Gálatas 6 - Uhokri Gahegbetawni Nukune akak Sawmus

¹ Nukebyuvwi, yis ku pariye wewnevwi akak Kiyavwiye Uhokri Gitip gihiyekemni, ku yis hiyap pahavwi tarakse pahaye adahan, uyay iki gihiyekemni git akak madikte huwivraki ay pivit. Heneme avuriwnabay kahadbe yis ka kawihpikanma payaknema gikak mmanawa yis ka kabaytema giw.

² Ayavaknay hiyuhwa yiheyvi pawtak. Ku wixwiy keh hene, amun ini nikwe wixwiy mateke Cristo gikumadukan.

³ Mmanawa ku wis ikaw ke wotbe wis kabayte giw pahavwi, amun ini wis kinis uvitwa. Mmanawa wis ka ariknawnema.

⁴ Amawka ku wixwiy mpuse ivegvitawnekuye ba wixwiywatma wew wadit. Ayge nikwe ku pahavwi hiyap giwewni wadit, hiyawa ig batek. Heneme amawka ig ka batek awakuma ig hiyap pahavwi tarakse amunma ini ig ikaw kabaytema giw. Amawka ka innema keh ig batek.

⁵ Mmanawa amawka wis mpuse battukaw adahan uvit.

⁶ Hawata akiw amawka yis battukaw gidahan yikannuhten amin Kiyavwiye Uhokri giwn adahan yis kiyegi adahan yis kehne kabayka gikak.

Ku pariye umuthan abetit uhiyekemni innewa hiyan wot

⁷ Ka yi muwaka kinis yivit. Ig Kiyavwiye Uhokri hiyak ku pariye abet yihiyekemni, yis ka hiya gikinsak. Ku pariye umuthan abetit uhiyekemni innewa hiyan wot.

⁸ Ku wixwiy mutuh hiyakemniki amadgaya inin abetit uhiyekemniwiy, ini keh wixwiy biyuk giw Kiyavwiye Uhokri adahan avanenekwa. Heneme ku wixwiy mutuh Kiyavwiye Uhokri Gitip gihiyekemni abetit uhiyekemniwiy, ini keh wixwiy aymuhwa gimun Kiyavwiye Uhokri adahan avanenekwa.

Uyay ka muwaka ehwa adahan wixwiy keh kabayka

⁹ Uyay ka muwaka ehwa adahan wixwiy keh kabayka. Ku wixwiy ka ehwa nikak, aysawnemenek wixwiy uti ka aynsima kabaykanek.

¹⁰ Uyay keh kabayka gidahankis madikte hiyeg ku samah wixwiy hiya nikehka. Uyay pi mpiksawte keh kabayka gidahankis ukebyuvwiy Jesus gihiyegavu.

Nah batek kinetihwa aminnenwa ku samah Cristo umahkiswe nudukwenavrik

¹¹ Kuri nahwa Pol anniri inakni iwit buttitnene akakwa nuwakuh. Nenheve ka anniri inakni. Ivegnay ku samah nanhan nopsad anhaki.

¹² Neras yikannuhten kinisekevutnevwi igkis ikawnamahkis ke wotbe in ku pariye ukehni awkinenwa uvitiw ini keh wis danuh git Kiyavwiye Uhokri. Inneki keh igkis mpiksaptihpey adahan yis hiwhka yivit adahan areketni ku yis igyewa Kiyavwiye Uhokri gihiyegavu. Heneme igkis kehne hene ininewa kahadbe igkis ka hiyap mbeyne ay giwakukis neras judeyenevwi giwewkistenkis. Wake igkis ekkenebe ku ignewa Cristo keh wis danuh git Kiyavwiye Uhokri ku samah ig umahkiswe amin giyakni udukwenavrikwiy, nikwekam neras judeyenevwi giwewkistenkis hiyapkis mbeyne gitkiskam.

¹³ Igkis ikawnamahkis ke wotbe igkis ihpenevwibe ariwn amekene Moís gikumadukan bawa kawa. Henewa igkis hiwhka givitkis ku samah gikumadukan awna heneme igkis gidukweneswa ka iha gikumadukan madiktema. Araytaknen igkis iha. Heneme igkis muwaka yis hiwhka yivit awaku igkis batek kinetihwa amin ku samah igkis wages yihiyekemni ku samah igkis keh yis ahehpa gikehnikis awkinenwa givitiwkis.

¹⁴ Nahme ka batek kinetihwa amin ariknawnema awkinenwa uvitiw. Nah batek kinetihwa aminnenwa ku samah Ukivarawiy Jesus Cristo umahkiswe amin giyakni nudukwenavrik. Ku samah ig umahkiswe amin giyakni nudukwenavrik nah ke wotbe nah aygebe daddahka payak gikak. Kuri nah ke wotbe nah kuwis miyap ariw inin hawkri ahiyekemni. Inme inin hawkri ahiyekemni in ke wotbe in kuwis miyap nuwhu.

¹⁵ Nukebyuvwi, ku wis hiwhka uvit, in ka ariknawnema. Ku wis ka hiwhkama uvit, in kawnata ariknawnema. Heneme ini nukune uhiyekemni ininewa keh wis danuh git Kiyavwiye Uhokri.

¹⁶ Yis ku pariye wewnevwi akak ini nuhiyekemni, yis ku pariye igyewa amekene Abraawh gihiwhivwi giwtrik Kiyavwiye Uhokri, ig Kiyavwiye Uhokri kariswehse yiyakninek, ig amnihpeynek.

¹⁷ Kuri nah ka muwaka hiyeg kiyimwihun akiw amin arikna awkinenwa uvitiw. Mmanawa nahwa hiyap busukne adukwen nuvitiw awaku ku samah nah hiyapkiska mbeyne nutuh givatra Kiyavwiye Jesus. Nutuh ini nubuskana adukwen ininewa ku pariye arakak awkinenwa nuvitiw adahan ekkene ku nah Kiyavwiye Jesus gihiyega.

¹⁸ Nukebyuvwi, Ukivarawiy Jesus Cristo gabay yikaknek. Ameh.