Gálatas 5 - Uhokri Gahegbetawni Nukune akak Sawmus

¹ Ig Cristo keh wixwiy isahptaw adahan yuma pahavwinema amadgaya inin kumaduka uhiyekemniwiy akiw. Misakwanay avanenekwa akak inin ku samah wixwiy isahptaw. Uyay ka muwaka kumadukasaw arit ariknawnema hiyakemniki akiw.

Ka akakma ukehbetannenwatma wis humaw kibeyne giwtrik Uhokri

² Nah Pol ku pariye Uhokri giwatni awna yit. Ku yis hiwhkis yivit adahan yis ihpene ariwn amekene Moís gikumadukan, amun ini yis mpiksewne akak yikehbetannenwa adahan yis humaw kibeynevwi giwtrik Kiyavwiye Uhokri. Ku yis keh hene, nikwe yis ka kamaxwenema givitit Cristo adahan ignewa keh yis kibeyne giwtrik Kiyavwiye Uhokri.

³ Nah awna akiw yit ku pariye hiwhkavu yivit. Yis kuwis ihe abusku ariwn amekene Moís gikumadukan. Kuri nikwe amawka yis iha madikte.

⁴ Yis ku pariye ihpenevwi ariwn amekene Moís gikumadukan adahan ini keh yis kibeyne giwtrik Kiyavwiye Uhokri, yis mpiksewne humaw kibeynevwi akak yikehbetannenwa. Yis ka pahavwiwatma gikak Cristo nikwe. Yis kuwis isahkise ini ku samah Kiyavwiye Uhokri akak gabay ig keh wixwiy kewa kibeynevwibe he gikannenwa ku samah wixwiy pahavwiwa gikak Cristo.

⁵ Wixwiyme kamaxwa givitit Cristo. Ig Kiyavwiye Uhokri Gitip ay uvitwiy keh wixwiy iveg givitit Cristo adahan ignewa keh wixwiy ke kibeynevwibe giwtrik Kiyavwiye Uhokri.

⁶ Wixwiy pahavwiwa gikak Cristo Jesus. Ku wixwiy hiwhka uvitwiy ini ka ariknawnema. Ku wixwiy ka hiwhkama uvitwiy ini kawnata ariknawnema. Heneme ku wixwiy kamaxwa givitit Cristo Jesus he wixwiy amnihak ke igbe ininewa keh wixwiy kewa kibeynevwibe giwtrik Kiyavwiye Uhokri.

⁷ Nukebyuvwi, yis kuwis tiviknene gikak Kiyavwiye Uhokri kabayntiwa. Pariyeki hiyeg kinistevyi adahan yis ka wew akiw avigku ini gihiyekemni ku pariye inyewatnene?

⁸ Ka ignema Kiyavwiye Uhokri gannip. Ig uhumektenwiy gimkat adahanikwa wixwiy wewne nikak.

⁹ Hiyakemniki taraksevye in kewa bugut abusanbe. Ku wis wagesbeta aynesa bugut abusan abetit ka aynsima fahhin, ayge nikwe madikte in tukugvi. Ik adahan pahavwi hiyeg taraksevye taraksasa ka aynsima hiyeg.

¹⁰ Heneme nah iveg yimkat ku yis ka amava nawenyewatma hiyakemniki akiw. Nah hiyakni ku yis kamaxwene givitit Kiyavwiye Jesus. Igme ner ku pariye matekbetevye yihiyekemni, igwa Kiyavwiye Uhokri hiyak gikaknek.

Nah ka ekkenema ku amawka hiyeg hiwhka givitkis

¹¹ Nukebyuvwi, neras yikannuhten kinisekevutnevwi awna ku nah nudukwenewa ekkenenekwa ku amawka hiyeg hiwhka givitkis. Kawa. Nah ka akki hene. Wake nah ekkenebe hene, nikwekam neras judeyenevwi giwewkistenkis ka hiyapkis mbeyne nutuhkam. Heneme igkis kuviknene hiyapkisnene mbeyne nutuh. Igkis dagawne nutuh awaku ku samah nah ekkene ku ignewa Kiyavwiye Jesus keh wis danuh git Kiyavwiye Uhokri ku samah ig umahkiswe amin giyakni udukwenavrikwiy. Wake nah ekkenebe ku amawka hiyeg hiwhka givitkis hawata, nikwekam igkis ka dagawnawkam nutuh.

¹² Nahme ka batek ku samah igkis matekbetene yihiyekemni. Wani igkis higihwebdi ayteke yiw.

Kehnabay kabayka pawtak

¹³ Nukebyuvwi, Kiyavwiye Uhokri humekwewiy gimkat adahan yuma pahavwinema amadgaya inin kumaduka uhiyekemniwiy akiw. Heneme ka yi muwaka ikiy nikwe ku ka sam yis mpiksaw aharit yidahanwa kabayka ku samah yihiyekemni minikweknene. Kawa. Ihpaknay pawtak adahan yis kehne kabayka pawtak adahan yis amnihekne.

¹⁴ Mmanawa pahatwowa iwit ahiwe madikte amekene Moís gikumadukan. Inakni iwit awna: “Bateknaba gikakkis piyakivwi hiyeg hawata ku samah pis batek akak pivit.” Ku wixwiy keh hene, wixwiy kuwis mateke madikte amekene Moís gikumadukan.

¹⁵ Avuriwnabay yihiyekemni ba in kabayntiwatma. Ku yis ka kiyathak pawtak, ku yis awna paminak, amun ini nikwe yis ke wotbe yisweke umehekbet pawtak. Yis ikaw ke pahavwibe igwa ax givit.

Uhiyakemni amadgaya inin akehni suguhak akak Uhokri Gitip gikehni

¹⁶ Nah aya yit nukebyuvwi, isaksanabay Kiyavwiye Uhokri Gitip kumaduka yihiyekemni. Ku ig kumaduka yihiyekemni, nikwe yis ka keh yihiyekemni amadgaya inin abetkima akiw.

¹⁷ Mmanawa uhiyekemni amadgaya inin in suguhak akak Kiyavwiye Uhokri Gitip gihiyekemni. Igme Kiyavwiye Uhokri Gitip gihiyekemni in hawata suguhak akak uhiyekemni amadgaya inin. In kavetunsak pawtak. In uhiyekemni amadgaya inin in mpithaw adahan wis keh ku pariye umawkan gidahan Kiyavwiye Uhokri.

¹⁸ Heneme ku ig Kiyavwiye Uhokri Gitip huwitha uhiyekemniwiy, amun ini nikwe wixwiy keh Kiyavwiye Uhokri gibetki. Nikwe wixwiy ka muwaka mpiksaw adahan keh gibetki akak ukehbetannenwatma mmanawa kuwis wixwiy kehnene Kiyavwiye Uhokri gibetki.

¹⁹ Uhiyakemni amadgaya inin akehni hiyakan muwapuw. Nah akkite yit ku samah akehni. In keh wis mahayakemnihwa, powkemnihwa. In keh wis ivegminene uhiyekemni amin mbeyevye hiyakemniki. In keh wis meksatruvye.

²⁰ In keh wis kiyatha arikna amadgaya inin mpiy Kiyavwiye Uhokri. In keh wis hikuhak git ihamwi. In keh wis ka batekak. In keh wis iniyak. In keh wisweke atihpekbet. In keh wis dagawnhaw pawtak. In keh wis ikaw kabayte giw pahavwi. In keh wis ka ihpak pawtak. In keh uhiyekemni ibekhewbet.

²¹ In keh wis kaminwaptihak. In keh wis uwkihwa. In keh wis arewhevye. In uhiyekemni amadgaya inin in keh arakembet akebi ini mbayka. Kuri nah akkite yit akiw ku samah amakohnokwa nah akki yit. Hiyeg ku pariye kehne akebi ini mbayka ignes ka uti Uhokri gikumadukan.

²² Igme Kiyavwiye Uhokri Gitip ig iki uvititwiy nukunewa hiyakemniki akiw. Ig keh wis batekak pawtak. Ig keh wis batek unaktin. Ig keh uyakni karisaw. Ig keh wis kiyaknihwa pawtak. Ig keh wis huwiparevye. Ig keh wis amnihak pawtak. Ig keh wis ka kinis pahavwinema hiyeg.

²³ Ig keh wis tuwatevye. Ig keh wis avuriw uhiyekemni kabayntiwa. Yuma pahatnema kumadukaki suguh akebi ini hiyakemniki.

²⁴ Wixwiy ku pariye Cristo Jesus gihiyegavu, wixwiy ke wotbe wixwiy umahkis uhiyekemniwiy amadgaya inin. Nikwe wixwiy ka keh nibetki akiw. Wixwiy ka wew akak umirihwanwiy minikweknene akiw.

Wewnabay akak Uhokri Gitip gihiyekemni

²⁵ Ku samah ig Kiyavwiye Uhokri Gitip kuwis ike dehetniki ta uvititwiy, uyay isaksig adahan ig kumaduka uhiyekemniwiy.

²⁶ Uyay ka muwaka mavihpak pawtak. Mmanawa in keh wixwiy kiyimwihak pawtak, wixwiy atihpak pawtak.