

⁵⁶ Avim ini neras muwveg kiyatyevwi gikakkis neras farizewkis igkis awna gitkis hiyeg: — Ku pahavwi yaytak hiyak ku kiney Jesus, akkanig wotuh. Igkis awna inakni adahan igkis gikamaykiswitni.

⁵⁷ Igkis hiyeg fetyavu hiyapni hene, igkis misekwe giwmpetni mataytak ariku Uhokri Givin. Igkis avuriwnamakis adahan wehepne gidawnhan atere. Ayge igkis kinetihwa pawtak gimin. Igkis awna: — Mmani yit? Mmah yivewkan ig danuh akiw?