Joawh 10 - Uhokri Gahegbetawni Nukune akak Sawmus

Abektey amin muwtoh gavuriwkegkis

¹ Ayteke ig Kiyavwiye Jesus awna gitkis hiyeg akiw. Giwn: — Nah akkite yit abektey. Ay paha avuriwket gidahankis nuhiyegavu kewa muwtohbe gavuriwkegkisbe. Pahatrawa ahin adahan pareket atere. Ku pahavwi parak arimkat gavuriwkegkis muwtoh heneme ku wis hiyap ig ka parak ku kiw pareket, ku ig parak ayamaw aharaptak iyar, ayge nikwe wis hiyakgi ku ig amepye. Wis hiyaknig ku ig ayta kidisne arikna ku pariye kane gidahanma. Henewatbakig.

² Pahavwime ku pariye parekwiye ku kiw pareket, igi muwtoh akivara.

³ Avuriwkevutne ku pariye ayge ariku muwtoh gavuriwkegkis, ig woka asabwat gidahannenwa igyewa muwtoh akivara. Asabrat woka, neras muwtoh ayge igkis timap gikuvimna gikivarakis. Igme humak givigvu. Ig kanum mpuse giwkis. Ig pekkisgikis tahan kabaywakat.

⁴ Pisenwa givesnikis ig wew pitati giwkis, igkisme makeke gihavu butte. Igkis kuruw gihavu mmanawa igkis kuwis hiyeke gikivarakis gikuvimna.

⁵ Gihavume nawenyewa hiyeg igkis ka wew mmanawa igkis ka hiyak gikuvimna. Ku aysaw igkis timap ner gikuvimna, igkis sigisbet giw. Henewatbaki ig Kiyavwiye Jesus awna.

Jesus pareket udahanwiy arit kabayka

⁶ Ig kehe abektey heneme igkis timepnevwi ka pukuha inakni giwn.

⁷ Ig hiyapni hene, ig awna gitkis akiw. Giwn: — Nah akkite yit huwewe. Nahnewa ke inibe ahinbe gidahankis muwtoh. Henewatbaki nah. Nahnewa pareket arikutwiye nuhiyegavu gavuriwkegkis. Nahwata pesket arimketwiye kabayka.

⁸ Ka aynsima kinisekevutnevwi kuwis danuh navitkig. Igkis ikawnamahkis ke wotbe igkis ekkenes Uhokri giwnbe. Bawa kawa. Nutuh igkis kewa amevwavyebe ku pariye aharitne giweptenkis nuvigvu. Heneme ku samah neras muwtoh ka iha nawenyewa hiyeg giwn, igkis nuhiyegavu kawnata iha giwnkis neras kinisekevutnevwi.

⁹ Nahnewa pareket arikutwiye nuhiyegavu gavuriwkegkis. Ku samah muwtoh parak ku kiw pareket adahan ayemwevye ariw mbayka, hawata neras ku pariye kamaxwenevwi nuvitit ignes isahptawnek ariw mbayka. Hawata akiw, ku samah muwtoh pes ku kiw pareket adahan ivegvene gimanakis, hawata neras ku pariye kamaxwenevwi nuvitit igkis utinek madikte ku pariye gimawkanitnenes.

¹⁰ Amevwavye ayta ininewa adahan gameptenkis muwtoh, giwmeptenkis, pisenwevye gihawkankis. Nahme nah ayta adahan nuhiyegavu kadeheten, adahan igkis igisavye akak kabayka.

Jesus ukivarawiy ku pariye kibeyne

¹¹ — Nah avuriw nuhiyegavu kabayntiwa kewa pahavwi muwtoh akivarabe kibeyne. Ig muwtoh akivara ku pariye kibeyne ig ahegbet adahan umahkiswa adahan gamnihtenkis givigvu.

Judeyenevwi giwewkistenkis kewa muwtoh gikavriwtenkisbe ku pariye kane kibeynevwima

¹² — Gaytakis hiyeg avuriw muwtoh heneme igkis ka gikivarakisma. Neras muwtoh ka gidahankisma, igkis he gikavriwtenkisnen adahan katiwnihka. Ayge nikwe ku pahavwi axtigi danuh atere, ig muwtoh gikavriwtenkis hiyapni hene, ig diyuhe giwkis muwtoh. Ig sigise giwkis. Ayge nikwe ig axtigi kamaxe muwtoh. Igkis madikte pekhe.

¹³ Igme muwtoh gikavriwtenkis ig sigise giwkis mmanawa ig ka batekyema gikakkis. Ig gikavuriwtenkis he aharitnenen gitiwninen. Nahme ka henema.

Jesus hiyakak gikakkis gihiyegavu

¹⁴ — Nahme nah kewa muwtoh akivarabe kibeyne. Nah hiyak madikte nuvigvuh kabayntiwa. Igkisme hiyakun hawata.

¹⁵ Usuh hiyakak pawtak kabayntiwa hawata ku samah nah hiyakak gikak Niguh. Nah umahkiswenek adahan gamnihtenkis.

¹⁶ Gaytakis nuvigvuh yumahte ariku gavuriwkegkis. Amawka nah iwavavevgikis atere. Igkis timap nukuvimnanek. Igkis kamaxwa nuvititnek. Ayge nikwe igkis humaw pahayruknene gikakkis nuvigvuh ay. Igkis madikte pahavwiwa gikivarakis.

¹⁷ Nah umahkiswenek nuwnteknewa adahan nah kannikaw akiwnek. Inneki keh Niguh batek nukakuh.

¹⁸ Wake adahan nah ka umahkiswa nuwnteknewatbe, yumakam hiyeg hiyak nuwmak. Heneme nahwa umahkiswa. Nah kadahan nannuh adahan nah umahkiswa. Nah kadahanwata nannuh adahan nah kannikaw akiw. Henewatbaki Niguh awna nutuh.

Hiyeg gihiyekemnikis gimin Jesus ibekhewbet akiw

¹⁹ Neras judeyenevwi giwewkistenkis timapni hene, gihiyekemnikis ibekhewbet akiw.

²⁰ Gaytakis awna: — Wavitye ay givit. Ig puwvup. Mmeneki yis timap giwn?

²¹ Gaytakisme kaytwa giwnkis: — Ig yuma wavitye ay givit. Wavitye ka awna ke inaknibe. Ig kawnata hiya aviyhak hiyeg motviye.

Judeyenevwi giwewkistenkis tukuhe Jesus

²² Ariwnteke ini, hawkri danuh adahan judeyenevwi fetya ayge Jerusalém adahan kiyene ku samah amekenegben barewha ini leglis kewye Uhokri Givin ariw nivathawni.

²³ Kuwis ahawkanavrik mwokweki. Ayge Uhokri Givin ig Kiyavwiye Jesus wewvari ayaranwew payt amun ini iwetrit kewye amekene Salomão giwetri.

²⁴ Neras judeyenevwi giwewkistenkis danuh atere git Kiyavwiye Jesus. Igkis pahadguhwe ganwat. Igkis awna git: — Ka muwaka ayamwa wowhu takuniptima akiw. Asa akkaw wotuh kurinewa baki pis igyewatma Cristo, Uhokri gikanyan adahan ukumaduketni.

²⁵ Igme kaytwa giwnkis: — Kuwis nah akkaw yit, heneme yis ka timepkere nuwnuh. Ini annut ku pariye nah keh giwntak Niguh ini akkan huwewe ku pariyene nah.

²⁶ Yisme ka iha nuwnuh mmanawa yis ka gaytakisma nuvigvuh ku kamin nah kinetihwa amakohnokwa.

²⁷ Ku pariye hiyeg igyewa nudahan ignes hiyak nukuvimna. Nahme hiyaknigkis. Igkisme batek wew nukakuh.

²⁸ Nah keh igkis aymuhwanek gimun Uhokri adahan avanenekwa. Igkis ka biyukti giw Uhokri. Yuma pahavwinema hiyeg hiya giwiwhkakkis ayteke nuwakutak.

²⁹ Niguh ku pariye gikeptenkis nutuh ig datte ariw madikte. Yuma pahavwinema hiyeg hiya awiwhka ariknawnema giwakutak Niguh.

³⁰ Nah gikak Niguh usuh pahavwiwa pawtak.

³¹ Ku aysaw neras judeyenevwi giwewkistenkis timep inakni iwit igkis kidise tip akiw adahan givedkepten.

³² Ig Kiyavwiye Jesus hiyapni hene, ig awna gitkis: — Kuwis nah keh ka aynsima annut, kibeyne annut giwntak Niguh. Pariyeva annut kavatra yis nuvedkepten?

³³ Igkisme kaytwa giwn: — Usuh ka padakpi avatrama kibeyne annut. Usuh padakpi avatra ku samah pis makuksebdihne Kiyavwiye Uhokri. Pis he awaygnen amadgaya inin, heneme pis ikawvari ke wotbe pis Uhokribe.

³⁴ Igme awna gitkis: — Yidahanwa yikumadukan awna: “Kiyavwiye Uhokri awna ku yis Uhokriyanvu.”

³⁵ Ini Uhokri gannasan in avanenekwa awna wadit. Amadgatak inakni gannasan ig awna ku neras ku pariye gikanyanvu adahan ignes ekkenes giwn ig awna ku igkisnewa Uhokriyanvu.

³⁶ Nah kaniyka nah awahkiska atan gavit Niguh adahan nah yamnihten. Mmah nikwe yis ikiy ku nah makuksene Uhokri awaku ku samah nah awna ku nah Uhokri gikamkayh?

³⁷ Ku yis ka hiyap nah keh annut giwntak Niguh, nikwe yis ka muwaka iha inakni nuwnuh.

³⁸ Heneme ku yis hiyap nah inyewa keh annut giwntak Niguh, ihpanabay ku nah igyewa gikamkayh. Hiyawa yis ka iha inakni nuwnuh ku nah gikamkayh, heneme nannuh akkin yit huwewe. Ayge nikwe yis hiyakun ku nah gikak Niguh usuh pahavwiwa pawtak.

³⁹ Igkis timapni hene, pahaynewat akiw igkis givewkankis gikamaxwitni, heneme ig pese giwkis akiw.

Jesus misakwa pahabakat Jordawh

⁴⁰ Ariwnteke ini ig Kiyavwiye Jesus tivik manuke egu warik Jordawh akiw. Ig danuh atere ku kiney Joawh Batista pitatye kaywene hiyeg. Ayge ig misekwe.

⁴¹ Ka aynsima hiyeg atere git. Igkis awna: — Amekenemni Joawh Batista ka keh annut, heneme ig awna inyewa inetit gimin ner awayg.

⁴² Ayge ka aynsima hiyeg ihevye giwn.